影片
以上資料只供參考, 請與餐廳確認詳情
同朋友喺深水埗珠仔街工作完，順路喺附近覓食，於是試一試呢間茶餐廳。小店不大但算乾淨整理，二個人點左蝦醬通菜,椒鹽鮮魷以及店員姐姐推介嘅蜜餞腰果牛柳粒，每個小菜都附送白飯例湯。一上菜已有驚喜位，冇茶記求求其其炒埋一碟嘅感覺，老闆用炸米粉沙律菜伴碟，有酒樓小菜嘅質素。第二個驚喜位係蜜餞腰果牛柳粒，老闆用料大方，牛柳粒肉質軟滑非常多汁，唔係廉價牛肉，加上甜甜地的腰果，值得一讚。蝦醬通菜好惹味，蝦醬汁送飯一流，每餐必需要食菜嘅我，表示滿意。而椒鹽鮮魷則稍嫌粉漿厚左少少，食到最後有少少硬，建議要趁熱食，卜卜脆。整體都覺得滿意，兩個人食到好飽都係200蚊左右，下次再試埋招牌椰汁雞煲!
繼續閱讀
上兩個禮拜一個人係深水埗呢間港煮港食食飯，入到去覺得鋪面光線充足餐牌選擇多，晚市以小菜為主，店員落力推介椰子雞鍋，不過自己一個人又怕食唔晒，睇咗好耐之後點咗個福建炒飯，等咗約10分鐘左右，炒飯有蛋香福建炒飯係好多茶記嚟講會好少俾埋細嘅帶子粒呢度相對嚟講料夠多，味道都幾好,凍檸茶正常，雖然地方吾係好寬躺，但$48黎講價錢算係低食，宜家汝卅街真係多咗好多好多餐廳選擇，如果以茶記黎講個人覺得呢間值得推薦俾大家。
繼續閱讀
勁鍾意食茶記嘅我，成日去唔同餐廳食早餐同常餐。以早餐黎講，唔多餐廳有叉燒選擇，難得見到呢間有，即刻入去試下啦。其他係典型常餐選擇（$29），沙爹牛肉、五香肉丁、雪菜肉絲等等。朋友想清啲所以叫左彷鮑片火腿米加奄列，如果想加方飽或多士要加$1，加奶油豬要加$3，少左塊飽又點叫完整的常餐呢，所以我加左$1😉。我就叫叉燒麵，餐蛋加奶油豬。份量唔少，碗米粉大大碗，鮑片火腿都唔孤寒。加左$3嘅奶油豬就得半隻，似乎細左啲喎。但叉燒都唔錯，夠淋。符合茶記水準。食食下望望餐牌，原來佢仲有得揀香茅豬扒（$31），都係俾多$2啫，下次要再黎試先。
繼續閱讀
第一次係度寫食評，今日夜晚係深水埗買完嘢後8點半左右途經汝洲街呢間（港煮港食）因為見門口員工幾落力介紹，就一於試下啦，座位吾多，不過都算企理地下干淨，跟住坐低叫咗一款四川回鍋肉小菜套餐。上菜時間等約10分鐘，嚟到見到個賣相都幾吸引😍然後食落味道夠香😋有少少麻辣味，腩肉切得都夠薄，因為太厚會好鞋，不過本人略嫌青椒就吾夠辣，我諗可能吾係長嗰隻青椒，但整體都好，凍檸茶唔太甜，我鐘意，埋單連凍飲$70。下次會再嚟😃
繼續閱讀
今晚九點半左右放工想食個焗肉醬意粉， 就行咗去老爺冰室食，點知已關門。 咁係佢隔離就係呢間「港煮港食」，見佢燈火通明， 就問吓個職員有無焗肉醬意粉啦， 個職員就好積極咁入廚房問，然後回答仲有。咁我同家姐就入去試啦， 落左單之後，我就行左去西九龍中心㩒錢，㩒完返來都十點一二啦，點知個焗意仲未到，我哋又坐左陣， 就聽到個樓面問水吧個職員，「喂，個焗意仲未有呀？」之後水吧個職員先恍然大悟咁跑左去焗爐個邊拎個焗意出來比樓面。 咁個焗意無冇燶的。 但係 一抄， 料勁少， 薄薄一浸， 無茄味無芝士味。 啲意粉發脹晒，無味。都算， 食到尾 ， 見到然後， 同店員講左聲話佢哋唔係好衞生之後就買單走人雖然個疑似經理的人話唔收錢，叫我哋下次再來食，不過我哋有照比錢，始終佢哋咁夜都做埋我地生意，又真係有食到， 所以都係要比錢的不過要再來食就不了， 一來衞生欠佳， 二來食物質素都唔好 最後要提一提， 叫左杯凍奶茶少甜，但係都好甜， 而且茶味同奶味都欠奉
繼續閱讀