釗記海鮮小菜

8月10日電話訂座晚飯，9個人，話明預算3000蚊食海鮮餐，菜式由釗記老細推介:一隻碌鵝(樓面阿姐話隻鵝重13斤)，椒鹽鮑魚（14隻），豉汁蒸白膳（重約2斤幾），粉絲蒸花尾躉（重約1斤），支竹火腩煲(小煲，堂食餐牌價88蚊)，西芹炒牛肉（中份量，堂食餐牌無尼味餸），雜菜煲（小煲，堂食餐牌都無尼味餸），原本有份炒飯嘅，後來cut左，因為仲未出餐。雜菜煲係因炒通菜估清臨時頂上嘅。以上7個菜式，承惠3000蚊！！！ 不禁感嘆:我真係化身一隻大水魚！！！ 埋單時我並未提出異議，老老實實現金結數。第二日朝早，比電話釗記老細，要佢出張單，寫明每個餸收費幾多，我轉頭過來摞，遭到拒絕。佢表明只寫「海鮮餐3000蚊」尼幾個字！ 以下是釗記老細同我通電話之語錄:「隔離有張檯8個人食，同你一樣的菜式，人哋唔知食得幾開心，讚不絕口。」「讚我嘅，唱我嘅都有，你食得唔開心下次咪唔好再來囉。李嘉誠，有人話佢好人，都有人話佢衰人，一樣唧嘛。」「你食3000蚊，樣樣都要海鮮，我咪蝕死。」 至此，我都沒必要同尼位老細再講D咩嘢了。尼件事有個細節要講清楚，我親細佬同佢熟，經我細佬落唧order，全權由釗記老細自薦菜式。 結語:凡事都係要親力親為，別將信任交他人，換得方便當水魚。…查看更多

通常想食海鮮時，作為大埔人都會到新街市地下行一轉，買新鮮又靚的海鮮然後到2樓熟食中心搵師傅煮嚟食。我較喜愛2樓搵釗記幫手，呢間磅重是幾袋總數計的，每磅約60至70元加工錢，再同客人溝通想點煮…很喜歡豉油王鮮魷、椒鹽瀨尿蝦、切片鮑魚炒薑葱或陳皮蒸原隻鮑魚、再加條蒸魚就是二人餐了，人愈多就食得更開心呢釗老闆很喜歡與客人傾計，他最拿手的是芝士焗龍蝦、豉汁蒸蟠龍鱔…午餐時的炒粉麵飯餐連凍飲也非常抵食冬天食蛇宴，也值得一大班朋友嚟預訂呢！…查看更多

《好味道嘅避風塘炒蟹》我今次要同大家分享一個超好味嘅餐廳，絕對係海鮮控嘅天堂！佢哋嘅避風塘炒蟹超爆多高，仲有勁多蒜蓉同埋蔥。同出邊食開嘅避風塘炒蟹好唔同、出面大多炸得比較乾身同埋蟹會裹上炸粉。但呢度嘅避風塘炒蟹就好唔同，佢係原隻配埋啲蒜蓉即炸，味道一流，超級好食！ ！仲有食過佢整嘅蒜蓉粉絲蒸扇貝，蒜味濃郁，粉絲亦極多，但因為其他朋友食得太快，所以冇影到相！但亦建議大家下次可嘗試買上嚟加工！ ！總括嚟講，呢間海鮮餐廳都值得推介！ ！…查看更多

翻開餐牌，揀左黑椒牛仔骨同鵝片先來個開胃🍴！黑椒牛仔骨火辣辣，夠晒香，啖啖肉juicy得滯，骨旁依啲肉啖啖都咁滑嫩，把口水流晒一地。再食鵝片，啲鵝肉滑溜溜，鮮味十足，每塊都吸晒啲香濃汁液，食落簡直正到爆燈💥！轉戰海鮮，蒸咗個扇貝上檯，塊面鋪滿咗金黃色蒜蓉同綠油油豆苗，蒸得啱啱好，肉質彈牙又帶點甜，蒜香襯托得啱啱好，整體味覺平衡得宜。班球則係另一喜出望外，炒得噼啪作響，表面饒有彈性，呢個做法保留咗鮮魚嘅原汁原味。走後門出去海鮮市場，貪新鮮買咗個龍蝦返嚟伊麵底，勁！龍蝦肉嫩彈牙，好似彈簧咁，伊麵吸滿咗海鮮嘅鮮美同湯汁，每條麵都係唔舍得放落嘴以外。整晚食完，真係正過六合彩。朋友跟我一齊歎，都讚不絕口👍，成功將我哋普通嘅食海鮮夜晚，變成一場味蕾嘅盛宴！下次再撲埋啲新鮮嘅，試吓佢哋其他拿手菜，準備好餓返去一次啦！…查看更多

