金莎冰室

真係估唔到，街坊生意都做得好差，唔講好唔好食，半隻豬手上桌，見到豬手邊有毛，以為只小部份，點知後來發現 黑椒汁下，成隻豬手都有毛，同餐廳反映，收返入廚房，原來用 煤氣爐燒d毛再出返來，成陣味，仲要用煤氣爐燒，真係想食死人。已經食唔到豬皮。真係好失望，冇下次！邊有餐廳用有毛豬手去做食材，又唔去毛，直接煮熟。😑第一次出去食豬手，成隻豬手都係毛😑😑仲有間鋪，伙記的態度勁差，呢間鋪都係做街坊生意，但點返轉頭，第一次食，亦是最後一次。…查看更多

12.05.2021 呢間金莎冰室之前喺田景，食過晚餐幾次，宜家轉左去中央廣場。今次見deliveroo 做七折，真係抵到爛🤣，大大塊牛扒餐，包飲品，$62，仲有七折，而且味道不錯。另外同事叫飯/意粉，「菠菜汁海鮮燴意粉」、「黑松露卡邦尼意粉」同「香草龍利柳飯」本身賣相應該不俗，味道濃淡各人口味不同；但惟一包裝真係唔得，玩層層疊，結果其他同事用錫紙包裝嗰啲意粉/飯全部壓扁哂！🤭因為落單時無得留remark，專登打電話去叫「凍檸茶走甜、薯菜走薯條、醬汁另上」，餐廳職員一一仔細記低，而且全部做齊；看似簡單小事，唔好以為無理由做唔到，但事實好幾次有啲餐廳即使留remark、打埋電話，最後送到嚟都無做到，所以今次值得讚下餐廳姐姐同廚房哥哥。…查看更多

叫咗外賣，總共係2份套餐。但係店員執漏左一份餐湯同埋兩份甜品於是我哋打去問佢點處理我哋提出叫佢補送返，佢唔願意退翻部份錢，佢都唔願意咁我哋問你想點處理？女店員直指「總之今日唔會送畀你」收線時仲要大大力cut人線從來未見過態度咁差的餐廳自己執漏畀個客 重要比氣個客受舖頭位置已經偏遠態度仲要咁差唔怪得知堂食都無人食自問都算係熟客仔，成日叫平時係個男店員，態度好好多但依個女店員態度差劣浪費晒廚師的一番心機…查看更多

好耐無食呢啲懷舊風鐵板扒房，又平又抵食。店面唔大，我地揀左bar 枱坐，都坐得幾舒服。一個餐有齊餐湯，餐包，野飲同甜品，大滿足。忌廉湯個味好懷舊，好耐無飲過，好味～個碗都好靚！餐包係蒜蓉包，焗得唔燶又鬆化，讚！加多左個淨蒜蓉包食～叫左個雞扒焗飯，加左2粒吉列帶子同珍寶腸，跟洋蔥汁，新鮮焗出黎好好味！洋蔥汁都較得唔錯，飯夠乾爽，如果有炒飯底會更好，而雞扒都好嫩滑！男胖子就食12oz 嘅紐西蘭牛扒，真係好大塊，一塊鐵板都裝唔哂，淋左黑椒汁喳喳聲勁香，肉質都唔錯，鬆軟得黎又好香口，而個薯條都係新鮮炸，好味～野飲就揀左熱杏霜同凍檸茶，有水準。甜品有啫喱同雪米糍揀，我地試左好少有得食嘅青檸啫喱，加埋花奶好味～…查看更多

今日同女友人放工後黎左屯門覓食， 經朋友介紹就去左金莎冰室, 我地黎到之後就發現原來呢間餐廳我之前食過架, 佢前身係係屯門市附近既村屋地鋪黎. 嗰陣已經覺得佢唔錯,底食夾大件，味道又唔錯好平均. 今次佢地搬左黎屯門中央廣場，我地依舊食返佢既港式風味. 只係佢環境唔同咗, 簡潔左同熱鬧左.. 今次我地叫左一個12安士既紐西蘭牛扒，跟黑椒汁配薯菜， 女友人就叫左個洋蔥汁焗雞扒飯..我地亦追加左蒜蓉包, 佢本身餐湯都有跟一塊, 但我地發覺好好味所以就叫多左一客.. 味道方面, 個牛扒好大塊，既鬆化又好濃牛肉味 點埋d黑椒汁真係完全無走樣 同之前係舊鋪食一樣既水準, 女友人就話個焗飯做得唔錯份量好多多到食唔晒..最後飲埋杯凍檸茶同熱杏霜已經好滿足. 點知原來佢仲有必殺甜品青檸啫喱.. 好fresh好清新既味道， 為我地呢個晚餐加上美滿既句號..…查看更多