金家樂茶餐廳

營業中

休息中

今天在此遇到一個身形高瘦、十分奇怪的侍應：無禮貌、扮做嘢、無心招呼客人、態度有問題，食物已到在他前面，還叫人出㚈等。請問等什麼？等其他侍應做埋佢果份？最後客人取外賣給櫃枱入袋！劣評！

伙記好唔掂，錯單又試過，唔落單行咗去又試過。有幾個無咁精叻最多漏單，但自己以為自己好醒果啲，特別係個人稱高佬嘅，咁寸咁掛住同啲熟客講波認叻，錯咗對唔住都唔識講，一係寸你幾句又笠水扮熟。講真茶記由細食大，落單食飯已經無乜需要交流，又唔係要你介紹吓個餐牌每個菜點煮，唔知點解要俾你寸。晚市食物質素無問題，可以話係有水準，性價比高，午市普通，早餐唔使試。睇波係好抵，但要忍到班伙記寸爆同不知所謂嘅服務，另外場內大量煙民包括個老闆，熟客可能唔介意，我幫襯咗好多年依家都決定唔再幫襯

我係鐘意食茶餐廳既人羣✋✋✋✋由期係下午茶三點三哩間金家樂係我幫襯開既鍾意佢下午茶多選擇，價錢又抵喎今日揀咗佢個A+B+C下午茶餐A:炸雞翼 B:火腿奄列 C:生菜魚肉 +熱檸水只係$31真心抵！！而且份量都好大份，睇下佢碗生菜魚肉好大碗架，炸雞翼都好大隻，只係嗰火腿奄列有啲失色！

話時話，應該都有2年以上冇嚟過食早餐！返到嚟食當然食我最鍾意嘅沙嗲牛肉麵啦！餐牌，環境，伙記，都冇乜點變😂依舊咁熱鬧🤣 茶餐廳經常出現嘅嘈到一個點！🤣 不過接受唔到😂早餐：好好味嘅沙嗲牛肉麵火腿煎蛋

好耐無食過茶餐廳，個日經過見到午餐例牌好似幾正就入咗去。環境同一般茶餐廳差唔多，不過入座率就明顯高過同一條街既其他茶餐廳。坐低無耐啲伙記就會過黎落單。因為日日都食飯所以就嗌咗個燒汁菠蘿火腿扒意粉同凍奶茶。等左幾分鐘就先上咗杯凍奶茶，再等多陣就上埋個意粉。個意粉煮得啱啱好，唔會淋曬，份扒都大大舊，男人食都夠曬飽。雖然啲汁比較多，同埋有少少鹹，但唔撈曬黎食都ok。杯奶茶都好正！唔會好似其他普遍既茶餐廳勁甜或者無茶味。黎緊得閒都再會去幫襯！

之前經過的時候，都看到餐牌上面只有燒味飯以及其他午市頹飯，這天看到時鐘，即使過了5分鐘，職員亦表示「還有早餐，請到內裏坐下」，於是第一次一試。早餐的選擇也不少，但是要沙嗲牛肉麵竟然要加$3 ，原來連沙嗲牛肉麵也算是矜貴的早餐嗎🤔。沙嗲牛肉麵，湯底都算是濃郁，味道不算很咸又很濃味味精，麵條也都不算煮到完全軟林，保持少許彈力；又不會是冷凍了的沙嗲醬放在熱麵上邊，算是挺有誠意的除了有煎蛋之外，可以選擇要多士、麵包、還有蘿蔔糕。的確，大部份餐廳的早餐或常餐，不是給你多士，便是方包，有蘿蔔糕選擇的應該寥寥可數，因此便豁然一試。蘿蔔糕輕煎，還算大大塊，最少比起吃麵包來得更特別。煎蛋的質素也不錯，內裏保持流心狀態。友人的茶走，味道不夠濃郁，奶茶亦都欠奉，相比起咖啡還要遜色。我的咖啡走，反而味道比較香濃，早晨提神的不錯飲料。

