石磨樂豆

營業中

休息中

公司附近新開左Jollibean，原來德福廣場店仲係旗艦店，lunchtime同同事試吓新嘢先，點知去到發現有好多選擇，就決定買返嚟share食🤩🤩❥ 爆餡芋泥肉鬆吐司$38吐司主打即叫即整，咬落鬆脆，芋泥肉鬆足料爆餡，肉鬆配上入口即溶既芋泥，食落唔會好乾身，好好味🤤❥ 彩虹芝士吐司$42第一次見彩虹芝士，賣相好吸睛，芝士用咗食用色素整成彩虹顏色，食落鹹香味十足，仲有拉絲效果🌈❥ 芋泥西米露$38食完正餐梗係要食返個甜品，芋泥西米露食落椰香味十足，將芋泥同西米露攪勻一齊食，簡直係絕配😍❥ 奶蓋珍珠豆乳茶$42同平日飲開嘅奶蓋珍珠奶茶差唔多，但係就用咗豆乳做茶底，飲落都幾特別，同埋都好大支有500 ML，我哋share就啱啱好啦💕

之前喺新加坡Exchange食過一直念念不忘，知道香港開左店就急不及待要去食🤩發現款式多左好多，樣樣都想try~今次趁睇戲前去買左個quick lunch，呢間德福廣場店仲要係旗艦店，人手多，所以唔洗等太耐就有得拎🤓✨牛油果碎蛋吐司 - 賣相唔錯，好清楚見到一半牛油果一半碎蛋，味道同我想像中唔同，唔係平時食開嗰d沙律碎蛋，呢隻係比較清淡，蛋比較碎，啱晒注重健康嘅人🥑 🥚 🤗✨新加坡咖央吐司 - 呢款咖央係黃色嗰隻，吐司幾厚身，用左三塊麵包，薄薄兩層咖央醬，食到甜甜地~最欣賞係吐司個脆邊，脆卜卜好有口感🍞✨巴旦木仁芋泥豆腐花 - 都幾大桶，芋泥同豆腐花一層一層間住，幾貼心🧡芋泥口感綿密，豆花嫩滑，而且唔會太貼👍🏻✨火龍果豆乳 - 好鍾意佢嘅質地夠thick，火龍果好新鮮，食到果肉碎，同豆乳呢個配搭又幾特別，溫度好冰凍好fresh😋

今日同家人飲完茶剛好經過德福平台，見到這間新開的新加坡豆乳店，由於近排在網上見到有好多人推薦，於是便買來試試看。它有吐司加飲品套餐的，但套餐沒有我想食的吐司，所以我唯有散叫，點了：爆餡芋泥肉鬆吐司$38 ～ 目測是多餡的，但芋泥口感不太幼滑，肉鬆味道不太香口，整體一般，沒有驚喜，有些失望樽裝咖啡豆乳$24 ～ 本來唸住點正常味道不會中伏點知飲一啖，竟然嚐到人生的甜酸苦澀味道忍不住要講真係好難飲我已經無勇氣飲第3啖，最終成樽掉了。如果想挑戰甜酸苦澀咖啡的人可以試試。這店寫明是即叫即整，所以我等了差不多15分鐘。不過性價比太低，不會再有下次了！

👧🏻😋👅🍽✨一試新加坡過江龍德福新店-🫘 Jollibean 德福旗艦店租左以前渣哥個位, 方便一眾打工仔grab and go買健康輕食🫘 Lunch time經過塞滿晒人, 放工時間再去都仲係好爆, 但等左10分鐘左右都有得拎, 但可惜既係好多野都賣晒試唔到我最想試既野-🍞 爆餡芋泥肉鬆吐司 $38💯用個拉拉紙盒裝住, 兩件吐司整齊放係盒內, 就算係街食都好企理唔論盡💯芋泥軟滑冇加糖, 同鹹甜肉鬆唔撞, 吐司薄身香脆-🍡芋泥西米露 $38✨呢款芋泥反而有甜味, 但撈勻個椰汁西米露就岩岩好; 特別一提佢真係好大盒, 兩人食都好足夠-🧋奶蓋珍珠豆乳茶 $42💯豆乳好香, 同普通奶茶一樣咁滑; 奶蓋佔3成左右算係黃金比例但唔會太甜, 珍珠軟熟, 珍奶既健康替代品!

