麻吉灶咖

當日係星期五，行到咁上下見到呢間餐廳，見8點半都仲咁多人排，以為佢會收11點，之後就拎咗飛。等到9點10分左右入座先知佢收10點，已經last order了，我哋嗱嗱臨叫咗個二人餐。推介二人餐 $358/二人用夜市小食+廚師推介+飯麵主食+清新果茶🔹澎湖古早紫菜魷魚煎呢個紫菜魷魚煎必叫，超好食😋煙煙韌韌，魷魚又多，咬落去勁有口感🔹墨汁鹽酥雞配三文魚子及辣味蛋黃醬 +$18鹽酥雞似係台灣食嗰種，但加咗三文魚子有啲唔夾，淨係食鹽酥雞同點蛋黃醬係可以嘅，而且份量都好多🔹蕃茄雜錦豚肉鍋 +$28呢個豚肉鍋份量勁多，有食極都未完嘅菜同丸，豚肉份量都唔少，加錢都值得嘅，如果你想食啲菜平衡返的話🤓🔹基隆港蝦醬蝦球鍋飯呢個飯幾濃味下，同時佢都好油😣但唔差嘅，有幾隻蝦，還可以🔹鮮鳳梨綠茶🔹鮮柳橙綠茶鳳梨印象中好似冇柳橙咁甜，味道唔太記得了，因為食到一半已經勁趕，某店員已經話茶水姐姐要收工，飲咗幾啖就停咗手😟不過值得一提嘅係銅鑼灣分店某店員係會趕客，未到10點成枱野食而且全部都仲食緊，佢係夠膽過嚟問收得未，洗碗同茶水姐姐要收工🤯我嗰吓係呆咗，心諗仲食緊喎🤯Anyway，食物質素都中上，但服務態度真係有待改善🥺…查看更多

今晚同朋友去麻吉點咗三樣嘢黎share，食到超滿足，全部都幾好食！先講個大甲芋泥芝士肉鬆蛋餅，入面夾滿芋泥同芝士，拉絲拉到癲，仲要落咗好多肉鬆，香甜鹹香一齊爆出嚟，一啖落去已經想喊，超邪惡但又超正，食完一條都唔膩。跟住係因為近排降溫想食d暖野所以點既臭臭鍋，個銅鍋上台好有氣氛。湯底係微微辣嘅泡菜湯，酸辣得黎唔會太勁，啱晒我哋。材料超多：臭豆腐夠臭夠入味、鴨血軟淋、肥牛片薄薄的幾秒就熟、豬大腸洗得乾淨無臭、貢丸花枝丸都彈牙，仲有金針菇娃娃菜吸晒湯，一碗食完暖笠笠。碗牛肉麵揀左半筋半肉，湯底清澈但牛味好香，肉同牛筋都煮得軟腍入味，麵條彈牙，份量又夠，食完有飽足感。整體嚟講，麻吉呢度環境舒服，燈光暖，服務員好快手，三樣嘢都好啱香港人口味。…查看更多

見到麻吉出左秋冬限定menu，今次就揀左兩款試，幾有特色又暖胃，大推！先食左芋泥鴨鬆九層塔春卷。春卷皮炸得薄脆，金黃香口，咬落去唔會太油。入面鴨鬆炒得入味唔柴，配上綿密嘅芋泥，甜鹹平衡得好正，配埋九層塔好有台灣味。仲有少少拉絲芝士，熱食時拉得耐，口感豐富但唔搶戲，整體幾好食，幾啱做開胃小食。主食係台灣腸油渣香飯配溫泉蛋。鐵鍋上枱有火燒住個鍋幾熱辣辣，飯用豬油撈得香口但唔會太膩，油渣脆卜卜，配埋腊腸粒、酸菜、紅蔥酥，味道好夠鑊氣。溫泉蛋撥開，蛋汁流出同飯一拌，變得滑溜又creamy，暖笠笠好啱冬天食，份量都幾多，食到飽飽哋。飲品飲咗草莓沙冰芝士奶蓋。上面芝士奶蓋打得綿密，帶少少鹹香，下面係草莓沙冰，酸甜清新，兩層口感一齊飲落去幾夾，草莓味夠真，唔太甜，飲完好解膩。…查看更多

最近想食台灣野，見到希慎有間就同fd係附近行街順便去食。墨汁鹽酥雞炸得超脆口，雞肉仲好嫩。配埋三文魚籽同辣味蛋黃醬個口感好豐富。牛肉麵湯底帶甜，牛腩同牛筋炆得腍，溏心蛋流心，酸菜紅蘿蔔份量多，麵彈牙，一碗食完飲晒好暖胃。個滷肉飯肥瘦均勻，滷汁香濃甜鹹，撈落飯超香口，飯粒唔太濕，一碗好快掃晒。d甜品都好好食。麻薯豆乳芒果雪糕好解膩，芒果新鮮，配埋雪糕好夾；紫米珍珠芋泥好足料，食完好滿足。整體都幾唔錯，幾啱同朋友約埋黎。見到佢仲有好多款小吃，之後有機會一定再黎試。…查看更多

見餐廳門口放左二人餐餐牌，一點幾都仲有位，價錢還好就入去試試。餐廳環境尚可，地點係方便的，喺希慎3樓，上菜速度都可以。但食物質素真係有D失望，特別係嗰個墨汁鹽酥雞，雞塊肉質一般，嗰碟入邊D肉塊好多都係細細碎，頗為失望！蕃茄雜錦豚肉鍋無論係味道同用料都一般，湯底平平無奇，呢兩款食物仲要另外再加錢🫩😞真係覺得CP值唔係好高。反而成餐入邊尚算滿意嘅，竟然係甜品，甜粟米忌廉窩夫。結論都係性價比唔係好高。…查看更多