明寶石餐廳

很久沒有在灣仔搵食、今晚去會展睇完展覽順度行天橋過對面譚臣道看看有沒有改變、來到看到燈火通明原來有幾間新店開業、我以前來過的明寶石餐廳經過多年的疫情也在、入去看到服務人員都係熟口熟面那幾個、信心也增強。我們點了日本黑豚豬肋骨、帶子皇拼牛柳及超值$98的乳鴿餐、乳鴿夠肥大加埋焗豬扒飯、餐湯甜品及飲品2年價錢都沒改變真係服左佢哋點做。鐵板牛柳拼帶子是店的名菜、牛柳夠大件、帶子是3L級的、大到豉油碟一樣。日本黑豚豬肋骨真係好食到無輪、骨邊肉夠軟滑、肉汁切開流出來配合醃肉的日本特色醬、5條2人份量的整件骨幾乎被我搶晒。$338套餐2人用、真係好扺又好味。所以話存在多年的老店一定有驚喜、不會令人失望。下次一定會再來。…查看更多

一早出到灣仔，想搵間餐廳食個早餐，點知一入到去就中晒伏，入到去，伙計好似見你唔到，但成間野得3個客😮‍💨之後想order,足足叫左3次先有人應你。到上食物時，個waitress唔係放野落枱，係（訂）啲嘢落枱🤬🤬想點呀？個汁兜仲要係爛。成間餐廳d人只係係到吹水同吹水。一定唔會再去，永夠black list,再衰既茶餐廳都唔會係咁，電話長響個waitress 都唔去聽電話，咁擺個電話係到做咩？伙計講野仲大聲過音樂…查看更多

中秋節晚上響灣仔區，預計食唐餐一定多人，就去呢一間老牌西餐廳。其實幾個月前去過一次覺得麻麻哋，所以好耐冇去。今次就試吓睇吓有冇改善。點知去到人山人海，我哋都好幸運攞到張枱，目測似係自由行多。我哋兩人叫咗兩個燒牛仔骨餐，羅宋湯同蒜蓉包都OK，燒牛仔骨來到每人兩塊，但係煎到睇唔到啲肉，以為係拍咗粉煎，點知切開全部係肥油，一嚿又係咁兩舊又係咁，有一塊油係可以鬆開，睇得出係兩塊摺埋一塊，我哋都懷疑係咪人造肉＇最終九成都係油，冇乜牛肉，心諗嗰個做廚房煎嗰陣都知啦，點會咁樣攞得出嚟賣俾人。最後向個侍應投訴，女個個都好啲話煎多塊俾我哋，但心諗都係啲油嚟嘅，煎多塊都冇肉食啦！個男侍應做搞笑，話呢一水啲貨係咁，下一次嚟可能好啲。都唔明咁樣點樣做餐廳呢！我下一次仲會嚟俾你搵笨？真係一間冇良心嘅餐廳。睇咗其他評論，原來呢間餐廳係之前轉咗手，感覺佢已經唔係一間港式西餐廳…….。…查看更多

尋日第一次去明寶石餐廳食下午茶餐，嗌咗個薄牛扒湯米線，唔駛加錢包埋杯熱檸水 ($68 + 10% = $75)。以 $75 一個下午茶餐，我o既觀察係：1. 薄牛扒：有部份肉係正常口感，但有部份係淋到似梅o既口感，攪到我唔敢吞落肚（比用疏打粉乸過o既仲淋）。2. 米線：比預期中少，如果要具體比喻係大家樂湯粉下午茶餐3/4分量。3. 收得 +10%，但係水都無勘杯嚟。去過某啲連鎖店下午茶，係 waive 加一的。應該用免+1作為招徠，如果佢好想吸引人消費。佢只明寶石餐廳唔係名餐廳，如果以呢個水準交到上述水準，我只覺得值 $50。如果收 $75 先為到皮，就要做到相應質素。早知唔好嫌遠唔好怕餓，行遠少少去波士頓餐廳食。…查看更多

呢間位於灣仔譚臣道嘅老牌餐廳，在近年轉手後食物及飲品質素皆有所提升。近月多次於周日及周末午膳時間惠顧，對於佢嘅食物質素感到十分滿意。午餐嘅選擇頗多，價錢相比茶餐廳不算便宜，仲有加壹服務費，但食物質素明顯好得多。午餐一般包括餐湯，可選羅宋湯或忌廉湯。我每次都選擇佢嘅羅宋湯，因為味道非常濃郁，明顯係好足料，有當年嘅新寧餐廳羅宋湯嘅感覺。餐包方面可選擇甜餐包，多士或蒜蓉包。我十分喜歡佢嘅蒜蓉包，係即叫即焗，新鮮熱辣，蒜蓉味十足，而且係用法包，有兩片。至於主菜選擇就更多，所用嘅材料比一般嘅茶餐廳高質素多。佢嘅吉列黑豚肉十分嫩滑，一啲都唔乾或韌。焗牛脷飯嘅牛脷係厚切，而且份量足夠。牛柳粒或牛肉都唔會好似一般餐廳咁醃得太過份，仍然保留有牛肉嘅味道。咖喱牛腩炆得非常之到位，但個咖喱做得太過鹹，希望會有所改善。燒雞做得非常之嫩滑而且唔乾，十分美味。至於餐飲方便，絕對值得一讚嘅係佢嘅咖啡，特別係凍咖啡，可以飲得出佢用嘅咖啡豆並非平價貨，而佢所用嘅奶亦都非常濃郁有味道，唔係一般嘅平價奶，絕對有八成UCC coffee嘅感覺。至於服務方面，如果唔係繁忙時間，其實服務絕對可以。但如果係周日中午繁忙時段就屬於一般，特別係一位主管級嘅女人，面口就真係一般啦⋯⋯整體嚟講呢間餐廳絕對係值得幫襯，雖然價錢稍為貴，但食物質素係比起好多同區所謂嘅西餐好得多。絕對係性價比高，值得幫襯！…查看更多