豆漿大王

營業中

休息中

本身諗住買外賣，企係收銀話外賣無人理，派位果個淨係處理啲打占攞位呀婆，又指返去收銀。行去收銀到個食客埋單打占，個呀姐就話人哋埋單姐，埋單就可以打占？外賣落單會用多你好多時間？已經無同啲打占攞位既呀婆呀伯爭，好聲好氣排隊仲要比你同事串，建議安排返排隊指引，同教返職員安排返先後，唔係老人家就大晒！

之前食過其他分店覺得唔錯就嚟沙田舖頭幫襯下 舖頭一朝早已經好多人 但係淨係見到一個後生妹妹忙東忙西一個人做幾份嘢 唔知係想慳人工定有其他原因 見到其他客人都係想搵人幫手落單都落唔到 等咗勁耐先食到野

豆漿大王回頭指數：⭐️⭐️⭐️⭐️推薦：鹹糍飯1. 味道：❤️❤️❤️❤️🤍2. 價錢：❤️❤️❤️❤️❤️3. 打卡：❤️❤️🤍🤍🤍4. 等候：❤️❤️❤️🤍🤍5. 位置：❤️❤️❤️❤️❤️食物：1. 午餐：上海排骨麵｜担担湯底｜熱豆漿｜$532. 鹹糍飯｜$20（還可以選擇+$升級份量）評價：◇担担湯底一般，排骨有些偏油，炸的一般♡熱豆漿自行加糖，可以選擇無糖，但豆味一般（平常喜歡特濃豆漿）♡鹹糍飯有層次感，喜歡相關配料會感到很滿足；還會幫忙切件，適合朋友一起分享地址：沙田橫壆街1-15號好運中心3樓3116號舖營業時間：8：30 - 22：00

已經係第四次幫襯沙田呢間豆漿大王一直以來都覺得佢地既粢飯同豆漿好出色今次黎到一樣叫返豆漿粢飯但係佢杯豆漿勁大陣「燶」味！係d豆漿煲燶左果隻燶味！然後我飲第一啖同個姐姐講話有燶味佢係全程反住白眼咁同我講野我：唔該杯豆漿有燶味佢：我地既豆漿係出名有「焦香味」既我：但係擺明係燶味喎佢：(極不耐煩)如果你覺得唔岩飲可以換其他野飲個豆漿底就全部都一樣既之後我就換左杯檸檬茶講緊係全間鋪一半以上人客人都係話有燶味佢地鋪頭d員工堅持話係「焦香味 」我去咁多次新蒲崗同沙田兩間都去過冇一次飲過所謂既「焦香味」其實老實講燶左就燶左 唔好搵人笨囉！仲有個小籠包d肉係霉同臭既！煎餃子韭菜豬肉勁鹹！成個用餐體驗好差！白頭髮扎辮個員工服務態度差到爆！搞臭晒豆漿大王個名！

排隊等好耐，好少二人枱，基本上都要搭枱，但張四人枱勁迫，大家你眼望我眼咁食真係迫人快啲走。食物質素都好差，上海麵個湯底勁似即食麵湯料包開出嚟，成個面都勁鹹，配料又小，唯一係粢飯係好少少，但啲料超少，鹹豆漿直程係難飲，味道超奇怪，食完一次真係唔會再去。

之前每逢喺新蒲崗都會去豆漿大王吃粢飯，終於等到他來到新界開分店。今天叫了兩樣食物兩杯飲品。▶️ 鹹粢飯（另全加配料）這裏的粢飯一向都好好吃，全都是即叫即包，油炸鬼非常脆口，熱辣辣很不錯。▶️ 肉鬆奶油多士這款普普通通，多士很香脆，肉鬆和煉奶都很夾，但沒有什麼記憶點。▶️凍豆漿豆漿味道香濃，很消暑。▶️凍牛油果豆漿這款凍牛油果豆漿味道很特別，喝起來不像牛油果味，反而很像某種紙包飲品，蜜瓜豆奶，但味道很清爽，也可以試一試。

拎飛好有問題 明明我黎先但張飛比後面遲黎既人個陣收錢阿姐話好忙都算 另一個員工派飛係見到佢係到扮睇唔到 張飛仲要比唔係一組人 係比夠後面兩組人 谷鬼氣咪唔食囉我話知你唔夠人手定點 真係勁有問題囉之前食過外賣 諗住試堂食 點知咁唔愉快好心改善下啦 搵鬼食咩

第一次寫食評！因為超嬲！中午要等位，位唔多，見到一個職員坐張4人枱食飯，眼見好多人唔等就走人，因為前面D號碼走晒，結果我們3人等左15分鐘有位。食物方面，與九龍灣分店差很遠，酸辣湯餃子超級鹹，雞翼炸過火黑蚊蚊！聽到職員在食飯時講，都話好喊，有客人都投訴過！我們就沉住氣沒人投訴，但食到一半抹下嘴，筷子還未放低，職員問都唔問收走我碗麵，超級離譜！我告知，我們坐低只是15分鐘，不過未食完都走！一肚氣！

我之前係去新莆崗的豆漿大王好好味，因為現在真係好少出去所以冇得食好味粢飯，現在見到沙田開咗這間粢飯，豆漿，雞扒麵都好味，但酸辣湯就真係冇下次超咸，真係咸到一個點。

