花都餐廳

營業中

休息中

餐廳食物質素不錯，曾與朋友食過牛扒晚餐，坐得舒服，感覺溫馨。但是，隔幾天後經過銅鑼灣，一個人順道入去食個午餐，見到餐廳都係6成full，而且中間有幾張枱（長檯8人座，可間開4個位，非卡位）都係吉，某位女店員（頭髮到頸左右）見到我坐落一張檯後，唔知係咪見我無「搭檯」，即刻黑口黑臉，將個手機QR Code單「掟」落嚟比我，我揀緊果陣，仲急住問我食咩，我答佢「自己落得喇，我好快食完㗎」，佢仲要回應「好呀好呀」，不知幾想您快d走咁款。我份人就好識做嘅，您個飯唔使2分鐘就送到，我就用8分鐘時間就食完，點知您杯野飲都未到。隔咗一陣，另一女店員就走埋嚟，話無熱朱古力，叫我轉野飲，我就飲熱檸茶啦咁，跟住即刻見到師父用手「乸」幾塊檸檬落去個杯度，嘩，真係難怪你間餐廳開係銅鑼灣，午市晚市都係得咁上下人流。總之，無下次啦。附近仲有唔少港式扒房揀，我個位留比你地d熟客得啦，唔阻你做生意了。😆

我好鐘意食西餐，食過好多唔同嘅西餐、CAFE、扒房。我發現而家啲餐廳好多都食物質素唔多掂，但係收嘅價好離地。尋尋覓覓，終於俾我搵到呢間又有質素，價格又適宜嘅餐廳。餐廳位置喺鵝頸橋隔離，屬於好地段，但係就係因為係樓上鋪，所以難搵啲。啲位都好大好舒適，坐耐啲都唔會唔舒服。我叫咗鐵板西冷扒，揀咗五成熟。醬汁就揀咗黑椒汁。好多餐廳都唔識處理牛扒，一係整得太柴，一係整得太霉。呢間餐廳就唔同，廚師手勢好掂，塊扒煎得好香口，肉質好軟熟，好濃牛味。而且塊扒醃製得好適宜，好好味。每一啖都正，唔會有啲部位柴，有啲就軟熟咁參差。我個friend就叫咗三文魚卡邦尼意粉。又大份又整得好食，而且擺盤又好睇，好適合打卡。啲醬汁校得好濃稠，又加咗啲芝士粉，好好味。有香濃醬汁嘅意粉加上煙三文魚，個配搭好正。價錢適宜同唔加一值得一讚👍🏻

好好味wo，平時食開金X 同 花X 餐廳，見網上有人講，今次試下不錯wo叫左西冷牛扒 同 肉眼牛扒，忌廉湯好creamy，肉眼五成熟好嫩口，個西冷有少少筋位但都唔會嚼唔爛嗰隻，個薯條唔會好似平時食開個啲腍晒甘。飲品仲可以選擇濃啲淡啲完全可以跟隨個人口味自己選擇👍🏻👍🏻👍🏻最開心係佢有甜品，係啫喱或者芒果布甸，童年回憶番晒黎，價錢又差唔多，如果喜歡港式西餐廳非常推薦👍🏻👍🏻環境座位仲好舒服，有好多卡位

Cp 值高！港式食物。有餐湯配蒜茸包，個蒜蓉包好食！好脆！又香！配湯係正嘅。🥖🫕個焗豬扒飯係炒底，有誠意。食扒餐有甜品送，雖然唔係咩特別野，但港式係有種浪漫🌹，花邊杯(雖然係膠嚟嘅😂)用咗應該係奶茶杯隻碟放好，加多個花奶係側邊。而塊扒好厚，好滿足到想食港式扒嘅人。隔離枱三位男士都講，一人八十蚊左右抵丫。😂空間亦好好，多卡位，坐得舒服。😊位置確實唔起眼係出面好似連招牌都無，要行到大廈入面先見到，低調高手😎

