烏蠅館响寶林都有一段時間，由商場地舖到家下商場二樓，我一直話想食，一直都冇幫襯過，終於下定決心，一試呢間開到去日本嘅烏蠅館嘅美食到抵如何。我點咗「雞脾雞湯米線」，「紅油皮蛋」配「桂花烏龍茶」嘅餐；另一個餐係冒菜C餐，配菜有芋絲、豆皮、蘿蔔片、雞肉、肥牛、鴨血、豬大腸、午餐肉同火鍋麵，要小辣麻辣湯，配懷舊大大杯紅豆沙冰。「紅油皮蛋」係跟餐唔使加錢，辣味夠香，同埋醋味都好突出，而且有半隻都算係咁。諗住下午茶嘅「雞脾雞湯米線」唔會好大碗，點知不單只唔細碗，仲要係大大隻嘅雞髀，咬落鮮嫩多汁，大大隻極具口感；湯底非常清澈，但同時帶出濃郁嘅雞香味，而且輕輕帶出藥材嘅回甘。响雞髀下有唔少嘅蟲草花，完全係一個養生嘅米線，加上爽口彈牙嘅米線，成個菜式配合到天衣無縫，呢個算係我食過最好食嘅米線之一。有8款餸嘅冒菜，冒菜係啲川菜嘅菜式，8款餸我揀咗芋絲、豆皮、蘿蔔片、雞肉、肥牛、鴨血、豬大腸同午餐肉，佢唔係每款一件，由二至四件等，如蘿蔔片薄切有四片，但非常爽脆有口感，而唔係淋哂一篤嘢咁，非常討喜；比較驚訝嘅係佢個豆皮係非常煙靭，最後我放棄冇食哂佢。最驚喜係個火鍋麵，我一直以為係普通嘅公仔麵，但原來係我好鍾意嘅扁身麵，好爽好有口感，吸收咗佢獨特嘅麻辣湯汁，麻香氣、辣嘅刺激，加上爽彈嘅麵，唔想講得太誇張，但真係不得了。好慶幸冇揀錯嘢，隨咗個豆皮之外。餐飲我點咗「桂花烏龍茶」，好清香解湯，我多手摵開出嚟睇，入面堅有茶，唔係hea沖啲茶入去，誠意十足。而呢杯「懷舊大大杯紅豆沙冰」，因為唔係我飲就唔比個人評價了。今次一試，的確係有驚喜，味道上嘅刺激令我一定會回頭。佢嘅味美更帶到日本涉谷，真係不得了，希望佢能帶出更多新菜式同保持住呢個水準。…查看更多
