餃子館

營業中

休息中

幾乎可以日日打卡既餃子店。新北江好多餐廳都食暈哂，呢間餃子館真係少數可以encore 再encore 既舖頭。首先介紹返，佢呢度賣既野，有3類：餃子﹑小食﹑支裝飲品。餃子共8 款：韭菜豬肉﹑粟米香菇豬肉﹑芝士豬肉﹑雲耳白菜豬肉﹑雲耳椰菜豬肉 ﹑紫菜豬肉﹑香菇木耳雞肉。餃子可以揀湯同煎，可雙併，加麵底。如果揀餃可以揀魚膠淮山翅骨粟米紅蘿蔔豬骨湯/ 重慶辣湯。我就最鍾意佢地既魚膠豬骨湯，好重翅骨味，次次都飲到一滴不漏。佢地既餃子份量好夠，成粒大乒乓波甘，女仔叫6隻已經好飽。我最愛係韭菜餃，湯同煎都試過，6隻只係$30！食到捧住個肚走個種飽😂😂👍🏻佢地既餃子醬油味重，但又唔會蓋過食材本身既味道，仍然會食到韭菜香，係街好少食到呢種餃子。試過佢地既上海麵，又爽又滑甘，係幾得意既嘗試~ 小食有皮蛋豆腐﹑雞翼﹑拍青瓜﹑豬耳等等。平時自己一個黎食就未必會叫小食，因為會食唔哂，但如果同多個朋友仔黎，就可能嗌多個豬耳。😋佢地既豬耳偏重麻油香，鍾意麻油既朋友可以一試～ 試過太子既餃掂、旺角既美味餃子店，都係覺得天水圍呢間餃子館最好食！未試過既，有機會行開天水圍記住試下～ 😋👍🏻

👭餃子屋(天水圍)👭八色拼盤餃子 (加上海幼麵) $53🥟韮菜豬肉🥟粟米香菇豬肉🥟芝士豬肉🥟雲耳白菜豬肉🥟雲耳椰菜豬肉 🥟紫菜豬肉🥟香菇木耳雞肉菜單上面有唔同款式嘅餃子，由於真係揀唔落手嘅關係，38決定嗌個拼盤唔洗煩🤣！小店位置唔多，所以客人既位置會比較迫，加上繁忙時間會轉用外賣包裝，但都無阻眾人對佢地嘅喜愛😍餃子皮薄餡爆多💥隻隻都漲卜卜好足料，成粒乒乓波咁。❤咁多款水餃之中，38最推薦以下3款:1⃣韮菜豬肉餃韮菜好香濃，韭菜咬落爽脆，配上豬肉簡直絕配🤤2⃣粟米香菇豬肉餃粟米好清甜，小朋友都會好鍾意❤3⃣芝士豬肉餃芝士溶晒落豬肉餡，所以每一啖都充滿芝士香味。食湯餃最緊要個湯底，呢個湯底名叫做👉🏻魚膠淮山翅骨粟米紅蘿蔔豬骨湯，湯底好出色👍🏻飲落就知道冇味精，38次次食完都會飲晒啲湯🙊。P.s 見網上有人話店員服務態度好差，但38個日就無遇到，店員態度都正正常常，可能係個別店員態度問題啦🙂推薦度：7.5/10🏠天水圍天湖路1號嘉湖新北江商場地下A106號舖🕐9:00am-9:00pm

叫得餃子館，餃子明顯係招牌菜。有好多種餃子揀，亦可以揀湯餃或者煎餃（但係唔可以一半湯一半煎），如果唔知揀邊隻餃好，重可以一種餃食一隻。唔好以為8隻餃會唔夠食，因為一隻餃好大隻，所以8隻已經好夠，真係唔夠就可以加米線。我今次食左8隻韮菜煎餃，強烈推薦煎餃，因為佢每一面都會煎得好透，好香好脆。食煎餃都可以免費加湯飲，不過湯就有少少咸。加多支豆漿，$43，又抵又飽又好食！不過店面較細，唔好諗住坐得舒服。即叫即煮，所以都要等一段時間，同埋係落完單先俾錢後食野。有人話店員無咩禮貌，個人覺得還好啦，係個別店員問題。

呢半年差唔多個個星期都有幫襯，都算係常客，但啲服務質素差到可能以後都唔會再黎例牌會叫嘅白菜豬肉餃，其實真係大大件又足料，味道同呢個商場其他餐廳比真係幾好清湯都幾好飲，但最近好似有加味精，飲完有啲口渴，冇以前咁一飲就飲到係真材實料煲出黎米線成日都煮到好快爛，不過都只係其次啦菜脯以前真係新鮮又脆又辣超好食，兒家全部都淋晒好似擺咗好耐咁，唔多掂如果想係呢個商場頹頹地食一餐係OK嘅不過重點黎啦，佢啲服務質素真係好差！特別係高高瘦瘦個阿姐同佢講要買外賣，叫我等一等，一等就得5分鐘，遊花園咁行黎行去死都唔肯同我落單，要再催先得成日仲嫌啲人叫外賣阻住佢條路，如果你爽爽快快幫啲人落晒單，咁大家咪唔會塞住囉以前暑假個陣有個妹妹幫手，做野手腳快，非常欣賞呀可惜兒家冇做，變咗呢個阿姐。本身即叫即煮已經要等15-20分鐘，俾佢一搞，結果一共要用40-45分鐘先買到個麵。味道又冇以前咁好，服務又咁差，我諗我以後都唔幫襯啦！

