Ristorante Pizzeria Da Vincenzo

營業中

休息中

一坐低就有斷人頭計嘅車厘茄小麵包，可以點橄欖油或者黑醋嚟食。意粉就揀咗意大利薯仔粉團，佢有幾個汁揀嘅，問waitress姐姐邊款最好味，佢就推薦我哋試下羅勒香蒜汁，佢話因為呢個汁係佢哋自家製嘅，又真係冇介紹錯，個汁好清新好香羅勒味，反而又冇乜蒜蓉味。佢個薯仔粉團煙煙韌韌幾好食。pizza我哋就揀咗最傳統嘅意大利辣肉腸pizza，呢度嘅pizza係長方形嘅，我估主要係要就個pizza焗爐，味道唔錯，唔好睇佢細細個其實食落就知都幾飽。我哋仲叫咗個羊架，肉質都幾嫩，好食。最後食埋甜品就非常滿足，佢個tiramisu好好食，另外嗰個唔記得咗叫乜嘢名嘅蛋糕味道都唔錯。

呢間意大利菜味道正宗，而且食材非常新鮮，我哋今晚四個人叫咗一個前菜一個Pizza同埋一碟意粉再加兩個甜品share，食到非常滿足，每人都唔使$200 ，簡直係超值。前菜揀咗意大利風乾火腿黑醋火箭菜沙律卷，火箭菜好新鮮，用風乾火腿包住配合得好好，佢個呷醋汁調返個鮮味出嚟。 pizza就揀咗留心水喉芝士火箭菜Pizza，唔小心又叫咗火箭菜添，pizza個餅底做得好好食，火箭菜同埋水牛芝士都正，個Pizza幾好，唔會好滯，食得出好新鮮嘅味道。 pasta就揀咗意大利雲吞配黑松露雜菌汁，佢個汁做得好好，好Creamy，個意大利雲吞都好好食，雲吞皮有彈性，另外邊嘅芝士粉好香。仲有佢免費送嘅小麵包味道都好好，點黑醋加橄欖油超正。

因為我哋得三個人，但係好多款pizza都想試，最後發現原來啲pizza係可以雙拼嘅，於是我哋就揀咗意大利辣肉腸pizza拼卡邦尼pizza，唔好睇佢咁薄，其實三個人要食曬都幾飽下。辣肉腸pizza就唔使多講啦，佢啲辣肉腸係幾好味嘅，至於個卡邦尼pizza我都係孤陋寡聞第一次見。有大大隻蛋喺上面個感覺就好似印尼炒飯咁樣，入面嘅配料主要就係煙肉同芝士，即係好似卡邦尼意粉咁樣不過就做咗pizza。另外仲叫咗一份芝士焗矮瓜，啲芝士好香，呢個小食都幾滯，如果多人叫嘅話值得一試。

今天來一趟高級的happy hour，唔飲啤酒要飲吓紅酒，仲要配埋好正嘅cheese platter同cold cut，過一個非常relax嘅下午。佢呢度嘅cheese platter一共有4款芝士，除咗隻blue cheese之外，其他嗰三款我都唔係好識分辨係乜嘢芝士，總之就係飲住紅酒食芝士好正啦。佢個blue cheese幾好食，個味道唔會太濃。cold cut就有意大利風乾火腿同埋辣肉腸，兩款都幾好食，又唔會好鹹。 happy hour紅酒白酒同意大利起泡酒free flow都幾正。

農曆新年吃了很多頓中菜之後要吃些其他東西，所以今天晚上便選了這一家大角咀的常滿西餐廳，點了一份烤羊架和喝了一杯Mojito。這份烤羊架物超所值，才$198竟然有4年件羊架，而伴在一旁的沙律菜亦新鮮精彩。羊架size大而且偏向厚身，肥瘦度適中，如太肥便讓人吃不消，但如果太瘦則會偏向韌，很難咬開。羊架內仍保留肉汁，煮得不錯。沙律菜是用新鮮菜自家製，入面的火箭菜和車厘茄都很新鮮。唯一挑剔是羊架配了芥辣而不是薄荷醬。這裡有非酒精的Mojito，點了一杯，味道不錯，薄荷葉很香。

