雄記美食

第一次嚟雄記美食食午餐，之前聽咗好多好評，果然名不虛傳！我試咗佢哋嘅牛雜香煎蝦米腸粉同招牌雜錦糯米飯。牛雜配煎蝦米腸粉真係意想不到嘅驚喜組合 — 腸粉外層香脆、內裡滑嫩，配上濃香入味嘅牛雜，層次感十足，非常出色。雜錦糯米飯亦係水準之作，粒粒分明、香氣撲鼻，而且食完唔會覺得笠滯，反而清爽舒服，令人想再嚟一碗。整體而言，無論係味道、食材質素定價錢都非常值得推介。如果你喺附近，一定要嚟試下，絕對唔會失望！…查看更多

這間位於灣仔的小店以懷舊風格裝修🏮洋溢着濃厚的本土特色🎞️除了適合打卡，用心製作的招牌菜式，亦是客似雲來的一大原因💕————————————————————————雞蛋蛋香濃郁🥚腸粉口感滑溜，兩者融合得天衣無縫😇表面的黑白芝麻炒得十分香口😋猶如畫龍點睛，使整體香氣和層次生色不少🤩牛雜款式相當齊全🐮牛肺、牛肚、金錢肚、牛膀、牛大腸都一一包含😊整體處理得十分乾淨👍🏻調味上比潮式牛雜清淡，香料味道較少🤏🏻入口更為舒服😊不過份量略嫌太少，麵底基本上只得幾口😅相信一般人都不會感到飽足🤔————————————————————————雞蛋和腸粉這兩款普通不過的食材😗經店家用心製作後，竟能創造出驚喜滋味😌難怪是每枱食客必點的指定菜式👍🏻…查看更多

平時放工行過總係見到佢鐵閘上面嗰個 graffiti，見咁多飲食KOL推介今日放假終於有機會特登走過去朝聖一下，十二點去到好彩唔使排隊不過已經好滿座，店鋪的骰可以坐二十人左右，裝修幾特別成間玩具 figure 潮流屋咁，可能啲KOL猛烈推介下先入為主有所期望，不過老實食完之後確係有少少失望，又唔係唔好食嘅不過冇預期中果種驚喜。突然在進餐途中發現到某位名節目主持都係餐廳裏面嘅座上客，餐廳特意安排一張四人枱俾兩位貴賓享用，當期時正值中午午飯繁忙時間成間餐廳已經爆滿，幾枱客都食完番幾桌，出面亦有十幾人左右正在排隊輪候，名人與其友人仍然優雅地慢慢進食，名人嘅待遇與典雅果然不能與一般平凡市民相比喔.....😅😲🙄…查看更多

今日終於就啱時間喺開門冇幾耐就入去食, 唔需要等位直入。裏面嘅裝飾好吸眼球，牆上面掛咗好多唔同年代嘅唱片同埋海報仲有書籍， 都有不同年代嘅玩意， 連Labubu都有。我點咗著名嘅雞蛋蝦米煎腸粉，不過就唔係好覺有蝦米, 且唔係好夠熱。另外亦都點咗馳名嘅牛雜粥。平時我唔鍾意食內臟，但呢個牛雜粥我都可以接受，只係個牛肺有少少血腥味。至於個粥底就係最好味嘅，係白果腐竹嘅粥底，而且煲得好綿好鮮甜。如果有淨粥底叫我一定會點粥底。招呼就正正常常並冇趕客嘅感覺。…查看更多

今日喺灣仔處理完事項，大約下午1:00左右，所以就去雄記睇吓咩情況，我見得一個人排，咁我就排隊，幸好3分鐘後就放另一批客人入座。☺️我每次嚟雄記，都一定要食「煎蝦米腸粉加雞蛋🍳」，但我又想食佢嘅新鮮牛雜🐮，正當猶豫之際，店員提議我食「牛雜撈煎蝦米腸粉加雞蛋」，咁就可以一次過滿足兩個願望。🤭來都來了🤭 順便買埋外賣返去，可惜雞蛋煎蝦米腸粉而家變為冇得外賣，只有堂食，咁就唯有只外賣一個牛雜飯啦，因為餐廳不設加單，要一次過落單。😛大約10分鐘左右，食物就整好。一如既往，「煎蝦米腸粉加雞蛋」外層煎得幾香，加上蝦米腸粉質地亦都軟韌適中，好味。😋而牛雜佢就圍邊放，不過點都有啲整濕咗腸粉，所以下次為咗保障唔影響腸粉最佳嘅狀態，兩樣都係分開嗌好啲。🤔牛雜質素同之前差唔多，都係令我食得乾淨放心，加上佢嘅辣椒油都夠辣，一齊食就惹味啲。☺️離開餐廳嘅時候見到門口條龍，又變返正常的長⋯😛雖然我真係幾鍾意食佢嘅「煎蝦米腸粉加雞蛋」，但我又唔會專登為咗食呢一樣嘢而早啲起身去食。所以都係隨緣，如果下次都係唔使點排隊嘅話先會食，至多下次食夠兩份煎腸粉。😆…查看更多

