究極堂 (永光中心)

早排出咗銅鑼灣食廚師發板，今日又再過嚟銅鑼灣食日本嘢，不過，簡簡單單同朋友上居酒屋「究極堂」食個丼飯午餐而已。朋友話炮台山都有分店，至於呢家銅鑼灣分店小弟都喺第一次到訪。整個地方唔算大，但環境裝修都好居酒屋格局，環境昏昏暗暗，天花掛上好多和式燈籠，好有深夜食堂嘅感覺，近門口嘅另一邊更可以間為廂房，適合一班人搞飯局，同店員傾開，原來炮台山分店亦有廂房。基本上是日所見都坐滿人，剛好最入嘅吧枱仍有位，唔使等！午市主要喺賣套餐，慳慳哋嘅有蛋包飯、牛肉丼、烏冬……之類，豪啲嘅有刺身丼、刺身定食、壽司定食……之類，正所謂豐儉由人:)。此外，散點餐牌嘅食物亦會全數供應。帶子他他 $38先試試店家嘅炸物，餐牌圖文並茂，見呢一款帶子他他賣相靚仔，就揀咗佢。外層脆漿唔算厚，最緊要喺做到脆而不膩，啲帶子好鮮甜，襯埋啲他他醬，加上三文魚籽，真喺相得益彰。韓式泡菜章魚玉子燒 $78玉子燒似乎喺店家受歡迎嘅菜式，見有唔少客都有點，玉子燒可揀明太子芝士或泡菜章魚，選後者因為未試過咁嘅組合。首先蛋卷嫩滑而富濃郁蛋香，裡面捲住好多泡菜，頗為惹味，加上極具咬口嘅章魚，增加點點海鮮味道。究極丼 $208朋友話辛苦搵嚟志在食，所以，奢華少少嗌咗個「究極丼」，可惜喺海膽剛無貨，但會用番時令刺身補上。睇見份丼真喺好吸引，有帶子、三文魚籽、炙燒左口魚、油甘魚、三文魚、赤身、拖羅蓉、大赤蝦，仲搭上一隻蛋香十足嘅蘭王蛋，外觀非常吸晴。佢話啲刺身好新鮮，味道鮮甜，每款刺身都超好食，真喺無咩挑剔位，夠晒足料，物超所值。究極炎之丼 $128而小弟嘅炎之丼跟朋友嘅差唔多，當然，用料無佢嗰個咁高檔，但一啲都唔失禮，有左口魚、黑鯥、甜蝦、吞拿魚蓉、油甘同帶子，全部都炙燒過，入口帶點點焦香感，同樣食得出食材新鮮，又能一次過試到多款刺身。此外，所有定食都包埋田園沙律同麵豉湯，以一頓午餐而言，已喺豐富至極。成日都講，只要做出水準，不愁無客，兩個丼都食得出用料不賴，所以，午市基本上都可以講全場滿座！…查看更多

銅鑼灣究極堂 — 刺身飯大滿足（兩人晚餐心得）今次同老婆臨時想食啲好嘢，就上到銅鑼灣永光大廈11樓嘅究極堂。店鋪環境係偏居酒屋風，入面有吧枱亦有正常坐位，燈光唔會太暗，氣氛舒服唔迫。職員態度有禮貌，落單同上菜都幾快，座位間距合適，坐大枱或者吧枱都幾自在。我哋今次叫咗兩款刺身飯同一個熱食小食，仲配咗支札幌啤酒，整體好滿足，講下細節：究極丼（海鮮滿滿） — 必試第一碗就係究極丼，刀工同配料都令人驚喜。刺身切得夠厚，肥美嘅三文魚油花靚、帶子爽甜，油甘魚同其他生魚片都新鮮無腥。最吸睛係隻生蝦，上面仲有一坨超鮮味嘅蝦膏，一咬開即時爆鮮味，口感彈牙。海膽質感細滑唔苦，配埋一堆晶瑩嘅三文魚子同滑蛋（好似係日式蛋）拌飯簡直一流。飯量同配搭比例好，唔會淨係食到飯又唔夠料。整體我會畀個十分——出色嘅海味同視覺。究極炎之丼（火炙風味） — 香口有層次第二碗係火炙系列，師傅用火槍輕輕燒過刺身表面，帶出香氣同油脂味，配上店家特製醬汁，味道層次豐富。海鮮口感仍然保持鮮嫩，特別係蝦同三文魚，火香令整碗更有「食落去好有層次感」嘅感覺。細細缺點係如果鐘意食冷刺身嘅人可能會覺得火炙味重啲，但我哋就超鍾意。廣島蠔薯蓉（熱辣即上） — 驚喜小食另外嗌咗個廣島蠔薯蓉，上檯係熱辣辣嘅鐵板／小鑊，薯蓉香滑帶芝士，蠔夠鮮味同份量足，啱晒兩個人share。熱食同刺身成為好好嘅冷熱對比，配埋啤酒真係幾過癮。飲品同服務我哋叫咗支Sapporo啤酒，冰凍杯配生食／火炙飯真係match到爆。服務方面幾貼心，落單後菜上得快，店內環境企理。價錢究極丼 HK$218、究極炎之丼 HK$138、廣島蠔薯蓉 HK$108、Sapporo 334ml HK$48，連加一後兩個人食完大概 HK$563。以質素來講我覺得係值得。總結（值得再去）- 優點：刺身新鮮、切片夠厚、海膽／蝦膏／三文魚子表現好；火炙款有誠意；熱小食即場上味道好；環境舒服服務體貼。 - 建議：如果想食更平靜嘅氣氛可以避開繁忙時間、部分人可能會覺得火炙味偏重。 我同老婆都好滿意，決定下次再返嚟encore其他熟食同炸物。總體推薦比鍾意高質刺身飯、想試多款海鮮配搭嘅朋友。…查看更多