呢一間大角咀的意大利小店真係有D料到，睇返D資料先知原來個大廚兼老闆係意大利人，唔怪得之佢D食物嘅味道真係與別不同。就以呢個茄汁意粉為例(佢個餸名好鬼長又唔記得影低所以唔記得咗寫唔番出黎)，個樣好似平平無奇，但係一食落去就知道個分別。首先佢係用真嘅番茄去整個汁，而唔係用D罐頭野甚至係D工業用茄糕去開個汁，其次就係佢個意粉，食落有咬口，同外間食到嘅一般意大利粉好唔同，佢係有彈性嘅。跟住就係D香料，有屠次感，唔係就咁得個酸字就係番茄意粉。當然佢D肉碎嘅質素都係唔錯嘅。是日餐湯係西蘭花湯，又係自家製而唔係飲罐頭湯，真係非常有誠意。

幾年前幫襯過嗰時每道菜式都好好味，今次特登再返大角咀幫襯，平日晚上只有我哋一台客，但啲味道就比以往失準🍆焗芝士千層茄子拉絲芝士，但個餡味道偏鹹🍝蕃茄牛肉寬意粉面頭灑咗好多芝士，但意粉味淡🍕意大利風乾火腿薄餅+ 辣肉腸薄餅Pizza 最好食，餅底係薄脆款，食落好煙靭，

今日因為得兩個人幫襯，所以只可以喺意大利粉同Pizza之間二選一，費事食唔晒做大嘥鬼。選擇困難症嘅我哋最後就揀咗一個好傳統嘅Pizza：意大利辣肉腸pizza。呢度嘅Pizza係長方形而唔係圓形嘅，估計都係為咗就個Pizza爐，不過乜嘢形狀都唔緊要，最緊要好味道。佢個Pizza嘅size都幾大，兩個人食到爆肚先食得晒，因為每人有四件。佢啲辣肉腸配上芝士好惹味，佢係薄批嚟嘅，所以都夠脆口。雖然已經食到好飽，但係都想試埋佢個Tiramisu，幾好食，成餐嘅性價比都高，值得推介俾大家。

今日Lunch Time食意大利菜，小小的餐廳(大約5-6張枱，好似係2張4人枱，其他的都是2人枱)，不過卻有了一個精彩的體驗。坐低即送上小麵包一件，個樣似蛋糕仔，不過其實係車尼茄小麵包，仲跟埋橄欖油同黑醋比你點黎食。前菜二選一，可以揀雜菜沙律或者是日餐湯，個雜菜沙律非常有誠意，D雜菜夠晒新鮮，落埋少少黑醋落去好正。個Main Course都有好多款式，我就揀咗廚師推介嗰個Menu上面的意粉，叫做特大長通粉(Paccheri)配意大利豬肉腸、茄子及芝士(Provolone)。個特大長通粉都算厚身，煙韌彈牙，D芝士好香，係用真芝士而唔係求其落D芝士粉，佢個汁好惹味，整體味道偏濃，所以食完就好飽。包埋餐飲，$108再加一，都幾抵食。

中秋節正日，同事黎呢度食西餐慶祝中秋節🥮環境氣氛好有小店feel, 坐位唔多，最好預先訂位。冷氣稍為唔夠凍。午餐包埋前菜可以揀湯或沙律菜。今日個西蘭花餐湯唔錯，唔會太杰撻撻。同事話呢度出名食pizza 🍕，果然有驚喜👍.新鮮出爐嘅pizza係唔同啲，叫咗個辣肉腸pizza，辣肉腸稍為辣咗啲，但係Pizza皮脆，芝士濃味。 個Pizza仲要好大個，份量十足。另外試咗個手工pasta 🍝，麵條彈口，不過醬汁不過不失。最後加埋個甜品Tiramisu，完美😂

