影片
以上資料只供參考, 請與餐廳確認詳情
呢間粉麵都已經開咗好多年，間唔時都會食佢，不過好少堂食，因為其實佢啲位唔係幾好坐之餘仲有啲污糟，不過今日趕時間就冇辦法。今次叫咗牛腩魚皮餃雙拼河粉加檸檬茶，就咁望落去量都幾多，但係夾起就見到佢有一半嘅牛腩都係薄切切咁樣，而且係瘦嘅，食落去就真係麻麻啦。魚皮餃有三粒，份量算多，但係食落去唔係好夠魚味，同其他舖頭嘅魚皮餃爭少少。檸檬茶茶底OK，係值得加分嘅地方。埋單$51尚算OK，不過如果過黎食嘅話就唔推介食牛腩啦，叫崩沙腩會比較好。
繼續閱讀
今日收工又做孤獨的美食家自己搵食，係天水圍想食下粉麵無幾多選擇，行黎新北江呢間金銘都無乜點食過，見有位就坐底先啦。餐廳環境一眼望晒，好開揚，坐底睇下餐牌，價錢比一般既粉麵店較為貴，但如果食物質素好就貴都值得，咁就一試究竟啦。六星級崩沙牛腩河今日一於食返我最愛既崩沙腩，佢仲要講到話係六星級，就試下係咪先，先講講牛腩大約有7-8件，切得都幾大塊，食落無雪味，不過質地比較老，比較鞋口，好在都夠腍，同帶少少筋位，質素要講六星級就一定唔係，勝在夠大件，河粉係比較幼身果種，夾都算夾到但比較易斷，未去到碎濕濕果種，叫做合格啦，湯底黎講唔會好咸，起碼食完唔會好口渴，ok既，另外我加左8蚊將個菜加底，加完都有超過10條生菜食下，但無得分開上成碗黎。整體黎講金銘定價比較高，質素比較普通，相對性價比偏低，但未至於食到講粗口，所以我覺得係潮式粉麵店黎講只屬中下水準，環境方面去行商場中央冷氣，環境比較局促，食到都出晒汗，好熱，店員既態度相算不錯，問野都會好好咁答唔會唔耐煩果隻，係成日係度吹水比較大聲d。
繼續閱讀
📍金銘潮州粉麵（天水圍）-#5🫶🏻係最高 環境：🫶🏻🫶🏻🫶🏻🫶🏻食物：🫶🏻🫶🏻🫶🏻🫶🏻🫶🏻回頭率：🫶🏻🫶🏻🫶🏻🫶🏻🫶🏻服務態度：🫶🏻🫶🏻🫶🏻🫶🏻-牛腩河粉 -$46今次已經係第二次食！~\(≧▽≦)/~ 佢每件牛腩都係好淋 好入味 食完真係會每次經過都想再食 唔好睇相以為佢好細碗 食完都好飽架🤤 豬手麵 -$46今次都試左佢嘅豬手 平均一碗會有4塊豬手 而且上菜嘅時候會有埋個細碟比你放骨 唔駛放落枱面 佢嘅豬手都好入味 食到有滿滿嘅骨膠原🥹🥺我地兩次都係星期六嘅3/4點去食 所以都唔需要排隊 經過天水圍嘅朋友 又中意食粉麵 就要試下啦
繼續閱讀
雖然好近屋企，但未食過！次次經過都滿座，以為係普通嘢，因為佢嘅位置麻麻地。今日放假見人少少地，就入去試下，點知：牛腩夠冧，米線又彈牙，份量又超級多，因為我嘅食量好大，爭d都食唔晒，一般女仔應該係食唔晒，服務態度很好，奶茶夠滑，佢哋嘅辣椒油超級正👍🏻
繼續閱讀
就算出面食幾多間牛腩河都覺得金銘好食d 今次係私心推介 因為以前份工收零晨 小巴經過金銘都會係紅橋落車車一碗先返屋企訓 哈哈 轉左工之後好好彩 金銘都跟住我係天水圍開左分店 雖然分店不見總店甘可以保持水準 不過河粉依舊爽滑 湯頭超濃縮牛骨精華 食完真係好精神 又好開心 我身邊朋友都俾我推介左去食 今日我係圖書館遇上我死黨所以我同佢講左我岩岩食完金銘 之後佢要我陪佢再去食返碗 超好笑 我每次叫餸都有少少唔同 但都不離牛腩加多一款餸 同埋要多蔥加辣油 店員會用湯匙盛起蔥花 甘唔鐘意食蔥既人客都可以自「走蔥」好聰明既做法 不過餐廳唔提供紙巾 大家一定要帶紙巾
繼續閱讀