洪記

營業中

休息中

首先碗粉好細碗，見好多人都嗌兩碗先夠。魚皮唔好食，好似只係食炸粉咁。魚蛋同魚片都好細粒細片都算，重點係極不新鮮，咬落唔彈牙無魚味又’鞋’又實，應該係放左落冰箱勁耐。如果叫野飲要$17一杯，沒有服務態度可言。總括嚟講，去返對面食欽記好過。

昨晚睇完介紹大埔街市熟食中心，兩公婆決定去試點心，點知去到一位難求，立刻搵第二間。經過洪記，人不算太多，搵位坐低再行出去叫嘢食，姐姐落單時特意提醒製作需時，那就先飲奶茶慢慢等。十分鐘左右兩碗魚蛋粉送到，上面有一片炸魚皮，雖然放在湯面，但依然酥脆！魚蛋細細粒，味道同長洲張記有幾分相似，湯就有點普通，碗麵size偏細，以我食量最少要食兩碗先夠飽。總結用餐愉快，味道好但非神枱級，價格合理抵食。值得一提，好多人話佢哋服務態度差，我又唔太覺得喎！傳菜嗰位哥哥仔非常斯文，我同佢講唔該，佢都有同我講唔使客氣。幫我落單同收錢嗰位姐姐係同一個人，落單時見佢木口木面，但佢幫我哋收碗同埋單嗰時，都有講唔該同多謝。是日消費：魚蛋河x 2 = $72

知道這間麵店也有好幾年，但每次到來，不是人太多，就是已經售罄，實在有點氣餒！😢早前終於試到，原來這裏只有魚蛋河、魚蛋麵 及 淨餸，因我們偏愛河粉，所以叫了兩碗魚蛋河 及 壹碗淨餸。🤗魚蛋河表面放上一片魚皮，食落油潤香脆，湯底清淡，河粉雖然比較厚身，但順滑可口，魚蛋不是彈牙那種，但魚味香濃，好有以前中環「新景記」的質感，反而魚片就比較一般啲。😋後記：坐下後本想立即叫侍應下單，但其他食客叫我們安靜等佢埋嚟落單(明就明)，好在等了也不是太久。🤭#魚蛋河#洪記地址: 大埔鄉事會街8號大埔墟街市及熟食中心2樓CFS4號舖

可以一試，可以再吃，可以不再吃。洪記幾乎是大埔最有名氣的魚蛋粉，在大埔市政大廈只有4張圓枱，每張枱仲劃了邊界註明只可以坐5個人。只賣魚蛋粉或麵，從清晨起營業至下午一時就收檔。我和朋友在上午10時30分到達洪記，等了大約10分鐘有枱坐，先是鄰店問你會不會點飲品，因為洪記沒有供應飲品的，但鄰店收17元一杯熱飲，我覺得有點兒那個。然後相隔10分鐘，才有洪記店員問你要粉還是麵。沒錯，你只需要回答粉還是麵，和幾多個就可以了。我和朋友都點了一個粉，魚蛋粉有少量炸魚皮附帶在魚蛋粉。每碗賣36蚊，我覺得性價比算可以，只是坐落市政大廈，就別對環境抱大期望。而魚蛋粉，的確沒有甚麼值得評價，但奇就奇在，我們在吃魚蛋粉途中，已經有一堆人站在我們側邊等位，而且疑似給壓力想我們快些吃完，然而我和朋友都吃得好慢，等位人士卻不得要領。只能說，要是你來大埔旅遊，而想不到吃甚麼，洪記可作為一試的小食，試完可以再吃，也可以不再吃。

大埔新街市出名多好野食，比較多人認識都係海鮮加工嘅晚市鑊氣小炒，原來晏晝嘅人潮都十分之多👯‍♀️其中有兩間魚蛋粉都係長期排晒長龍，基本上12pm左右賣晒就會收工，分別就係洪記同欽記😎依幾年家人都經常幫襯，佢哋累積經驗後都比較推薦前者～所以今次就寫下洪記嘅食評先😙魚蛋粉 (36) 再重要當然係魚蛋，有成4粒魚蛋同2塊魚片，再配上厚身脆口嘅炸魚皮。魚蛋真係食得出手工誠意，有別於一般超爽嘅口感，依個相對上係會腍身少少，但係魚味超重，食落去唔會覺得只係麵粉👍🏻大家都要試下！再講湯底，坦白我覺得比較淡，但配上佢特製嘅辣椒豉油，依個味道剛剛好，反而可以突出魚蛋嘅鮮味。至於個麵底，可以揀鴛鴦，但我就揀河粉，因為佢個河粉好滑，唔會容易發脹。但係份量就比較少啲，男士一碗就未必會夠飽🤔最後一個tips💡新街市或者其他熟食市場都有個特色，就係只可以坐舖頭前嗰幾張枱。但係洪記附近都有啲茶水檔，只要有幫襯佢哋飲品或者其他小食，都可以喺洪記叫個魚蛋粉過嚟～咁就可以減少排隊嘅時間😌

