牛牛台式鴛鴦火鍋

營業中

休息中

我其實成日同friend 去喱間食 如果大家好食得嘅 喱間超啱你 如果大家唔中意佢漏單嘅話 喱間都超啱你 佢嘅配料超多 丸又多菜又多 野飲都超多 佢個湯底仲可以揀兩個 超推薦佢個沙嗲同麻辣湯

旺角火鍋放題開到成行成市，而家要搵間加埋一閒閒地都要兩百蚊以上。點知咁啱搵到間免收加一，平日一口價$158就任飲任食，抵食到要即刻去試試佢創興廣場出名多食肆，要食到間平靚正都唔易架。呢間正正地方夠大，剩係配菜都有四個櫃，基本上想食嘅野都有齊。湯底就揀咗麻辣湯同蕃茄湯，鴛鴦都唔使加錢，麻辣湯辣度適中，蕃茄湯唔會話淡矛矛。食肉獸最關注的肉類，牛肉都有3款你揀，唔使食死一款美國肥牛！驚肥可以叫牛小排，一d脂肪都無，如果想啖啖肉仲可以叫安格斯牛肉，大大塊。仲有海鮮類，有蝦有蜆墨魚仔都係任食加埋多款dreyer's雪糕同甜點，抵食到痺呀！

其實呢間野真係正一平靚正，158全包唔好諗住有乜超正野，但cp值一定高過$158，飲品冰品配料醬料多蘿蘿，贊湯底食番普通芫荽丫沙嗲丫就算，咸菜胡椒豬肚同行朋友話得個咸字服務一般啦，太多客，想有咩服務丫，又唔係去酒店，將就下啦

創興大廈一向都有好多唔同既放題食，今晚我就試左牛牛台式鴛鴦鍋其實說穿到都係普通兩種湯底，我嗌咗麻辣同胡椒豬肚，麻辣湯底一般個人覺得得個辣，食唔到麻既感覺，差少少而胡椒豬肚湯豬肚唔多，味道都唔係好食得出香既味道，加上佢加湯全部都係用普通湯，食到最黎後真係淡到不得了食物種類都多既，有大部份食物係放喺open area，可以自已出去攞，有各種甜品，雪條同雪糕，任攞既飲品種類都多，除左一般雪櫃飲品，佢另外有熱飲同沙冰等等都唔錯既另外有部份食物可以用點餐紙叫，牛有三種，質素一般，牛味都唔係好夠佢係好在叫得既數目都跟足咁上枱，甩單好少發生整體黎講以$158無加一食兩個鐘我覺得都係差唔多，cp值一般

心情唔好既時候，食野都係解壓方法之一朋友笑住話依家已經愈黎愈少女性朋友同佢打邊爐因為個個女仔都掛住減肥節食計我話，緊係食左先減拉！旺角創興多野食就係人都知呢間牛牛🐮火鍋新開張就幫襯下拉食物飲品款式都算多，自己出面自便牛肉同海鮮就另外點選小編湯底揀左海底撈麻辣味真係愈食愈辣‼️打邊爐黎講，都幾抵食！ 係同朋友聚餐既好地方！

先前有食過旺角嘅火鍋，無論半自助定自助都有，但係好多間都有加一服務費，今次呢間餐廳就「突圍而出」係唔收加一，餸菜選擇亦唔少！首先每個人收＄158 (夜晚入座、成人) 呢個價位係好合理嘅👍湯底方面同其他火鍋店相約，佢有一個獨家嘅臭臭鍋 同 麻辣鍋，我就食咗一個麻辣鍋，其實味道就好似米線店嘅辣一樣，唔洗怕叫錯咗湯底而食唔到🤣牛牛呢道特別在有好多飲品同甜品，我就好中意飲佢個沙冰，仲有球狀雪糕！