試左雞蛋煎腸粉, 牛雜湯河, 腐竹糖水雞蛋蝦米煎腸粉 腐竹糖水 值得再食星期六早上黑雨去到唔使等位 雞蛋蝦米煎腸粉好快煎好, 24蚊份量不錯 蛋食落好香 腸粉好軟滑 唔係好覺腸粉有蔥花蝦米 好似係齋腸嚟 反而蛋到食到有蝦米 落咗啲甜醬同辣椒油去食 食落唔錯 到牛雜河粉 55蚊份量偏細 河粉都幾好唔會淋曬 牛雜同湯我覺得正常 腐竹糖水系細支裝嘅12蚊唔算太貴 飲落唔會太稀亦唔係得個甜字覺得都有豆味…查看更多

聽聞食雄記係要講緣份😂好彩今次平日1點幾黎左，佢仲要有開門，仲要吾洗等好耐就可以入座又聽聞雄記員工較有性格，但今次惠顧又唔多覺，都幾好態度今次試咗佢啲招牌⭐️⭐️⭐️⭐️雞蛋香煎蝦米腸粉 （$24）用雞蛋煎好香，有黑白芝麻，再自己加啲甜醬加辣醬配腸粉食，幾特別，有驚喜🫶🏻⭐️⭐️⭐️⭐️💫牛雜麵 （$55）一飲佢個湯底就覺得好好飲好清，但身為零煮嘢食經驗既我，實在試唔出點解咁好飲所以就上網搵，見到MillMilk的報導，原來係將煮熟的牛雜的滾水加入磨豉、南乳等材料熬成濃湯；同埋牛雜係食得出洗得好乾淨同新鮮，牛雜份量亦足料，每個部位都大概有2-3舊，所以牛雜麵係極度推介，一定要食！😍⭐️⭐️⭐️⭐️咖喱牛腩撈通粉 （$55）嗌咗小辣，所以辣度接受到，都幾惹味，鍾意食濃口味啲既朋友，這款就會較適合你！…查看更多

唔係放假，我相信我都冇機會可以食到。首先今日嚟到佢有開，係一件值得感恩嘅事，因為佢係不定期會休息。目擊一位客戶問職員，你哋幾時係休息？職員都好謙虛咁答佢「我哋鍾意就休息㗎啦」😂第一次嚟，就一定要食佢馳名嘅咖喱牛腩煎腸粉，加咗錢要加隻蛋去煎腸粉。咖喱牛腩整得好腍好入味，煎腸粉一定要加蛋，真係特別好味，我仲夠膽死挑戰佢嘅辣度嗌咗個中辣，嘢食未到之前聽到隔籬枱有個女人話，上次嗌中辣食完搞到胃痛，我個心已經滴汗。結果，佢冇呃我，真係辣到標汗，亦都辣到食唔晒🥵。腐竹糖水好好味，同埋好快賣晒。呢間舖頭好細，但有好多打卡位，都係以懷舊為主。…查看更多

