鴻發牛什魚蛋專家

營業中

休息中

早兩日自己一個入大埔做嘢，冇乜胃口打算搵碗粉麵食就算數！走咗去出名多好嘢食嘅大埔墟熟食市場，上到去見到有好多間都有粉麵食，於是乎搵左呢一間「鴻發」，座位唔算太多，中午時段差不多坐爆哂。上openrice爬文後決定order一碗牛腩魚片河！首先，30幾蚊一碗粉有咁嘅份量真係無得輸，河粉夠多之餘連牛腩同魚片都唔少，仲送你一塊炸魚皮㖭！魚片都算彈牙兼有魚味，牛腩亦夠香、軟硬度適中。河粉唔算好滑，但都算過得去啦！本來成碗粉都唔錯，但係敗筆就係個湯底嗰度，真心講，真係超級重味精！食完之後我去七仔買左成支蒸餾水，隊晒之後仍然覺得好口渴!熟食中心果度仲有好多其他選擇，下次再去嘅時候，我諗我都係試吓其他囉！

每次來到大埔街市醫肚，都自不然會行去依間，好似食極都唔厭。（雖然熟食中心的豬扒麵，雲吞撈麵都更出名，而且還有很多食檔都未試過，但最後都係照舊😅）鴻發長期都咁爆，我通常假日先來，所以每次場面都好墟冚。今日都算唔好彩，叫粉麵的客人都要等好耐...落單之後都等了25分鐘先有得食😑（如果肚餓的話，就火到離埋）雖然很多時都要等好耐，但都仍然會選擇鴻發。因為真係好抵食，餸和麵的份量都比得好大方（米粉通常都大碗到食唔晒），另附上的魚片簡直係like爆！不過今日的牛筋米粉，好似有點兒參次，米粉好碎，牛筋唔好食。另外，還叫了咸菜豬肚湯飯，入面有三隻雞腳，用好多胡椒。儘管今天兩個都不是很好吃，但三十三四蚊，連凍飲，今時今日仲想點！希望下次再來時，會好一點吧！中途都叫了一個中淨牛腩外賣...不過都等了25分鐘先有

大埔必食🐂腩粉其實距離街市不遠有一間較為出名嘅清湯腩但有上過黎嘅就會覺得冇必要排隊吃嗰間份量真的不少的+$5 可轉崩沙腩❗️抵‼️可惜冇得轉其他 其實我鍾意爽腩多d😝還有招牌的三寶米（腩，肚，筋）真係好大碗 我都唔係次次食得曬😅不得不提 佢個唔辣嘅辣醬其實係辣的，只係辣度比較低因為我食唔到太辣，呢個辣啱曬我蒜香十足 非常惹味我們也叫了一碗淨魚蛋唔係我食過之中最好食但也不過不失幸運地比左3塊片頭我😻✌🏻

平時成日都同男朋友呢大埔墟街市熟食中心二樓上面嘅鴻發牛什魚蛋專家度食牛腩麵 呢度嘅清湯腩真係無敵 牛腩炆得軟熟唔in,無渣之餘又重牛肉味 仲要加送兩塊炸魚皮 都只係26蚊 可惜今日晏晝食得太多嘢 食唔落個面 就食多士啦 黎呢到食奶油多都係第一次 怕肥嘅男朋友就嗌咗個沾醬多 多士餐都係$16 仲有野飲送 凍飲唔洗加錢添！ 叫咗杯凍奶茶同凍檸茶 茶味夠之餘又唔溉澀口 仲有好多塊檸檬 不過就偏甜 如果唔鍾意太甜嘅朋友就記住嗌小甜喇！ 個多士黎到 個包烘得好脆又夠乾身但係食落又唔會太un口 仲好貼心咁似開兩邊梯形狀 奶油份量啱啱好唔會過甜又好有牛油既咸香 沾醬多嘅花生醬好豐富但係食落又有果醬嘅微酸 正！

牛腩麵$26，下午茶來食個麵，的確十分抵食，因為牛腩份量很多，而且仲附送脆魚皮。牛腩有10件左右，比其他的麵檔多一倍以上，牛味重又香，肉質鬆化易咬，湯頭清而不膩，幼麵彈牙爽口，不會有太重鹼水味。朋友點魚蛋粗麵，同樣價錢，白魚蛋十分彈牙，魚味突出，而且睇得出加了胡椒粉去整魚蛋，所以不會腥，同樣送脆魚皮，多份脆口感，真係抵心夾大件。粉麵有套餐，可揀飲品或菜，可以點了腐乳通菜一齊食，腐乳味道就不太好，跟平常食的有點不同，幸好通菜新鮮爽口，淨食通菜就好。其實係街市食檔，而家環境已經好好，又乾淨左又有冷氣，價錢吸引又份量多。