真心覺得呢一間位於大角咀嘅意大利菜真係非常出色，而且價錢亦都係好相宜。呢一個流心水牛芝士火箭菜pizza係一個味道非常清新嘅pizza，水牛芝士配火箭菜就好似食沙律咁樣，而佢嘅pizza係薄批，所以好香脆，如果唔鍾意好滯嘅感覺就推介可以試下呢一個pizza。呢個雜錦芝士拼盤作為頭盤嚟講絕對係非常豐富，佢有四種芝士，cold cut就有Parma Ham同Salami腸，真係應該要飲紅酒。我哋冇飲紅酒反而飲咗呢隻礦泉水，個樽好靚。

$108一個set lunch，對於大角咀呢個區黎講，如果就咁睇價錢係偏高嘅，不過如果以一個正宗嘅意大利餐廳去睇，其實真係物超所值，佢呢度lunch嘅價錢係畀晚市價錢差唔多平一半，但係份量同質素都一樣冇減。沙律同埋餐湯之間我選擇咗沙律，因為今日嘅餐湯係南瓜湯，唔係好啱我胃口，如果沙律一到嘅時候真係有驚喜喎，一來好大碟，二來啲沙律菜好新鮮，溝埋黑醋同埋橄欖油好正。主菜就試咗一個名為番茄醬扭扭粉配意大利豬肉腸、青豆、牛肝菌同埋雜菌嘅意粉。佢個扭扭粉好有彈性，而佢落咗個番茄醬令到個意大利豬肉腸唔會好滯好漏，另外佢個牛肝菌同埋雜菌都好香。另外碟面嘅芝士粉都好正，啱晒我呢D Cheese Lover。之後我加咗$15要咗個tiramisu，呢度個tiramisu做得幾好幾滑，有tiramisu做甜品就梗係要飲返杯咖啡啦，杯咖啡仲係免費嘅餐飲。

羅勒醬長通粉，意大利文叫做Penne Al Pesto，係一個口味非常清新嘅意大利粉。佢嘅羅勒醬加入咗橄欖油所以唔會好杰好滯，仲有松籽伴碟。佢嘅芝士粉鋪滿碟邊，好似落雪咁樣好靚，個芝士粉好香，估計係用新鮮芝士刨出嚟，而唔係用一啲現成嘅芝士粉沈落去。佢個長通粉都做得出色，少少煙韌兼且好有彈性，唔會煮到淋pat pat。set lunch價$98再加一，包埋麵包、前菜可以揀沙律或者餐湯，仲有杯餐飲跟埋畀你，真係又抵食又好食。

今日食晏去咗一間好正嘅意大利餐廳，店面雖然細得幾張枱但係味道真係好正宗而且份量大到嚇死人，性價比極高。我哋其中一個餐就係叫咗呢一個特色薄餅包Floded Pizza，名副其實佢就係一個Pizza然後將佢對接。成隻巨型餃子咁樣，我見侍應攞出嚟嘅時候隔離枱嗰啲人都望住，因為佢個size真係好浮誇。入面嘅餡料已平時pizza嗰啲為主，即係有芝士同ham在家其他配料，我個人認為起碼要三個人以上先食得曬呢一個一人餐，不過真係好正。佢呢度嘅set lunch仲包餐湯或者沙律、餐包同埋餐飲，真係好抵食。

今日試了一個很精彩的意大利芝士拼盤，4款芝士都唔錯，份量亦非常滿意。如果無認錯，4款芝士應該分別係Mozzarella莫薩里拉芝士、Parmigiano-Reggiano巴馬臣芝士、Pecorino意大利羊芝士同埋Provolone普羅沃洛內芝士，我自己就最鍾意隻羊芝士，又香又軟。除咗芝士之外，佢D Cold Cut都幾好食，少少鹹香味但係又唔會好鹹，另外值得一讚係佢嘅份量，真係好足，唔似好多地方咁款式唔多又每樣得兩三片都要百幾蚊，呢度只係$150左右，真心抵食。我地無飲wine反而好健康咁叫咗支意大利Sparkling Water黎飲，成件事就好似去咗意大利食Tea咁樣。