今日返老家大角咀探媽媽，化身成外賣仔，買幾味孝母親大人。由於金家樂外賣份量十足，預左三樣粉麵飯加兩個菜就夠一家大細六個人食，相當抵食。時蔬有白菜、菜心、菠菜，就叫左蒜蓉炒菜心同埋金銀蛋浸菠菜。十一點左右落柯打，正值係週日早餐的繁忙時段，只見老闆娘忙著包裹源源不絕的早餐外賣，又要忙於應對響個不停的電話，還要時不時處理客人找數埋單，同時不忘吆喝激勵在場樓面事氣，可謂忙得不可開交，做茶記老闆娘真係唔簡單！結果都係等左十五分鐘就有處理好我的午餐柯打，真的不得不佩服金家樂的高效率！入返正題，金銀蛋浸菠菜真係有水準，菠菜含豐富鐵質，最岩女仕們食用，而菠菜浸得相當淋，配合咸蛋黃的咸香和皮蛋獨特的香味，口感十分豐富！最愛佢炒至金黃的蒜粒浸淫响上湯入面，超好味！而蒜蓉炒菜心大路野又點會難到功夫紮實的廚師呢。至於午餐A咕嚕龍鳯球炒飯底，「龍」者蝦也，「鳯」者雞也，兩球用油爆至脆身再用咕嚕汁噲兩噲上碟，蝦肉同雞肉的火候分別掌握得好，心思夠之餘仲好考功夫。用平民價錢食到咁多味小菜，外賣自取又可以安坐家中慢慢品嘗茶餐廳風味，難怪金家樂一直得到大角咀街坊鼎力支持！

2018ㄧ9ㄧ24 /17:00入門，塲內清閒，冇人接待，自己揾位座，遞手示意寫嘢，侍應態度欠佳，落單有碟頭飯及凍飲，全屬正價，廚房出品時間正常，上枱食物仲熱，埋單到櫃位比錢，收銀冇友善態度，也沒有客氣用語.(欠奉)

大角咀係朕長大的地方，大同新邨一帶的食肆林立，尤如少林木人巷，能夠响呢樹屹立超過三十年的金家樂一定有返咁上下。朕最喜歡港式茶餐廳的靈活多變，周身刀張張利，而金家樂除左小炒出色外，燒味都係佢強項。黎得茶餐廳，環境嘈吵就預左，重點係食物味道同埋錢買唔到嘅回憶！難得餐牌上有燒味雙拼粉麵，一於叫個叉雞米。待應覆單要切雞或油雞，睇得出呢度燒味幾咁講究，抵讚！一黎到呢碗叉雞米睇落平平無奇，啜啖靚湯便知底蘊！有別於一般湯底，呢個粉麵湯好飲，加上叉燒整齊排列於米粉之上，切雞部份亦係朕最喜歡的雞翅膀！米粉用上廣東米粉，火候控制得宜，唔會浸過龍一夾就散，而且非常掛湯，要做到以上各點經已唔簡單！食完成碗米粉有種感覺叫「和暖」，既似春日下沉睡未醒的海棠，又似初戀令人如沐春風！黎到茶記當然唔少得嘆返杯港式奶茶，我鍾意佢個茶膽沒有暗戀的苦澀味，茶葉夠香奶夠滑，茶味淳厚得黎仲有少少回甘，第二樹真係飲唔返！

尋日太懶，唔想岀街買宵夜，但又好肚餓，所以就叫咗男朋友去買外賣，想食中菜又想有鍋氣既就揀左金家樂了😍 金家樂喺大角咀超級岀名～✌🏻✌🏻 好多街坊都返去幫襯，以前住大角咀嘅時候已經晚晚滿座，連我男朋友都好鍾意去打躉🤣🤣 服務好好，見你入嚟就好熱情咁樣照顧你，有時仲要記得你幾耐嚟過🤣🤣🤣 好誇張，我男朋友就叫左排骨河，佢食左一半，之後就打包返黎俾我做宵夜😂 呢間係開到12點架👍🏻👍🏻 好正！返到黎都係熱既～ 排骨好大舊😍 好正，唔會太硬好難咬，河粉好好味👍🏻 真係傳統好闊既河粉，軟身，配汁，正