攞咗飛等位，我地3位，當時一直叫號既都係2位，叫到我飛號就跳咗，以為佢係未有3人台，後來其中一個家人先行離開，想同佢講轉2人枱，點知佢同我講過咗我張飛，個職員堅稱自己有叫，但係當時我一直企佢前面等佢叫，佢係無叫到跳咗我限飛號，其實係咪覺得我3個人消費唔起？咁可以老實講不招待我哋，唔洗咁，重講大話話自己有叫！呢啲餐廳，搵鬼去啦！

之前經過排咗幾次隊，次次都過咗飛去，所以冇入到去食。今次決心排隊拎飛，不過天氣太熱，中間一下商場行，每10分鐘出嚟望，都係走飛，卒之職員俾我哋補飛。不過排隊拎飛真係有啲問題，永遠唔知叫到幾多，叫得嗰2秒冇人應就即刻下個Number，咁多客整返個電子顯示版好難咩😅好耐未食過啲餐廳係冇得自動拎飛叫飛食物嗰方面都真係好普通，芝麻有冇食過以前嘅，不過就咁食落口都覺得好普通。擔擔麵叫做小辣，不過食落口完全冇味，冇味道唔想攞其他嘢一齊落去食，個湯底完全唔吸引。小籠包還好，有少少湯汁不過皮偏厚。嗌咗杯牛油果豆漿，幾特別，不過冰太多冇飲筒，牛油果嘅味喺晒底。最正常不過滷味六小拼，肉好食好入味好腍，不錯。環境擠迫，員工服務態度一般，黑口黑面😓

平時經過每每見到好多人排隊等待入座。今天(7月26日下午12時左右)與太太路過見到沒有人龍所以即時入內午飯。可惜有以下不愉快的經歷。一間以”豆漿”中的王者命名的食店但是連製作豆漿的品質都未能做好！除了叫了粢飯, 上海餃子麵同煎餃了夫婦二人還點了一客豆漿共享。食物品質素一般但個豆漿喝了一口就即時發現有少許燶味。告知店員後只回應佢哋的豆漿用豆多所以才有此獨特的味道。叫佢哋入去廚戶試吓跟着出嚟就話已經叫咗廚房注意一下並沒有對客人作出進一步跟進(如更換飲品)。現有的燶豆漿似乎還是繼續供應給其它客人！當時位於我們對面的另一臺客人亦有投訴其豆漿的味道不大對勁但要求店員更換後亦不得要領。面對這家沒有品質要求及良心的食店相信此次是本人的第一次光顧亦是唯一一次的光顧了！難為自稱”豆漿大王”。

期待已久餐廳降臨沙田✨豆漿大王之前喺新蒲崗食過，一直念念不忘佢既粢飯！終於等到沙田開，專登去食🤭之前每次經過都大排長龍，今次下定決心點都要等位一試！⭐️雞扒粢飯 $26我最期待既粢飯，粢飯食落比較乾身，一咬就散開曬，同埋都唔係好食到雞扒味😅真係有啲失望！⭐️秘滷六小拼（肉骨、雞中翼叫做、蛋、牛肉、鴨腎及豆腐）$90全部嘢都滷得好入味👍🏻食落就濃味咗少少，不過配飯或者麵就啱晒啦！⭐️上海小籠包 $30黎到嘅時候熱辣辣，食落都有肉汁，但係皮就好似有啲厚，比較硬身，冇乜特別！⭐️上海排骨 $28睇相就知呢個好食啦，啱啱炸起香噴噴，而且肉質軟腍，推介推介！⭐️酸辣餃子麵 $48賣相一般，酸辣湯味道唔算酸又唔算好辣，餃子味道比較普通！總結 對比起新蒲崗店 係遜色好多🥲

新店開業，非常多客人排隊，望打方便又美味的粢飯，價錢合理！🥢雞扒粢飯$26雞扒炸得香口，油炸鬼炸口，肉鬆口感酥而不膩，加上榨菜平衡油膩感，粢飯入口糯糍，非常滿足！另外粢飯可選擇切為兩件，方便與朋友分享！👍🏻🥟煎餃子（每客4隻）$28很有驚喜！油煎過的面皮很是焦香味，新鮮韭菜豬肉完美交融，一口咬下去湯汁流了出來！層次分明，味蕾瘋狂舞動～🥑牛油果豆漿（凍）$24是用即溶粉沖出的牛油果味，味道不似預期，建議大家飲返原味豆漿好了！🌰榛子豆漿（熱）$18加了榛子，口味偏甜！本人覺得比牛油果豆漿好味，容易入口很多！

嘢食一般，唔係特別好食，但係啲姐姐喺11點幾lunch Time都未到就係咁催人走，同佢講飲緊嘢就快走，仲要隔30秒又搵第二個阿姐過嚟催，講緊係由入座到走40分鐘都未到，食到一肚氣，唔想受氣嘅唔好幫襯。仲要我覺得嘢食係同新蒲崗嗰間分別都幾大，冇新蒲崗嗰間咁好食，冷氣又太凍直吹個頭，如果佢唔係開喺沙田，覺得會有好多人幫襯，真係唔好怪人北上消費，過嚟食飯仲要俾人趕，用盡一切方法想人快啲走，我諗好多人除咗嗌外賣都唔會想再嚟堂食第二次