影片
以上資料只供參考, 請與餐廳確認詳情
聽聞新蒲崗開咗一間由後生仔經營，專心做一件事一定做得好嘅叉燒飯專門店。今日放工特登過去試吓到底是龍還是鳳！呢間店只係單賣叉燒飯，不過仲有幾款涼菜同飲品可以加購。但其實最開心嘅係可以自己揀想食肥定瘦嘅叉燒。我食嘅係瘦叉飯，但瘦叉一啲都唔嚡唔乾，白飯有啲似日本米，但食落比較爽口，雞蛋煎得好靚，燶邊黃生，配上不太咸嘅豉油，賣相好吸引之餘味道都很好。幾個後生仔服務員熱誠殷勤招呼，有問必答，價錢又唔貴，絕對係物有所值嘅叉燒煎蛋飯。
繼續閱讀
呢間鋪頭開業之後一直都好多人，Lunch既時候無乜機會食到，而好幾次經過都聽到有位店員(唔知係唔係老闆)係門外大讚自己既叉燒有幾勁。有同事話咁啱星期六少人啲有食過，話好食所以今日lunch去睇下有無位。點知又真係有位喎！入去之前都重聽到有個店員係門口sell緊其他人，好記得佢一句說話“你食到就等於你賺左”。嗱！你推高左食客既期望，咁我就用高啲既標準入黎食你個叉燒飯。$58叉燒飯一碗連一條菜一隻太陽蛋，汽水+$6。如果係做到精挑細選咁既品質既叉燒飯，呢個價錢係可以接受。呢間鋪特色之一係可以選你想要咩叉燒，靚啲肥叉再貴幾蚊，而我只係選左燶邊，我係幾鍾意有少少燶燶地果種香味，而我呢份叉燒係無呢種風味既。-燶邊既質感係無既，只係燒耐左黑左少少。燶邊係咁？我真係唔識食。-蜜糖味食唔出，連後加蜜糖都無滴，可能漏左掛。-肉質乾柴，肉既纖維斷開晒，仍然有少少豬肉味既。-因為有啲實淨要咬耐少少，然後就開始有啲啲豬騷味出左黎。我個人體驗黎講，係差既！睇番我同枱既食客，同埋其他人果碗既賣相，似乎係我唔好彩啫。不過！當你吹噓自己既叉燒係幾咁出類拔萃，而你又咁唔小心出左一份咁既質素既食物比食客，呢個就突顯到你係無做好品質控制。呢啲咁差既部位你唔應該出比客人，經過廚房切叉燒擺盤，再經樓面送去比客人，經過兩個同事既手都唔認為碗叉燒有咩問題，咁啫係表示呢碗叉燒就係你地最好既出品，而我食完之後既感想，對唔住！只係工場叉燒。既然唔係每一碗都做到最好品質，咁就謙虛啲唔好咁大力推高食客既期望。比呢個價錢，其實我食唔到你所講既“你食到就等於你賺左”呢種滿足感。我相信我同事係真心覺得好食先推介我黎試，因為佢果碗(都係$58)眼見係正常無咩大問題架，另一個同事叫左肥叉比多$4，都係幾靚仔架。做好每一碗既品質管理，既然講到係精挑細選，唔好既部位咪棄囉，繼續努力！
繼續閱讀
屋企人放假，提議去新蒲崗食晚飯，話景福街近年進駐左好多新食店，去到發現好幾間舊店都執左，換左好多特色新店！其中一間，門口餐牌竟然寫住獨孤一味只賣“叉燒蛋飯”！ 仲要店名寫住“有團火叉燒事務所！”心諗：禁大胆！因為附近都有一間主打賣叉燒丼嘅食店。望入店內，見只坐左幾枱客，即刻諗住都係睇定啲先！但行左兩轉都冇乜心水店想試，又有少少雨粉粉，就決定會一會呢舊“大胆叉燒”🌟店內裝修係用“簡單型格”嘅設計，環境都算寬敞，樓底高，令人唔覺侷促！讚！但略嫌冷氣嘅風有啲勁！可能禁啱坐果個位，又或者係我個人怕凍吧！✨️餐牌只有一張（唔記得影相！），有飯，有兩款小食，一款係海蜇，另一款唔記得係乜！🍚飯就只有 A>>“古法蜜煉腩叉飯”（五花腩） ＆B>>双蜜豉香叉燒飯(梅頭肉)，另一款就係A+B嘅双拼叉燒飯。🍛三款飯都係會跟一隻太陽蛋，亦可以加錢加多一隻竹絲雞蛋或蘭王蛋🥚，又或者揀特色嘅米，不過我地對蛋同米冇乜講究，🤷所以冇加。一碟飯價錢大約60元左右，喺呢區係相當合理。原本想要兩碟双拼飯，但店內哥哥仔好好人，話如果每款叫一碟再兩個share食會更抵，一於咁話啦！🍛叉燒蛋飯嘅賣相合格！有菜有肉有蛋，啲叉燒冇令我地失望！👏腩叉肥瘦双間但食落又唔會覺得肥膩！入口淋得黎又有少少爽彈，讚！梅頭叉有幾舊都帶少少少少肥！但都好爽淋！再讚！👅都可以講係色香味俱全！🫶好難講倒邊款好食啲！下次再黎會叫双拼飯，因為兩款都禁好食！難分高下！🤩用茶餐廳價錢食倒酒店嘅水準，我覺得真係物有所值！👍👍👍😆果然係高手在民間！
繼續閱讀