CRAVINGS

營業中

休息中

今日嚟咗油麻地呢一間中東餐廳，試咗佢哋嘅燒烤拼盤，有驚喜，因為佢嘅燒烤竟然唔會燒到乾爭爭，而且有炭香味，掂。佢哋仲非常細心，因為我哋其中一個朋友唔食羊，餐廳方面為咗等佢唔好唔小心中招，所以就將有羊嘅部份（其實都係羊架同埋免治羊肉卷）分開放落另一隻碟度。另外佢哋仲有一啲秘製醬汁係用嚟食燒烤嘅，店員有解釋每隻醬係乜嘢味，都係一啲印度式嘅醬汁。食燒烤梗係要飲啤酒啦，呢度有隻德國啤酒幾好飲，係麥啤嚟嘅，小麥味好香，而且一啲都唔苦，好易入口。

呢間係一間由印度人主理嘅餐廳，所以啲菜式特別地道。下午茶時間去到，見到隔離檯碟野幾有趣，問咗估計係老闆嘅男士，原來碟野叫印度灌湯脆餅Pani Puri，於是就叫咗黎試。個樣似煎堆仔，不過作佢塊皮係脆而唔係煙煙韌韌嘅，上面開窿，入面放咗啲蔬菜粒。食嘅時候配合呢支汁，係凍嘅，其實就係灌湯嘅湯。唧入去個脆球入面食，味道好清爽，老闆話係一道夏天好受歡迎嘅小食，我覺得個味道都ok。我仲叫咗杯印度拉茶。間餐廳其實唔係好大，老闆同d侍應都好friendly。佢原來仲有keaba食，下次試吓先。食咗$76，都唔錯。

油麻地搵食search Openrice見到呢間餐廳D Pizza好似好正，所以就行咗去幫襯，其實都近油麻地地鐵站，不過都唔係好識路，要兜咗一陣先搵到，佢喺個街市仔埋便嘅。佢個Pizza雖然無菠蘿，不過又未必係正宗意大利Style，不過材料都幾豐富，而且味道真係無得彈，佢係即叫即製嘅所以熱辣辣嘅，食落去個餅底都係好脆好好味好新鮮好鬆化嘅感覺，同埋佢有幾款自家醬每一款我都覺得幾好味，我最鍾意白色嗰隻，有啲似沙律嘅感覺。佢個Pizza超級拉絲芝士，所以食得好happy。

下午茶時間一心諗住黎encore個尼泊爾餃子(Momos)，點知我個Friend又話想試吓印度薯仔脆餅(Dahi Puri)，咁咪叫黎試吓law，點知又真係幾好食woo。印度薯仔脆餅(Dahi Puri)就係咁嘅樣，佢算係冷盤黎嘅，外層好似係一塊好薄好薄嘅蛋球，入面就包住其他野，主要嘅汁醬好有少少似開稀咗嘅Sour Cream咁，有少少印度香料喺面，再加少少類似媽咪麵，食落都幾清爽。侍應姐姐話係好地道嘅印度小吃，真係唔錯，有驚喜。尼泊爾餃子(Momos)就梗係要食啦，食過幾間印度或者尼泊爾餐廳嘅Momos，都係覺得呢間最好食，我鍾意佢個餃皮厚薄適中，同入面D餡料嘅份量夠晒Balance，另外就係佢入面D餡料嘅調味都調得唔錯。Mango Lassi又係我嘅至愛，另一杯係我個Friend嘅Coconut Lassi，佢話都幾好飲。

今晚食中東菜，點了個羊肉中東卷餅(Kebea)，打直一大卷肉切下切下出黎，再用中東Style薄餅包住黎食。呢度嘅羊肉唔羶，另外佢入面有好多蔬菜，切成絲嘅，咬落去好新鮮好清爽。唔係睇佢只係一件卷餅切開兩半，其實食晒之後都飽。佢有三隻汁比你唧落去個Kebea度食，不過因為我本身食野都唔會食好濃味，所以無落到D醬汁。飲品就叫咗芒果印度乳酪Mango Lassi，襯返中東菜都幾唔錯，因為唔記得叫少甜，所以杯野黎嘅時侯有少少擔心會太甜，不過好彩杯野嘅甜度都OK。

