添好運點心專門店

可以一試點心專門店😋撞正十月一日國內黃金周，商場入面多左好多遊客，正因為咁都好擔心食野等位要等好耐，都提前去餐廳拎位。由於早到關係，仲有吉位可以揀。但係都擔心有用餐時間，會俾人趕走，都特意同職員查詢，慶幸係可以任坐飲茶，值得一讚。而店員都好熱心咁安排位置，坐低後發現冇主餐牌，只可以在手機查看及落單，對老一輩比較唔方便。落單後食物都好快黎😋整體食物質素唔錯，但唯獨有幾碟唔太夠熱，可以改善再值得一讚，由於店員話冷氣係中央自己調節唔到，都好儘力幫我地尋找解決方法👍🏻…查看更多

今日放假同屋企人諗住去沙田添好運飲個茶，點知去到門口就嚇親，排隊嘅人多到打晒蛇餅！心諗既然嚟到，即管試吓等啦，點知又唔使等好耐就有位，算係咁啦！叫咗幾款點心試吓，整體中規中矩，冇咩驚喜。鮮蝦菠菜餃皮薄餡多，蝦算爽口；蝦餃都算晶瑩，不過皮有少少黏。腐皮卷炸得幾脆，但略嫌油咗少少。叉燒腸粉個皮滑溜，但蜜味唔算好出。鳳爪排骨飯係穩陣之選，豉汁入味。最有驚喜係釀尖椒，魚滑彈牙又唔會太辣！牛肉球同潮州粉果就正常發揮。如果唔使排長龍，可以一試，但特登等個幾鐘就未必值啦…查看更多

正正式式堂食添好運係第一次未到中午12:00到咗沙田新城市廣場有位唔使排就帶媽咪大人試試佢揼本裝修坐得寬敞舒服嘅全QR code落單連老人家都用慣晒喇首先上枱嘅係豬頸肉撈粗粗麵質地偏淋、豬頸肉同湯都中規中矩枱面沒有任何調味品問店員有冇醋，店員說只有辣椒醬和喼汁濃味人都係要咗一小碟辣椒油迎接燒賣和幾款傳統點心燒賣加咗冬菇粒、山竹牛肉有芫荽（加喼汁）兩款傳統口味都OK洛神花脆脆蝦腸$48有6件都幾抵雖然洛神花醬比較甜唔係我杯茶整體上媽咪大人都話滿意，性價比高期間限定同香港品牌維他奶crossover試咗反豆維他奶砵仔糕比傳統嘅甜，如果可以多豆就好喇😛…查看更多

由添好運第一間深水埗店開始幫親，都試過唔同店，最鍾意都係總店。 到宜家新城市開新店，原本都幾期待，近近地屋企附近就食到。食過幾次沙田店，估唔到第一篇食評係呢個情況下誕生。食物質素係大商場租金貴的掣肘下，中規中矩都可以理解。今日終於見識到神級員工，一定要寫低呢個奇遇。近4點來到，有一大班人等位，需輪候十幾張台，係呢個市道算不錯。等左唔夠十分鐘，突然不停叫號，原來前面的人都走了，但反應唔切，聽到叫到我之後2個號碼。驚過左唔計，急急腳去侍應面前，當時我問黑衫戴眼鏡扎馬尾中年女侍應，係咪叫左我啦，仲想話洗唔洗等多張先候補，點知都未講第二句，佢突然發爛渣🤪侍應瞪大眼怒啤：「我咪好大聲叫左囉，你聽唔到架咩。」喂大佬！真係黑人問號❓我正正常常問一句，洗唔洗發癲。 咁我問宜家有無位，佢照帶位繼續一邊鬧🤪，埋到台我都認唔住笑笑口問：「我洗唔洗同你道歉？」 她繼續怒啤， 屋企人話我地坐低後，她企係後面一路繼續啤，真係俾佢笑死。之後佢入左後欄，就無留意啦。成件事超級無謂，唔知佢做咩自己開波。老老實實，食左咁多次，個個員工都正常，服務態度算幾好，尤其有幾個後生仔女。可惜，印象俾呢位騎呢躁狂阿姐打破，一粒老鼠屎影響晒- 糯米雞夠大份，餡料唔算多，味道正常無特別，同超市急凍返熱差唔多- 紅木腸： 腸粉皮口感軟爛，水準算幾差，少少正常的米香和口感都無，餡係炸蝦🍤，味道係正常炸物，但無蝦味，配果醬味道豐富啲，以前有花生醬，宜家可能係成本原因cut 埋。- 燒賣：無影相，餡料大部分係肥豬肉，不過算有啲蝦味，正常發揮，係試過嘅點心中最好一款…查看更多

去沙田行街睇戲，想食點心，就揀咗好耐無食過嘅添好運。星期六午市真係比較多人，2人枱都等左一個鐘，建議預早禁飛，然後係商場行街涼冷氣。兩個人食唔到太多嘢，食評如下：………………………………………………酥皮焗叉燒包 ⭐️⭐️⭐️⭐️⭐️皮薄餡靚，表皮酥脆，好食！晶瑩鮮蝦餃 ⭐️⭐️⭐️⭐️⭐️賣相好靚，大小剛剛好，蝦仁新鮮有彈性，蝦餃皮啲摺痕係正宗嘅証明。蜜汁叉燒蛋飯 ⭐️叉燒太瘦，肉質亦都唔夠林，蜜汁同豉油都唔夠，麻麻地。陳皮牛肉球 ⭐️⭐️⭐️⭐️牛肉好嫩滑，配埋吸晒牛肉精華同喼汁嘅腐竹，真係好味，同細細個去酒樓食嘅山竹牛肉球完全一樣味，係傳統點心的味道。斑蘭炸鮮奶 ⭐️⭐️⭐️⭐️期間限定的商品，奶味香濃，都炸得好香口，不過斑蘭味唔夠突出。………………………………………………添好運近年先係沙田插旗開新分店，但係其實好多年前已經係深水埗發跡，歷史悠久，點心的品質相對有保證！不過如果要等一個鐘先有得食，我會選擇食其他餐廳😂 …查看更多