坊間不少名為美食的美食店，但要對得上名符其實的，「雄記」是個人心目中的首選！好了，終於有時間執筆分享我喜愛的「雄記」！所謂美食，當然直接由食物的味道裡反映。「雄記」的餐牌內容不大， 特別在於可找到一些具香港代表性的食物， 如從細吃大的糯米飯(季節限定)、非常貼地的牛雜粥粉麵飯、茶餐廳的炒蛋和港式糖水等，雖然我不是完全吃過，但認為吃過的都是美味之作，更是雄哥(唯一的廚師）發揮獨門廚藝的細緻滋味。再將滋味融合香港地道文化和藝術等的擺設與裝飾，美食的「味道」自然有增無減！「雄記」是一家個性小店，老闆、老闆娘非常爽直幽默，閒時喜歡跟客人聊天與開玩笑，甚有舊式小店的人情味，記得不能加單的規定啊！另外，免摸門釘，必須留意IG 專頁的營業時間，食品沽清便關門休息，要吃熱門食物便要盡早到！店內還有不少雄哥的私人珍藏，在短短的用餐時間，將會是一個目不暇給之旅！有著獨突香氣的叉燒蛋煎腸粉 HK$45 是我們每次的必點！一吃便能感受得到其魅力所在，記得別點漏了叉燒，因為光蛋煎腸粉的風味會較為遜色！牛雜新鮮、粥底流暢，加上招牌胡椒粉，一碗令人回味的牛雜粥 HK$40 ，大有「省招牌」的作用！現在甚少找到牛雜粥的蹤影，珍惜還有「雄記」！假如不吃牛雜，來一碗簡單溫馨的柴魚花生粥 HK$25 也不錯！足料、不油、糯米乾身、調味溫醇，「雄記」季節限定的糯米飯 HK$80 絕對是搶手貨。記得有次糯米飯沽清，過了一會，老闆給我們遞上一碗迷你版，超感動！第一次吃的咖喱牛腩麵 HK$55，給我的感覺是咖喱有點港式，可是港式得來咖喱的味道是挺香、有層次感和好吃的，只嫌小辣有點意猶未盡，誰不知此次後便種下了禍根，哈哈！自問也算是能吃辣的人，有次想回味「雄記」的咖喱，於是叫來中辣的咖喱牛腩通粉過過癮，事前經過老闆再三勸喻，最後出來的製成品是將辣度調低至中辣與小辣之間！結果，吃下多年沒吃令我頭冒汗、唇紅腫、心燃燒，需要分三次才能勉強完成的辣勁度，特別是深深吸收了辣汁的生菜。故奉勸各位，千萬不要亂試「雄記」的中辣咖喱！幸好，「雄記」的咖喱是自家調製，包括自家磨製的辣椒粉，均採用天然材料製作，完全沒有摻入化學成份，辣也辣得夠放心！每日「雄記」備有少量自家製飲品，記憶中有檸檬薏米水！然而可以飲得的凍腐竹糖水 HK$22 正是我們的至愛。老公至愛的渣咋mHK$28，非常 Home Feel，小甜兼不會太稠，吃得舒服！雄哥愛分享好東西，有次吃到極新鮮、充滿牛香的牛腩，當然是「雄記」自家出品，謝謝！如果你也愛感受香港味道，「雄記」就是我的推介！願你也可享受及欣賞包括食物、人情、情懷與及文化譜出的香港味道！…查看更多

話說 同朋友一齊食呢間灣仔人氣小店 竟然第一次去就食到 好彩🥺事緣係呢間小店主打廣東式粉麵及牛雜一向深受食客歡迎🤩經常大排長龍食物賣哂就閂門🚪加上休息時間不定　食唔食到真係靠緣份🪷我同行朋友就話想試吓幫我寫食評😂🤣我一睇 寫到成哂抒情文咁 大家一齊欣賞吓佢文筆✍️<緣分到了自然會食到>【世間所有的相遇，都是久別重逢的因緣】曾幾何時，疫情期間當你想落樓下間茶記食個飯都需要有d運至可以食到。去到今時今日，你又知唔知道有間食肆一樣要等運到或者係講求緣份你至可以食到呢講緊既就系位於灣仔既雄記美食，呢間食肆嘅網上評價十分出色，今日咁啱有呢個緣份得閒而佢又有開就走咗去試吓咁啱去到唔算多人，唔使排隊就可以直接入去，一入去就見到店鋪裝修方面充滿香港特色，入面枱凳都係大家曾經返學時期坐嘅枱凳，d中小學回憶即刻返晒嚟（我就諗返起曾經坐我隔籬嘅女同學，唔知佢而家點呢），牆邊嘅擺設亦有好多老細嘅珍藏，要欣賞晒可能都要去多幾次🥹坐低咗開始望吓個menu，梗係要嗌返個最出名嘅牛腩撈通同叉燒蝦米腸，佢哋個腐竹糖水都可以一試。啲嘢食果然名不虛傳，全部都好食又抵，不過要小心佢哋嘅辣度都唔惹少，唔食得辣嘅朋友可能要小心，食完出去門口見到大排長龍，真係好彩早咗少少去…查看更多

