Tuen Mun Baguettes

營業中

休息中

事緣係睇到某個群組介紹之後第二日就衝咗去買，間舖頭唔算太難搵，唔熟路的話最多係圍住橦大廈兜一個圈就一定搵到。門面細細只有一個收銀櫃同埋一個細雪櫃，後面就已經係廚房，所以由落 order 到等攞嘢食都係企喺舖頭外面。等咗大約10分鐘就有得拎，由於呢間舖頭冇堂食，所以買完就急急腳咁返屋企開餐。今次買咗春卷撈檬 + 越式牛肉法包 + 凍越南咖啡，冇記錯好似加埋大概 $90 左右，真係好抵！食評：好好食，春卷有 4 大條，配埋個魚露好正，個魚露唔係一味勁酸，淡淡哋配埋檬粉食好夾。法包勁脆，肉量同配料夠多重有個醬都唔搶味，好好味😋 另外個越南咖啡都好好飲，冇記錯的話只係 $8

舊鋪已經聽人講好味，所以好想試一試。店舖距離何福堂輕鐵站兩分鐘路程，都幾方便。店面小小的，如果你想買完即刻食， 老闆會開張細枱俾你坐係出面慢慢食😇叫佐個越式雞肉法包，等佐3分鐘左右就有得拎喇！一打開就聞到超香既香茅味，個樣又好吸引！個包夠哂脆，又唔會脆到硬，非常好！肉餡好豐富，有越式泡菜、青瓜，仲有睇唔到但食到味既芫茜，仲有好似沙律醬+？鵝肝醬，同幾片扎肉，加埋沾有香茅碎既雞肉，口感好豐富！雞肉好嫩滑多汁，又唔會有雞皮同肥膏，加埋啲啲香茅既碎，好好食啊！但第一下食落去覺得雞肉味道有點淡，但食食下又覺得同埋配料一齊食，都好好味！食完又好夠飽！舊總而言，好味又足料又抵，老闆又nice!