金鳳大餐廳 (D2 Place TWO)

營業中

休息中

早收工特登叫老公接我去食飯浪漫下, 咁啱附近收工去剧扒夠哂近, 數數手指原來都有2-3年無食過, 好在我地平日去唔洗等位就入得我地一齊叫左羅宋湯配牛油餐包, 落完單無幾耐就送到黎, 餐包係熱辣辣, 搽少少牛油再點湯咁食超正, 牛油味好香! 羅宋湯味道夠哂濃郁, 少許辣味會慢慢係飲嗰時滲出黎, 同埋仲要夠多湯料, 正!我叫左美國牛小排餐, 七成熟配黑椒汁, 牛小排熟度剛剛好, 食落好軟熟, 牛味好突出, 重點沾滿黑椒汁咁食更加惹味, 除左個汁靈魂之外, 食牛扒一定要加生蒜, 令到個牛小排味道更加惹味提升, 配菜薯格點下茄汁加黑椒汁食, 真係愈食愈停唔到口!我老公叫左美式什扒餐配黑椒汁, 佢每次一剧扒就會叫什扒, 因為佢鍾意咩都有得食, 咁先開心喎, 什扒餐入面有豬扒, 牛扒, 雞翼, 香腸同火腿, 豬扒煎得夠香口, 食落實在夾少少彈牙感, 牛扒雖然無牛小排咁厚身, 但牛味都幾突出, 雞翼被黑椒汁沾滿哂好惹味, 配菜係波浪薯條, 我自己鍾意沾滿哂汁既軟淋淋薯條, 好似食緊薯蓉咁正!原來依家餐廳有得下載app做會員儲分, 儲夠就可以當錢用, 下次黎食又可以儲下分了

平時返工，成日都去呢度食午餐，除左本身嘅主菜同飲品之外，仲有湯有餐牌，感覺好抵，下午2點之後去，仲有折添。不過始終呢度都係出名食扒，出糧之後就放心食扒啦！睇下餐牌先是日忌廉湯 雖然羅宋湯比較出名，不過今次想飲白湯。忌廉湯有煮得幾軟，但仍然保持形狀嘅紅蘿蔔粒，可以都有少少洋蔥，非常creamy，適合用來點湯。野菌牛柳（五成熟）（加蒜茸$2） $145呢個比一般鐵板牛柳貴少少，分別係寫明野菌，就會得到用專屬容器裝好一份、有雜菌嘅燒汁，淋落鐵板上面，一般嘅燒汁黑椒汁，會用大桶拎過來。食港式鐵板，我習慣叫生啲，等鐵板慢慢加熱嘅。不過好彩下面有薯條墊一墊，會熟都唔會熟太多。鐵板上面有兩塊牛柳，早食嘅一塊腍啲；之後等熟啲食另一塊，肉味濃啲，變成我原本想食嘅七成熟，食埋充份吸收醬汁仲有少少脆嘅薯條，同翠玉瓜，感覺滿足。欣賞經理哥哥落醬汁前，會提醒餐紙放緊枱邊，避免彈親，保障安全。凍檸檬茶紅茶味濃，加埋檸檬調味，可以解膩。服務費 $14.5找零差額 $0.5總數 $160

這間餐廳門口帶位女人態度十分差，已經安排座位坐下但無理要求客人起身，明明入座嘅時候話等朋友去洗手間已經說可以安排座位，其他客人就不用齊人可說立即叫嘢食就繼續坐，我已表明我可以立即叫嘢食佢都要我即刻起身，非常之唔合理嘅安排，兼且態度十分之差👎真係以後都唔會再幫襯咁差服務嘅餐廳仲要受氣、如果一開始講明話齊人先入咁人哋都會接受佢，唔明佢點解要安排，真係好耐未見過態度咁差嘅人仲覺得自己冇錯，以後都唔會再去所有金鳳餐廳

