新泰東南亞餐廳 (雙子匯1期)

今日去左啟德雙子匯行下商場，食個lunch.同朋友去左一期14樓嘅泰國菜新泰食午餐。餐廳裝修好有渡假風情，坐得好舒服，而且唔會噪。星期六午市都仲有set lunch, 我地叫左一個越式蟹肉炒粉絲 加配 燒豬頸肉沙律。餐飲跟配凍即磨咖啡越式蟹肉炒粉絲都幾大碟同足料， 蟹肉都足，食落香甜，粉絲炒得乾爽口，唔會太重口味，味道唔錯。加$25 配埋 燒豬頸肉沙律，酸辣開胃，豬頸肉爽口好食，沙律菜夠新鮮。串燒羊肉 賣相好靚，燒得啱啱好，配料蕃茄仔，洋蔥，菠蘿等等，色彩鮮艷。羊肉粒，肉質有咬口，帶少少筋，有香濃嘅羊肉味，配埋酸酸地嘅醬汁好夾。蔬果配料新鮮，食落好juicy, 風別係菠蘿超香甜多汁，必試羊肉串燒。原個菠蘿咖哩蝦充滿椰香嘅咖哩食落香甜順口，夠厚身，蝦數過有8隻左右，用咖哩煮完都有食到蝦嘅鮮味，肉質彈牙。放左陣都仲暖暖地嘅香脆印度酥餅配埋咖哩好好食，外脆內軟。泰式凍奶茶，叫左少冰少甜，奶茶味道夠香濃，幾好飲！餐廳都好多泰國人店員，服務有禮親切，環境都好好。…查看更多

餐廳真係好有特色，由門口一裝修佈置，到每一個侍應打招呼都真係好似去咗泰國睇得出餐廳都好注重每一個細節今日兩個人食飯揀咗一個湯，2個菜，一個主食1.肉碎生菜包-雞肉2.冬蔭功湯3.蒜蓉炒貴妃苗4.泰式菠蘿炒飯冬蔭功湯，湯頭酸辣開胃，喺口腔入面爆發出檸檬葉、香茅和辣椒嘅層次感，既有熱辣刺激又保留泰菜嘅香氣。海鮮份量十足，蝦肉鮮甜彈牙，湯底香濃但唔會過鹹，真係令人一啖接一啖，好適合開胃，細份量都好夠兩個人飲😋肉碎生菜包，可以揀雞肉或者豬肉平時成日都食豬肉，我哋今次就試吓雞肉肉碎味道濃郁，酸酸辣辣，完全足夠包曬每一塊生菜，口感清新又健康，味道同質感都極佳至於蒜蓉炒貴妃苗，青菜爽脆，蒜香濃郁，每口都帶住濃厚嘅蒜香同油潤感最後，泰式菠蘿炒飯帶出咗明顯嘅酸甜果香，米飯粒粒分明，好鬆散，完全唔會黏笠笠。菠蘿同炒飯混合得宜，以菠蘿上菜感覺又美觀飯粒又能夠吸咗菠蘿的香味，滿滿的炒飯整餐約兩人$464，食物質素、份量配合環境，都覺得不錯…查看更多

新泰啟德店必食！沙嗲串燒 x 冬蔭公 真係正到爆！喂，講起啟德搵食，想食正宗又高質嘅東南亞菜？「新泰」真係唔可以錯過！佢哋間啟德分店坐得舒服，重點係啲嘢食堅掂，尤其係佢哋嘅沙嗲串燒同冬蔭公湯，食過返尋味㗎！ 沙嗲串燒 - 食肉獸最愛！新泰嘅沙嗲串燒，真係鎮店之寶！佢哋啲串燒（雞牛豬都有，最推雞同牛！）燒得啱啱好，外皮帶少少焦香，咬落去啖啖肉都 超Juicy超嫩滑，一啲都唔「鞋」口！最靈魂梗係佢哋個秘製沙嗲醬啦！花生味超香濃，帶住啲微甜同香料味，仲有少少粒粒花生碎添，口感豐富到暈！點滿個醬，真係一串接一串，停唔到口㗎！同friend share叫半打/一打，係基本啦！冬蔭公湯 - 酸辣過癮！鍾意飲冬蔭公嘅朋友，呢度嘅版本真係 超！級！推！ 一上枱就聞到好香嘅香茅、南薑、檸檬葉味，勁開胃！湯底嘅 酸、辣、香 平衡得好好，唔會一味死辣或者得個酸字，而係好有層次！辣度算適中（如果怕辣可以叫少辣），飲落去個喉嚨會feel到少少刺激，但跟住係濃郁嘅海鮮甜味同香料香，好過癮！仲要 料超足，大大隻鮮蝦、爽口草菇，飲完個身暖粒粒，超滿足！點解特別推介啟德店？環境夠新淨寬敞，坐得舒服，好適合同班friend或者屋企人慢慢食、傾吓計。服務都幾好，上菜速度合理。價錢方面，呢個質素絕對合理，性價比高！想食地道又高質嘅泰式風味，沙嗲串燒配冬蔭公呢個組合，真係 必點！食完包你心思思想再encore…查看更多

