影片
最近去咗香港仔嘅瀛火日式放題，都好滿足！我同屋企人無BOOK 直接WALIN，入到去發現環境都幾舒服，雖然唔係好大，但裝修得幾靚，有種日式風情。服務員一入嚟就好有禮貌，可能人少，佢會幫我拿野飲，第一次食放題有店員自動拿野飲比我，真係覺得好開心！落單時係用紙劃嘅，服務員來回都幾密，收野落單都好快。.首先，刺身拼盤真係唔錯，三文魚、八爪魚、赤蝦等都好新鮮，切得厚厚一片，每口都充滿肉感！佢地第一round 整左個特大SET，整得幾靚！但帶子壽司明明應該幾好食，但上面加左明太子，就即刻難食左。.至於熱食方面，清酒煮蜆味道清淡，不會太重，能夠保留蜆嘅鮮味。燒大蝦彈牙，真係好推介，可惜叫得３隻，再叫多６隻等到走都未上菜。辣酒煮花螺有D難食，可能煮得太耐，但個汁係好食。最難食個係三文魚湯? 完全係有D臭味。冬蔭功湯都唔掂。我特別鍾意佢哋嘅羊架，烤得啱啱好，唔會太老，啖啖都有羊香味，超正！另外，茶碗蒸蛋亦都好有特色，有蟹籽同冬菇，食落去滑滑地，非常好味。.我哋仲試咗佢哋嘅甜品，簡左菠蘿雪葩，食落真係有一絲絲菠蘿而且唔甜，必叫。.整體來講，對比大喜屋，當然係大喜屋好食，但香港仔出去來回車錢同時間，瀛火日式放題性價就高少少，如果你住喺香港仔或者附近，可以一試。但比我簡我會出返去食大喜屋，因為大喜屋品質控制較好，雖然次次食d味都一樣。
繼續閱讀
琴晚係銅鑼灣收工男朋友話見到呢間放題，不如去試下囉？當時20:00，就試下打去約20:30有冇位啦！留咗陸小姐2位，好，直入香港仔，到步後搵咗一陣都搵唔到就打去問下，電話一通「喂！陸小姐你好」，服務員仲記得我姓陸😱好好，問完位置就即刻行過去，一入到去唔係好大間，但服務員已好細心講解落單流程，好肚餓，唔理三七廿十一點咗嘢食先，落單係用紙劃的，服務員每收一張都會說多謝，食物到喇，服務員會同你講「小心碟邊熱呀/紫菜卷物要食先唔係會淋咗/炸物要小心熱呀！」呢啲每一句說話我都好耐冇聽過，重要嘅係每一位服務員都唔會黑住面對住你，到差唔多食完，我問係咪有甜品咖？服務員即問「陸小姐咁快食飽喇？好，我攞張甜品紙比你」鍋心到呢，埋單$590，呢個價錢呢個服務，有冇攪錯呀，五星級酒店都唔會記你貴姓啦！讚讚讚👍🏻👍🏻👍🏻好希望香港飲食業可以做到咁，唔係要你地記住我貴姓，只要唔好黑面就好了🙏🙏🙏
繼續閱讀
已經食過3，4次。如果係香港仔想食新鮮刺身真係要嚟呢間，壽司飯唔係機製，質感唔死實，而且舊飯唔大嚿，材料又非常充足，正👍🏻性價比算係咁，最重要係坐得舒服。宜家去啲普通質素連鎖壽司店想食飽都要成二百幾一位，如果想叫好多刺身就更加唔使諗，三百幾都唔會夠。真係不如嚟呢間算，食物種類有多又任食，晚餐可以食成3個鐘，真係飽到上心口。服務更加唔洗講，好少去啲日式放題會係咁主動換碟，野食又上得快。呢啲加一服務費先抵俾架麻。
繼續閱讀