朋友介紹，又系慶生邊爐！今次呢間感覺系親民貼地平民火鍋，158免收加一，款式主要範圍食牛牛！配料醬料，見下圖：肉同魚都薄切，易熟快食，上菜圞國會特別，建議牛牛類比較好吃！還有縮水八爪魚定章魚😂，縮到勁細粒😂，鴛鴦湯底，但其實味道差別不大，都系恰下恰下。玉子豆腐同午餐肉都幾好。玉子豆腐可以自己拎一條比你自己吱落去！之後有雪糕阿果啲甜品，有朱古力同latte之類，感覺有少少似牛x鍋。最特別系有款，似雞蛋形既乳酪雪糕球。 食物見下圖：

無意中發現依間野，價錢兩位三百幾，兩味鍋，上到去都好多人，冇卜枱，好彩地等一陣就有位。揀左臭臭鍋同海底撈味，但湯底唔夠濃味，仲要加水都係加d普通湯，變相不停溝淡味道。如果食d墨魚丸丫，魚蛋，本身都有加工既食物，係唔會有湯味入到去，食牛丫羊個d就ok。食物都多選擇，不停加同不停轉，d丸類都唔係常見既咩海鮮丸丫，龍蝦丸個d，比較特別既，當然有豬紅，鴨血，鵝腸，大腸，午餐肉，菜，燒賣等等。雪糕都有兩車揀，小甜品都一車，野飲四部機，好多野揀丫~~依d都係自己去揀既，咁牛羊豬肉就落紙，都有海蝦，蜆，小八爪魚，但海鮮類就少量d俾得，肉都正常既份量。夠時間食，食得好飽，二人打邊都唔會有難度~~~就係湯底差d，失敗。。。。。

眾所週知旺角好多放題火鍋，但係免加一真係唔常見，牛牛台式鴛鴦火鍋嘅價錢💰同其他火鍋店睇齊，但係加少10%都抵好多👍🏻呢道個海底撈麻辣鍋並唔係對岸嗰個味，卻係值得一試❤️食材方面同其他店相約，佢嘅賣點卻係有多款雪糕可以選擇，食家飽嘗2個鐘芝士丸肥牛火鍋後可以用各式點品作完場😜相信唔係好多餐廳可以比到咁多甜品choice

有碗話碗介紹，星期四食7:00，walk in唔使等，但7:30過後就超多人等位🤢環境唔算乾淨🤢啲碟有少少污糟，要自己清潔。我哋兩位坐得唔迫但張枱好細😂根本就唔夠位放啲嘢😂你個碗差唔多掂住生嘅牛肉😟不過如果你食5:00應該會比張四人枱你，汽水果汁啤酒任飲🥰🥰有三個櫃俾你自己出去攞嘢食🥰🥰👍🏻👍🏻有好大張嘅調味料枱😍調味料齊全。大概10款甜品，甜品超難食，雪條有好多款👍🏻👍🏻有張紙俾你點湯底同埋追加牛肉豬肉羊肉。個人應為牛肉羊肉最好味😍追加左好多次😊😊豬肉就麻麻地啲肉太實，仲可以追加蝦同蜆，有幾粒勁腥😔整體來講$158其實算唔錯，食足兩個鐘👍🏻

第一次食呢間火鍋放題，覺得不錯，冇收加一服務費，抵食，牛小排正，海蝦新鮮，飲品多款式，雪糕甜點甜品有齊，豆腐花正，比我預期中好，抵食火鍋放題👍👍👍限時兩小時。

當日經open rice book左呢間台式打邊爐餐廳食公司飯聚，太開心反而唔記得左影相🤦🏿‍♀️💦第一次黎呢間火鍋台打邊爐，夜晚市段用餐算為抵食，揀左芫荽皮蛋、馬拉沙嗲、胡椒鹹菜豬肚、海底撈麻辣湯底，各有千秋，湯底唔太濃味，只要時間一長左職員加過湯後，湯底原味會被沖淡。至於食物上算多項選舉，素菜類同丸類為主，肉類較少，甜品方面雪糕同雪條口味或者凍食甜品口味比較多選擇，飲品更是多選擇，先有汽水、果汁、啤酒、沙冰、咖啡、朱古力等。味道上大多數不過不失，以價錢再睇番個水準系合理少平，牛豬既肉質方面唔重肉味，反而海鮮既蝦非常新鮮同肥美，當日最少翻點左三次，當日蝦鮮甜既味道到呢家仍然記憶猶新，推介大家去點蝦！整體評價中評