原本欽記個間無開，求期揀左一個話自己係專家的"鴻發粉麵"。魚蛋河一碗有四粒魚蛋，兩塊魚片，一大塊魚片頭，仲有兩塊魚皮售 $25 算幾抵！魚皮幾新鮮，可惜得兩塊，另叫的話要$25。魚蛋幾彈牙，又唔太咸，感覺無咩味精幾好味，不過魚味無乜。平時係沙田一碗食完都唔算太飽，可能今次多魚蛋，食完超飽！總括說不差 👍🏻 但未算好好食！

大埔街市出名好食，次次去親都係幫襯哩間，必食牛腩牛筋河，牛腩半肥半瘦啱啱好，一向唔食肥膏既我，食落一啲都唔肥膩，配埋自製辣椒油好野味，宜家加左價，不果都係平價之選！

做下孝順女，放假陪阿媽入大埔買腐皮支竹，回程阿媽話食個下午茶先走，甘就順路經過街市食啦。其實大埔墟街市真係有好多檔揀，不過阿媽係「淡口味」人，唔駛旨意叫佢陪我食炸豬扒麵，行過鴻發，見到佢熱騰騰端出一盤炸魚片頭出黎，甘就吸引左我地坐低食。見到新鮮出爐炸魚片頭揀左個魚旦米線食，估唔到碗麵係有炸魚皮跟埋，唔係魚皮碎，係正常size，仲要唔孤寒，眼見起碼4-5大塊，平時都起碼十幾廿蚊碟，阿媽果碗仲要有幾塊係勁長勁大塊，果到值幾蚊架勒~ 而且塊塊都仲好脆口，唔係放得太耐，等到林晒果種。至於魚片頭，入口都幾彈牙，無乜皂水/勁重胡椒味，即係D魚都新鮮，唔駛用皂水/胡椒味去令魚旦彈牙同辟腥味。要彈既就係個米線，麵身好削，碎碎濕濕好難夾......不過廿幾蚊個下午茶，仲包埋飲品，重點係隨麵附送炸魚皮數大塊，CP值好高

星期日熟食中心超多人，真係插針都插唔入。行過「鴻發」同侍應靚姐眼神相遇，即俾個靚位我地，甘好招呼，梗係要幫襯。隻肥野話唔食魚蛋，甘就陪佢食清湯腩。「清湯腩河」：湯底比較淡身 (其實好似無咩味)，河粉唔算滑，亦唔算薄，但都唔算厚身，算合格有餘。牛腩份量超級多，肥肉均稱，有濃郁牛肉味，肉「淋」無渣，係切得比較大舊粗獷左少少，如果薄返d d一啖一口就更very good。塊魚皮雖脆，但好咸。以$26呢個價錢同質素黎講，係幾抵食。

份量大,魚蛋實,牛什多.食很飽都算得上這個價錢.但湯底實在實在太差,很重味精,但又不及公仔麵的味精,很難食..一路食一路講點解我會幫襯依間店...牛什個湯地都完全無平時個種牛味,同魚蛋粉同一個湯地.,好難食...腸很肥又有髒,..真係唔明點解依間野有人推荐...最可惜是這碗份量太多,又不想浪費吃到飽了不能吃其他...雖然想食的無開,但食完都對大埔街市很失望....

大埔墟街市真係有寳呢檔d牛腩河好抵食又好大碗食完絕對唔會餓25蚊一碗河 目測有成10大舊牛腩!係全。牛。腩!!!(平時食開27蚊得5舊腩左右 仲要有一兩舊係牛筋)仲要係切成大長塊 唔係小丁方肉質鬆化 肥位入口溶化清湯上冇加腩汁食完唔會太口渴驚喜係留俾冇走青即小孩!topping蔥碎加左生蒜蓉仲有炸魚片一大枚大満足

大埔墟新街市，有好多食肆，今次又係黎番食佢既牛腩魚旦河，每次黎心裡面都會諗黎諗去，牛雜定牛腩，一或放棄食魚旦呢，其實係可以三拼，但我怕自己食唔哂，一碗雙拼，牛腩有大約7~9件，三粒魚旦，河粉既份量都好足，仲附送2~3塊炸魚皮，作為一個午餐都夠飽，我鍾意牛腩有少少肥，怕肥既落單時可以叫佢走肥，牛肺除左夠淋，好入味，好香，其他地方食過無數咁多種牛腩，佢既味道同口感係獨特而且好食。