老老豆豆, 好少人會唔鐘意食餃子, 而呢間餃子店, CP值爆燈, 唯一美中不足係個個服務員, 瘦個個.好, 講重點!①食完呢間, 八方x集無頂企.一隻餃子=八方3-4隻大, 足料, 煎餃焦底香口, 除左油係多左D之外, 呢個價錢, 真係物超所值.②我朋友比個服務員激到話下次唔會再幫襯, 機乎要拍台走, 但最後都係變左常客.就知幾吸引③日日新鮮包, 個人覺得最正係羊肉餃, 冬天食一流④米線同個湯都ok, CP值黎計, 好過你去7仔買個淨烏冬⑤有時人多都要等下位, 但總體來說都唔駛點等, 十次有一次咁.不過落單後, 可能一次同其他單一齊煮/煎, 等食時間一般都15分鐘以上走唔甩, 外賣同堂食都試過, 差不多.⑥最後, 其實寫呢篇野就係要講個服務員, 我諗好多人都體驗過, 成日同客嘈交, 不過佢地應該家族經營, 應該唔會炒佢架啦, 瘦瘦地眼眯眯地個個A. 落錯單機會頗高, 錯左話係你問題, 客人唔好皮4就會變罵戰B. 計錯錢機會頗高, 因為係落單比錢, 佢計錯錢又唔即刻比番你, 你同佢講佢仲會同你嘈,唔知係咪想襯你唔記得食埋C. 極不衛生, 呢間店生同熟分開係好衛生, 唯獨係呢個服務員完全沒

平時去開呢個商場，經過呢間餃子店，都勁多人，同埋又聞到好香既餃子味，成日都話要來食下，但無一次食到，因為太多人排隊🤪今朝去順豐拎件，又經過勒，終於今次唔算太多人，拎完份件，就一於搵個機會食下佢地啲餃子🥟望完成張餐紙，只覺得好抵食😋今日先點韮菜豬肉餃$36/8隻餃子跟湯，湯底係魚膠淮山翅骨栗米紅蘿蔔豬骨湯(無味精)，個湯真係好鮮甜👍🏻等左一陣，碗餃子到了，聞到好香呀，同埋隻隻餃子都好大隻，漲卜卜，仲有辣菜蒲，不過我嫌個辣菜蒲唔夠辣，可以再辣少少就更好😄唔講得笑，每隻都好足料，韮菜好香，亦都好飽肚下次要買生餃回家食先得☺️

在新北江, 離不開都係食粉麵或者餃子, 呢間餃子店經常都好多人, 今日朝早黎, 難得無乜人, 咁就食佢啦。記得佢岩岩開果陣, 好鍾意食, 但係慢慢, 佢好似變左質咁。呢一日叫左8隻素菜餃, 聽到好似係即叫即整的, 不過食落都無特別新鮮既感覺, 因為d 餡料都用左唔少調味, 食唔到蔬菜既鮮甜味, 味道麻麻。另外, 雖然每隻都好大隻, 但佢包得太鬆散, 好似求其一塊皮包住個餡咁, 口感欠奉。最致命係個湯, 本來好欣賞佢魚膠淮山翅骨粟米紅蘿蔔湯, 但而家變到得返鹹味, 除了鹹還是鹹, 完全飲唔出咩湯咩味, 忍唔住寫個劣評比佢!呢碗野$38, 下次上去食碗牛腩麵好過!

今次食芝士豬肉餃，味道不錯！湯底是淮山湯底，味道清清地跟上海幼面配合不錯，但麵質頗稔，份量較少。為職員態度欠佳，多次向職員取菜甫，職員沒有理會。經多次詢問，職員才回應並說沒有菜甫，製作中。最後等了很久，我才問職員為何外賣能夠即時提供菜甫，而堂食卻未能提供。他才立刻奉上菜甫。此外，職員急於多做生意。在食客未吃完時，已收拾桌上其他碗子（醬油碟），完全沒有理會同行者是否吃完，更向朋友說拿起袋子，給其他等待位的人坐。其實職員安排我們這位置（可放袋子）。朋友還未吃完，手拿筷子，試問如何立刻拿走袋子。其實我也很想早就吃完快點離開，讓出位置。總括而言，食物質素不錯 但職員態度有待改善。

天水圍嘅一間無得輸嘅餃子鋪!! 鋪唔大不過真係好好食 😋😋😋魚膠豬骨湯無味精夠膠夠味, 羊肉餃子大大食超Juicy🤤🤤 生腸夠爽, 好食到無野講 🤷‍♂️🤷‍♂️

