金裝燉奶佬餐廳 (美孚新邨)

營業中

休息中

呢排成日留在家，晚餐主要食外賣，試咗好多新餐廳，今日試咗呢間金裝燉奶佬，點左喇沙雜錦湯米線，配吉列蝦、田園蝦餅及叉燒，聽落個配搭有啲奇怪，不過勝在大堆頭好似乜嘢都有咁。取回食物到家，第一時間試吓個湯底，超開心，係我鍾意嘅椰汁味重嘅喇沙湯底 yeah! 食物方面，吉列蝦沒有特別，叉燒係冇味嘅，田園蝦餅都冇乜味，米線亦都係普通嘅米線，全部野夾埋好似大家唔識咁，湯底雖然係我鍾意嘅椰汁味，但感覺味精超重，食完超口乾，全身都有唔自在嘅感覺。價錢方面，全部外賣都有八八折，咁多配菜算係咁啦，果腹而已。

叫咗個煎餃炸蝦羅宋湯通粉，真係好難食。先唔講賣相，啲煎餃炸蝦唔分開上，直接浸入個湯到，咁仲煎黎做咩，炸黎做咩，都算。啲餃子炸蝦都唔知擺咗幾耐，表果浸完全係凍既，更加唔好話個通粉啦⋯⋯本身已經中咗一次伏，不過唔熟美孚，無咩選擇，先焗住黎食。真係無下次

11月26日9:11pm我同一班朋友跑完步係荔枝角公園體育館出嚟，近近地就有一間，米入去食囉。一男一女係樓面，女的服務態度極差，要杯水都係到黑口黑面，話明9:30cut單，10pm close。ok fine, 我哋叫左兩set野，你只黎左一set就要我地埋單（因為要折數）。埋完之後另外個set就無黎到啦，我哋米追囉。女的語氣非常差且我哋問佢仲有啲咩即刻就咁走咗去 ,非常唔好老皮。你走我單跟住又話無湯無salad格硬屈我哋你上麥野我哋就要食麥野，改我單你又上得慢咁我食嘢梗係遲d架，但我地無過10pm喎，9:49pm佢就走埋嚟趕我哋走,嫌我地食得慢。我朋友問個女的你地收幾點，等我地下次唔黎食阻住佢收工。女同男既員工一齊怒啤我哋，話9:30 last order, 只可以坐幾個字。佢哋係咪有病啊？你遲上菜，又要人早食完，之前又話收10點，10點前就趕人？我朋友麥同佢嘈，佢仲發我地long 黎。個男既走出黎話：‘得，你哋可以繼續坐，係我哋既錯，得未？’🙄好似我哋老屈你咁，你覺得自己冇錯？我哋嬲到拉拉聲走，佢地仲怒啤我哋添🖕🏻

美孚好多食市，這舖是不少人去吃飯的地方，勝在價廉物美。我叫了一個焗豬扒飯外賣， 站在門外等了接近半小時。 入店舖一看， 只有大約三位 侍應負責 上菜、清潔和收銀， 非常忙碌， 各人都相當勤快。 眼看遠處的廚師也是忙過不停。 午市時間如此多人光顧， 工作人員人手緊拙， 最終令到食物上菜時間大為延遲。焗豬扒飯分量非常足夠，一整塊大豬扒橫鋪在飯上面，豬扒碎上，豬肉很軟身，咬下去唔會有渣，而且有濃郁的蕃茄味。飯是炒底，很香，還能看見一絲絲蛋花。 之前食過呢間鋪頭覺得食物太鹹， 但今次有改善。 算是物有所值。

首先想講d野食係ok既。但係由疫情爆發起，美孚萬事達廣場店服務欠佳。坐入d卡位入面舉手冇人招呼，剩係叫你等。隔離行既侍應寧願執枱都唔幫左你先。以前服務係好好既，好失望😖😖😖

美孚新邨，香港第一個大型私人屋苑，分八期，我是美孚街坊，一、二、五、六期都住過。美孚社區内有好幾间酒樓、餐廳，多數做街坊生意，和一些從新界西到美孚轉車的途人。美孚的餐飲配套，算可以的！比較弱的是甜品，尤其是中式糖水鋪，金裝燉奶佬是區内，少數供應中式糖水的茶餐廳，我喜歡海帶綠豆沙、椰汁黑糯米，很多時候，是為了吃碗糖水，滋潤一下，就會來金裝燉奶佬。早餐：我喜歡吃餐蛋公仔麵，配即磨咖啡，能量滿滿！午餐：我喜歡吃咖哩飯，豬扒、牛腩都不錯！薯仔是亮點！下午茶：台式肉燥飯很實惠！晚餐比較少來，因為食物比較油膩！總體算合格的店！

今日嚟到美孚金裝燉奶佬食午。同茶餐廳一樣好多選擇，但係今次我木板佢哋嗰個set lunch，食左個鰻魚米線。完全想像唔到鰻魚喺米線嗰度係咩味道。上台見到大大碗米線，但係啲面得半碗。我叫咗喇沙味湯底，味道都算唔錯。不過條蟹柳就出事。炸咗嘅蟹柳好感好奇怪，但係原條鰻魚就會出色，味道保持到，無俾湯沖走D味。雖然同湯底唔算太夾，不過當獨立兩個餸食都算唔錯。凍柑桔蜜好多冰同時又好甜，其實係咪要等啲冰融左先飲。平民價錢其實都算唔差。會再黎食👍🏻