招牌薄餅House of Cravings係一個以雞肉為主嘅pizza，其他配料仲有燈籠椒、紅洋蔥、黑橄欖同綠橄欖等等，就係呢啲配料令到成個pizza呀唔會好滯，另外我覺得呢個pizza最勁嘅地方就係佢個餅皮，做得好好食，我忍唔住問老闆有乜嘢秘訣，佢話最重要就係個名底係即叫即整，唔會整定然後擠入雪櫃，等客人落order嘅時候先至攞返出嚟焗，佢話功夫雖然係多啲，同埋如果忙起上嚟就廚房會好大鑊，但係為咗個味道所以佢都堅持要咁樣做。另外佢哋仲有三隻自家製嘅醬畀你唧落個pizza度食，佢有講過畀我聽啲名但係已經唔記得曬，只係知道綠色嗰個有啲似青醬，紅色嗰個唧出嚟其實係橙色嘅，少少辣，白色嗰個有啲似沙律醬，不過佢就稀少少。

見到呢一間中東fusion餐廳係由南亞裔人主理，心裏面覺得味道應該幾正宗，所以就入去幫襯，試下呢度廚師嘅造詣。因為唔知食乜嘢好所以就叫店員推介，佢就建議我試下呢個咖哩羊膝，主食可以揀印度米飯或者印度尊薄餅Naan Bread，我揀咗Naan Bread因為用黎點咖哩汁應該幾正。佢個羊膝做得入味，d羊肉都算嫩，而且一啲都唔韌。個架呢汁用咗好多香料秘製，所以除咗辣之外仲有好多其他嘅香味，果然非常正宗，呢度菜侍應真係冇介紹錯。

真係估佢唔到，一間中東餐廳仔竟然有一個咁出色嘅Pizza，有驚喜的一個晚上。佢呢度嘅Pizza有好幾款，我地就揀咗呢個叫Fully Loaded，中文名叫「啖啖肉」，顧名思義就係好有質感嘅肉Pizza。入面有雞肉、牛肉同羊肉，不過當然就無豬肉，因為呢一間係清真餐廳黎嘅。除咗肉之外，個Pizza仲有D洋蔥青椒等唔配料，成件事好Full好豐盛，我地兩個人好辛苦先至食得晒唔嘥野。呢杯叫Mango Lassi，芒果印度乳洛，味道唔錯，少少醱，幾開胃，夏天啱飲呢D飲品。

聽老闆講近排唔知係咪天氣熱無乜客，今日星期六下午1點都係得我一枱，所以想寫篇食評支持下小店環境乾淨企理，中東菜黎講好難得。每次想食中東菜/南亞菜，搵到嗰啲成日燈光昏暗，裝修簡陋，啲職員好似淨係想做同鄉生意咁，最後放棄唔敢入。呢間雖然迫夾啲，同店員都要講英文，至少感覺係想做普通人生意，入去難度低啲。食物黎講中東菜正常發揮，即叫即做，黎到熱辣辣幾好食😋烤雞肉飯，雞肉同菜都幾多，配埋啲醬食正👍🏻食哂😋仲叫咗個羊肉卷，包得好滿好實，食完好滿足老闆同店員都好親切友善，唔會因為生意差就黑口黑面☺️舖頭同大馬路有段距離，感覺好難有街客，希望多啲人會去食，乾淨企理嘅中東菜唔多，唔想佢地咁快執❤️

咁大個人都真係好似第一次食尼泊爾餃子momo，亦都係第一次見到呢一款嘢食，佢可以揀蒸或者炸，諗住可以香口啲。其實我覺得佢有少少似上海小籠包同埋嘅混合體，外型就似小籠包，不過因為佢塊皮比較厚，呢一點就似鍋貼塊皮。佢入面嘅餡主要係雞肉同埋一啲蔬菜粒，雖然已經叫咗唔辣，但係食落去都覺得有少少辣，點埋佢個專用汁，就係想入面啡啡哋色嗰碟，效果唔錯，比起就咁食嘅味道更加好。$68一份，如果一個人食都咪話唔飽肚。