大埔街市必食屋企人一早訂咗枱去到就有得食🤣最鐘意佢個豉汁蒸鱔真係食到幾碗飯可惜今次呢條蒸鱔，唔係話太肥冇五斤🥹但係都係好脆口👍🏻今次都有叫龍蝦伊麵，但係嚴重懷疑點解啲龍蝦多過伊麵咁多🤣呢張相入邊係啱啱嚟到伊麵真係好少到喉唔到肺，但係佢個汁係超級好食💃🏻真係細個喺酒樓食到嘅味道落咗去街市買蠔食菜新鮮真係點整都好食👍🏻豉椒炒蟶子炒到啱啱好，但係調味有少少Over叫咗兩個小菜睇到佢嘅顏色咁足油就知咩料🤣🤣好食呀…查看更多

上星期諗住同屋企人去大埔食海鮮，所以特登喺樓下街市度， 買咗條靚魚， 瀨尿蝦， 鬼爪螺..... 仲有其他海鮮， 點知奶曬嘢。原來高手真係太勁， 幾隻椒鹽瀨尿蝦，料頭又唔夠不突止，D蝦又過熟！都算啦！ 啲鬼爪螺一D都冇洗就拿去蒸， 搞通我食到成手都係沙，仲煮唔熟，最後仲要返蒸先至可以食得。條幾百蚊嘅魚至死得唔低， 佢一聲唔該，洗都唔洗， 魚扣都冇劏開就攞去蒸。死未。最後好彩佢識做， 褪番少少加工費， 但啲海鲜就白白枉死了…查看更多

都係經朋友介紹同埋見網上YouTube都有好評 所以特登過嚟試下！叫左幾碟小菜 同埋海鮮 🦞最推介係佢嘅炒蟹 好有鑊氣 好惹味 朋友試左都覺得好味😋 唯獨一點是出菜時間可加快一點就更完美！推介推介…查看更多

今日釣完魚攞住啲泥鯭，嚟到大埔街市熟食中心，見四周都好多人，最終因為唔駛等位去咗食評唔係咁好嘅釗記，諗住未必咁好彩試一試佢，打算加工椒鹽泥鯭、再叫兩個小菜（叫咗豉椒炒蜆同豉椒鵝腸）同啤酒咁。店內一個四眼妹話加工70蚊一斤，我多咗一両，一係俾番兩條泥鯭我一係加10蚊，我有啲愕然但訂價係咁就真係無話可說，只好收回兩條泥鯭。之後，我向店內一個四眼仔叫一支大青島啤酒，同佢講我帶咗支白酒，要求俾冰桶，有其他客人要用我即時交還，四眼仔話ok，之後親自攞一個裝有冰粒，凍水同一支大青島嘅膠桶俾我。之後，店內一個70餘歲嘅阿姐攞碟椒鹽泥鯭嚟，大聲講：「我一桶油二百幾返嚟，真係蝕俾你呀！」我再次愕然，咁算唔算侮辱客人？！你舖頭都寫明椒鹽加工每斤70，你用二千蚊桶油唔通又怪我呀？？食曬碟魚同蜆，飲完啲酒好耐都未見碟鵝腸，我問四眼仔有冇漏單，我話漏單唔要了，四眼仔好誠實，話冇落單，我就取消了。埋單時我睇吓有冇收多錢，俾我發現多收了二十蚊，70阿姐話冰桶要加收，最近開始，我話一早同我講要加收，我心甘命抵，餐牌、店面冇寫埋單唔出聲，我唔check單都唔知。喺度希望大家惠顧此店必須小心，清楚收費內容，之前濫收費用嘅評價絕對可信，小心！！…查看更多

當日星期日晚，遲左去街市買餸，成6點先去到，加上休漁期係冇乜靚海鮮。當天買到既海鮮可能唔係太新鮮，加工後我哋覺得味道好一般，但理解既係廚房得老細老人家同另一個男人煮，根本忙不過來。椒鹽瀨尿蝦-呢一個係果晚最好食既，瀨尿蝦夠新鮮，炸得透同埋加埋椒鹽既調味好野味！薑蒽炒蟶子-原本叫左薑蔥炒蟶子王煎米粉底，但上台變左豉椒炒蟶子王，蟶子仲要腥既，唔知係蟶子唔新鮮定點，全晚最差😮‍💨蒜蓉粉絲蒸仙貝-不過不失花雕蛋白蒸像蟹-隻蟹唔新鮮，好削應該養到瘦晒變成水蟹，所以蒸出黎比較水汪汪，呢一點唔關廚藝事，但係完全無花雕味。係一味普通蛋白蒸‘水蟹’。鹽焗奄仔-首先一上台就有‘壓’味，一反個蟹肚黎睇就見到未有擠走蟹屎 先煮唔怪之得有呢個臭味。同埋d腳甩晒，好彩食落無臭味。清蒸黑瓜子-消失的‘扣’，明明交代左有扣但最後上台係唔見，條魚蒸得岩岩熟，但係豉油略為較淡😮‍💨豉油王大蝦-呢一味煮得最好食，調味好得！…查看更多