永光中心11樓全層，環境清靜舒適🥢究極丼 – 海膽、帶子、三文魚、三文魚籽、吞拿魚、蝦、生蛋海膽金黃細膩，入口即溶，三文魚油花分佈勻稱，橙色肉身油潤滑溜，食落有陣陣魚油香。吞拿魚切成厚厚赤身，肉質細膩，魚味濃郁，加份生飛蛋，拌勻飯同刺身一齊食，將全部鮮味同蛋香完美融合🥢4重芝士炸蝦卷外層酥脆，再嚟係彈牙炸蝦，蝦肉鮮甜，壽司飯粒粒分明又唔會太軟。芝士味道層次豐富，有鹹香、有奶香，唔會搶走蝦味，反而令成個卷口感更creamy更濃郁🥢秘製蕃茄汁 - 蒜香虎蝦配蒜蓉法包蝦身煎到微焦，肉質厚身彈牙。秘製蕃茄汁酸甜開胃，帶微微蒜香同香草氣息，完全冇搶去蝦嘅鮮味，反而更加突出蝦肉鮮甜。法包切片烘到脆卜卜，香味濃郁。拎塊法包蘸啲蕃茄汁同埋蝦肉一齊食，層次豐富🥢鰻魚芝士玉子燒鰻魚入口即化，魚味香濃，帶少少煙燻香。芝士溶晒喺蛋同鰻魚之間，鹹香同奶香交織，食落去有拉絲效果又唔膩口。三種味道融合得恰到好處，鹹甜適中🥢抹茶牛奶(紅豆)抹茶味道濃郁，帶微微甘苦，牛奶令成杯飲品變得順滑香濃，唔會太甜。紅豆煮得腍身又保留口感，粒粒分明🥢紅柚檸檬酸酒 – 無酒精飲落去清新酸甜，紅柚味清香、帶微微果肉纖維，檸檬酸味醒神，令成杯飲品好refresh…查看更多

今日試左一間喺銅鑼灣區性價比好高嘅日本餐廳，叫究極堂。芝麻雞翼2隻 （$38）上枱雞翼熱辣辣，外皮炸得好香脆但唔算好油，咬落去雞肉仲好嫰滑，充滿肉汁，送啤酒一流。燒油甘魚鮫 （$98）因為鍾意食燒魚但驚左食落有好多細條魚骨，所以見到有燒魚鮫就即刻叫左嚟試下。呢份燒油甘魚鮫魚皮燒得好脆，魚肉就一啲都唔乾，好有魚油香，最緊要係冇咩骨。濃湯蕃茄咖哩牛肉烏冬 （$78）蕃茄湯底足料鮮甜，食到有好多茄肉喺湯入面，同埋個湯底都幾杰身，令到每條烏冬夾上嚟食嗰陣都好掛湯，牛肉係類似肥牛，用左日式咖哩都煮，所以整體食落係唔辣而偏向有少少甜味，同埋碗烏冬同肉嘅份量都好多，同朋友share嚟食會啱啲。究極炎之丼 （$138）因為我地坐bar枱，個丼飯未上枱嗰陣已經聞到炙燒嘅香味，到食落口就覺得炙燒左帶子同蝦嘅生熟程度控制得剛剛好，唔會燒到過哂龍，配埋醋飯食係非常夾。油甘魚4切 （$68）4件魚肉都係厚切，非常新鮮肥美，果然7月食油甘魚係perfect timing。4重芝士炸蝦卷 （$48）有三件，外面嘅飯好軟熟，包住新鮮炸起嘅蝦，配埋經炙燒過的四重芝士，口感層次顯得更加分明。Orion生啤 ($78) 買一送一睇Menu嗰陣見到啤酒全日有買一送一優惠，所以即刻叫左嚟飲，食住日本野飲冰凍嘅日本啤酒，真係最夾。…查看更多

環境5分：樓上日式居酒屋格局，吧枱前面有好多公仔勁cutie，散枱整齊闊落又唔迫，入面仲有間VIP房，原來炮台山分店都一樣有，背景播住D日文歌好輕鬆，格調好好，可以畀五分。衛生5分：室內地方同後樓梯廁所都好乾淨企理，衛生一樣畀五分。服務 5分：未落單先有熱茶飲，侍應生好好心機介紹Asahi Sour有不同水果味，落單上菜快捷爽手，效率高，服務滿分。味道5分：1)   Asahi Sour個果香好出，有酒精畀大人，無酒精畀細佬，係人都啱飲。2)    Orion生啤全天買一送一，細啤清爽解渴。3)    油甘魚刺身一客四件，非常厚切，師傅絕不姑寒，好肥好爽。4)    究極丼入面有齊三文魚，油甘魚，帶子，魚籽，海膽，蝦，吞拿魚蓉，燒左口魚邊，炸紫菜，望落非常震撼，另跟特製紫菜蛋醬，好足料，又有層次。5)    炸半熟玉子外表好脆，蛋白好彈牙，半熟蛋黃好潤，伴隨粉紅色嘅鹽夠簡單，少少就已經吊到味。6)    天使蝦連殼都可以食得落肚，脆卜卜，好香口惹味，師傅好功夫冇炸過濃。7)    自家製炸雞伴洋蔥沙律啲洋蔥好爽好多汁，炸雞全部冇骨，外脆內嫩。抵食5分：每人三百幾蚊有酒飲有魚生炸物食，豐富飽肚，有好歌聽，抵食滿分。…查看更多