Butter Chicken印度式牛油雞配印度手抓餅：手抓餅點汁特別美味，用手食更加滋味，呢個律牛油雞係唔辣嘅，個汁落咗好多種印度香料，食落去好有層次感。佢嘅手抓餅熱辣辣，所以味道特別好。Falafel Warp鷹咀豆中東卷，雖然是以蔬菜類為主，不過入口就有一種材料豐富嘅感覺，d蔬菜絲（如蘿蔔、青瓜、椰菜等）都幾新鮮。呢個印度薯仔湯味道就略嫌有點濃，帶少少辣，不過佢d蔥花就幾香。飲品叫咗印度拉茶，雖然係凍嘅，但係都冇影響到佢嘅香味。

呢一間真係可以話係隱藏喺油麻地的中東美食，主要係食Kebea的，另外仲有烤雞同Pizza，今次就主要試咗佢地嘅Kebea。烤羊肉Kebea除咗烤羊肉之外其實仲有好多配料，主要都係D蔬菜類，例如蘿蔔絲、青瓜絲，另外仲有一D豆類，食落都幾fresh，唔會好多肉但係又夠飽，D烤羊肉一D都唔羶。另一款Kebea就揀咗個素食的，鷹咀豆(Falafel)Kebea，其實食唔出D鷹咀豆係乜野味，只係知道入面有豆蓉，都幾好食。食Kebea有秘製醬汁，我又係唔識分邊隻打邊隻，只知道隻隻都酸酸辣辣咁啦，我最鍾意綠色嗰隻。佢呢度都有幾多唔同款啤酒，仲有生啤添。

Green Monday來個素食午餐，喺呢一間中東style小餐廳叫咗一份鷹嘴豆warp卷set lunch，估唔到個warp卷都幾精彩。雖然佢叫做鷹嘴豆warp卷，實際上佢入面有好多唔同嘅蔬菜切成絲，例如蘿蔔絲生菜絲青瓜絲等等，佢啲菜都幾新鮮，配埋佢嗰個少少酸少少辣嘅汁都真係幾開胃，啱晒夏天食。呢幅相睇得再清楚啲，材料真係豐富，同埋都真係飽嘅。佢個set lunch包一個飲品，我就叫咗masala tea印度奶茶，唔會好甜，味道唔錯。

估唔到呢一間喺油麻地嘅餐廳仔有咁多啤酒選擇，除咗喜力同埋隔離嗰支德國啤酒之外，仲有印度單啤酒同來自尼泊爾嘅手工啤。喜力梗係好飲啦，不過呢支息德國麥啤都好掂。齋飲啤酒搞唔掂嘅，所以叫咗個小食餸吓酒，見佢有個尼泊爾餸餃子好似幾有趣所以就叫咗黎試吓，我哋叫咗一半蒸一半煎(其實係炸嘅)，呢個係細份，有10粒。呢個尼泊爾雞肉餃子係雞肉餡，配後面嗰個麻辣醬都幾正，佢個醬無想像之中咁辣，帶少少酸，配餃子算係唔錯。

意想不到喺呢個油麻地嘅小街市旁邊有一間質素唔錯嘅中東食物餐廳，除咗咖哩之外仲有我最喜愛嘅土耳其捲肉kebea，我朋友就叫咗咖哩牛肉配印度薄餅，而我就叫咗一份鷹嘴豆土耳其捲餅，我偷咗我朋友個咖哩牛肉同埋印度薄餅試咗一下，味道都幾好。lunch time時間幫襯有碗例湯，我覺得應該叫佢做印度style羅宋湯，入面啲配料都幾新鮮不過就好似䶢咗少少。佢個咖哩牛肉不過香料十足，印度薄餅熱辣辣，一邊閃咖哩汁一邊食好正。鷹嘴豆kebea係一個唔錯嘅素食選擇，有少少辣，鷹嘴豆同入面啲雜菜mix 得幾好食。飲品就叫咗印度拉茶同埋齋啡，每人70蚊又唔貴喎。間餐廳唔係好多位，不過估唔到相對偏僻嘅地方都坐得滿，我估都係因為好食所以吸引到啲人來幫襯。