五月尾某一天到此店加工四樣海鮮慶祝老公生日，是第一次幫襯，問咗加工費是 HKD70-HKD80 一斤，肉蟹一隻一斤多 (薑蔥炒蟹）、一斤蟶子王 （豉椒炒）、一斤大蝦 （蒜蓉開邊蒸）、一斤花甲王 （豉椒炒），四樣海鮮總共的加工費是 HKD290.00。七月初再次幫襯，是第二次，慶祝本人生日，都是這四樣海鮮，份量一樣，只是隻肉蟹改咗避風塘炒蟹，係個老闆叫我哋試吓佢個避風塘炒蟹，重點係佢冇同我哋講個加工費是不同的， 最後食完埋單時，四樣海鮮總共的加工費是 HKD480.00！我哋奇怪點解咁貴？！問佢點解… 佢話避風塘炒蟹係$190/斤，我哋當堂呆咗，我話你冇講過喎！佢話避風塘炒蟹一向都係咁貴架啦！又話我哋啲蟶子唔止一斤！😡😡😡 我哋兩個響樓下街市買完上黎加工，唔通我哋唔清楚個份量咩！真係好嬲呀！😡 本來想再理論！但隻佬見我生日，就話算啦！俾錢走人就拉咗我走喇！總結：亂收加工費，無標明價錢，永不再幫襯！😡😡😡 完！…查看更多

幫襯過幾次，大廚手藝的確不錯，仲愈來愈多客人慕名而來。不過近來質素每況愈下，伙記落單不清不楚，自來海鮮煮好之後攪唔清楚邊枱客人的order, 見過多次同食客爭拗海鮮份量，亦見過撈亂客人自攜海鮮，出現非常尷尬場面。發生喺我身上的一次谷氣事件；係我order咗碟豉油王炒麵，上枱得半碟份量，我同伙記仔投訴：吓……唔係麻，得半碟？伙記仔竟然話：我睇住師父炒嘅！落足兩個麵架喇！！我當堂呆咗-_- ，呢次堅嬲，所以決定唔再幫襯。再好食都假，更何況多人光顧之後質素已經大大不如前。…查看更多

上網見到有YouTuber有推薦呢間加工海鮮！都有上網做過啲資料蒐集，膽粗粗過嚟試吓係唔係真係咁正！黎之前其實都有啲擔心，驚佢係因為賣廣告先咁多人，唔知會唔會係伏！但嚟到先發現真係幾正！一入到店舖，整體都算幾乾淨，比我想像中嘅大排檔好!我係自己買海鮮上嚟加工嘅，但食到一半發現海鮮賣得唔夠，於是叫事頭婆幫我哋落去買咗龍蝦，打算整碟龍蝦伊麵！整體食咗嘅味道都覺得幾好！性價比高！值得過嚟試吓啊！唔講咁多，大家睇相就知啦！自己加工嘅炒蟹！…查看更多

都係上網睇到話大埔新街市有間海鮮🦞加工好正！！😋😋所以專登喺港島揸車過嚟食🚗🚗簡直就係勞師動眾，好彩冇令我地失望。我哋五個人食咗七、八碟餸，連埋海鮮，都係$1200💵💵埋單，都算幾抵食啦！呢碟啫啫芥蘭煲，好入味，好有鑊氣！上枱嘅時候仲出煙添！好正～問老細有咩好推介，佢就極力推薦我哋食避風塘炒蟹，啲蒜蓉多到爆都算係落足本啦！真係好正！啲膏又係勁多！睇相都知道！未試過喺出邊食過咁足料嘅避風塘炒蟹！仲有佢個椒鹽賴尿蝦都係冇得頂！ ！…查看更多

見網絡很多都推薦大埔釗記，假曰中午便到釗記食海鮮試試，但食物上枱已完全感到廚師的求其，例如豉油王蝦，無剪頭和腳，問的時候就話廚師忘記了，後來又說因蝦細隻，不用剪，其實我買的蝦$168一斤，是中蝦，唔算細，另外薑蔥蟹，冇落薑，之後補返D薑比我，再炒一炒，有出水情況，味道已不好，浪費食材，鹹蛋黃鮮魷更不好吃，炸皮很厚！食落成口油，而鹹蛋黃掛不上皮，鹹蛋黃一嚿嚿在碟邊，根本冇推開鹹蛋黃！以這個價錢，六様東西，每樣一斤左右，收了$460加工費，這價錢不值去食。…查看更多

我都隔咗好多年冇食釗記近日突然之間諗返起呢間餐廳，就二話不說訂枱，展開我懷愐美食之旅。之後先發現原來佢近排好紅，有YouTuber介紹過！其實我都識咗老闆好多年，覺得香港人應該要支持番多啲小店，所以我能夠再次品嚐到呢種美味，真係好開心呀！老闆人親切有善，好誠實我哋今次只不過係加工鮑魚，佢加咗啲果皮同埋豉油，令到啲鮑魚好有鮮味！真心好好味！之前去過其他餐廳都食唔到呢種味道！今日食返好耐之前食過嘅味道，真係好懷念啊！…查看更多