太晚揾飯吃，就去左依間餐廳。職員既態度都好好(我們大概9:45pm)到鋪佢地關門時間前半小時-1小時左右點左兩個套餐食蔥油雞太多骨無肉肉燥飯同豬扒都可以接受最好食都係個沙拉

今朝叫左個牛油+花生醬厚多+凍奶茶，足足等了15-20分鐘，眼見其他遲過我黎d食客都已食緊，我就叫侍應替我跟下，叫左幾次都未到，终於黎到，一看之下，心唸比狗食都冇咁差，一塊冇边的乾爭爭的白麵包上面有pat花生酱，牛油要自己搽，賣相不討好中伏了一次，以後不再幫襯，咁既食物都可以攞出黎比人食

這天在長沙灣聚會後，特意走到美孚找地方吃晚餐，方便在那裡直接乘車回家。行了一圈，看到燉奶佬的二人套餐不錯，就決定在此吃。二人套餐$159，可選一款前菜及兩款小菜，配藜麥飯，奉送例湯及餐飲。滷水豆腐 - 前菜份量也不少例湯有蓮藕😋 ，健康味美紅燒花膠冬菇豆腐煲 - 花膠燜得軟腍入味，而且很足料👍，又有西蘭花🥦原汁蘿蔔牛腩煲 - 有牛筋牛腩，同樣燜得軟腍入味另加$10追加香蔥醬油生菜🥬只是藜麥飯只有零星幾粒藜麥😅

去完醫院探病，搭小巴落返黎！勁肚餓，於是同友人是但揀左間茶餐廳黎食晚餐貪佢快，靚，正！7:45去到，都唔駛點等位！本身坐2人卡位，我地兩個人咩晒背囊，都幾迫，職員主動提出我地轉去四人枱！星州炒米，無乜味，唔夠香濃，無乜鑊氣，係醒在夠大碟，蝦🦐好梅凍檸🍋茶少甜少冰，但無乜茶味，好少可茶記整凍檸茶都整得唔好味！ 利申：不嬲係茶記嗌開少甜少冰！見無乜菜食，所以加碟生菜+$10菠蘿🍍雞粒炒飯！朋友呢個碟我試左少少，好味d

好夜放工番到美孚已經10點，冇咩食店未關，見燉奶佬已經係除左麥當勞外唯一選擇，所以去左買外賣。9pm開始會有宵夜時間，餐牌上嘅野會相對平少少，但都四十幾蚊，加埋凍飲就接近$50一個餐喇。不過已比晚餐平叫左一個XO醬大蝦炒公仔麵。唔知係咪個大廚放假？呢個麵簡直唔係一個識煮野嘅人炒出黎1）蝦一啲都唔爽、亦唔係粉，係硬又乾好似正常蝦同蝦米中間個狀態咁⋯咁嘅狀態真係第一次食，另外亦全無蝦味。若果我係喺大陸食到呢隻蝦，我會完全懷疑係咪假蝦⋯但咁大個香港飲食集團我相信一定唔會。相信真係師傅問題2）麵炒得唔勻，有啲位冇色，全個麵亦豪無獲氣。喺我真係超肚餓嘅狀態，我先食到個麵。當然蝦就真係食左一啖就不了⋯

今早落好大雨，見美孚地鐵站口燉奶佬餐廳冇咩人，入去避雨兼食早餐，一入去已有侍應招呼及落單，點了香茅煎豬扒旦面及熱檸茶$37，5分鐘內送到，味道尚可，雖沒有驚喜，但勝在環境及座位舒適，送餐也快。

金裝燉奶佬最近推出$17的下午茶套餐，包括炸雞肶、奶油多士和香檸薏米水。之前吃過一次，我給它滿分，炸雞肶外脆內軟味道好，奶油多士也夠脆的，香檸薏米水夠冰涼，不太甜，有淡淡的檸檬和薏米香味。這次再嚐，質素意大跌！先送上的是凍香檸薏米水，可是一摸杯子，飲品竟是暖的。雖有冰塊，但不多，全部冰塊極速融化後，飲品也只是微凍。在三十多度高溫下，雖有冷氣，但這杯冷飲也是不合格的。雞比也水準大跌，皮不脆，肉還算嫩但沒什麼味道。唯一保持水準的是多士，仍香脆好味，加了煉奶和牛油，極邪惡！我覺得一家食店要保持水準，才是經營之道。

中午叫外賣，等了一會兒便可以拿走，速度快。點了一個豬排撈米線，米線味道剛好，不會太鹹。米線很彈牙，完全入味。但豬排很重味，吃完要喝很多水。整體份量有點少，吃完只是飽了8成。熱華田有用心攪拌過，不會像其他餐廳那樣，所有粉都沉底，而且變硬。