我其實好懶寫食評，因為我唔想求其寫幾句，我唔係要呃like，亦都唔係要出名，我好單純地只係希望自己嘅食評可以幫到其他人。今次寫食評嘅最大原因係餐廳嘅服務，真係好到不得了，好到有啲受寵若驚😆不過當然要講食物啦！情人節，唔想去咁遠，所以book咗屋企附近嘅瀛火日式放題，好耐無食放題，成日經過都想去試下，但一放假又唔喺附近🙈講下食物🥘我哋點咗好多野食，每樣都試咗先，然後好食再返兜！首先講吓上菜嘅速度，我覺得都算幾快，不過有上錯嘢嘅情況出現，無點嘅野上咗幾次，本身其實係冇所謂嘅，不過如果我哋唔食嘅話就會有啲浪費🙈食物全部都係熱辣辣嘅(當然除咗啲魚生同埋頭盤啦)，唔係放咗好耐嗰啲，係似即叫即整咁熱👍🏻掛住食都影唔晒啲食物，哩度只係得一半😆我同仔仔最鍾意就係炸雞翼，孜然雞翼同埋芝麻雞翼都一樣好味👍🏻牛肉粒就有啲韌！蒜蓉蒸扇貝都好好味，呢個就等得比較耐啲，我見好多其他食客都有點呢一個😋另外壽喜燒都好好味，熱辣辣👍🏻飲品就係自己出去拎，選擇雖然唔多但係飲品嘅款式都係香港人喜歡嘅口味，例如可口可樂、道地烏龍茶、椰汁… 另外都有熱飲可以叫，我哋叫咗杯雪梨茶！甜品方面就唔係任點嘅，雪糕係一人一杯，有五種口味可以揀。另外仲有其他甜品每人可以揀兩樣！真係飽到捧住個肚出門口😆服務點解會令我覺得咁驚為天人？係因為入面有個戴眼鏡嘅男仔(黑色頭髮，頭髮短啲嗰個)佢超級無敵貼心，我搣完啲燒大蝦之後想要濕紙巾抹手。本身我先生已經喺背囊拎緊比我，但係個男仔好似聽到我講嘢咁，突然之間搣開一張濕紙巾俾我，仲有搣多一張俾我先生👍🏻然後我飲完罐可樂，諗住起身嗰一下，講緊我pat pat只係離開咗張凳0.5 cm，然後佢又再次出現，仲要拎埋同一罐可樂出現喺我面前，問我係咪想要多罐呢😂當我答完佢：「係呀」，佢即場就幫我開埋，真係不得了👍🏻😂佢唔止對我哋一家三口咁好，我見隔籬枱嗰個女士都讚緊佢！食物質素未必係驚為天人，但係我覺得都唔錯，喺香港仔嚟講都算係咁㗎喇！起碼叫做屋企附近都有間好啲嘅餐廳可以慶祝下開心下🌹我係絕對會因為佢哋嘅服務態度好而再去幫襯，畢竟，今時今日咁嘅服務質素已經買少見少！
繼續閱讀
一開始入去嘅時候諗住大年初一冇訂枱都好大機會冇位。。。好彩時間比較早，所以都有枱。一入到去啲服務員已經同我哋好詳細咁講述有啲咩嘢飲，凍熱都有。而且佢哋都好主動去問我屋企人有冇長者咭，唔似其他嘅餐廳咁個客唔問佢哋就唔理～上刺身嘅時候啲服務員都同我哋講要優先食，如果唔係會出水😂佢哋嘅服務態度好到我有啲尷尬，唔知以為自己去咗爆星嘅酒店食嘢🤭🤭d蝦好甜又大隻，其他刺新都好鮮甜！個燉蛋又唔會好老啱啱好！另外我哋都叫左即開生蠔，啲生蠔都好重海水味好正，而且價錢都唔貴！除咗嘢食好食之外，我覺得重點係真係佢哋服務態度係超好，佢哋會好留意顧客嘅需要，例如紙巾濕紙巾。而且佢哋都好體諒老人家冇記性，服務員一早同我哋講咗凍熱嘅嘢飲都有，老人家唔記得佢哋都好有耐性再講多次～又主動問顧客需唔需要幫佢哋影相，唔係淨係我哋呢一枱喺咁，我聽到佢哋都有問其他枱嘅客人～絕對喺物有所值可以再去食嘅鋪！
繼續閱讀