蘭香麵家

營業中

休息中

呢間店係舊式嘅麵店 所以環境衛生都唔會特別高分 同側邊啲舖頭有好大對比 入到去見到招牌都係介紹食黑柏葉同雞腸麵就決定叫一碗雙拼麵一試 麵嘅湯底浮住一層雞油 但係飲落一啲都唔會油膩 黑柏葉同埋雞腸爽口 沒有內臟腥味 幼麵麵質爽口彈牙 暫時未見過其他麵店用呢兩款來做配料 行過尖沙咀可以嚟試一試

平日lunch 差不多日日都去黎度食 食物幾好 平平地 我唔食太多野所以夠飽 但今日發現2隻野係碗野到 睇都未睇就話係咁 話佢地煲湯係咁 係我誤會 我影低左 後來過到黎睇就話咁換過比我 態度好差

今日帶大家去食鮮牛栢葉同雞腸，呢間嘢好耐啦，我第一次食係初中果陣，都有30幾年以上，係近呢幾日睇到大島與龍威條片介紹呢度我至諗吓乜呢間嘢仲响度！然後今日放假就走嚟食，有乜好食呢，當然係黑牛栢葉(冇錯牛栢葉係黑色，平時酒樓果啲係白色不過加工過)，仲有鮮雞腸，叫咗雞腸麵做底加個淨黑牛栢葉，夠晒飽，上嚟嘅醬油係佢哋自己調配，帶啲辣但唔咸，雞腸好鮮好乾淨，幾正，不過湯底淡左啲冇以前咁濃味，係真嘅淡左啲。到牛栢葉，好爽口又脆口又唔靭，好食，啲葱切到好靚又多，真係久唔久食下好嘞始終内蔵嘢。

#搞串個pantry今次我哋去咗一間有啲名氣💬，但係又唔算多人識嘅港式 #粉麵舖 🇭🇰。舖頭位於 #尖沙咀 ，所以我哋平日嚟到☀️，都有遊客等緊✈️，睇嚟佢嘅特色粉麵都幾出名🍜。舖頭係以小店經營🥢，開舖時間未必咁固定🕰️。舖頭都好有潮式粉麵小店♨️嘅feel，我哋就嗌咗佢最出名😍嘅兩款特色粉面，🔴鮮雞腸河($45)同埋🔵牛柏葉河($45)。鮮雞腸河🌟🌟🌟🌟🌟雞腸🐔嘅感覺好特別，平時都好少會食到呢一款食材😆。既有好似鵝腸、魚腸🌭嘅爽口感覺，同時間會比較腍啲🫦，而最正係佢嘅味道好有雞油香味🐥，就好似平時食豉油雞🍗，不過更加濃味。唯一係部份位置會有少少筋🤨。我哋食完都覺得值得返轉頭再幫襯💕！牛柏葉河🌟🌟🌟牛柏葉係用咗黑柏葉⚫️，食落同普通嘅牛柏葉🐮比起，彈牙得嚟係比較腍身👅。不過由於係用白烚♨️嘅方式，所以冇乜味道，只係靠每碗麵都有嘅甜豉油吊下味🥢，多啲調味會好啲。而河粉都係清湯🍜，所以建議自己加啲辣椒油🌶️，即刻香好多。

好舊嘅麵鋪 都乾淨企理平日下午茶嚟 幾乎無人 坐得舒服闊落最出名嘅係雞腸同黑柏葉雞腸都比較少見人做好自然都叫咗一碗湯底都幾淡黑柏葉同雞腸都係平平無奇以六十蚊嚟講 算係幾貴只可一試嘅體驗收現金同收wechat pay

今日行經佐敦三角公廁附近，決定黎潮聖一入去見到有蚊滋仔飛，後門大開望埋條後巷，其實有少少扣分雞腸冬菇雙拼麵（$50）雞腸食落唔肥，睇落無乜肥膏，爽口彈牙，皮薄唔會好難嚼，一段段切得剛剛好。配埋秘製藥材豉油好正，不過豉油偏鹹，落埋辣椒油點少少就夠。冬落食落有蠔油味，但唔算燘得好入味，略嫌冬菇定留太多，食食下會覺得硬。麵我叫左多蔥，蔥一絲絲連埋麵食岩岩好，好香好新鮮。雞腸既雞油落晒個湯度，個麵好有油香。南乳豬手黑柏葉麵（$50）豬手得兩舊仲要好細舊，無乜肉，又唔算好入味，不用再試。黑柏葉高質爽口，同豉油都係好夾，不過無雞腸咁令人驚艷。