星期六去大埔墟街市買餸～先上熟食中心搵食是常識吧上次平日食東記，個豬排唔係即炸好失望，今次本來想試試欽記，不過收咗？(下午三點幾）咁見鴻發多人就坐底。兩個人叫咗魚旦河，牛什魚旦河，跟通菜同檸水（31+38，餐每碗包菜/飲品）魚旦河先到，個樣好對辨。三粒魚旦加三塊厚切魚片，份量夠大，重跟炸魚皮。先試一淡湯底，簡單普通一點，不過䶢度適中，不算太味精。魚片咬落爽彈幼細，厚切更添囗感，惜魚味一般。魚旦外表好raw，但食落魚味超濃，好實在，胡椒粉味恰到好處，正wow炸魚皮⋯厚咗，炸過頭，放湯入面好耐都極硬，失色雙拼份量依然十足，好多其他地方只會得兩粒丸，幾件什。自己比較鐘意湯底加色之後濃一點。牛腸夠肥，牛肚有成六件，爽，牛肺牛膀夠入味。跟餐通菜比出面十五蚊油菜更大碗值得一提，辣椒油不算辣不過好香口，亦冇過鹹既通病，我足足食咗一湯匙哈哈今時今日，重有咁實在足料既魚旦牛汁，好難得。下次會買走d魚旦，$80/ 斤

連續數天的復活節假期天氣正好，於是便和M先生去大埔海濱逛逛，可是到了大埔墟後決心血來潮要踏單車，所以就馬上問了地頭蟲朋友那裡解決午餐最快又飽肚。 地頭蟲朋友介紹去新街市內吃粉麵，果然一到熟食中心內看到很多人點魚旦粉牛雜麵，我們走了一圈最後選擇了鴻發。街市內座無虛席，老闆很快便安排了我們搭枱，我們點了一碗牛腩魚旦粗加油菜($41)，和牛三寶河加一杯凍奶茶($37) ；由於街市內的廚房很細小，所以等了近十五分鐘才煮好一碗。牛腩的份量也不算少，有六、七塊，個人認為偏肥了一點，但肉質嫩不會有乾柴柴有渣；魚旦共有三粒，比普遍街邊買到的還要大粒，而且彈牙爽口，調味適中不會過份地咸；相反粗麵則要加少許醋來調味，因為實在是淡而無味，並有少許鹼水味，但也算是性價比高，抵食！  牛三寶河也獲得M先生的盛讚(他喊著肚餓所以來不及拍照...:yuk ，牛筋很淋有彈性不會煙韌十足、牛腩同樣出色肥瘦適中、相比之下覺牛肚略為平庸；整碗麵份量十足，足以填飽M先生的嘴巴和肚子。很可笑的是油菜近乎我們都吃完了才有，而且菜心好像洗得不清，有一兩條還夾雜了細沙，但油菜沒有熟油只存蠔油，較大多餐廳吃的健康。

曾經深愛已無情曾經滄海難為水曾經 — 原來會令人如此欷歔！不過我的兩個曾經，卻不盡一樣！牛腩麵這種地道麵食，曾經是我遠行回港後最想吃的；而應有盡有的大埔街市，曾經是我的 Dream Market，想不到這兩個不太相關的曾經竟可以連在一起！「鴻發」位於大埔墟街市的熟食中心內，以前沒有發現他，大抵近來愈來愈對牛腩、魚蛋粉麵有著牽掛，所以當天第一眼便看上了「鴻發」！不過當天光顧的客人多得爆滿，等了一會，在職員再三安排下，都未能即時找到座位，最後旁邊的「林記點心」讓我們佔用他的座位 (當然我們亦有同時品嚐點心)。師傅砧板上的牛腩肥瘦混雜，肉質豐厚，看頭不錯。而前方的牛雜，賣相亦相當不俗，還有左邊的自家製魚蛋，全部都是我喜歡的，實在叫我心動不已！牛雜湯米 HK$25雖然只是麵食，但「鴻發」不像一般的粉麵店，製作的速度相對緩慢。不過一看端來的牛雜湯米，沒有大牌檔的粗野，相反排列得整齊，兼富有層次美感，頃刻會懷疑這是大牌檔出品嗎？！值得一提是每碗麵食均附帶一塊炸魚皮，相信是「鴻發」的特色，炸魚皮又正好對上我的口味，嚐麵食前，先來品嚐大牌檔一份體貼的喜悅！初嚐湯底覺得有點淡，但漸漸會體會箇中鹹度適中、