越萊 (廟街)

營業中

休息中

見到有咁多正評，於是一試，點了米紙卷，炸春卷，安南豬軟骨飯，同自選湯河。米紙卷味道超淡，其中有舊米紙位置好硬。個飯完全唔好食，白飯入口好奇怪，好濕又太淋，個豬軟骨完全無味，啲汁又唔夠味。大伏我自選湯河選了豬軟骨配豬肉丸清雞湯加河粉 ，豬軟骨中伏，豬肉丸好OK。春卷無特別飲品無特別價錢比較平，真係一分錢一分貨。個總括：唔會返轉頭。有其他更好選擇。

呢間越萊其實我已經聽係尖沙咀返工既朋友提過幾次，今日黎到佐敦，一於試下先！🥳店舖裝修充滿越南風格，有d 草帽，吊燈都係竹制💚食物種類亦都好多，有越南名物撈檬、湯河、扎肉包、唔同種類既小食（蝦餅、米紙卷等等)，最重點係性價比超高，d 小食廿零蚊一款，好啱少吃多滋味！😋叫左個香茅牛肉撈檬撈檬汁開胃一流，酸甜味適中，牛肉亦好有𡁻口，份量都好慷慨。檬粉撈埋啲汁再加豐富配料（青檸，香葉，芽菜等）一齊食，滿足另外叫左個河內蝦仁米紙卷 蝦仁大大隻，不錯仲叫左個塗山海蜇沙律呢個真係全餐最驚喜，因為好少食越式野有海蜇做主角配料又超豐富，夠晒提味而且份量極大，如果我預知到係呢個份量，我應該唔會叫其他野食😂最後再叫左個越式熱咖啡為呢餐刺激味覺既盛宴留下一個完美既結幕🧡

第一次喺佐敦食越南野，餐廳隔局四四正正。嚟到先叫野食！隨餐會附送一杯飲品，揀咗熱柑橘蜜，依家天氣凍凍地飲就最啱啦！揀咗自選三餸牛骨湯河粉（雞絲、生牛肉、扎肉）睇相就知啲餸幾豐富 份量幾多啦😋 扎肉好厚實 好有口感，推介！生牛肉大片嫩滑，雞絲就偏瘦。加埋生芽菜同青檸 可以中和湯底嘅鹹鮮味！值得一提，枱面有一支橙色嘅辣醬，好好味，可以試吓加喺牛肉上面食！跟餐仲有我最愛嘅大豆芽，非常清爽！另外仲叫咗碗招牌牛萊了，有牛腩，牛筋，生牛肉，牛丸等等。首先最令人驚喜嘅係佢嘅牛丸! 多汁到滴晒油！牛腩係坑腩位，食落軟冧冇渣有牛味，好食。牛筋可以望到煮得幾咁冧。充滿骨膠原！生牛肉唔會過老，而且完全唔會痴牙，十分過癮。小食叫咗米紙卷，配上自家製沾汁，酸酸甜甜！

今日想食越式撈米蒙，上openrice 揾推介。尼間大把好評，仲要主力賣粉，完全中啱心水，立即用app order， 要咗一份下午茶：外賣燒扎肉撈米蒙粉，送兩隻牛油雞翼，一杯咸柑桔， 我在加多兩隻蝦餅。外賣燒扎肉撈米蒙粉， 本應係十分安全嘅選擇。 首先檬粉幾爽口 但完全冇味， 加上魚露汁亦好淡 加曬全部汁都係好淡。 扎肉亦都冇燒過，質地偏硬。另外分開點嘅 蝦餅 水準以下。 唯一係跟餐嘅牛油雞翼 算有返啲水準。 以咁嘅價錢嘅下午茶，屬於份量十足。 味道嘅話 可能需要選擇其他食物。

安格斯牛魔王牛骨湯粉牛骨湯底牛味淡河粉偏軟，感覺只是厚小小嘅港式湯河，完全沒有越南河粉的彈性牛肉份量都算足，可惜只得面頭露出湯面的牛肉夠生，被湯浸住的上枱已經全熟，明顯湯份量過多了，蓋住牛肉，生熟比例約是2:8，應該取名為牛肉片河，並非越南生牛河其實喺香港試過好幾間各區出名的越式牛河，無一間好食，呢間餐廳亦不外如是，Pho同樣是有其型而無其神湯底、河粉、牛肉都不合格蒜香牛油雞翼味偏甜，炸粉厚，骨黑，肉偏鞋，明顯炸過龍紅酒燴牛尾飯紅酒會牛尾味道正常，牛炆得夠稔，蕃茄味重飯另上，是老人院白飯，超濕軟佐敦說得上是一個美食雲集的地方，這間餐廳的質素是一間越式茶餐廳OpenRice上竟然都有不少好評究竟是香港人要求低，還是我期望過高呢？