以為舊式麵檔會有傳統味道，今日放工我哋去尖沙咀蘭香麵家食飯，我哋叫咗豬手麵，雞腸飯，見係牆上面小儀同金剛宣傳既冬菇有好多隻，就叫嚟試下，點知嚟到先得5隻，90蚊。而且阿姨仲不停叫我哋加野食，覺得只係想我哋食貴啲，味道真係好一般，雞腸好似未煮熟，係雞腸飯有附送幾條牛柏葉，亦係苦澀味，仲好老，豬手得一舊，埋單194完全唔值。如果同宣傳差太遠就有欺騙成份。咁就比youtuber 食家呃咗。建議大家去唔好中伏。

粉麵店的配料不外乎是魚蛋、墨魚丸等食材，但尖沙咀蘭香麵家則提供了黑柏葉及雞腸這兩款麵店少見的選擇。新鮮的材料，費時費工的事前準備及清潔，令雞腸油香四溢而不過於肥膩，而白灼的黑柏葉則鮮味爽口。兩者配合清湯粉麵，更能感受店家對食材處理的心思。When fish balls and squid balls are ingredients expected in a noodle shop, Lan Heung Noodles offers two unique choices: black beef tripe and chicken intestine. With fresh ingredients and loads of preparation, both ingredients have their unique aroma without being too greasy or chewy.

一直知道尖沙咀呢間蘭香麵家好出名食雞腸麵！今次終於特登走入去試下🤭🟠嗌咗雞腸麵，牛腩麵同埋黑柏葉淨食🌟🟡雞腸處理得好乾淨，唔會有臭味，入口幾軟滑咬得斷唔會韌😝 雞油都香不過唔重，碗麵都會見到有層油但唔算油膩😊不過整體唔重味，所以要點辣椒油加豉油🙏🏻🟢牛腩麵普通，冇乜特別🤣🔵黑柏葉雖然白灼，都係要點辣椒油加豉油，但係灼得啱啱好！一啲都唔韌！全部入口爽脆唔使浪費過多牙力！👍🏻 🟣整體其實主要係食出面餐廳少食到嘅雞腸，但黑柏葉必嗌(´>∀<｀)ゝ

食咗個孖寶粉，份量少，湯底勁鹹冇下次，湯底勁多油，牛柏葉得兩條，仲要係收$50，唔值咁嘅價錢，賣廣告根本係搵笨。從未食過咁差嘅，碗河粉少得可憐，千祈唔好食，食個老麥好過！！！

今日出到嚟尖沙咀近「天文台道」一邊，有啲義務嘢要幫手，放飯時間只有30分鐘，所以，一支公去「蘭香」速食碗雲吞麵就算。 「蘭香」都有好多年歷史，喺一家幾老派嘅粉麵檔（鋪面寫麵家，但餐牌就加多茶餐廳幾粒字），睇格局就知有番咁上下年日，賣嘅都喺傳統嘢，嚟嘅都喺街坊或上年紀嘅人多。 晌鋪面，貼咗啲藝人或雜誌嘅專訪，而佢哋嘅名物有鮮雞腸、黑柏葉、冬菇。 其中一個主打粉麵嘅餐牌，就有中英對照，真喺食麵學英文，明顯喺為咗啲遊客，可惜，未通關，近來都見到唔少老鋪結業，真唏噓。 除粉麵，仲有小食（粉麵檔式小食）、飯品、飲品……等等。 雲吞粗麵 $39相對其他區，呢度嘅粉麵起錶價喺$39，算喺貴少少，但一碗有水準嘅粉麵，都值得啦！比起其他國家嘅粉麵，如越南湯河、日本拉麵、韓國水冷麵……港式粉麵其實喺快靚正架。講番呢碗粗麵，麵質未喺好爽，但勝在無乜梘水味，啲雲吞大大粒，裡面喺原隻鮮蝦，又爽又甜，貨真價實，湯頭亦都鮮味，睇樣都喺雲吞麵一碗，平平無奇，查實喺有內涵。 匆匆食完，匆匆閃，星期日嘅午市，人客比預期中少，希望老店捱得住，家下搵食艱難。

