海港薈

蟹王薯爺收到風，利舞臺22樓最近新開咗間中菜廳「海港薈」主推阿拉斯加長腳蟹，週三雀局終於斷咗其六連敗嘅戰績，週四晚即相約肥肥家族去拆蟹慶祝！佔用面積全層嘅餐店以雲石裝潢嘅門面好有氣勢！接待處旁大大個魚缸啲水好清，展出多款游水海鮮，實在吸睛！用餐大堂樓底唔算矮，間隔開揚，舖上厚厚嘅地毯有助吸音。據悉，店內另有三間廂房，分別最多可容納上八人、十四人及十八人，對應嘅晚市最低消費為五千蚊、八千蚊及萬五蚊，其中唯一設有私人廁所嗰間十四人房就最多人訂。每位席上都擺有齊備嘅自用及公用餐具。網上已有人上載厚本餐牌，其首頁先道出店子「金齏玉饌」嘅理念。最後一頁列明茗茶$18/位及其他雜項收費詳情。開瓶費$100/枝，實屬良心價，不過新張期間暫免開瓶費，酒鬼們有福啦！如相所示，經理Roy哥哥架生齊備，開酒斟酒都絕不馬虎。場內嘅貴客大多選食原隻阿拉斯加長腳蟹，另加孖寶海鮮。人數唔夠多去拆一隻蟹，所以就選擇咗唔洗自己郁手嘅「長腳蟹の盛一人前」套餐，$498/位。服務生不忘告知此套餐於推廣期間買三送一，更表明歡迎五口子叫四客黎分，所以就另加咗兩款散點項目。金磚滑豆腐（$98）：豆腐粒當真如餸名般呈金磚狀，食落外層香脆心嫩滑，微辣惹味，送酒一流！金蠔法國鵪鶉生菜包（$298/四隻）：薯爺大讚半乾濕嘅金蠔飽滿肥厚，濃甜軟嫩，不過如果可以熱啲就更加理想。長腳蟹の盛一人前（$498/位）之長腳蟹肴肉：套餐第一道頭盤勁似「鎮江餚肉」，只係豬肉部份變咗做長腳蟹肉及蟹膏。兩件半晶瑩嘅點心清涼輕巧，連埋頂面細細粒嘅甜醋波波食，酸甜嘅調味於口中滲入蟹肉啫喱度，效果醒神又醒胃。長腳蟹の盛一人前（$498/位）之蟹肉文思豆腐羮：豆腐羮個湯底好清香，蟹肉鮮甜易入口，切成幼絲嘅豆腐亦細嫩順滑，一人一碗羮都唔溜，份量恰到好處。長腳蟹の盛一人前（$498/位）之蔥油煎焗蟹腿：兩件半煎炸嘅蟹腳肉厚身得黎外皮香脆唔油膩，蟹肉極之軟滑，黏上碟上翠綠嘅蔥油及點綴嘅魚子醬即倍添芳香及鮮濃，個人覺得係套餐中最正嘅一味！長腳蟹の盛一人前（$498/位）之京燒蟹肉和牛：一口一件嘅和牛鬆潤多汁，又唔會太肥，撈入蟹肉碎令惹味嘅菜式多咗份鮮甜，海陸組口毫無衝突，簡單味佳。長腳蟹の盛一人前（$498/位）之蟹肉炒長旺配蒸雲腿龍𧄌球：兩件龍𧄌球皮潤肉軟嫩，雲腿竟然超甜冇咸味，長輩欣賞廚師選配桂花粉絲夠清爽。長腳蟹の盛一人前（$498/位）之蟹籽蟹肉炒絲苗：炒得夠乾身嘅黃金炒飯鬆香有彈性，混入新鮮蟹肉尤其鮮香。長腳蟹の盛一人前（$498/位）之流心楊枝甘露布甸：成餐飯最差嗰味係不含蟹肉嘅布甸，唔睇餐牌仲以為自己食緊有芒果味嘅蛋白咁，好膠囉！長腳蟹の盛一人前（$498/位）之燕麥紫心番薯：好彩微甜嘅紫薯粒軟糯暖胃，芳香淡雅，輕盈可口。銅鑼灣新店「海港薈」環境光猛開揚，服務生好客有耐性，新張期間免開瓶費之餘仲有其他優惠，性價比都好高！家人已決定下次黎要叫原隻阿拉斯加長腳蟹自己拆，務求可嚐到靚蟹最鮮甜嘅原汁原味！…查看更多