星期六晚大約等咗10分鐘就可以入座🙂上菜速度快，食物夠熱食物好食喎 可以再encore 🤣要搭枱，枱與枱之間一條空隙都冇😅招牌牛柳扒套餐，蒜蓉汁，跟羅宋湯，連熱飲檸水$148加一，好味😋😋火喉控制得唔錯，鐵板出到嚟之後都唔會太老 蘇格蘭牛扒餐，蘇格蘭牛扒肉質軟硬度係介乎喺西冷牛同牛柳之間🤓 跟白湯(白湯有驚喜超好飲呀，點埋跟餐嘅牛油麵包不得之了呀😋😋）整體嚟講都係開心嘅一餐☺️為食B報告完畢🤭

叫左個燒汁雞拼漢堡排，食物上枱嘅時候簡直俾d汁嚇親。汁多到完全掩蓋了食物我味道。要用小碟分開食物才可以入口。最近食過兩次，鐵板牛係ok的。呢個就真係唔多掂！好難食

上次食金鳳真係痳痳地，因為食到個牛好多鬆肉粉，今次去開D2 ,老公話要食鋸扒，又見到佢個2人餐 258蚊就試下啦！餐湯係羅宋湯忌廉湯再點左咗牛柳同埋焗豬扒飯牛柳今次唔覺得有鬆肉粉，即刻加好多分。焗豬扒飯都幾好食。仲有蒜蓉雞翼同埋兩杯嘢飲

今日食嘅一間餐廳相信大家都有機會食過，佢就係金鳳大餐廳。今次去嘅係位於D2 Place嘅分店。同其他分店一樣，餐廳主色以紅色為主，而家因為做緊聖誕，所以都有少少聖誕嘅裝飾，幾有心思。位置空間不過不失，坐得都算舒服。因為咩都想食吓，所以今次嚟到就嗌咗佢嘅美式雜扒餐。同其他扒餐一樣跟紅白湯。自己就揀咗白湯。自己都幾鍾意依度嘅白湯，偏濃同埋Creamy，有少少奶油香味，而且非常之熱辣辣。當然都仲有餐包食，味道就正正常常咁。然後終於到主角。一嚟到已經聞到好香，鐵板渣渣聲，熱度合格有餘。倒汁之前店員會提醒你用餐巾遮擋，都算貼心。叫得雜扒餐就係貪佢乜都有份量夠多，而金鳳呢度嘅集扒餐分量更加係十分驚人。佢有牛、豬、雞、火腿、腸仔、雜菜同埋薯條，認真成座山咁。另外我仲加咗蒜蓉配埋蒜蓉汁。豬扒超大塊，配埋蒜蓉食非常嘢未。牛扒相對純粹大少少，但味道都唔錯。雞翼都烤得唔錯。腸仔火腿就普普通通。反而雜菜同薯條配埋啲汁食又幾好食喎。最後嗰餐係有跟埋餐飲嘅，凍咖啡走甜，咖啡幾濃，好飲過出面茶記。同埋都算幾大杯。總括嚟講，一路都覺得金鳳算係一間幾抵食港式扒房，如果想食肉，又想平平哋嘅話，金鳳真心係一個唔錯嘅選擇。

D2嘅金鳳茶餐廳，每次去到門口都係大排長龍，因為性價比高嘅扒房真係好受歡迎，價錢唔貴，份量又大，聖誕節過咗去嗰邊shopping，就順便諗住鋸扒應吓節，我都冇諗過好多人多到咁，攞飛等位， 20張枱以上啦，等咗足足一個鐘左右我自己叫咗個鴛鴦扒，有豬扒同埋雞扒，佢最好味嘅地方就係，我食咁多次都未試過個扒係乾噌噌，或者諧霎霎嘅，每次都係好Juicy，啖啖肉我仲見到佢有聖誕set，我記錯好似係$330 ，一人聖誕餐，不過佢話一人聖誕餐，我哋睇到餐牌糾結咗一陣，問佢點解會有兩個主菜，一個牛扒，一個豬肋骨，我哋以為係二選一所以冇嗌到，最尾同員工認證返，原來真係一個set有兩個主菜，仲有沙律，仲有甜品，仲有聖誕禮物，好後悔冇嗌到因為員工姐姐話，呢個set，雖然話一人份量，不過足夠兩個人食～唔知佢呢個set去到幾時呢？我想試吓佢個豬仔骨❤️‍🔥❤️‍🔥😂