今日路過蘭香諗住入去食碗麵、叫左碗冬菇麵，好快就黎到，一碗四隻冬菇。食左兩啖麵、睇到隻冬菇、咦！好似比人/動物咬左一啖咁既？ 心諗可能煮果時咁啱甩左邊啫，搵多一隻又係咁、再搵又中，全部都崩口既☹️無理由四隻冬菇四隻都咁啱崩口掛！叫收銀姐姐黎、諗住同佢問下、點知唔問猶自可，一問把鬼火，佢睇都唔睇下、就話煮果時崩左啫、眼尾都無望就走左。我同佢講，一隻半隻都算、你隻隻冬菇都係咁點合理？ 收銀彩都無彩你、走番去同煮麵姐姐傾偈、話隻冬菇煮崩左好出奇咩！ 大家睇相自行判斷係比野咬左一忽、定好似收銀阿姐話齋煮到甩左。最後、煮麵姐姐見我無食響度玩電話、主動同我講換兩隻比我（咁大發慈悲心四隻換兩隻）。好，又睇下你係咪隻隻冬菇都煮得崩口先，煮麵阿姐放低果兩隻完好無缺。一碗麵值四十大洋唔夠，你話你煮到隻菇勁到崩口崩到好似咬過咁，我見識少，都真係出街食左幾十年飯第一次見。唔該唔好侮辱香港人智慧，咪以為個個出街食飯都唔識煮野食。 一間貼曬明星食家招牌既食店，居然講得出呢番說話。 我不嬲都唔寫食評，奉行好嘅一餐唔好嘅又一餐，但今次實在太激氣！咬過既都比人食？仲有下次？不了！不了！

一早食完壽司郎，再去DONKI 行一陣，D早餐已經唔見咗大半，忽然想起蘭香⋯⋯十幾年前我也算常客一名，一個月總會去三四次。十一點幾不是用等位，一樣嘅裝修，牆上依舊貼住二幾三十年前的舊報紙，吹噓什麼大明星經常光顧，餐牌跟當年亦分別不大，大概只是價錢變了🤣🤣唔太餓，所以只點了一個雞腸米粉，賣相跟以往沒有多大的分別，淡淡的湯，軟滑的雞腸，少量的薑蔥，再加少許辣椒油，蘭香就是這個味道😋今時今日食店選擇太多，究竟係不斷創新，留住顧客，還是保留原味，努力經營？

蘭香麵家為柯士甸路三角公廁範圍嘅老字號，餐廳特色有香港少有嘅鮮雞腸同鮮黑栢葉同埋冬菇幾款比較少出現喺其他粉麵餐廳，為食嘅我又點會唔會留意咁有特色嘅小店。😊講起蘭香印像中應該由佢30蚊一碗開始食食到而家40蚊一碗，之前平均一年都會嚟二三次，如果工作地點喺附近嘅話更加會嚟多幾次，無他就係因為畀佢個雞腸吸引到其次就係黑栢菜葉。😋不過從疫情前幾年開始就比較少去，因為覺得個味道已經冇以前咁好食。以前每一啖湯頭都有濃濃嘅鮮雞腸味非常鮮甜，今次個湯好似溝咗幾倍水咁完全冇曬味。☹️☹️☹️☹️☹️有啲失望，唔知咩原因......？一間咁有特色嘅餐廳個味道都保持唔到，非常可惜！😔😔😔😔😔

如果你說它是歷史非常悠久的麵店，似乎又不算太具特色，但是在尖沙咀柯士甸路這邊，韓國以及其他國家的中高級食肆林立，可能隨便叫個韓國小食都貴過這兒一碗麵，整碟炸雞或是漢堡包都貴過兩個人食麵，那麼，它在這裏就有賣點，起碼想慳錢又或是帶著嬰兒想吃點小麵的話，都會前來這邊印象中以及餐牌所說，這而比較出名的都是雞腸以及黑柏葉，兩個都叫!據說米線的份量不夠，於是溝了些河粉，兩種麵條都完全沒有特別，雞腸都挺為乾淨，爽口彈牙，不過味道比較清淡，你不點辣油的話，其實沒有什麼特別味道。黑柏葉就更加爽口，大大抽的牛柏葉，沒有漂白過的純黑色，算是比較特別，不過都沒有什麼特別的味道。本身想給小嬰吃，但他太睏不太想吃，於是迅雷不及掩耳立馬吃完，汗如雨下，好不炎熱。店面不算太寛闊，不過走廊位置總算夠寬闊，在人流不多的時間去，也不算太過擠迫；但就味道、服務而言，沒太多理由需要專程再來