📌大埔街坊必定知道嘅魚蛋粉店🍜位於街市2樓有幾間都賣魚蛋粉 不過呢間由細食到大 所以食嘅更有回憶嘅味道佢地嘅湯底 魚蛋 魚片 炸魚皮都係自家工場製造 所以食得出魚蛋魚皮係有魚鮮味 一啲雪藏味都唔會食到～河粉唔會好散 再加埋佢地送嘅辣椒油🌶️辣椒油唔係好辣好麻個種 而係辣香味所以辣椒油會將魚鮮味再輕輕帶出黎 神來之筆嘅辣油令整碗麵好好食🍜佢地嘅魚蛋魚片係白魚蛋 細細粒 食落去會食到啲魚碎骨🐟唔會係雪藏貨真係食到出佢地自家手打😋好多人都話佢地嘅湯底好淡 比起同場第二間欽記的確係淡好多 但個人認為正正就係佢湯底唔會太濃 就令魚蛋魚片可以做整碗麵嘅主角 所以呢個就觀點與角度啦😆飲住隔離茶記嘅檸檬茶 食呢碗麵 再另加一個淨魚蛋/淨魚片 就係一個好豐富嘅早餐啦😙提提大家因為超級多人會排洪記 因為佢地賣完就會收鋪 大約1-2點就收架啦建議大家早啲去食😋究竟洪記定欽記好食啲？觀點與角度 自己鍾意食邊間就邊間啦🤣🍽️ 食物：🌕🌕🌕🌕🌑🥂 飲品：NA👩🏻‍🍳 環境：🌕🌕🌕🌑🌑💯CP值：🌕🌕🌕🌑🌑✅回頭率：🌕🌕🌕🌕🌑💰魚蛋粉 $32Overall: ⭐️⭐️⭐️⭐️ (out of ⭐️⭐️⭐️⭐️⭐️)📍洪記 地址：大埔鄉事會

第一，好聲好氣行埋去同佢講，早晨，想買外賣。。。第一句就好似想點著咁話「買咪買外賣呢邊呀」，我都係有禮貌地問一句，我點知你地啲規矩呀，你有冇寫明外賣一定要係呢邊。第二，我都未講食乜嘢，佢就話你半個鐘頭後先再返嚟，咁我話唔使唔使落單先，佢話你食乜嘢都係半個鐘頭先再返嚟，而家唔得閒招呼你，語氣奇差。第三，味道不外如是，啲麵太林唔爽口，魚蛋味道普通，湯又比較鹹冇乜味，如果食之前要咁受氣，我寧願唔食，冇下次。

放假總想訓晏少少，但大埔地膽介紹嘅呢間魚蛋粉，聲稱只有早餐時間至食到😶‍🌫️餐廳位處於大埔墟街市熟食中心，吸引好多街坊、買餸友、同行山友黎幫襯。但賣嘅只有魚蛋粉‼️麵底可選，但餸就無喇🤨如需餐飲，就要幫襯隔離嘅茶水檔囉🍹不過基本上你一坐低，兩邊嘅店員都會即刻approach你😏湯河到🔈碗內有魚蛋、魚片、炸魚皮、香蔥同河粉，另附一小碟辣椒油。數落好似好豐富，食落其實好細份🫢建議兩個人去嘅話叫完兩碗麵要加多碗淨魚蛋😝魚蛋、魚片唔似來貨，口感較軟、魚肉味濃👍礙於魚蛋唔彈牙，個人會比較喜歡魚片🧡炸魚皮齋食比較咸，但響淡過水嘅湯底浸耐d就可以了🙃辣椒油雖然無咩籽，但夠香夠辣，屬神來之筆😙😙😙題外話：奶茶同咖啡都令人失望，以為呢d老字號實夠香濃...原來只係我未訓醒🫣

洪記還是欽記，喺大埔都有大家嘅支持者，我連續用咗三個星期去try左呢兩間粉面,也嘗試咗佢哋裏便嘅兩溝！洪記湯底比較出色，清湯，炸魚皮好食，香濃，魚蛋偏魚味好濃，本身比較大碗啲，但個辣椒醬就豉油比較多，辣味比較弱至於另外一間，佢個湯底都係清湯，魚蛋我比較喜歡，但炸魚皮比較硬，好難咬，碗粉比較細碗，值得一題的話佢哋兩個都有我哋兩個嘅街市態度，如果需要服務的話，切勿去！我試過去是但一間食，我哋一路食，佢哋一路後邊係咁鬧對家