新北江呢間餃子店我去過無10次都有8次，一買野食就會諗到佢。次次去都有好多人去幫襯，食過咁多次，今次決定要寫返啲野去歌頌呢間小店！今次我都係叫返韭菜餃6隻，同埋加上海麵。之前一直都係食湯餃，今次決定轉轉佢，試下煎餃。雖然拎到返去無咁新鮮滾熱辣，但都係熱嘅。外皮煎得好脆，但個餃子餡係好juicy!呢間嘅韭菜餃嘅肉係有濃濃嘅醬，偏向濃味，適合重口味嘅人！煎餃配埋淅江紅醋係好好味！而呢度嘅湯底係無得輸！好鮮甜！而上海麵好有口感。

標題都講得好清楚了其他食評都有講，呢間食店的員工態度係極差，呼呼喝喝，又嫌你落單慢。隔離枱的客人拎張枱張紙黎落單竟然俾佢鬧，話唔駛用手寫，又叫佢地寫埋同一張😅我聽到佢地叫的湯底又唔同，一份湯餃一份煎，我真係理解唔到點寫埋一齊。anyway, 我係食煎椰菜豬肉餃，花膠湯+上海面。 啲餃子大大粒，足料，但豬肉味濃到遮晒啲菜味，所以都幾膩。 湯底佢寫明無味精，飲落都真係覺得有住家味道，值得一讚!! 上海面都唔錯，建議大家如果幫襯，都加$7 要個面

這家餃子館價錢經濟實惠，最平$30已經有六隻大大隻的餃子。本來一心到訪，想吃冬日限定的羊肉餃，怎料未到八時，已經賣完。而且多種熱賣口味也售完。今日就試試冷門的芝士豬肉餃和羊肉餃。平日吃餃子，多是吃湯餃子。今次的芝士豬肉餃選擇了煎餃。芝士豬肉餃$34/6隻芝士豬肉餃分量十足，一隻餃子要分開兩三次吃才可以食完。餃子煎到金黃色，表面焦香，加上餃子皮有一定嘅厚度，入口脆卜卜。而餃子餡了毫不遜色，充滿肉汁，雖然芝士味唔突出，但仍然惹味可口。沾上黑醋提味，餃子更為鮮味。羊肉餃$40/6隻這羊肉餃好飽滿，大大隻都好足料，吃到濃濃的羊肉和香芹味道。羊肉雖然帶一點點的羶味，但羶味唔強烈，即使不吃羊的人也容易接受。加上香芹的點綴，味道清香，令羊肉餃多一份冬曰氣息。再呷一口魚膠淮山翅骨粟米紅蘿蔔豬骨湯，味道鮮美，又無味精，感覺滋潤，在冬日份外溫暖。雖然店子裝修極為簡陋，就只有接枱和接櫈，坐得擠迫，有點肩並肩，背靠背，但他們的餃子味道招來不少街坊食客，而流轉速度亦快，可見他們有獨特的吸引力。加上價格貼地平民，味道不錯，唯服務的態度實在有待改善。

食過間野幾次，其實覺得味道唔差既，但係啲垃圾態度扣哂分，話說有次同女朋友食，我攞張落單紙寫野啦，點知個阿姐走埋黎話支持環保，佢幫我手寫落單，寫完單之後收左錢，跟住等左10分鐘有多都唔找錢，然後咪問下佢地，點知有位高瘦短髮阿姐話佢找左比我，姐係落單個個啊姐，但係佢真係未找比我，搞左輪佢老細話睇cctv，之後高瘦個阿姐突然話啲錢係佢到，聲稱唔記得左找😅都算啦，到啲野食上黎，咁我就叫左3隻韮菜3隻栗米豬肉餃，點知佢黎錯左3隻椰菜餃3隻栗米餃，我就問佢話點解唔係韮菜係椰菜，佢就直接同我講咁你地食椰菜啦，我地就話我地唔食椰菜，佢就話睇下單先，睇完單同時佢同老細講話我地叫椰菜餃現家話想轉韮菜餃得唔得，我女朋友聽到緊係好嬲垃，明明佢自己都有覆單覆個陣都話係韮菜同粟米，自己寫錯重要賴個客，我女朋友就同佢對質佢重要死口唔認，我地話退錢唔食又唔退，食到一肚氣，個2個一高一矮既短髮啊姐都唔係做生意趕客有份

買外賣,見到碗餃勁乾,隨口問句,湯係咪加左.點知d啊姐勁串咁答;咪係入面囉,分湯要加錢架.唔加錢咪無湯囉.心諗,幫襯你仲要無喇喇比你出氣咁,d態度差到無人有,未食已經飽晒囉

皮薄料靚..但少一半油會好D...我本身鐘意湯餃.但老公話呢度煎得好靚..咪試下囉..好彩冇加面..8隻餃又大隻.料又多...我食左7隻飽到一個點...總括係好食.但好油