約莫係幾年前，講開港式扒房已經唔會諗花園餐廳，而係多咗個「金鳳」選擇。事隔一年，今天興致忽到，決定同友人食下扒。 見到佢套餐配搭豐富，仲出埋到會服務👀晚市7 點前埋單仲有88折優惠！跟手仲見到同少爺啤有cross over，食扒飲啤，寫意。最後千挑萬選，揀左💁🏻‍♀️ 貴族牛扒（美國牛肩肉）HKD218 塊扒都幾厚切，煎得好靚，肉汁夠哂，薯格分量算多，蒜蓉汁撈薯條一流。 美式雜扒套餐 HKD134 (豬扒/ 牛扒/ 雞翼/ 香腸/ 火腿) 未上桌已聞到陣陣香味，店員仲好貼心提醒要拎餐紙擋住以免濺到。每款都有一定分量，塊塊都好入味，又唔會煎得太老。最鍾意佢個豬扒唔嚡，有焦邊，完全食到果種香港扒房味道。 兩個都係套餐，可以揀紅(羅宋)/白(忌廉)湯。我地兩個都揀咗紅湯：湯夠哂酸同辣，加埋個鬆軟溫熱嘅餐包係冬天真係無得頂！ 總結／ 和老友坐著聊聊天，邊食晚飯轉眼便過了１個半小時，環境都好適合聚會，有種華美老香港味道。

朋友約係D2食港式扒餐，都好一段時間無食，一於懷舊下......我地去到6點半左右，嚇左一跳，唸住工商區唔會有太多人啦，點知6點幾已經滿座，要攞飛等位🥲等左幾張總算入座，我地叫左比目魚松露汁（+$25轉餐）+ 什扒餐黑椒汁, 兩份都係set,所以都有跟餐湯,餐包同餐飲...🍽️羅宋湯酸味幾重🍽️餐包外表平平，但軟熟好味窩！如果有，真係可以食多個！🍽️ 比目魚配黑松露汁$132 -轉套餐$25以為魚係碟上，點知都同樣係鐵板上😃 魚肉好厚身下，薯條同翠肉瓜墊底，肉眼可見魚既兩邊都煎得好脆但裡面既魚肉都仲保持到濕潤同唔嚡口。黑松露汁係亮點，好濃既黑松露香氣，食牛扒既friend都倒左d黑松露汁試下。唔夠汁，職員好好甘再倒左一份比我地🍽️什扒餐配黑椒汁$134分量十足，牛扒，豬扒，腸仔，火腿，雞翼，薯條，配菜……滿到要分d係碟先切到。最好味係豬扒，好厚身但唔硬或黐牙有好多唔同既promotion, lunch set係抵食

啲肉超級鹹到爆全部用肉鬆粉那到太淋， 服務質素超差，我3人幫襯坐4人枱低連食都未夠30分鐘其中一位未食完去咗洗手間， 之後有一位攣頭髮戴眼鏡嘅店員即時沖埋嚟 話因為有客人要我地的起身 ， 但我先生當時仲食緊，亦已經多次同佢講咗我哋係三個人其中一個只係去咗洗手間， 但店員不加理會照樣安排2位客人坐低， 當時隔離枱有張6人枱只係坐咗2人 而且當時亦有其他枱 為什麼唔安排呢？ 我即時向店長反映， 但店長淨係話佢唔記得咗我係三個人，有咩理由有份餐同埋杯滿既嘢飲都放喺度都話唔知道仲有人坐喺度？ 同埋已經同佢講咗4次其中一個去咗洗手間，咁都叫唔知道😡 呢間野我永遠都唔會再幫襯， 誠意二百幾蚊一個餐仲要只係食咗37分鐘就被聲走 簡直係離曬譜