好鍾意食小炒，不過唔係好多地方好食！如果係又平又正又方便，一定係去金家樂！服務好有街坊感覺，會記得您黎過，好好招呼👍🏻 雖然衛生就有待改善，環境因為太多人幫襯，會有時趕唔切執枱～ 但係上菜快，味道都唔錯！上星期啱啱食完，最鍾意就係魚香茄子煲！好難搵到一間茄子整得林身，唔會太硬～ 肉碎俾得好多，啲汁入晒去，一咬就熱辣辣既汁咇岀黎，好好味！另外，鍾意既又有葺葱覇王雞佢真係俾足料你，肉好嫩，一咬就入口，好滑！皮唔多肥膏，好好味👍🏻菜都好食，不過都係小炒好食啲👍🏻

晚餐既好選擇之一，有大家咀呢間老字號茶餐廳係食極都唔厭 最近又去左一次，同住附近朋友聚聚，金家樂選擇好多，叫得岀既都有得食就算menu冇都叫到，好勁！可能師傅做太多年，有反咁上下我叫左金銀蛋莧菜同豉椒排骨炒麵！ 好細心，因為服務員會拎一盆滾水，被客人洗碗！等左大概10分鐘左右，菜就已經到啦！金銀蛋莧菜味道比期望既好味！ 皮蛋肉碎都好多~ 好足料！莧菜好入味，夠鹹度，唔淡口至於豉椒排骨炒麵，汁整得好好，排骨好大舊，又唔難咬，好入味～ 炒麵好特別，炒到脆口，脆脆地好好味😍❤️好推介！環境好闊落，只係衛生有待進步

今日晏晝喺大角咀做嘢，所以順便喺附近搵好嘢食！不嬲都知大全街好多好味嘅餐廳～ 但係都係揀咗傳統嘅飯店金家樂 呢間其實都幫襯左幾次！因為質素唔算好差！保持水準，亦都係附近都幾受歡迎嘅飯店 因為過咗午飯時間，雖然自己一個，但係都可以坐四人卡位 真係好好！服務員好好，見我坐低，即刻招呼我 我叫咗豉椒排骨炒麵之前食過一次，回味無窮！因為佢嘅炒麵整到博博脆 好少見到炒麵整得咁好！未去到媽咪麵嘅狀態，但係比媽咪麵軟身少少排骨嘅份量好多！最好味係佢嘅汁！同面一齊食，簡直爽～ 係會越食越想食😍🤣 面嘅中間同汁溝埋左一齊，變得林身！更好食好推介😍❤️

分享一下自己其中一個最愛飯腳點~位於大角咀大同新村街坊茶記，坐位舒適，通常兩個人去都會比卡位坐，10分周到大部份小炒都鑊氣十足，味道不錯本人誠意推介: 薑蔥霸王雞，咕嚕雞球，豉椒炒聖子，魚香茄子煲; 當然，凍奶茶必點！不過環境較嘈吵，繁忙時間要等位！但係其實都好係會有位，啱晒一家大細之餘，情侶偶爾拍拖都適合~下午茶餐選擇比較多，比一般茶餐廳多元化而晚餐就諗到咩餸都order到，即使餐牌搵唔到都可以叫！平均個人消費$80-100, 還算合理，係平民餐廳中既好選擇！

大角咀原來好多野食，真係大鄉里呀，無計！哩度交通唔方便嘛，所以都好少黎哩頭喔🤫🤫🤫朋友話想食小菜，行過哩條街見到好多食店，而且哩間又係食小菜既，我嗰肚仔餓到打晒鼓，一於就食呢間啦，我地六嗰人叫咗八碟餸，唔知以為我哋饑荒呀🤩首先叫左碟白切雞，小菜王，粉絲沙嗲肥牛鐵板燒，椒鹽鮮魷，京都骨，魚香茄子煲，粟米斑塊同埋推介嘅雞煲，由於太肚餓嘅關係，淨係影咗白切雞，然後就掛住食🤭🤭🤭首先碟白切雞又真係幾好食喎，啲雞好滑溜，好有雞味！個肥牛鐵板燒一上枱就查查聲，新鮮滾熱辣，加埋粉絲索晒啲汁，送飯一流！！椒鹽鮮魷炸到脆卜卜，味道啱啱好，不停食不停食，好怕會喉嚨痛添🤩🤩🤩食完最後仲有糖水送，今日係紫米露咋咋💕💕總體而言，呢間小菜好出色呀！