夜晚放工經過鵝頸橋，上OpenRice睇有咩食，見到有間花都餐廳可以食扒，就走咗上去試下佢嘅鐵板扒。間餐廳燈光昏暗都幾有格調，地方闊落舒服，適合食飯傾偈。啲侍應熱誠有禮，招呼好好。我order咗鐵板西冷，因為鐵板會持續加熱，5成熟對我嚟講啱啱好。首先送到嚟係忌廉湯，個湯口感綿滑，忌廉濃郁，飲落去暖笠笠，好好味。跟住開始食扒，塊扒好大份，我一個大男人都可以食得好飽。塊扒夠軟嫩，個面又煎得好crispy，啖啖肉，口感好好，滿足到我味蕾嘅享受。收工梗係要啤一啤，食住扒嘆白啤，真係好滿足！總括而言，無論食物質素、服務態度、環境舒適度，全部都好過一般嘅港式扒房。我覺得無論係放工之後，定假日嘅夜晚，都好值得喺依間餐廳食扒。

夜晚拍拖喺銅鑼灣想鋸扒，記得朋友喺WhatsApp group提過花都餐廳好食，就走咗去試下。一行到入去，見到都幾旺。依間餐廳環境舒適，裝修好有懷舊嘅味道，適合想喺夜晚搵間氣氛好嘅餐廳鋸扒嘅朋友。我哋嗌咗煙三文魚沙律做開胃菜，師傅俾咗幾塊好大塊嘅三文魚，食落又好食又開胃。我嗌咗煎大蝦伴牛柳餐，而女朋友嗌咗鐵板雞扒餐。WhatsApp group提到去到花都餐廳一定要飲羅宋湯，所以我揀咗羅宋湯做餐湯。果然好香濃，用料好足，你哋可以睇下啲湯色好靚，真係超好飲。而女朋友飲咗忌廉湯，個忌廉湯好滑、忌廉味好重，應該係真忌廉，而唔係一般餐廳果種麵粉溝水嘅湯。正餐個大蝦仲大過我隻手掌，鮮美可口，食得好滿足。而牛柳又tender又juicy，加上好濃肉香味，唔似有啲餐廳落咗鬆肉粉咁霉。女朋友嗌嘅雞扒都勁大份，外面嘅皮好酥脆、肉質鮮嫩多汁，用鐵板上令到佢好香口。用黑椒汁淋落去發出「渣渣」聲好有感覺！值得一提嘅係，服務態度好好，食得好愉快。埋單果陣發現免加一，真係估唔到晚市唔需要加一，真係好公道啊。整體嚟講，用餐體驗幾好，係夜晚鋸扒嘅絕佳選擇。。

假日係銅記行下順便食Lunch，想平平地据下扒，上網搵到一間餐廳，平價港式扒房，除左扒餐，仲有茶記碟頭飯等。餐廳面積寬敞，裝潢簡約，適逢佳節有聖誕佈置，呢款裝飾，有種懷舊的味道，我們4人，坐卡位，感覺舒適。 餐牌，食物上都幾多選擇，為食扒之來更係叫返扒餐，揀了Lunch Set，西冷牛扒餐，都係手機落單。熱咖啡，醒神。羅宋湯，材料十足，味道酸酸地少許辣，味道不俗，可惜冇餐包。西冷牛扒餐，$70，要了洋蔥汁，牛扒薄身，口感鬆軟，薯條夠熱幾正。食物味道正常水準，地區來計都幾抵食，坐得舒適，服務態度幾好，多一個平之選。

懷舊餐廳夠唔夠都想食下，今日去到銅鑼灣，打開個openrice睇下有咩食，點知見到好多食評都講話平靚正，咁就上去試下啦，點樣嚟到咁啱食飯時間，好多人，但係服務員服務態度都好好，我叫咗個西冷牛扒，佢話晏晝冇得嗌幾多成熟夜晚就有，之後老公叫咗葡汁雞扒飯，另外嗌咗半打串燒，兩支牛兩支雞兩支豬。個羅宋湯估唔到好好飲，平時出面啲例湯，講真淡茂茂。呢度超濃。牛扒就ok啦不過不失啦，葡汁雞扒飯個汁好好味，啲雞都嫩滑，沙嗲串燒啲肉好嫩，唔會乾真真佢個沙嗲醬其實好食但唔知點解要咁杰見到其他人嗌嗰啲午餐，講真而家喺香港，仲要係鬧市，邊度搵到40幾,50蚊性價比咁高嘅嘢呀,我見人哋嗌嗰啲午餐都好大碟喎。加油呀 ，忍唔住即刻真係要寫食評，讚下。

