同朋友們慶祝生日，去咗响山林道一間私房菜食生日飯。店舖應該唔細，但見佢將一半店圍封，可能生意唔係話太好，費事開全場掛。我哋點咗下面嘅菜式，好壞參半，大多問題係出於太咸，講真佢啲菜式係唔錯，但當日廚師似乎重手咗。1. 金銀菜燉豬肺湯，個湯好飲朋友們覺得佢味道太濃，但我特別喜歡，至少唔係只有咸味，菜乾好好味，豬肺都好乾淨；2. 冰鎮南非鮑魚望落去白雪雪咁，但估唔到好入味，而且唔韌，呢個可以係必點；3. 懷舊炸大腸以一個都幾鍾意食大腸嘅人，都覺得太肥，有部份係肥到完全入唔到口，望到都怕怕。唔肥果啲味道都OK，如果全部都唔係就好；4. 脆皮芝麻雞半隻作為一個雞蟲嘅我，竟然頂唔順佢隻雞實在太咸，咸嘅程度足以洗腎，明明隻雞好滑，真係嘥咗隻雞；5. 椒鹽鮮魷味道不過不失，外皮夠薄，但係份量就真係少咗啲，上菜時我都忍唔住講左佢「乜咁少嘅？」，成舊幾水我覺得唔太值；6. XO醬西蘭花炒雙蚌最正常嘅一個菜式，亦係少有唔係太咸嘅菜式，但份量同樣唔算太多，又係要成舊幾水我覺得都唔係太值；7. 金銀蛋浸時蔬估唔到佢個咸蛋黃仲咸過蛋白，完全浪費咗呢道菜，佢個咸蛋黃食完又係要洗腎；8. 豉椒炒蟶子煎米粉底佢個炒米粉底好脆，點上佢個汁係唔錯，蟶子洗得好乾淨，唔會食到一口沙，但價錢唔平；9. 小食魷魚 小小一碟，因為我遲嚟冇影到相，初時我仲以為係浸濕咗嘅紙巾，但反而佢呢個小食嘅味道係唔錯；10. 菠蘿咕嚕肉本來係叫冰震版本，最後搞錯咗嚟咗個普通版，經修正後原來只係將啲咕嚕肉到落啲冰度。味道係正常嘅，但比起牛奶冰室嘅咕嚕肉，都仲爭咁啲；11. 煎堆仔成晚最好食嘅反而係呢隻煎堆仔，夠脆又夠熱，亦唔太甜，呢個反而真係喜出望外。其實佢嘅菜式係好好，可能我哋唔好彩，撞啱師傅突然重手咗，佔一半嘅菜式都有過咸嘅問題，如果有下次，真係要事先講一聲唔好咁咸。…Read More
