Cafe Whale

去咗一間Cafe無飲到咖啡反而食咗個Burger同埋炸魚薯條係乜野玩法？呢間西灣河太安樓第三街嘅Cafe Whale就係咁嘅玩法。佢D Burger都真係有好多choice，花多眼亂，而我最後就揀咗墨魚漢堡，比想像之中更好食。入面舊墨魚真係好高質素，首先夠厚身，咬落去非常有彈性，而且入面D墨魚有粗有幼，食到入面有D大粒墨魚，整體感覺非常好。跟餐要咗特色薯條，揀咗火炙明太子薯條，性價比高，估唔到明太子同薯條咁夾。店長話今日有白鱔，仲話可遇不可求，Last一份，於是為食嘅我當然唔會拒絕啦。個白鱔炸魚薯條真係好有特色，中西Fusion，白鱔一咬落去爆油，好好Feel，佢個豆豉醬都好食，同白鱔好夾。…查看更多

上次食過呢間漢堡包店之後念念不忘，今日有機會喺西灣河收工，於是唔理三七二十一就決定去幫襯多一次，今次就揀咗余均益辣醬雞扒漢堡，件雞扒超級大塊，直頭大過個包凸曬出嚟，個余均益辣醬其實又唔係好辣，同個雞扒嘅味道都幾夾。加45蚊轉餐跟特色薯條一份，佢嘅特色薯條都有好多款式可以揀，包括有香辣、麻辣、大地魚、腐乳同埋我今次揀嘅火炙明太子，超級正，搵啲薯條撩啲明太子嚟食好有feel，火炙咗之後似乎更好食。飲品就再加錢揀咗佢嘅咖啡，要咗ice Americano，竟然係用咖啡冰，成件事高級曬。…查看更多

老遠來到西灣河，就係為咗食佢，呢一間小cafe最精彩嘅burger就係脆脆支竹羊肉漢堡，真係同粵菜嘅羊腩煲有得輝，最搞野係入面嗰塊炸脆咗嘅支竹，真係卜卜脆，再加埋個腐乳醬，真心佩服老闆嘅無限創意，而且仲要咁好食。呢度另一樣我鍾意食嘅就係呢個鮮魚湯烏冬，當中最正就係個個魚湯，真材實料，用新鮮魚慢慢煲嘅味道真係飲得出嚟。個烏冬仲跟一小碟話梅蕃茄仔，都幾好食。最後就係呢個可遇不可求嘅白鱔炸魚薯條，聽講因工序多，所以要老闆有雅興先至會整，啲魚油超香，真係好食。…查看更多

呢個蘋果木煙燻黃立倉炸魚薯條真係不得了，使英姐姐拎出嚟嘅時候有個透明罩罩住啲煙，煙霧瀰漫咁樣樣，原來就係用蘋果木做煙燻嘅效果，一揭開個蓋啲煙就消失曬，真係聞到蘋果味，好過癮好有儀式咁，下次再叫呢個真係要拍片先得。劍黃立倉都幾大快，而且都算厚身，魚味香濃。呢碗雞白湯立鱗燒烏冬又係好掂，最勁就係連啲魚鱗都炸到一塊一塊直立式，好過癮，使用姐姐仲提我哋啲魚鱗係可以食埋落肚㗎，因為已經炸到脆卜卜，魚固然好食，而佢嘅雞白湯都真係真材實料，唔係罐頭雞湯，飲得出用雞自己慢慢淆嗰種鮮味，配埋個鹵水溫泉蛋超正。，…查看更多

騸牯牛漢堡果然係正野，個size都幾大，真係要㩒偏少少先咬得到。佢嘅肉都幾juicy，牛肉味都夠香，咬落去有粗有幼嘅肉質感，應該係人手打而唔係用攪拌機打先做得到呢個效果。加$45跟餐揀咗特色薯條，幾款之中要咗火炙明太子，超正，搵火槍燒過嘅明太子特別香。呢個係魚仲炸魚薯條，老闆用新鮮魚整嘅，所以魚仲嘅肉質係同嗰啲雪藏魚柳有好大分別，呢樣野真係無得呃。最後仲叫咗碗鮮魚湯，魚味超香濃，打咗泡所以飲嘅時候好豐盈同creamy，入面仲有昆布，好掂。…查看更多