早前新加坡過江龍登港。我就去了湊熱鬧。請講食店主打每日鮮製的豆乳飲品、吐司、沙冰和甜品。店外看到品牌有多款不同口味的豆乳，如養生的紅棗桂圓豆乳，吸睛的火龍果豆乳等。今次我就選擇了火龍果豆乳，顏色粉紅，相當吸睛，甜度適中，有果香。除了豆乳還有沙冰，今天我就選擇了芋泥沙冰，芋頭味香，亦有非常冰凍的沙冰口感，適合天時暑熱時品嚐。但是飲品又怎會足夠呢？餐廳亦設有豆腐花和吐司。我就選擇了充滿本地風味的沙嗲免治牛肉吐司，即叫即烘，外皮酥脆，內裏免治牛肉餡料滿瀉，還有粒粒口感。至於豆腐花呢？當然都是芋泥豆腐花啦，上手時仲帶微暖，保留了豆腐花的豆香和滑嫩。

👧🏻Wodafoodie in Kowloon Bay德福平台最近進駐左新加坡過江龍，有30年歷史既著名豆乳品牌🌱主打新鮮健康吐司、豆乳飲品同甜品，早晨套餐同午市套餐最平$28/$45就有一份吐司連豆乳飲品，岩曬追求健康高蛋白飲食人士😍平日放工時間都要排隊，係最近既人氣No.1🏅✨ 🥪田園慢煮雞扒吐司 $40吐司有超過20款，健身人士可以跟我叫雞扒吐司🐥餡料仲有生菜蕃茄。慢煮雞扒已去皮，完全無油膩感，口感嫩滑又入味🤤吐司四邊夾到好香脆，好少係街買到熱壓toast麵包控一定鍾意🥰🥰成份吐司完全無加額外醬汁，輕鬆食曬一份都零負擔😋✨ 🫘白玉紅豆燒仙草 $44鍾意食仙草既一定要叫呢個！材料有小丸子、紅豆、椰汁、仙草。仙草份量超多，切成顆粒狀，口感彈牙，比台灣既嫩仙草，我更加鍾意呢款🥰撈埋紅豆同白玉一齊食口感豐富，想食得輕盈d仲可以好似我咁叫少甜😉✨ 🍧芋泥豆乳沙冰 $32🥉人氣第三位既芋泥沙冰芋泥綿密，同豆乳沙冰完美混為一體，豆香濃郁，即叫即製，夏天飲真係消暑一流！❄️✨ 🍐木瓜雪耳雪梨豆乳 $36/500ml品牌主打新鮮石磨既豆乳飲品，單係豆奶都有8款唔同口味。木瓜糖水食得多，但配豆乳一齊飲

今日係德福廣場行完街, 見到新開左來自新咖坡既石磨樂豆旗艦店, 有唔少人排隊, 小店主打唔同款式既豆乳飲品, 甜品同吐司, 每款都係新鮮制造, 早餐同午市都有套餐牛油果碎蛋吐司多士微微烤香左, 咬落香脆, 餡料塞到好豐滿三色芋圓豆腐花 配料豐富, 芋圓咬落煙韌芋泥豆乳沙冰落左好多芋泥打成, 質感好濃稠, 有淡淡芋泥香, 另外保留返豆乳既原味, 唔會好甜桂圓桃膠豆乳用樽裝包裝, 配搭好滋潤養生,豆乳味濃郁, 入口順滑, 仲有好多桃膠, 好有咬口

💡【過江龍甜品】新加坡過江龍近期黎到香港插旗，係德福廣場仲係旗艦店，一於買黎試下先。🍞沙嗲免治牛肉吐司 使用嫩滑的免治牛肉，加入香濃的沙嗲醬，牛肉份量有好多，沙嗲醬的香辣味道與牛肉的鮮嫩一齊食，好滋味。🍠芋泥西米露 由細膩的芋泥和西米製成。芋泥的香甜搭配西米的Q彈口感，令這呢道甜品既清爽又充滿芋香。🍧芋泥豆乳沙冰非常適合在炎熱的天氣享用，使用新鮮的豆乳及香甜的芋泥製作而成，口感滑順，清涼可口。🧋奶蓋珍抹豆乳茶結合左濃郁的抹茶味和滑順的豆乳，頂部覆蓋一層香濃的奶蓋，增添了口感的層次感。珍珠的Q彈口感與抹茶的清香好夾。

做完運動見佢新開 諗住買個甜品返屋企食開心下點知一食個豆腐花…..覺得超市/街市買個啲都好食過佢想食豆腐花，甜品都係去返豆乳x人好啲 起碼濃郁好多 食落去個下好幸福😪 唔好食嘅程度係平日冇要求嘅男朋友都食唔哂🫠

試咗三色芋圓豆腐花, 豆腐花一啲都唔滑, 芋園未熟透好硬. 沙爹碎牛三文治, 條邊好硬, 但中間一啲都唔脆, 等候時間要20分鐘, 出餐安排混亂, 員工態度差劣, 豆乳沒有豆味, 價錢貴, 性價比低, 不會再買.