今晚接女朋友收工。。。諗唔到食咩好就上網搵下銅鑼灣舊式扒房。。。上網search到有間新懷舊扒房就去試下。。。環境好乾淨好大。。。又少有地寧靜。。。唔會趕客走。。。侍應姐姐都好好禮貌。。。係香港食平民嘢好少有呢種服務。。。當日點左肉眼扒同埋西冷牛扒。。。個扒大份。。。冇落生粉。。。好好食。。。價錢合理。。。仲唔收加一。。。仲包埋甜品餐湯餐飲。全部加埋兩個人都係講緊309蚊。。。整體真係非常滿意呢間餐廳既質素！！

夜晚係銅鑼灣想食扒，上網搵到呢間新開餐廳。除左晚餐餐牌外，呢間都有d炒粉炒飯食，都幾平、五十幾蚊就有，見到隔離枱食都幾大碟。我地就叫左晚餐B同晚餐E湯都係正常發揮、個蒜蓉包好脆我幾鐘意。西冷鐵板上，渣渣聲香噴噴，好有風味🤤塊扒都幾大塊，建議大家可以揀五成熟，因為塊鐵板都幾熱、其實煮煮下都變七成。扒有肉汁、牛味都濃。葡汁焗雞扒飯，有少少芝士拉絲，雞夠滑，整體味道不錯！最後仲有個小甜品，雖然係啫喱，但係俾埋花奶，好有儀式感🤣🤣餐廳座位闊落，坐得幾舒服。員工有禮，感覺上幾有家庭式餐廳嘅感覺👍👍

對比精緻華麗嘅西餐廳，小編有時候更加鍾意港式西餐嗰種經濟又實惠😄 今次嚟到開業不久銅鑼灣嘅「花都餐廳」，就一次港式扒房風味😋首先價錢的確好相宜，喺銅鑼灣唔使$7-80就有一個套餐，有餐湯有餐飲都算係咁👍🏻 味道不過不失，加上座位舒服，整體體驗都唔錯～《 🍅 焗豬扒飯 》 $80 4 / 5豬扒好大塊，肉質軟腍腍；蕃茄醬酸爽，食落更開胃😋 炒飯底飯粒分明，份量都好足，一句講晒，抵食😎《 西冷牛扒意粉 》 4 / 5牛扒冇得揀熟度，都係薄身西冷牛扒🥩 不過肉質都軟熟，幾大塊👍🏻 意粉挺身，仲有新鮮西蘭花，係營養均衡嘅組合😌整體不過不失，梳化卡位夠大坐得幾舒服🤪———————————————🏠環境舒適度：💛💛💛💛👅舔脷回頭度：💛💛💛📸打卡able度：💛💛💛🙇🏻‍♀️服務滿意度 ：💛💛💛————————————————

喺銅鑼灣返工想搵餐平嘅飯食都好難 今日俾我搵到一間隱世花都餐廳 主打舊式港式扒房午市經濟套餐仲做緊優惠特價！望完個餐牌都唔敢相信呢個係銅鑼灣地段午餐價格😮 我今次叫咗個洋蔥豬扒飯，連埋熱飲都係$48 熱飲唔使加錢 凍飲先加$3個飯上枱係熱辣辣出哂煙 唔係煮定but出黎咁無誠意 個豬扒好淋身 仲要有兩大塊 一時唔記得叫少飯 即刻食唔哂啲飯🫨 男仔過黎食唔驚食唔飽如果你食白汁雞皇飯或者肉絲茄子飯都只係$35蚊！我相信呢個價錢 你係舊區都好難揾到 何況呢度係銅鑼灣！