早一日巳打電話訂位，當晚去到門口服務員話冇紀錄，我話你地訂位又冇訂位編號，咁點呀？佢淨係識得講話冇紀錄，我比我手提電話紀錄佢睇，顯示我昨天真係有打過電話來，跟住佢話我有打電話來吾代表訂咗位，因為兩位通常不接授訂位。比人當正騙子，我都吾係第一次訂兩人位來食，明明係佢哋自己冇落簿，仲話吾接受兩人訂位，揾藉口推卸責任，咁都得？幾經理論，佢都企硬，後來比我睇佢本訂枱簿有兩人訂枱，咁先知大話被篤穿，死死地氣安排枱。

本人第一次同幾個朋友黎呢到打邊爐,限時兩個鐘,食物選擇少,質素不過不失,D食物大部份都要自己出去拎、出去夾,我同我個朋友兩個出去夾野時,有個紮馬尾的中年阿姐(全身穿著黑色制服)推著手推車,撞到我同我朋友,佢第一次撞到我隻腳,一句Sorry都冇,ok,我算,當佢唔小心或者唔知;但冇幾耐,佢架手推車又再撞埋黎,今次係撞到我個屁股! 又係一句sorry都冇我於是走去提佢,話佢撞到我,佢唔單止唔道歉,仲要理直氣壯咁同我講:"鬼叫你地係到傾計咩?! 夾野食就夾野啦,傾咩計呀?!"哇!  乜原來客人夾野食係唔傾得計架?!  之後我就同個樓面既職員講(佢應該係比較高級的),個職員好聲好氣地叫個手推車阿姐同我道歉,但佢竟然講大話話自己冇撞過我仲要話返我轉頭,而且係大大聲咁鬧我:「你自己企係果到夾野就夾野啦!唔好一邊夾一邊傾計! 你傾計既話咪撞到我架手推車囉!」然後佢繼續不停鬧我,哇! 佢講到好似係「我鞋面整污糟佢鞋底」咁!仲要惡死能登呀! 我俾佢架車撞咗兩次,我講野都冇佢咁大聲,我同佢講:「如果你撞到我受咗傷,咁你有冇諗過個後果?」佢竟然大聲咁反問我:「咁你宜家有冇受傷先?!!!!!」佢仲要係咁鬧我,

牛牛台式鴛鴦火鍋📍牛牛台式鴛鴦火鍋旺角彌敦道593-601號創興廣場15樓星期五HAPPY FRIDAY ，當然又係暴食時間啦，好彩早前訂左位如果唔係平平地打個邊爐都冇位，等左10分鐘就有位啦     免加一 168咋!! 甘平仲係邊度搵阿當然要豪食一餐啦食肉獸既我地全部都點左，其實唔係太分到係牛定羊不過勝在簿簿地唔會老海鮮就還可以啦，唔好太高要求啦乳酪百香果冰沙 !  呢個真係超好飲飲士多啤梨雪球都好好食阿，好軟滑阿肚餓又唔太介意食物品質既其實都係個唔錯既好選擇來的！推薦👍🏻👍🏻👍🏻👍🏻#kayGorfoodie #foodie #hkblogger#food #foodporn #yum #instafood #yummy #amazing #instagood #photooftheday #sweet #dinner #lunch #breakfast #fresh #tasty #foodie #delish #delicious #eating #foodpic #foodpics #eat #hungry #foodgasm #hot #foods #MakeYouSmi