一家人食飯，雞油蒸長腳蟹5點幾重不過不失，嗌咗兩個點心蝦餃同鳳爪燒腩仔燒鵝上湯菜都好食架！最敗筆係蟹膏黑松露炒伊麵，難食到飛起，食一啖之後個口腔充斥苦澀味，飲茶都解唔到！本身黑松露炒伊麵，黑松露有浸汽油味係黑松露嘅特色，完全可以接受先會嗌，點知食落去又澀又苦，完全入唔到口，個個試咗一啖就食唔到，個蟹膏又苦又澀，經理定部長話問過廚房係咁嘅味道。…查看更多

我哋四個人去呢間喺利舞臺嘅海港薈，好似話新開冇耐，特登去試吓，環境十分舒適，服務幾好，店員仲特登過嚟分享點樣食雙皇面，之前以為開喺利舞臺價錢會好貴，但又唔係喎我覺得性價比好高！食物質素又好！可能因為係海港集團作風。 海港由細食到大，都保持到呢種風格同質素真係好難得！ 之前都係第二間海港薈都食過好多次小菜同其他海鮮， 上次喺北京道1號嗰間食嗰個黑毛豬叉燒都好正，依度仲upgrade咗變煙燻黑毛豬叉燒，下次call 齊屋企人過嚟試吓佢！仲要試埋長腳蟹同龍蝦！諗起都開心！…查看更多

今晚一班舊同事聚餐，有人推介去銅鑼灣的海港薈，因為她上星期去過食長腳蟹，稱讚非常抵食。今晚是星期六，長腳蟹優惠價$198/斤，比她上星期還平了$52/斤。我們一行7人，選了一隻5.2斤的長腳蟹，上枱時非常震撼。 我們另外叫了幾款小菜和一款小吃，但是蟹都吃完很久才到，連不用再加工的酒糟鴨舌都要等很久。其實，之前看過其他人的食評，都有講這裏除了上蟹最快，其他菜都要等很久。本以為是個别情況，但今晚實測真是如此。 雖然要等很久，但餸菜的味道又真是不錯。我們要求將蟹膏拿去炆伊麵，怎知㕑師攪錯了，把蟹膏拿去做了炒飯。送來時，我們說不是我們的，我們是叫伊麵，但重覆再來了兩次都是炒飯，我們就明白應該是他們已沒有多一份蟹膏去炆伊麵了，於是就接受了個炒飯。女部長知道是他們攪錯了，便說送份甜品給我們作補償。原來甜品是桂花紅豆糕，雖然是送的，但一點也不馬虎，賣相好，味道也好。 雖然這裏上菜比較慢，但員工的服務態度都幾好，食得都好舒服暢快。…查看更多

今日一行五人專登去銅鑼灣利舞臺新港薈食帝王蟹，見佢新分店，而且係集團式經營，明碼實價，點知都係失望。一心去食帝王蟹，第一時間梗係揀隻靚蟹先，我哋又想食龍蝦，經理就介紹咗一個套餐，龍蝦+海魚一條，我哋見都係自己喺魚缸揀龍蝦同游水魚，值得一試。我哋揀咗一隻西澳龍蝦，跟住再揀一條靚魚，揀嘅時候專登講明唔要畸形歪嘴同怪身嘅魚，最終自己揀咗一條靚仔白身嘅老鼠斑。第一道菜花雕蒸帝王蟹，完全冇投訴，第二道菜上蟹膏炒伊麵都冇問題。跟住再上龍蝦加條老鼠斑，經理幫我哋開條魚，開完佢都講咗一句條魚骨彎咗嘅，我哋試咗龍蝦先，還可以啦。一食條魚驚喜就嚟啦，一條白身魚開出嚟已經見到有啲啡色，夾上嚟食啲肉質死實、冇味，根本唔似我哋揀嗰條魚，真係奇怪？俾啲咁嘅嘢客人食，真係冇晒信心。我哋本着留港消費，可惜又係失望！我哋反影咗俾經理聽，最終取消咗條魚錢。我哋見到個廚房總廚係度，好想話俾佢知，睇實廚房，唔好俾佢哋亂咁嚟啦😤…查看更多