嘆甜品

營業中

休息中

【北區】【嘆甜品】舊同事複姓哥搬咗去北區，搵佢食嘢就梗係喺返北區搵，唔使煩。知道粉嶺聯和墟新開咗間餐廳，有嘢食得嚟，甜品仲幾高質，就梗係夾埋佢去試。先試 $30 五隻嘅 「BBQ蜜糖雞翼」，肥美得嚟好味，得喎。跟住試埋 $32 嘅「港式懷舊咖喱三寶」，足料。佢有燒賣、魚蛋各四粒加四件豬皮，好夠食，複姓哥甚至覺得佢哋咖喱好正。跟住試 $49 嘅「小雞拼盤」，有炸雞軟骨、鹽酥雞粒、香脆玉米片雞塊，配合原味椒鹽味道，好邪惡。食咗啲小食已經飽飽哋，所以我哋就直接試佢哋嘅甜品，始終本身係甜品店。必試嘅係 $65 嘅「榛子朱古力石板街窩夫」，配球朱古力雪糕喺面，畫龍點睛，好好味，窩夫本身勁香，配搭埋啲材料真係好似食緊 Rocky Road 雪糕咁。跟住複姓哥試 $36 嘅「西瓜西米露」，係鮮西瓜汁底做，加 $6 加埋三色芋圓，成件事就完滿晒，好食嘅。我就試 $28 嘅「大小團圓」，有三粒芝麻湯圓加小丸子，清得嚟口感幾豐富。嘢飲方面，我試 $33 嘅「Oreo 曲奇奶昔」少甜少冰，佢試 $35 嘅「雪糕曲奇奶昔」，兩杯都係邪惡肥仔水，好飲。呢一餐又食嘢，又食甜品，又飲嘢，埋單 $314，差不多啦。。