這家餐廳的burger、Fish and chips及魚湯烏冬均為必食名物，今日我們一行二人一次過滿足這三個願望。 burger點了脆脆枝竹羊漢堡，落單時order切一半令吃的時候更方便，羊肉漢堡扒Juicy非常，中間夾着的脆脆知足是畫龍點睛之作，果然名不虛傳，是放在手上的枝竹羊腩煲。 Fish and chips真是花多眼亂，最後選了白鱔Fish and chips，白鱔肉厚且魚油豐盈，入口魚香滿溢，配上西式的自家製豆豉醬，是上上之作。魚湯烏冬驚為天人，魚湯是真材實料的自家製魚湯，一殼便知道，那魚的鮮味證明是用新鮮魚熬製的湯，便不了人，那附送的小蕃茄也好吃，樣樣都是精心炮製。…查看更多

這間店的漢堡包很出名，因為唔想食牛肉，又唔想食魚柳包，所以就揀咗余均益辣椒醬巨型雞扒漢堡，塊雞扒真係好大，炸粉好薄，炸得夠香脆，配余均益醬帶少少辣又真係幾好食。大食漢堡包點可以無薯仔條呢？所呢度嘅薯條有大同細size，我揀咗大嘅，幾好食，都幾有薯仔味。聽講呢度嘅魚湯烏冬都好出名，原來可以就咁叫一碗魚湯，所以又叫埋，呢個魚湯真心正，好濃嘅魚味，真係真材實料。最後加錢飲咖啡，作佢杯latte都唔錯，咖啡豆都幾香。…查看更多

前陣子見到林海峰都嚟食，即刻跟風，叫咗佢哋signature 「手打騸牯牛漢堡」，每一啖都係極度享受之中。比起西式漢堡包餐廳嘅burger🍔，呢度嘅size係屬於細D嘅，但係講個質素，絕對有過之而無不及👍🏻。大大塊騸古牛好Juicy，煮到啱啱好，完全冇韌嘅感覺，配埋芝士🧀同埋生菜🥬，令到你唔會有太油膩嘅感覺。另外都試咗佢哋嘅「蘋果木煙燻黃立倉」，好香嘅煙熏味，除咗魚🐠，連啲薯條同埋菜都有濃濃嘅煙熏味，幾特別。…查看更多

呢間西灣河太安樓嘅餐廳真係好搞嘢，叫做cafe，雖然都有咖啡飲而且杯咖啡都唔錯嘅，不過佢最出名係食漢堡包，依家仲有埋好多款炸魚薯條，我同個friend今日就選擇食炸魚薯條。煙燻蘋果木黃立倉又睇得又打得，侍應拎過嚟嗰陣時候有個罩，入面就煙霧嚟慢，係蘋果木味嘅煙將個黃立倉做緊煙燻處理，一揭開天天都幾香蘋果味，黃立倉係自家製嘅，咬落去食到魚嘅紋理，絕對唔係雪藏魚嗰種感覺。另一款炸魚薯條就要咗懵仔魚仲，唔好睇佢得六粒，其實懵仔魚啲魚油都幾勁，食曬都幾飽。飲品唔揀咖啡揀咗紙包裝茶。…查看更多

一落風球即刻去呢間西灣河burger店朝聖，漢堡包真係食得多，來來去去都係安格斯牛肉、和牛漢堡、羊肉漢堡、有或者用巨型魚柳整嘅魚柳包，好少好似呢一間burger店咁樣又有gimmick又好食，上次嚟試咗支竹羊肉漢堡真係驚為天人，今日再嚟，試返個比較平淡啲嘅墨魚漢堡，同樣有驚喜。佢個墨魚漢堡入面嘅墨魚餅係做咗吉列嘅，比較厚身，咬落去除咗墨魚滑之外，仲食得到一粒粒嘅墨魚粒，所以都幾有層次咁。因為佢係一間cafe，所以叫咗杯latte，佢啲咖啡都幾好飲。…查看更多