大埔墟街市食肆中心一直都吸引好多街坊或其他地區嘅市民黎食上面真係有好多美食，例如豬扒麵、魚蛋粉、茶記西多等。兵仔由細到大都食開洪記的魚蛋粉，有舊街市食到黎依家食肆中心，水準一定冇以前咁好，但係食嘅係回憶。💂🏼‍♀️《招牌魚蛋粉》$32一上到枱飲啖湯先，好清甜調味都足夠，佢哋啲魚片同魚蛋都係自己打，所以有時會食到少少魚骨喺入邊但係夠晒新鮮又唔會太腥，喺出面食唔到呢啲魚蛋！最特別嘅係佢哋嘅炸魚皮，都係自製嘅，佢好似用一層麵粉再去炸個魚皮，令到魚皮特別香脆同入味同個粉好夾！辣椒油都好出色，夠晒辣，配埋個魚蛋粉超正，但係魚蛋粉嘅份量唔係太夠，大食啲嘅話應該都唔夠食。頒發軍階:少校🎖🎖🎖

細細粒啊，細細粒真係又彈又好食係啊，講緊魚蛋，唔係粉樣魚蛋係堅有細骨白魚蛋麵底我情有獨鍾，河粉有人食“兩溝，黄麵河粉打孖上，趣緻唔係我杯茶老闆串過馬頭咕喱，係串架但，你黎係做咩架？受氣？睇得太重啦，快人快語食左先講

這間麵食店被轉好味，所以事程一試，可惜就算怎樣好食，怎樣平，都不會貼錢受氣，另選其他一般但服務好的食店。明白街市公眾熟食中心不可要求太多，但基本的待人太度亦需要，那裏所有員工都可能持著被稱高質素麵店而有所自負，如果你想叫餐，他們會問「搵到枱未？未就冇得食」，雖知熟食中心所有枱都可以給食客使用，最終要自己還回碗碟給所屬食店，可是他們用一張不悄和高傲的態度說：「祇可以用面前呢兩張枱！」自問本人都非常客氣詢問，何必用這様態度去對待顧客！所以連甚本待人禮貌都沒有既食店，不食也罷！

食物質素差，服務態度咁差！年輕時候居住大埔區，在購熟食市場食過洪記魚蛋粉，當年在店外邊已經可以聞到魚湯嘅香味，今時今日湯冇味魚蛋亦無味。服務態度很差！好似負責煮嗰個對食物都冇乜要求。

講起食在大埔，第一時間就會上街市二樓，而由細食到大就一定係魚旦粉。街市二樓有好幾間食魚旦粉o既店，我比較常去洪記。洪記賣o既魚旦同炸魚皮全部自家自設工場制造，魚旦細細粒但好有魚味，炸魚皮又香又脆，唔會硬堀堀。講到個湯底，食唔到有味精，味道好清，連埋o的蔥花一齊食就perfect。值得一提係，想食粉又想食麵o既朋友，係可以叫鴛鴦o架，即係又有粉又有麵。不過，每碗o既份量唔多，一般人都會叫一個粉/麵，再叫一個淨魚旦，再唔係一個人叫兩碗粉麵都好常見。同埋街市座位不多，如果想食洪記，可以揀隔離間茶記坐低再叫佢送過黎，咁就可以食魚旦粉又可以飲杯咖啡或奶茶喇。以前好多人話洪記服務態度差，其實依家香港好多食肆都冇左服務態度好耐啦，所以又唔覺洪記特別差態度。當然去得街市食，都預左服務態度、環境衛生唔會係5粒星啦。

洪記魚蛋粉已經係我們一家星期六必食既早餐。通常我們一家四口，每人一碗魚蛋粉再另叫一碗淨魚蛋share，就剛剛好夠食。好食既魚蛋真係要靠彩數，時好時差。有時d魚蛋好彈牙有魚鮮味，有時d魚蛋會比較腥。通常休魚期會差少少，因為少左新鮮魚。淨魚蛋果碗湯會濃d好飲d，粉面果碗湯會淡口d。炸魚皮有時會好碎好少，有時會好厚。不過整體都唔差，唔會難食。差唔多每個weekend都食，已經成了習慣。如果果個星期無去食洪記，就好似weekend少左d嘢咁。所以我覺得我食既係情懷，只要保持住先有水準都會繼續一直去。