逛完西九龍海濱嚟咗佐敦覓食🍽~可惜兩間我食開嘅上海舖都執晒笠,隨便找一間餐廳~越南嘢最鍾意食春卷,呢間嘅春卷夠脆,入面唔會覺得食到成口肥豬肉咁,都唔錯~加埋生菜同酸酸甜甜嘅醬汁幾清爽🥬~個味道略鹹一點🧂,不過可能通菜已經過咗季,實在非常老😶!我諗一碟有大半都係食唔到,得啲葉嘅部份比較可以食...越南嘢我最鍾意食生牛肉粉🍜,因為個湯好香,而生牛肉好嫩滑唔會韌🐮~呢度個湯都唔錯,牛肉份量亦足~食撈檬最怕個汁太酸或怪味,呢度個汁都唔錯,帶少少甜味唔太酸~重點佢嘅豬扒好香口🐷,而蝦餅都好食🦐,鍾意食肉嘅朋友就最啱~呢間店喺廟街好易搵,但位置唔算多,比較受歡迎,有可能要等位👯‍♀️👯

我好少去廟街一帶，早排陪朋友去嗰頭買嘢，估唔到廟街竟然有好多好西食，朋友喺芸芸眾餐廳入邊，揀咗呢間越萊嘅，果然冇令到我地失望。主食我地叫咗越萊精選火車頭河粉，上到黎嗰下真係嚇一嚇，因為佢嘅size實在太驚人，分量應該係jumbo size。佢湯底真係好令我地驚艷，完全飲得出係落足功夫，香料味恰到好處，扎肉同牛丸都好好食。仲有個法式豬扒包，個包勁正，同茶記係兩回事。小食我地叫咗一大堆，樣樣都睇得又打得。海防炸蝦餅外酥內嫩，蝦肉彈牙唔欺場。越萊自製手工春卷酥脆可口，尤其鍾意餐廳附上嘅醬汁，完美解膩之餘仲好有越南風味。河內蝦仁米紙卷煙煙韌韌，配上佐菜嘅醃蘿白絲係絕配。仲有食越南嘢嘅必然之選—蒜香牛油雞翼，我覺得呢個係最睇得出一間越南餐廳嘅質素如何嘅菜式，而呢度嘅蒜香牛油雞翼，我會比100分。朋友最喜歡係潘良帶子明蝦，佢話口感豐富。我最鍾意就係串燒雞，又嫩又juicy。

越萊小火車頭（$58）特飲紅豆冰（+$4）本來以為下午茶餐，又叫“小”火車頭，都唔會大碗得去邊，點知上枱嚇咗吓，好大碗。配料有生牛肉（竟然有4片）、牛腩（勁有牛味）、牛筋（煮得好淋又入味）、牛丸（彈牙得嚟裡面又有汁）、扎肉、豆卜、雞絲（比較嚡）、豬軟骨（大大舊，夠味），最好食係牛腩同牛丸，當然其他都唔錯；另外仲有白蘿蔔、生菜、洋蔥、炸蒜、芽菜、九層塔、蔥花，認真大堆頭；牛骨湯湯底好清，微咸，飲咗半碗（事後冇勁口渴）；可選河粉/檬粉，揀咗前者，份量都唔少。紅豆冰正常，紅豆唔算大粒，但夠淋夠粉。雞絲雞骨湯粉（$42）柑桔蜜雞絲正常；雞湯湯底同樣好清，微甜；預設係河粉，份量同樣好多。越萊蒜香牛油雞翼，牛油味足，一堆蒜蓉放係面，雞翼炸得啱啱好，香口唔乾身，好味道。

佐敦真係有好多餐廳🍴每次經過佐敦都好多餐廳非常吸引其中呢間越南菜pho食過幾次份量非常好大 👍🏼雖然位置唔多，如果唔係繁忙時間都有位我哋叫咗經典撈mo入邊有炸豬頸肉，豬排，涼拌牛肉,肉質亦鮮嫩，整體來講口感豐富ar，就連河粉吸湯能力也非常出色☺️Yummy!!之後我另外亦豬頸肉煎蛋飯豬頸肉真係嫩 唔會鞋 肉質鬆軟多汁，必食！另外加咗兩款小食菜心苗同埋蝦餅。蝦餅不厚粉， 必食！午餐就可以用優惠價錢加了抵食.,,值得試吓！👍🏼蝦餅彈牙 香脆配甜酸醬一流👍🏼👍🏼另外推介紅豆椰汁冰飲落似椰汁牛奶 都非常香濃架店內仲有好多特色嘢食例如越南發包, 有吉列豬扒 / 炸魚柳/ 或者扎肉不過兩個人食唔到太多嘢下次再試下先

疫情以來，基本上甚少出遠門，連東南亞國家也去不了，像泰國，越南，新加坡這些以前經常到訪之地，都已經有數年不曾踏足，偶爾想起當美食，都會懷念不已。今天途經廟街，看到有越南菜館名“越萊”，想到久未嚐越南牛肉河之味，食指一動，馬上踏步進去。店面不大，但相當雅緻，入座時客人不多，但坐下之後，十分鐘內來了四五枱客人，不知是否由我带旺先點了一個開胃前菜魷魚圈沙律，再來小吃春卷一份，然後是我最喜愛的生牛肉河，還加了牛筋，沙律酸酸甜甜，開胃醒神，春卷不是平常吃的越南春卷，而是叫三岐珍寶蝦仁春卷，也相當不俗。主菜生牛肉河，牛肉大大塊，牛筋軟熟腍糯，份量也不少，吃得我十分滿足。至於人們常說的正宗不正宗，個人以為好吃才是大前提，你們說呢？