期待咗好耐嘅Jollibean九龍灣德福廣場旗艦店終於開幕啦‼️因為本身好鍾意飲豆乳，特別係陀緊雪雪果陣，高蛋白質又飽肚，健康又好味😋新加坡品牌石磨樂豆於1995年創立，其品牌Jollibean由Jolli和bean合併組成，意思係從豆類制品得到快樂。100%香港製造，嚴選A級加拿大黃豆，每日石磨鮮製，大人小朋友都啱飲😎爆餡芋泥吐司 $38無改錯名，真係爆餡嫁⚠️ 一邊拎住影相一邊好驚太大力唧左啲餡出黎，真係要小心翼翼🤓 新鮮製作，即叫即整，拎起已經聞到勁香... 芋泥食落口感仲好綿密🤩 配上海量既肉鬆有獨特既鹹香，同芋泥超夾，同時唔會令人覺得油膩同滯!! 樽裝木瓜雪耳雪梨豆乳500ml $36秋風起最啱食木瓜雪耳雪梨🍐滋潤一下!! 加落香濃豆乳估唔到都幾夾，有淡淡木瓜嘅香甜，同時咬到雪耳，口感一流!! 奶蓋珍珠豆乳茶-500ml $42想健康地飲珍奶，識飲一定飲珍珠豆乳茶😎 口感煙韌嘅珍珠唔算好甜，香滑嘅奶蓋同香濃豆乳，真係最佳嘅配搭👍

用佢自家app買外賣，冇寫明有得揀熱同凍，自取時又冇問我要熱同凍，拎個陣以為係凍啦，點知外賣拎返去完全估唔到係熱，大熱天時俾咗個熱嘅我，好無奈😮‍💨講返個豆腐花，買咗一個黑糖豆腐花，味道好普通，好似街市買個啲八蚊雞豆花嘅質素，可能街市買嘅個啲質素同賣相分分鐘好過佢，而且個黑糖只係加啲淺黑色嘅糖水，勁頹！啲豆腐花個樣又畢到散修修，個質感同觀感好差，真心覺得完全唔值呢個價，未必會再幫襯第二次，差評！

今日經過見到新開就去試下,買咗仙草豆腐花,黑白芝麻豆腐花同埋芋泥豆乳呢三款,點知一試就中大伏.首先個"仙草豆腐花"完全無味都算,最慘係豆腐花完全唔滑,完全係"鞋"嘅, 同我平時食嘅豆腐無區別,甚至可以講平時買嘅豆腐都滑過佢,可以想象一下一舊普通"鞋"豆腐配仙草,何來對得住佢宣傳香滑豆腐花二字??然後個黑白芝麻豆腐花,又係零甜味,豆腐花同埋個芝麻都係"鞋"嘅,同埋有苦澀味.個芋泥豆乳又係完全無味道,芋泥顔色好化學色.最後買3樣野,但提供嘅外賣紙袋零承托力,個紙袋行到一半穿鬼埋.

最近聽朋友講 星加坡有間豆飲店喺香港插旗 Jollibean旗艦店 原來喺德福廣場1期平台 今日去幫襯 已經見到唔少人排隊😉-🫘白玉紅豆燒仙草 仙草勁多入口滑嘟嘟 白玉柔韌帶嚼勁 細細粒軟糯Q彈 加埋甜滋滋起沙紅豆粒 啱晒嗜甜一族嘅我-🥤樽裝木瓜雪耳雪梨豆乳500ml木瓜雪耳雪梨清甜潤喉 入秋之後 喉嚨時不時感到乾涸 真係要飲呢款豆乳飲品養生一下啦😉 豆乳唔算好甜豆香ok-🥪牛油果碎蛋吐司除咗豆乳飲品 呢度亦提供多士 單買或者做套餐都得 特色餡料有榴槤咖央 牛油果碎蛋係人氣選項 粗粒🥑將多士塞到好滿 如果麵包烘得再燶啲 咁就更好

田園慢煮雞扒吐司一路拎住外賣返屋企，一路聞到個吐司好香。雞扒夠大塊，慢煮雞肉肉質嫩滑。三色芋圓豆腐花豆腐花好重豆香，芋圓夠晒煙靭，仲有好多粒添，share黎食啱晒。黑白芝麻奶蓋500ml唔太甜，黑芝麻味道剛剛好，樽仔密封左，夠晒衛生。記住小心拉開蓋因為超足料斟到滿一滿。芋泥豆乳沙冰500ml淡淡芋泥香味，豆味都好香，兩樣好夾飲落好舒服。500ml都好夠飲，因為都好杰身。好多人經過都俾佢吸引而停低左，條隊keep住都好長龍。