今次嚟到位於啟德The Twins雙子匯泰國菜餐廳-新泰東南亞餐廳，餐廳主打泰國、越南、星馬菜式，廚師同埋侍應都係由泰國人主理，非常地道。裝潢充滿濃厚嘅東南亞風情，好有度假嘅感覺，而且環境舒適闊落，有落地玻，採光十足，此外設有戶外座位，可以飽覽到啟德景色，非常悠閒寫意。泰式海南雞飯海南雞飯以便當盒呈上，雞肉嫩滑可口，皮爽肉嫩，而且係無骨，食落好方便，配上酸辣醬同埋薑蓉，更添風味。雞油飯油香四溢，飯粒分明，配上嫩滑嘅海南雞肉，係完美嘅配搭。焗奶油大蝦伊麵即點即焗同埋製作需時，表面奶油焗至焦脆，溶化嘅奶油同埋芝士包住大蝦同伊麵，充滿奶油香氣，大蝦肉質爽彈，伊麵香糯可口。醃無骨鳳爪沙律無骨鳳鳴味道酸辣開胃，口感爽脆，帶有酸辣鹹唔同嘅風味，再配上酸辣嘅洋蔥同埋蕃茄沙律，非常爽口。芒果糯米飯芒果香甜多汁，配上口感軟糯嘅糯米飯，糯米飯加上椰奶充滿濃郁椰子香氣，加上糯米飯中微微嘅鹹味，口感同味道都非常豐富。龍眼冰龍眼冰味道清甜香醇，口感清爽，仲可以食到新鮮龍眼果肉，味道濃郁天然。綠豆沙冰綠豆沙綠豆香濃郁，口感細膩綿密，混合冰沙，冰涼又解渴，非常消暑。…查看更多

最近終於踩點到開咗一排嘅【新泰東南亞餐廳（啟德）】，喺幾個 mall 裡面都見過佢分店，裝潢一貫走 resort 熱帶風＋木系設計，餐桌寬敞舒服，環境係舒適 chill 風。中午時段人流唔算多，基本唔使排隊，兩位女生靜靜地食個簡單午餐，體驗算是不錯。不過整體味道就有少少高低起伏，以下慢慢同大家分享。---🍜【芝士焗香芋海鮮飯】呢個主食賣相幾吸引，白汁加芋頭同芝士，夠 creamy，而且食落竟然有幾款海鮮（包括蝦仁、蜆肉），仲有粟米、甘筍粒同洋蔥粒。熱辣辣焗起嘅芝士香撲鼻，但整體味道偏溫和，無預期中咁「芋香突出」，飯底亦有啲濕，鍾意口感分明嘅朋友未必啱。不過以 $75 嚟講算係抵食，適合喜歡 creamy 港式 fusion 飯嘅人。---🍲【泰式鴨髀燒河粉】我哋本身對呢碗河粉期望頗高，賣相色彩豐富，有鴨髀、蘿蔔片、鴨血、香料粉碎、菜葉等。但飲落湯底比較清淡，唔太似泰式重口味那種香料湯，感覺有啲似偏向港式調整過的口味。鴨髀夠腍，但味道略淡。河粉滑，不過吸湯能力不高。整體唔難食，但對追求濃香泰味嘅朋友來講，可能未夠 punch。---🐙【燒原隻魷魚】視覺效果唔錯，一大隻原隻魷魚切件上枱，有齊觸鬚。燒得剛好，肉質爽口有咬勁，冇過熟過韌，醬汁係偏甜微辣那種，味道帶點燒汁風味，亦有附上一碟酸辣魚露點汁，加咗會更惹味。呢道菜係今日小驚喜之一，適合喜歡燒味與咬感豐富嘅朋友。---🥬【馬拉盞通菜】作為配菜，呢碟通菜份量足，爽脆炒得夠火喉，唔焗水，帶點微辣。惟馬拉盞味道唔算濃烈，口味偏保守。如果你係嗜辣之人可能會覺得唔夠過癮，但對一般食客來講已經係平穩表現，唔出錯。---🍤【泰式炸蝦餅】小小一件炸蝦餅外皮香脆，配搭泰式甜辣醬，味道中規中矩，蝦肉感覺唔算特別實淨，有啲似港式炸蝦角質感。唔算驚艷，但勝在容易入口，做小食開胃都算 OK。---🧊【飲品：紅豆冰＋酸欖蘆薈蜜】紅豆冰賣相打卡指數高，底層紅豆鋪得足，奶味唔會太膩，整體係個討好嘅甜品飲品。酸欖蘆薈蜜就比較有趣，酸酸甜甜、透心涼，有少少中藥舌感，不過天氣熱飲落幾過癮，係我今餐最鍾意嘅飲品！---💰人均約$192｜味道中等偏好，性價比取決於你點咩埋單 $385，加一後人均接近 $200，以 mall 裏面氣氛舒適、服務有禮、唔趕人嚟講，算係 reasonable。但菜式方面就比較見人見智，若你係鍾意正宗泰菜或者重口味愛好者，可能會覺得佢偏向港式版本。但如果你想搵個地方慢慢傾計、食得舒服輕鬆，呢度會係一個不錯嘅中間選擇。…查看更多