此小店已BOOKMARK咗好耐, 之前來過但摸門釘, 今次終於可以試一試 食物 : 牛雜粥 $40 ~ 粥底口感有D特別, 比其他地方的粥底更細滑, 牛雜味道正常, 整體唔錯 牛筋麵 $50~ 牛筋燜得好淋好入味, 都幾好食 雞蛋香煎蝦米腸粉 $24 ~ 腸粉自細都食唔少, 但此份煎腸粉真係唔錯, 煎得好香, 來此店一定要試 飲品 : 可惜此店無熱飲, 所以無叫飲品 環境 : 店內地方偏少, 但佈滿各種珍藏及海報, 來到可以留意看看 服務 : 職員有禮貌 價錢 : HK$114 (無加一服務費)…查看更多

本人幫襯這間小店兩次，兩次都買外賣，第一次正常，無服務態度絕對明白，因為午餐繁忙時間；第二次先生去買外賣，先生口多多俾錢嘅時候對住老闆娘話吾該靚女，好明顯係講笑，點知阿老闆大發雷霆話以後唔做我哋生意。大家有去過都知老闆娘咩樣，唔通真係調戲佢咩？今日我又經過呢間小店，見到佢門口有啲幾得意嘅poster，就企咗響度打卡影幾幅相，點知老闆見我唔係幫襯即刻落閘，真心覺得呢間舖頭趕客，唔俾人影就唔好貼出嚟，坦白講睇吓幾時執笠，嘢食亦唔見得特別好食。…查看更多

食評黎講除咗食物 當然服務態度都係其中用餐重要一環所以今次就集中講服務話說有人灣仔食晏食食下有對男女入咗嚟嗰樓面呀嬸叫佢哋搭枱同時有張四人枱吉枱佢地想坐過去嗰呀嬸就不斷話坐嘅話有人嚟就要叫佢地搬枱最後嗰對男女坐咗係張四人枱度佢哋好似講咗句到時有人先算嗰呀嬸無啦啦著曬制話唔做佢哋生意趕佢哋走結果嗰男嘅一路走一路鬧其實嗰時入座就大約有一半門口又無人等位我都唔喺幾明個客有咩嘢錯呢種餐廳真係對經濟毫無益處其實經濟都已經咁差呢種服務真係多謝晒…查看更多

叫咗個咖哩牛腩撈麵中辣，食咗第一啖，即刻感覺唔對路，辣到飛天，完全食唔落，平時食開譚仔三小辣，感覺上呢個係十倍，點食呀!食唔到又唔想嘥，唯有叫點打包拎走返屋企睇下點整，個店員又好冷靜，完全冇同我交流😏…查看更多

睇「消夜節目」主持人介紹，今日橫掂過開灣仔～試佢試佢節目內介紹咗～牛雜粥，煎蛋蝦米腸，淨係聽到「牛雜粥」呢三個字都己經好吸引，因為牛雜，牛雜麵，真係由細食到大，入落粥到真係第一次嘗。一放低，其實有啲失望，點解？點解得一半嘅？呢個型態係未食架，粥真係個碗一半都無，唔好同我講好似西餐啲「卡邦尼」咁，碟好大，啲意粉喺個「窿」入面得幾條，以呢個邏輯計算～正常！？好彩啲牛雜同粥都好食，攞返晒啲『分』返嚟，牛雜最緊要洗乾淨同新鮮，無果陣「徐」，粥底要「軟糯」同「綿」，識食粥就知我講乜！煎蛋蝦米腸，好鬼好食，其實係女友食，忍唔住都食咗幾嚿，如果唔係阿姐事前話「無得加單」，我肯定嘅多一碟～好食！因為唔可以加單，所以都加定個糯米飯，都係得個碗嘅一半，二舊大冬菇有咬口同都好出味，糯米飯略嫌份量少咗啲，同硬咗小小，味道剛好大會太咸。三樣食物嘢嘅水準同味道都俾到我驚喜，唔怪之得係「長龍店」，如果個粥同糯米飯個份量多返啲就完美。幾鍾意個老闆成間鋪啲擺設同性格，點解？擺設係佢啲枱係用我哋做學生時嘅枱，至於『性格』，下次你入去果時，唔「燙」埋個玻璃門，你就知道我講乜！至於唔可以「加單」，我個位其實唔係好睇得清楚，佢好似一個人喺廚房「踢」晒全部，如果係咁，唔可以加單又幾正常，俾我都會咁做，所以要「睇諒」！回頭度：9/10…查看更多