平時好少去油尖旺一帶，估唔到今日行過廟街，居然發覺都幾多嘢食，有好多唔同嘅新餐廳🤩🤩見到有個招牌都幾光鮮，咁就入去試吓啦！間餐廳係賣越南嘢嘅，越南河粉、撈蒙、同埋其他小食。叫咗個越南河粉，第一眼以為佢價格比較貴，差不多$70一碗，點知一嚟到，就發覺原來係勁大碗，啲配料多到就嚟瀉出嚟，湯底清而不膩，最鍾意係個牛丸，有肉汁係個口爆岀黎。另外我哋仲叫咗個越式法包，係吉列豬扒，有青瓜同蕃茄，口感幾fresh。小食就多囉：叫咗串燒雞、春卷、蝦餅、米紙卷同茄子。茄子口感就最豐富：有帶子同埋鮮蝦，令人非常滿足！而且所有小食，都配有特色嘅器皿裝住，感覺好精緻！叫咗咁多嘢食，埋單都係$300唔夠，真係好抵食！

自己一個諗住夜晚快食，星期日差唔多八點入去時成間舖得一枱客，因為佢地冇閂門但大門口其實對住車路，唔想坐近門口嘅四人枱，問女待應我可否坐隔離入啲張兩人枱，女待應堅持我唔得坐張兩人枱，叫我坐張中間隔左板嘅四人枱，因為要可能要留四人位（我都唔明佢個邏輯？），態度差都可能係個別員工問題，我就算啦坐低落左單。野食普通，之後食到一半，我叫個撈濛個雞串竟然唔熟，兩串都唔熟！叫番頭先嗰個女待應同佢講，佢竟然黑面😳再立即想拎走我全個碗（我串雞已放左喺枱面，係都係補番串雞俾我啦，點解要收我未食完嘅碗？），講完，永久blacklist。

佐敦一向都臥虎藏龍，食店到處都有，要搵食真係話都冇咁易，今晚去食越南菜，越萊。餐廳位於佐敦廟街，近尖沙咀方向，夠哂便利。.🍚 牛萊了我揀咗檬粉，牛萊了即係牛肉雜錦，包括有生牛肉，牛腩，牛筋，牛丸，牛𦟌，十分豐富。湯底清甜，食得出用左大量牛骨去煮，生牛肉慢慢浸煮，夠哂嫩滑。蘿蔔超級甜，無渣 ，入味。牛丸好強牛肉味，上乘之作。.🍚 順化香辣湯粉同樣點左檬粉，個人口味鐘意檬粉口感，有肉碎，扎肉，牛𦟌，牛丸，蘿蔔，仲配菜心苗一碟，十分划算。味道方面，湯底又香又辣，夠哂惹味。鐘意食辣就唔好錯過。.🍚 越萊自製手工春卷食越南菜，越南春卷又點少得。春卷炸得皮夠脆，配上青瓜同生菜一齊食，平衡番個油膩感。

之前都嚟過一次食嘅，其實都好覆桌，但成日都好似好多人咁，今次難得少人排，就等咗15分鐘就入嚟叫咗個牛肉湯底嘅2餸河，生牛肉同牛筋，生牛肉我覺得有啲過硬，但有牛味嘅，上枱嘅時候都係半生嘅，而牛筋就煙煙靭靭，幾好之後叫咗個setdo撈檬，個燒牛肉幾香，豬扒都係好香口，豬頸肉就乾咗啲，我覺得個撈檬汁就差咗啲，唔出色。加12蚊有哩個，唔記得叫咩，但一般冇乜味但可能多人食水準感覺冇以前咁好，同埋張枱 黐立立🤢要自己抹

第二次黎食越萊，翻兜係因為覺得呢度嘅嘢性價比好高，好多嘢都係大件夾抵食！今次叫咗個牛萊了湯金邊粉同埋經典撈檬，以呢個價錢平時晚市都只會係出面食到一個普通既dish,呢到就已經可以叫到個升級版比較多肉同高級既版本！牛萊了係高級牛火車頭河粉，佢既特色係有兩粒超好味，彈牙充滿肉汁既和牛牛丸！淨係呢兩粒丸都抵番曬個價！而成碗粉無論係粉本身定係肉都份量十足！經典撈檬就係豬頸肉，豬扒同牛肉既合集，你會見到面頭滿滿都係肉，而蜜汁燒豬頸肉仲有少少香脆，非常入味！最後要推介既就係呢到著名既牛油雞翼啦！真係食過番尋味！香脆既雞翼用輕炸既方式，再加上牛油，飽滿肉汁加上牛油香咬落去，果種味道加香脆口感真係一試難忘！非常推薦！