由細到大都食過唔少扒房同西餐，哩間真係價錢合理又高質，食得好滿足。首先值得一讚嘅係忌廉湯。個湯好熱、好creamy、好濃厚，超好飲。個蒜蓉法包好香脆，好好食，食完之後好期待食正餐。塊西冷牛扒果然有水準，一送上嚟賣相已經好吸引。識食一定係食用碟上嘅牛扒。塊扒表面嘅色澤煎得好靚，令人好有食慾。只有好嘅牛扒先可以用碟上，切開後嘅牛扒嘅切口好粉嫩，睇得出肉質好掂，係一塊靚扒。塊扒擺到入口真係冇得彈，肉質鮮美柔軟，唔需要過多咀嚼就融化喺口腔度。外面酥脆香口、裡面鮮嫩多汁，配搭香濃嘅燒汁，真係停唔到口。而意粉都整得幾好，唔似一啲西餐求求其其。佢啲意粉好有彈性，好食。咁嘅質素收咁嘅價錢我覺得好合理，今次總體嚟講我好滿意，下次會試埋其他扒。

早幾日幫襯過，上次已經發現咗有超值炒粉麵飯套餐，依度真係可以成為我嘅固定食堂。依間餐廳啲嘢又好食又大份，既可以醫飽肚，又可以滿足味蕾，最重要係勁抵。啲50蚊炒粉麵飯套餐由下午兩點供應到夜晚十點。依度又抵又坐得舒服，銅鑼灣真係好難搵到好似咁嘅餐廳。上次食完之後我一直心掛掛，所以又嚟咗食晚飯。話說上次發現依啲超值套餐嘅時候因為太肚餓，所以唔記得食飯之前打卡。今次提醒自己一定要影相打卡。我同啲friend叫咗西炒飯、菜遠牛肉炒河同揚州炒飯，全部都好有鑊氣。西炒飯炒到粒粒分明，番茄味濃郁，每一啖都好滿足。加個有冰底嘅罐裝可樂都只係加3蚊，加埋都只係53蚊！真係良心價！而菜遠牛肉炒河俾咗好多菜心同牛肉，啲牛肉肉質柔軟，肌腱同脂肪少，外脆內嫩。河粉濕潤得嚟好彈牙。個揚州炒飯俾得超足料，蝦同叉燒都俾幾多，蔥香同蛋香加唔少分。飯粒軟硬度適中，夠爽口。成個飯鹹香鮮味，一啖接一啖，超滿足。要埋紅豆冰加6蚊咋！咁正嘅套餐真係要介紹俾大家，大家不妨試試，之後都有機會變成你哋嘅固定食堂😛

之前已經食過依間餐廳，估唔到而家晚市仲多埋超特惠嘅炒粉麵飯套餐！因為要OT，所以搞到遲咗食飯。實在太肚餓，一收工就同同事走咗去依間餐廳食飯。一上到去竟然睇到個餐牌有好多50蚊包埋熱飲嘅炒粉麵飯套餐，凍飲都只係加3蚊。本身唔供應晚市，而家晚市都食得。到咗月尾我其實啲銀兩已經唔多，簡直幫咗我大忙！我即刻叫咗個肉絲炒麵。個餐好快送咗上嚟，熱氣騰騰，賣相好吸引。因為實在太餓，一送上嚟就狼吞虎咽。個麵熱辣辣又好味，導致唔記得將完整嘅賣相打卡影相。但係實在太大份，就算好肚餓都淨咗喺度。我個同事食咗個馬來炒貴刁，佢讚不絕口，話又有鑊氣又惹味，一睇就知係即叫即炒，估唔到咁超值！佢嘅已經被收走咗，打唔到卡🤣🤣我真係好推薦大家嚟試下，又抵又好食嘅地方喺銅鑼灣真係鳳毛麟角，好難搵啊……銅鑼灣邊度搵咁抵嘅晚市套餐？有冷氣嘆，仲要咁平咁大份，真係糧尾救星啊