章記香港仔魚蛋王

營業中

休息中

牛什牛腩撈麵，講真句味道好似有進步喎，味精好似少左好多噃，值得一讚。牛什仍然保持中級水準啦，應腍則腍、應爽則爽、應滑則滑，炆得入味，正。但牛腩始終無變，一係鞋烚烚、一係肥騰騰，無肉食。麵煮得稍過火，過腍，但可以接受。

值得一讚既係味精真係少左，加分，但質量同技巧真要多多提升 ~蠔油生菜走油，稍為過左火，黃黃地，雖然我偏愛食腍一啲，但太過腍喇。味道就無問題，新鮮充滿水份，簡單既烚菜。雲吞麵走蔥，師父呀，您啲雲吞好鬼咸呀，對我黎講咸左啲，雖有原隻蝦仁又爽口，呎吋又大粒，但味道唔得。湯底好啖，無左腩汁就無晒味，但千奇唔好再咁多味精喇，麻煩晒。牛什牛腩伊麵走蔥，好似師父近排真係輕手左好多，無再落咁多味精喎，食完唔會太過頸渴，多謝。牛腩太肥，八成都係肥膏，得返兩成肉仔，無咩肉食，牛什保持水準，腍則腍、滑則滑、爽則爽，亦炆得入味，幾好。伊麵煮得幾好，軟硬、粗幼適中啦，但可以做得更好。

人懶、貪近、貪快，唔好食、又普通、又貴、味精又勁，但始終係自己選擇，都要甘心逆來順受啦 ~ 鬼叫窮咩 ~ 唔知食咩好，求其啦 ~四寶麵走蔥，有豬肉丸、墨魚丸、札肉、魚蛋、魚皮餃，唔止四樣咁少喎，上次仲多，但係湯太多，唔啱比例，飲落好明顯味精少左好多，多謝師父，但個湯底非常淡，我都明要真材實料又要好味係成本上有一定壓力，麵煮得太耐，太腍無口感，蛋味又完全流失，無味。蠔油生菜走油，真係走左油味道清新左好多，無咁混瀆，生菜算新鮮，亦未烚過火，咬落仲會索索聲。

越食越悶，啲出品平平無奇，又唔係好好食，只求快同近乍，如果唔係都唔會幫襯 ~蠔油菜芯，離晒譜架，咁大個仔都未食過腐乳菜芯架，落錯左都唔攞去沖乾淨，就咁倒啲蠔油遮住去就算，當我傻架咩，需然唔會食死人，但係咪咁馬虎求其呀？﹗我食既時候個阿姐仲係度眼望望，想我比咩反應呀？﹗如果唔係貪依度夠近，真係唔鬼黎呀，味精又多，出品又唔係好、服務就不在話下啦。牛腩麵走蔥，睇吓啲牛腩無肉食之餘仲要三分二以上係根黎架，可能有食客喜歡，但唔係我囉。啲湯未試過多到連啲麵都失踪咁滯，過多喇，一放落枱，賣相怪怪的。味道一般啦，味精囉。牛什伊麵走蔥，依舊食完好勁渴囉，味精太重手。滷水牛什入味而且腍滑，麵質彈牙嚥靭，幾好，但我真係覺得份量比其他麵檔少，不過應該大家都係用同一呎吋麵餅啫。牛腩河走蔥，好鬼肥呀，三份一以上都係肥膏，要咬走先得，無咩肉食，最抵咪味精夠多囉，唔洗本咁。雖然我都聽唔少食客專登要食肥腩，但我唔多好囉。

紫菜牛丸麵走蔥，唔知係咪上次講完，今次碗麵真係熱辣辣，出晒煙喎，多謝。牛丸兩截色既？梗係浸左好耐都無人理啦，香濃牛肉味，自稱手打牛丸，都好彈牙，唔錯。紫菜同麵大眾化口味，都係咁啦。今次食完唔太口渴，希望味精份量會一日比一日少啦。

牛什河走蔥，滷水牛什好味，炆得又腍又入味。湯底香濃，河粉夠晒滑，係厭唔棉囉。整碗河粉又唔夠熱，要出晒煙先得架麻，只係暖暖地。賣相都係一向雜亂無章啦，切晒啲牛什掉晒落隻碗度就算，您估真係凌亂美咩 ﹗最大問題都係味精太多，食完渴死。

食左份極大份三文治做早餐，到 lunch 都未肚餓，咁是但食碗麵啦 ~四寶粗麵，札肉、貢丸、魚蛋、魚片、紐紋魚片、魚皮餃、兜形魚片，唔知點解咁鬼多送既，唔掛得比平時等得耐啦，但只係 HKD22 乍喎。粗麵爽滑啦，咁多款魚蛋都好彈牙且有魚鮮味。貫徹始終，食完都係好頸渴呢 ﹗

牛什粗麵，牛什保持一貫味道，可以啦。粗麵非常爽滑，唔知係咪心理作用，好似比平時食幼麵為少咁，兩啖就已經食晒，真係咁少？食後依然有啲湯，但已比以前好多了 ﹗

因最近公司既潮洲麵檔只得依間，係正樓下，每次趕時間都唯有幫襯依度，無選擇﹗麵檔既服務都係咁上下啦﹗瘦腩伊麵，牛腩入口軟腍鬆化，比肥腩更好，伊麵發得恰到好處，嚥嚥靭靭，有趙口、唔好過腍。奇怪地，今次食完唔係太覺口渴，唔通師父今日心情好？定係我開始習慣重味精呢？如果係後者就慘喇﹗牛腩牛什麵，嘩﹗牛腩 90 % 係肥膏 ......... 雖說牛腩要越肥先會越香越腍越好食，但個人口味接受唔到囉，我喜歡肥瘦適中，半肥瘦最好。牛什保持水準啦，牛膀、牛肚、牛肺、牛腸都入味好食。瘦腩麵，牛腩雖瘦，但夠鬆化，炆得夠腍入味，今次幾好，麵爽湯濃。芥蘭，不過不失啦，免強可接受，未算嫩口，有啲渣，年紀老左啲。

極渴極渴極湯麵﹗每次食完之後嗰六個鐘都勁頸喝，勁飲水﹗啲味精勁鬼到呀﹗如果唔係貪佢近、貪快的話，真係唔會去﹗環境都幾污糟，啲食具、枱面都幾油吓，地面都幾多垃圾，睇得出好少清潔﹗牛什麵走蔥，如果鍾意淩亂美既都唔錯，攞到黎，已見求其將啲肉掉落碗就算，好鬼馬虎。講返味道，都幾好、湯底都好香濃、牛什入味又夠腍、麵質爽口，但食完唔夠半個鐘，開始發作，勁頸喝，真係好一碗極渴麵，啲味精多鬼到痴線，之後嗰六個鐘仲要不停咁飲水，飲極都解唔到喝，頂﹗雲吞麵走蔥，係咪好奇怪點解會有蔥呢，咪就係啲阿姐唔聽野又或者唔睇單囉﹗又係馬馬虎虎。雲吞平凡穩陣大路，尚可以，無咩特別，麵爽口、無問題，但又係味精太勁呢，食完喝到痴孖根﹗炸魚皮，先試吓齋啪先，都幾靭吓、唔夠脆、有啲通風。再試吓放落湯度試吓，炸得夠透夠標準，可以聽到啲噼啪聲，但係偏咸呢﹗