影片
更多
2024-01-26
1271 瀏覽
前言得閒無事去深水埗玩，咁岩行過西九，見到呢間餐廳居然未執，就好似見番以前嘅朋友一樣，一諗起以前同佢嘅點滴，心中不禁勾起一陣甘苦嘅思緒，所以毅然決定入去食番一餐，回味一下。以上全部都係尻UP，純粹係同朋友黎到，想逃戰下D野有幾難食，諗住大家知難而退，點知各自都鐵頭而引發嘅悲劇……食物炸物、甜品壽司D食物質素我就唔多講，有相為證，係睇到都唔想食嘅等級，而你一入口就會直接感覺到無需解釋嘅難食。尤其係佢D壽司，首先你睇到塊紫菜好似好濕好淋咁樣，唔好意思，雖然其實唔係好濕，但佢係比你想像中更加淋，軟淋到一個地步你係可以係塊紫菜度搵到咬口，係紫菜度找尋咬口你聽過味？當佢同埋舊飯一齊送落口，其實你係要咀嚼好耐先可以吞，非常之唔似食緊壽司。然後係壽司上面嘅配菜，果塊章魚真係唔講得笑，本身係已經無味，食落去塊章魚係極度煙韌，加埋岩先講嘅紫菜，二個buff加強左壽司嘅咬口，令到要吞呢塊壽司要更加長嘅時間。三文魚係有小小接近臭嘅邊緣，已經唔係好唔好食嘅問題，我當日食完無肚痛都算係咁。其餘野都係水準之下嘅難食，最好食居然係D有小小汁嘅壽司，因為佢起碼有D汁調味。另外D泡菜同甜品，泡菜係除非大白菜之外，其他全
以上全部都係尻UP，純粹係同朋友黎到，想逃戰下D野有幾難食，諗住大家知難而退，點知各自都鐵頭而引發嘅悲劇……
食物
炸物、甜品
壽司
D食物質素我就唔多講，有相為證，係睇到都唔想食嘅等級，而你一入口就會直接感覺到無需解釋嘅難食。
尤其係佢D壽司，首先你睇到塊紫菜好似好濕好淋咁樣，唔好意思，雖然其實唔係好濕，但佢係比你想像中更加淋，軟淋到一個地步你係可以係塊紫菜度搵到咬口，係紫菜度找尋咬口你聽過味？當佢同埋舊飯一齊送落口，其實你係要咀嚼好耐先可以吞，非常之唔似食緊壽司。
然後係壽司上面嘅配菜，果塊章魚真係唔講得笑，本身係已經無味，食落去塊章魚係極度煙韌，加埋岩先講嘅紫菜，二個buff加強左壽司嘅咬口，令到要吞呢塊壽司要更加長嘅時間。
三文魚係有小小接近臭嘅邊緣，已經唔係好唔好食嘅問題，我當日食完無肚痛都算係咁。
其餘野都係水準之下嘅難食，最好食居然係D有小小汁嘅壽司，因為佢起碼有D汁調味。
另外D泡菜同甜品，泡菜係除非大白菜之外，其他全部都無泡菜嘅感覺，至少可以話係唔會令你開胃，而且大白菜都係有陣味。
甜品應該都係入貨，正正常常，所以反而係OK，之不過果個綠茶布丁都係完全無味。
環境
當日我係大概兩三點黎呢間餐廳，加上係星期三，所以係非常之少人，雖然我唔知平時又或者午或晚市會唔會多人D，不過我係非常之鍾意人少少又無咁嘈雜嘅地方。
而且佢果間格係比較寬闊，唔好話同普通放題或者燒肉比，就算係同冰室比都係嬴，而且張台都係夠哂大，活動空間係VERY OK。
雖然成間餐廳嘅設計可以話係好隨便，尤其係幾乎全黑色，D台台凳凳清一色嘅材質，就好廉價嘅感覺，但本人非常非常喜歡比較暗嘅環境，對於我黎講反而係加分項。
同朋友雖然食得唔係咁安樂，但至少坐低吹下水傾下計，係呢度反而係高水準。
清潔程度我認為可以，最起碼無咩油。當時雖則當時客人好少，但係服務員亦馬不停蹄咁清潔，我諗呢個係當中一個原因。
價錢
明將出名係咩？除左難食之外當然係佢嘅價錢，七十幾蚊嘅任食，你全香港都搵唔到幾間啦係咪？
七十幾蚊其實好多時候你係茶餐廳都係食呢一個價，雖然大部份茶餐廳係好食過佢，但呢一間野淨係以坐低靜靜地思考下人生黎講，都明顯比其他同價餐廳好啦。
尤其係而加D茶餐廳有幾唔好禮貌，D野食有幾行貨，香港人心中有數……
結論
如果問我推唔推薦，我係完全唔推薦，因為D野真係太難入口，但如果無地方坐，想有小小玩味可以黎
因為呢間雖然係難食，仲要係都幾難食，但我同朋友作為尋樂過黎食飯，居然係會有一番滋味
題外話/補充資料：
搵唔到紅豆軍艦ORZ
可以睇得出明將平時可能仲會有印尼姐姐黎食，因為四周張貼嘅「不准浪費」字樣嘅標示，唔單止係有英文版，仲有印尼文版文。
作為一間以價錢同難食招來顧客嘅店，佢幾乎係十年如一，無變過嘅難食，無變過嘅裝修，無變過嘅果種好「霉」嘅感覺，我反而係佩服佢地果種奇特嘅堅持……又或者係求其。
(以上食評乃用戶個人意見 , 並不代表OpenRice之觀點。)
張貼