【深水埗區】【金鳳大餐廳】同大學同學耀哥好耐冇見，最近佢遇到一啲困難，我作為「問題解決師」兼「解決問題界 KOL」，當然要挺身而出、拔刀相助。不過佢嗰啲其實好小事啫，三兩吓手勢就解決咗，起碼唔使我用腦先。不過既然出咗嚟，咪食個飯囉，當大家聚吓舊都好吖嘛。佢話想食金鳳，我哋就去咗荔枝角 D2 Place Two 嘅分店，叫咩扒都好，實有「牛油餐包」同「餐湯」，質素都係咁上下，冇咩好講。我就食 $218 嘅「貴族牛扒」，即係美國牛肩肉，要五成熟、蒜蓉汁、鐵板上，食落唔係太大份，不過味道算係過得去嘅。佢就要 $190 嘅「每月特選晚餐」，有「胡麻醬蟹棒沙律」、「鐵板帶子西冷牛扒」，佢要五成熟、蒜蓉汁，仲有晚餐甜品「朱古力雪糕」，佢就話正常水準。餐飲佢要「凍檸茶」，我要「凍奶茶」，加埋一埋單 $449，算啦我畀啦，一餐半餐我豪得起嘅。。。（地址：荔枝角長順街15號D2 Place TWO 3樓312號舖）#1amfoodie #foodie #hkfoodie #thatfoodiething #hkfood #food #instafood #yummy #foodlover #delici

好耐冇鋸扒今日去咗荔枝角所以就去D2 Place間金鳳度醫肚鐵板牛小排 七成熟 跟蒜蓉汁出嚟真係有七成熟嘅效果冇乜筋位 所以唔會太韌不過略嫌薯格有啲油整體嚟講係鋸扒退好地方❤️

今次去咗荔枝角D2 Place TWO 三樓嘅金鳳大餐廳食久違了的鐵板餐水準同以前一樣今次去食嘅時間係下午茶時間價錢都好抵食雖然唔係食靚牛但係味道都唔錯今次叫咗兩個餐，兩個餐都有餐包，餐湯可以選忌廉湯或者羅宋湯，同埋仲有餐飲。上餐時間非常之快，仲快過連鎖快餐店😂3分鐘就上齊晒全部嘢，食都食唔切鐵板啲薯條勁好食！可以選擇黑椒汁同蒜蓉汁，牛扒嘅肉都算嫩，另外一個餐叫做牛肩肉加腸仔，兩個餐都好夠熱，熱到啲薯條燶咗😂總括而言，非常滿意！

中秋節夜懶得叫女友煮，想出去行下又食吓野-D2place 同金鳳。 叫咗個晚餐，帶子配西冷牛扒。 餐包餐湯沙律～基本嘢，正正常常味道，羅宋湯起碼俾我感覺新鮮嘅，唔似有啲地方好似煮咗好多日咁😅。主角出場，揀咗黑椒汁，帶子二粒～爽甜，西冷牛扒今次口感幾好，唔似落「鬆肉粉」咁鬆晒無口感，但牛味欠奉，小小薯格格墊底，多啲更好，反而啲脆肉瓜幾好食。晚餐有甜品送，意外驚喜係雪糕，仲以為會係啫喱。老牌店係有佢哋嘅水準，未必話佰份佰滿分，但整體質素都一定令你滿意。P.S.有啲好奇係,如果唔叫晚餐，散叫西冷牛扒，店員話係碟上，無得鐵板上，但晚餐帶子西冷牛扒就得，可以鐵板上，呢個係乜嘢邏輯，但係餐牌入面個圖係鐵板，費解？！回頭度：8/10