墨魚漢堡真心好食，見墨魚滑打出嚟嘅墨魚餅，超級厚身，入面仲有粗粒墨魚，所以咬落去係有少少層次感，同一般墨魚餅好唔同，呢個好好食。加$45轉套餐就可以揀埋呢個火炙明太子薯條，味道好Rich，明太子配薯條真心正。湯烏冬又係好好食好精彩，最正係個魚湯，一飲落去就知講得少，似乎係用新鮮魚自己煲嘅魚湯，所以飲落去feel到有好多條魚嘅精華喺晒入面，簡簡單單加上魚蛋魚片頭，已經好好食。佢個魚湯烏冬仲會配一個小食，呢個似乎係八爪魚沙律，少少Wasabi味，好fresh。兩個餐都跟埋飲品，我就覺得幾抵食。…查看更多

今日嚟西灣河太安樓搵咗一間可以好好地坐嘅餐廳食lunch而唔係好似平時咁樣掃街。作為一間Cafe當然要飲咖啡啦，一杯ice Americano再加一杯熱latte，杯ice Americano係用咖啡波波冰， 而杯latte竟然有拉花，都幾有誠意。呢個炸魚薯條用嘅魚係懵仔魚，我將啲薯條轉晒做沙律菜健康啲，啲魚好新鮮好好食，特別鍾意佢嗰個秘製醬汁，綠色嗰啲係香蔥汁，真係食得到蔥花嘅味道。漢堡包就揀咗脆脆枝竹羊漢堡，呢個就係傳說中拎得上手嘅羊腩煲，羊肉漢堡好多地方都有得食，不過配埋枝竹真係絕無僅有。…查看更多

一間絕對值得encore嘅餐廳經常有新菜式，為我帶來無限驚喜，今次就試咗每日限量10碗嘅雞白湯立鱗燒烏冬，真係做得好出色。先講個雞白湯，雖然冇出邊食到咁Creamy，不過佢嘅雞味真係好香濃，唔搵新鮮雞殼，仲要係大量咁樣去咬個湯好難煲得出呢一種香度同埋濃度，難得嘅就係唔會好多雞油。至於粒立鱗燒同呢度魚類出品一樣有一貫嘅出色水準，除咗個樣好有型（因為啲魚鱗炸到企晒起身）之外，連啲魚鱗脆卜卜可以吞埋落肚嗰下正。…查看更多

好多人話呢間Cafe嘅魚柳包好正，所以慕名而來，嚟到先知原來佢魚柳包都有三款魚，分別係沙巴龍躉、白鱔同埋馬友，我就揀咗最Classic嘅沙巴龍躉漢堡。佢個龍躉柳都幾厚身，同埋佢嗰個蔥油他他醬幾好味，真係食得出有蔥嘅味道，另外佢入面啲沙律菜都幾新鮮幾爽脆。漢堡包加$25就可以有埋飲品同埋炸雞鎚兩件，呢個雞鎚都幾好食，質素唔錯。飲品就可以喺雪櫃任揀，入面除咗有一般嘅汽水之外，仲有好多紙包飲品選擇，而我就揀咗麥精維他奶，因為好似好耐冇飲過。…查看更多

呢間西灣河太安樓餐廳個名叫做Cafe，不過入面一啲都唔Cafe，就好似今日我哋食咗一個日式丼飯，再加啲西式小食同埋fusion小食，味道唔錯，而且可能喺太安樓入面呢一間係坐得最舒服嘅一間餐廳。呢個係和風牛肉丼，佢啲飯真係用日本珍珠米，牛肉切薄片而且一啲都唔肥，加埋就溫泉蛋，喺食之前拮穿佢兼撈勻佢超正。佢有個小食跟埋，應該係話梅蕃茄仔，酸酸地幾開胃幾好食。佢哋嘅丼飯係跟埋嘢飲嘅，雪櫃入面任揀。佢啲小食都幾正，所以叫咗三款，分別係吉列炸蠔、麻辣薯條同埋火炙明太子薯條，三樣都好食，最邪惡一定就係火炙明太子薯條啦，但係佢個明太子同啲薯條嘅味道真係好夾，成完先再減肥啦。…查看更多