The Best Burger

營業中

休息中

味道:唔差，但係水準黎講，漢堡係M記的質素，但係雞翼同雞塊仲難食過脆香雞翼同麥樂雞份量：漢堡入面塊扒同配菜係足料，扒夠大塊，食得飽肚，醬汁都充足，唯獨是雞翼劏開半隻當一隻賣。賣相：一般，冇讚冇彈。溫度：凍凍地，比人感覺擺左好耐。衛生：有時會唔帶手套掂個包？價格：喱個價位，同Mos burger有得揮，只不過下次我唔會食喱間。總結，建議大家如果有錢食好D，就唔好諗住揀食the best burger 啦~~

近排食得太多肉想食清啲，gogo mall 好多食野食呀😂😂😂周圍都充斥住香氣，所以最尾忍唔住都係叫咗個burger $39 ，有個蘑菇漢堡喎⋯⋯都算貼合我食清啲嘅主題啊！加咗$15要多份洋蔥圈買相OK味道一般，下次再試其他

Gogo Mall的食店我都試得七七八八， 只有數間我就試完全部，昨天午餐我試了The Best Burger。The Best Burger是Gogo Mall少數賣漢堡的食店，漢堡的種類頗多，小食不單只有薯條選擇，還有炸雞翼，炸雞塊和洋蔥圈。我挑了黑松露芝士牛肉漢堡配炸雞翼連凍蜜桃紅茶，黑松露芝士牛肉漢堡麵包用烤箱烤焗，所以滿香脆的。牛肉漢堡肉質扎實，不會鬆散，肉汁豐腴，不過黑松露芝士味不足，這方面略為扣分。至於炸雞翼炸得金黃，雞皮香脆，雞肉滑嫩，可是炸雞翼沒太多調味，吃來味道有點單調，若有椒鹽提升風味會較好。凍蜜桃紅茶同樣是淡淡的，既無桃香，亦無茶香，所有食物味道有待改善。

見到條友手套都唔帶整個包 芝士煙肉薯條以為會焗下 點知係求奇倒個芝士汁上去再放啲煙肉 食落係凍凍地 無乜味 個包就好普通 無乜seasoning 個餐成70蚊 我去隔離啲麵店or日本野食好過。。。

第二次黎Gogo Mall 嘅food court。第一次嚟嗰陣時漢堡包店冇開，今次終於等到喇。 有好多個漢堡包，眼花潦亂。最後叫咗個最basic嘅經典芝士漢堡，加配芝士肉醬薯條。 漢堡囉即叫即整，係open kitchen見住佢冇帶手套.......講返個漢堡包聲稱漢堡有150克，果然漢堡幾厚，厚過M 記安格斯漢堡。雖然厚，但係唔會煮到好乾，仲啖啖肉汁。食到好messy。至於薯條，真係令人好失望。第一，薯條冇薯味。第二，薯條唔脆。第三，只係加咗啲冇芝士味嘅芝士醬同好少肉醬。另外，亞媽叫咗黑醋雞堡。雞排炸得幾香口，可惜如果多d黑醋會更好味。總結而言，值得為咗漢堡黎再食。

Gogo mall 新裝修，轉咗型變咗一個熟食中心，上去醫下肚，行咗個圈，最終揀咗依間漢堡睇menu 幾吸引，叫咗個黑松露芝士漢堡，再加15蚊要埋炸洋蔥圈，等咗一陣，終於有得食個漢堡微暖，黑松露芝士唔夠濃味，認真扣分，最差係塊牛肉漢堡，d肉鬆散，一d都唔似漢堡排，毫無肉汁，完全唔juicy⋯⋯而個炸洋蔥圈，好似無調過味咁，而且d茄汁佢搵個好似洗潔精樽裝住，自己去擠，我覺得有d唔衛生，整睇嚟講，依餐64個大洋，完全唔值，永遠無下次，行返過對面食老麥仲好，起碼平d啦，真心係個伏

由於小弟本身對漢堡都幾有愛，咁岩公司附近就開左哩間野，當然要試下第一次去佢新張冇耐，見佢主打牛肉，於是就叫左個牛肉芝蛋煙肉漢堡外賣，拎到返去滿心歡喜咁打開盒，嗯，幾大份咁，食落，噢！！中哂伏。牛肉大係大，可能係因為只係焗冇煎過，冇油香又乾爭爭，一啲都唔juicy，最緊要係冇牛肉味，完全覺得只係食緊一舊漢堡扒型既物體，成個漢堡最好食就係啲芝士同煙肉喇，我當佢新開張個架步未熟識，所以就諗住比多個機會佢喇，可惜......可惜又係中伏，今次叫左個咩珍寶鱸魚扒漢堡，又話珍寶，唔覺珍寶左係邊，字眼問題都算喇，塊魚又係乾爭爭仲要冇幾多肉食，啲沙律菜多又有咩用丫，撇除哂佢之後仲細過個魚柳包，去用哩個價去隔離食可能仲好食過佢。認真冇下次！！

🔺TheBestBurgerGoGoMall 覓食round 2🤘🏻.黑松露芝士牛肉漢堡🍔漢堡扒食得出係手打 口感鬆化唔會太過實淨🐮 大大塊好厚身 煎得啱啱好🤘🏼配搭新鮮蔬菜 有蕃茄、生菜、洋蔥🥬🍅加上黑松露汁 juicy得黎口感好正😍😍總括黎講性價比好高👍🏻 好食過Shake Shack好多😂

叫左個芝士薯條。上面有D蕃茄肉醬, 味道OK,但薯條5夠熱, 5夠脆, 面頭係林左D 芝士呀,但完全無芝士味.....28蚊, 份量算正常 下次可能試番BURGER算..............

今次試下佢既熱狗叫咗個煙肉芝士熱狗熱狗腸夠長芝士醬都多味道都幾好食不過嫌芝士醬唔夠濃芝士味煙肉就普普通通唔算多份量但價錢合理所以都會再嚟食(食左兩啖先記得影相😂😂)

話說我同老公都幾鐘意食burger大部份出名既burger 店食過今日行過見到人地食呢間burger 幾得就忍唔住叫左個最basic 既黎食好似$4x外賣番到屋企雖然個包已經凍左不過中間個漢堡扒食完都覺得好味夠juicy 唔dry而我諗有差唔多一吋咁厚另外生菜亦生鮮雖然麵包都係平時既漢堡包不過都唔錯，有烤焗過先放埋一齊個sauce感覺就係平時m 記既sauce 😂😂不過不失啦總體而言都係唔錯既選擇，下次再食過~

同老公食咗一個經典牛堡及熱狗。經典牛堡d肉很多根，一啲都唔juicy. 咁嘅價錢同埋咁嘅質素真係一定唔會再幫襯...叫The Worst Burger 就差唔多。個熱狗係OK嘅...