雲貴風正宗雲南米線

營業中

休息中

今日黎開呢頭，就試一試都幾多好評的米線。對於唔食辣的我，湯底的選擇少了。今日叫了小鍋米線，加豬腸。一送到黎，見到d 豬腸就後悔了，太肥，豬腸入面無清肥膏，見到都唔想食。唔食辣但喜歡酸的我，呢度個湯都幾啱我，夠酸味。小鍋米線原來包個餸就係肉碎，肉碎份量足，但略嫌肉碎太肥。唯一令我覺得好吃的係芽菜同韭菜，米線的口感唔會過硬，還可以，但由於豬腸太肥，我食了3件就放棄了。另外加了杯凍利賓納，比我自己沖還差，無咩味，淡淡的。我下次會選雲川燒！

酸辣米線真係好多種變化，各有各特式今次第一次食雲貴風，鋪仔細細，但人流不減米線麵質正常湯底有芝麻味，小辣都辣，越食越上癮墨丸普通、大腸就不錯最勁係一個餸都只係29蚊咋！抵食！！

晚餐點了外賣雞翼尖羅白刀削面，俾店員100蚊，佢找返44蚊俾我，我係到計緊，諗緊係未加左價呢，點知佢拎碗麵出黎話岩岩刀削面無收我錢要收返2蚊，我話下你岩岩找返44蚊俾我咋喎，佢話64，我俾埋個銀包佢睇，（因為咁岩我銀包得個張100蚊）佢話俾2蚊黎啦，找錯錢你又唔即時出聲，嘩，我真係成肚氣，以後都唔會再食，店員態度差，一直都無改善，找錯錢又唔認，食物又唔係特別好食😡😡😡😡😡😡😡😡😡

平時就係鍾意食米線，一個人嘅享受。呢間雲貴風，日日都排長龍，難得今日啱啱好有一個位，畀我即刻入座。呢間的麻辣米線，之前試過小辣係唔夠辣嘅，食中辣都仲係爭少少，今次是大辣，點咗豬脷米線$29。豬脷份量都唔少喎，數過大概有十片，豬脷食落其實唔算太辣的，但好香，因為裏面有芝麻，麻油等煮成。麻辣湯鋪滿了辣椒乾和辣椒籽，見到都興奮。 其實啲湯本身個湯底好好飲，唔食辣的人，會叫清湯，連湯都飲埋。米線好爽口，因為佢預你浸湯食，會浸淋一啲，所以上桌是比較爽身的，我通常會食幾嚿餸，先至再食米線，咁樣米線的軟度就剛剛好。$29一個豬脷米線，食得都夠飽，只要唔使排長龍我都會幫襯。

餐廳位置唔多，所以要食呢間係屯門出曬名嘅米線鋪，少不免要排下隊。今次好好彩，等左5分鐘就入得喇。細細間餐廳迫滿曬人，環境甚至可以話係狹隘。講返野食，配料選擇都幾多，仲有啲係普通米線鋪食唔到嘅配料，價錢都唔算貴。豬頭皮米線中辣 $29豬頭皮爽口不油膩，份量都頗多，好少見到有呢個餸揀，見到可以試下。米線較出面嘅粗身，更有口感，但自己就覺得太硬，莫名嘅消化不良感？！湯底唔酸都唔麻，係兩者嘅mix，不過就有啲兩不就嘅感覺，自己就麻麻喇以家啲雲南米線越開越多，要係入面真係做突圍而出，真係好難。或者呢間餐廳以前真係做到，但而家有多間米線鋪比較下，就只能算係還可。

聽聞呢間米線舖喺屯門都幾出名，所以難得入嚟屯門都要去試吓位置方面唔係喺屯門市中心附近，而係喺紅橋內街位置，所以要花少少時間去搵。店內座位唔多但來去好快所以都唔使等好耐叫咗一碗豬手魚片麻辣（小辣）米線，豬手炆到好淋好入味，魚片就同普通魚片差不多魚味沒有特別濃。芽菜等等的配料份量都算多，所以整體米線嘅份量都幾多同飽嘅食米線最緊要個湯底，叫咗麻辣小辣但唔係好辣， 而且仲有一大陣草青味，小妹對個湯底就麻麻哋喇不過員工非常親切，整個用餐體驗都非常好

好多人都話虹橋既米線出哂名，不過究竟係邊間咁出名呢，今日我終於知啦6點幾尼到已經大排長龍，心諗係咪真係咁正呀? (後悔了)入面得20個位到，所以唯有等下啦。等左15-20分鐘，終於入到去。入去之前其實已經幫我地落好哂單架啦，我就試左豬脷腩肉米線。不吃由至好，一吃不得了。呢度既米線真係不得了!唔單至湯底夠哂濃，米線又好有咬口，好吸引!豬脷揀左唔辣，味道幾好，索哂d汁，好入味腩肉有肥有瘦，份量夠哂多，真心抵食。再加6蚊配埋蜜桃汁飲，大滿足呀!

