豐盛人家

營業中

休息中

荔枝角區絕對值得一試既小店，本人已經多次回訪！野食好味又唔會太濃味，感覺係比較健康既，而且店員服務態度親切，好有家的感覺。餐點選擇多，佢地仲不時會研發新菜式，每個月都有新野試！食左招牌牛四寶湯麵。湯底係好濃既肉+藥材味，試得出係真材實料。四寶分別係牛肉，牛展，牛丸同牛筋。牛肉軟淋入味但唔會散哂/柴，係肥瘦均勻既部位。牛展同牛丸正正常常。牛筋唔淋有咬口勁重膠質，岩唔鍾意淋到爛既人。餸既分量極多，多到見唔到D麵。麵質係幼麵，非常掛湯，剛送上檯即刻食係煙韌，浸耐左就會淋少少但都好味唔會變糊。結果當然係湯都飲哂。我覺得牛肉麵系列係呢間餐廳最好味，第一次黎必試。另外試左新既鹽焗雞脾飯。雞脾幫你切好方便食，肉質新鮮調味唔會太鹹，加埋佢地自製既蔥油，送飯食一流。野飲推介豆漿，係店家自製既，可以揀無糖/有糖，飲落同出面個D好唔同，十分清甜，聽講係蒸餾水整。跟個主食都只係+$6。