假期同家人去飲茶，去咗間以為係新嘢嘅《真味鮮廚》，望到啲餐牌，cher！海港集團嘅！本身對海港嘅印象都唔係話太好，佢嘅食物質素嘅落差可以好大，今餐可以好好食，會期待下一次，但再次幫襯時，就差到唔想再幫襯，所以都冇話佢呢間唔同名嘅茶樓抱有好大嘅期望，但不來也來了，就睇下係好定差。我地點咗分幾次點咗14樣點心，最後嚟得13樣，其中一樣問咗兩次都係有落到單，真係摸不著頭腦。我哋最後食咗黑椒金錢肚、香煎蘿蔔糕、蟹籽燒賣皇、潮州粉果、蠔皇叉燒包、家鄉煎薄罉、鮑汁鳳爪、翡翠蝦餃皇、刴椒蒸魚雲、黑椒牛仔骨、金沙銀蘿腸、生滾鯛魚片粥、大豉汁蒸排骨。呢13樣嘢，「蟹籽燒賣皇」我真心覺得最唔好食，呢個係佢整得唔好食，佢冇豬肉味之餘仲要係有陣唔知咩味，酒味？定係啲肉變咗？感覺又唔似，同埋佢個皮係瘀瘀黑黑咁，一啲生氣都冇。另外一個我覺得唔好食嘅係「潮州粉果」，呢個係我唔喜歡佢個味道同質感，就同佢本身嘅製作無關。其他11樣係正常嘅點心嘅味道，要講驚喜嘅係有四款我一响唔食嘅兩款點心，一個係「鳳爪」，好少可覺得啲鳳爪好飽滿同好有骨膠原；第二個係「刴椒蒸魚雲」，我一向唔食咁多骨嘅嘢，我只係試下味，但最後有一半係我食哂。佢做到好惹味，雖然魚雲一定係多骨，但佢嘅香味係好難令人抵抗，有啲想知佢個汁係用咩嚟整；另外一個讚嘅係「金沙銀蘿腸」，雖然佢有啲似炸兩，但味道係唔同，佢係用腸粉包蘿蔔嘅春卷！ 蘿蔔粒清甜，加上春卷酥脆，而且份量都唔少，實在係好誇張。第三樣係「生滾鯛魚片粥」，咁怕食魚嘅我都覺得味道唔錯，鯛魚片有好多塊，仲要好大塊，肉質好爽同埋冇乜骨，呢個真心讚嘅。叫咗咁多嘢，諗住都唔平，連茶錢加一，埋單只係$403，比我地想像中平好多。…查看更多