自己一個人食嘢最好，自由自在，唔洗受其他人限制去選擇食物。今日去咗屯門區幾出名嘅米線鋪頭，食碗夠辣的米線先。點咗麻辣豬脷米線，中辣， 29蚊。豬脷呢個餸可以揀唔辣，也可以揀麻辣，我喜歡食辣，就一定要麻辣，豬脷都幾爽口，麻辣味其實唔算辣，係鍾意佢嘅香味，因為有麻就會更加香。米線啱啱上桌時，仲係硬咗啲，要喺啲熱湯度浸下先，佢預咗你會浸湯食所以唔會煮得咁淋，如果唔係，食得慢，就成碗米線都林曬。浸一陣，連湯食，質質地剛好，夠煙韌彈牙，麻辣湯我最喜歡，因為佢呢度嘅湯底夠濃味，落咗好多芝麻，食落好香口。配菜有芽菜，韮菜，少少酸菜，如果唔食嘅可以叫佢走咗呢幾樣。咁大碗米線都係29蚊一碗，外賣加多一蚊，每次食親都要排長龍，坐低落咗單，都要等15分鐘先上到菜，所以通常我會揀非食飯時間去食，唔係真係有排等。

喺英國日思夜想番到黎當然要瘋狂食LOL腩肉米線雖然雲貴風嘅腩肉偏瘦唔似出面食開嘅咁層肥層瘦，但係肉質爽口彈牙而且唔韌，就連平時鐘意五花肉嘅我每次黎都必點；米線質感唔係彈牙而係偏軟但未至於夾落去就會斷不過我鍾意；湯底唔係味精所以食完成碗米線都唔覺得口乾，相反充滿肉香完全係成碗米線嘅精粹；辣味唔係辣油嗰種死辣而係香辣；腩肉可以揀辣或者唔辣而湯底亦都有唔同辣度可以揀好貼心腩肉米線餸辣湯唔辣走芽菜多蔥萬歲!!

呢到唔洗搵都知，長期大堆人排隊，到底有咩咁吸引？叫左個 冷肉到卜美線稍辣冷肉入味、偏瘦但不鞋口到卜唔洗講、滿口湯汁滿足到暈美線彈牙最緊要係個湯！惹味又夠香料得黎、唔似係味精美中不足係鋪面細、又多人、又大油煙但為了好吃的美線，我在所不惜🎯

半年前食過一次後就經常心郁郁過黎食。。。但早幾日過黎見間鋪仲有大把空位咪是但靠邊坐低。。。店員湊巧落緊外賣。。落完跟手問我食咩。。。岩岩講左雲耳兩字。。。店員走左入水吧。。。都算啦。。。咪等佢出黎再落。。。點知佢再次完全忘記左我。。。唯有揮手試意要落order..好快落完。。。同樣米線好快到。。。離遠一望唔係我既。。。因為見到上面鋪滿豬耳。。。本人從不吃豬耳的。。。點知店員直往呢邊方向前黎。。。跟手就放低碗野。。。我即刻叫住佢。。。碗野唔係我架喎。。。店員完全好似聽唔明。。。就一味話我。。。我再3強調唔係我。。。佢先叫番落單果位出黎。。。點知態度差到極端。。。咬牙切齒一口話係我落。。。火都黎埋。。我從唔食豬耳又點會叫。。。。聽完佢先問我叫左咩。。。我repeat完仲衰。。。居然話冇理由爭咁遠。。。爭遠唔遠我唔知。。。我淨係知even茶記式今時今日咁既態度幾好食都冇用。。。揾鬼幫襯咩。。。落完單你可以repeat一次。。。。自己冇repeate之後搞錯仲要道歉都冇都算啦。。。仲聲大大話係我錯。。。。真係永世唔會再翻兜。。。。

等候時間耐唔緊要 通常先打電話去下單叫外賣 再到店再付錢但拎到個外賣返屋企都總有野錯要刀削面 俾米線要全走 有蔥有芽菜明明每次都有重覆同佢核對都係岩嘅 但總係錯打去同佢地講返 居然cut我線 仲要話係我的問題 懶我無講到 我唔食得我梗係有講喇 玩自己咩已經唔係一次係咁樣好味都無用喇 態度差爆

9.35打電話落單 9.55 到，第一時間收左錢先，叫我出去等以為有，點知過多5 min 都未有，問佢重話整緊，o 嘴，咁既服務真係好差，結果一碗腩肉米線要40分鐘先到我手！！

木嘴今次又黎到屯門覓食，口痕痕想食下D粉面類，突然諗起新假期有篇野係介紹全港米線嫁TOP 10而其中一間就係喺屯門，即刻開地圖衝過去然睇下咩料。如果閣下係想搵一間坐得寬敞舒服既食肆，建議你可以即刻按返上一頁搵過另一間。因為呢間野真係超細間，得5、6張枱，如果唔係新假期篇野介紹我諗真係唔會入去試。由於地方超細，兩點幾三點先去到但都依然係坐滿晒咁滯，好在咁岩仲有個位比木嘴勉強攝入，又可以唔洗等位，非常好。湯底揀左酸辣小鍋米線$29，中辣。見佢都有唔少餸揀，但木嘴今日真係純口痕，食唔到太多野，所以淨係叫左一個雞肉，同加左杯凍檸茶。原來2:30開始下午茶時段凍飲只係加$2，本身要加$5嫁，身為窮J慳左$3實在太高興。碗米線都黎得幾快，一望已經覺得同普通出面既米線唔同，個湯好濃厚，配料好足，而食落之後更加覺得佢入選得全港米線TOP 10真係有原因。佢個辣唔係D油到爆嘅辣，而係加左好多辣椒碎係個湯度，辣而不膩。個湯係加左好多肉碎入去煮，所以食完唔會好似D味精湯咁勁口乾。仲有D酸菜唔係D勁梅又酸死人既酸菜，而係放得入口既酸菜。見D人話米線太腍，木嘴就認為剛剛好。至於D雞肉，就係好普通嘅雞肉，評黎都晒

星期六番半日，放工就去試食屯門人氣米線!起初諗住堂食，但太多人幫襯同座位都迫，最終都係叫外賣。炸豬麻辣米線(小辣)湯底：屬於香辣，小辣食唔到麻既味道，味道讚，但就偏油少少。米線：它屬於粗米線，外賣關係，麵身會再發脹少少，但我就鍾意食林既麵質。炸豬扒: 負分，應該炸左好耐，好硬!後感：都值得推介，辣味有別於其他米線舖。覺得呢種辣味係會令人上癮。