味閣

食材新鮮👍🏻味道恰好😋每碟菜式都有特別好味之處，賣相已好急不及待去品嚐.所以再帶朋友一起來食晚飯. 適逢朋友生曰，慶祝生日的好選擇.又有卡拉OK，頂級音響器材，豐富滿足的一晚. 服務態度非常好.👍🏻…查看更多

大肥爸爸友人誠意推介灣仔樓上中餐廳「味閣」，小肥循例上網搵料時，發現自己原來六年前開張之時已經幫襯過，仲好罕有地寫咗篇清一色一分嘅喊評，梗係叫佢三思啦！細閱過評論後，長輩即告知店子成個班底已經唔同哂，力勸細姪俾多次機會試試個晚餐先，或許會帶黎驚喜咁話；肥肥家族都算反應快，二話不說即訂位週五晚去試。派對被安排於十六樓新增設嘅私人廂房內進行，私人空間足，衛生企理，舒適得很。而且有足夠位置擺放隨身物。全店免收開瓶費，連醒酒瓶都好齊備，酒鬼們當然係自己帶酒啦！九男女飯局嘅菜單交由廚師發辦，剛剛好合共十道菜，莫非係寓意著十全十美？！每位席上都擺有齊備嘅自用及公用餐具。餐前小食之涼拌海蜇皮：第一味涼拌海蜇皮修長爽脆，唯一大家食前都唔知（亦睇唔出）開胃前菜暗帶麻辣。小弟愚見，菜單上應註明麻辣之外，服務生亦可於上菜時加以提點。餐前小食之椒鹽鮮鮑粒：熱辣辣嘅椒鹽鮑魚細細粒、容易食，炸漿唔會過厚之餘，皮脆鮑彈牙，香口尤甚，送酒一流！餐前小食之慢煮滷水鵝肝：如相所示，鵝肝厚薄均勻有光澤，食落柔潤不溜滯，講真比坊間好多潮州舖做得好，只係小肥曾經食過更好嘅，所以難免會比下去。餐前小食之荔枝蝦球：四款前菜中，最有特色必選勁逼真嘅荔枝蝦球！菂薂嘅荔枝球凹凸不平嘅外皮鬆化巧脆，而且絲毫不油膩，入面舊白雪雪嘅蝦球軟嫩甜美，必吃推介也！羊肚菌响螺燉雞湯：原盅上嘅雞湯每盅都有隻腍滑嘅雞腳、煙韌有嚼口嘅响螺肉及脆嫩嘅羊肚菌，清甜足料。花雕雞油蒸花蟹（陳村粉底）：大肥大讚蟹蟹鮮甜無比，厚身得黎啲肉好滑，美中不足係個花雕香唔係好出，如果可以多啲汁同陳村粉，效果應更佳。紅燒安格斯牛肋骨：已預先切好一件件嘅牛肋骨肉嘅肌肉脂肪比例恰到好處，安格斯靚牛腍身得黎好鬆爽，肉香多汁調味濃，盡顯多層次嘅美感。葡汁焗蟹蓋：蟹蓋深啡色嘅賣相或許唔係咁吸引，但卻贏得席上所有長輩嘅誇獎，因為蟹蓋上枱時夠熱，入面有足量幼嫩嘅蟹肉，而並非塞滿其他食材，帶有微微辣勁嘅葡汁惹味得黎食完都唔會覺得溜。龍蝦球蒸蛋白：大家冇睇錯，橙亮嘅菜式的而且確係蒸蛋白，只係蛋白上多咗層南瓜汁而已。墊底嘅蛋白十分軟滑，已去殼嘅龍蝦肉亦爽脆彈牙，個人自係略嫌甜濃嘅南瓜汁搶走哂龍蝦本身應有嘅鮮甜。鮑汁刺參琵琶豆腐：用煲上嘅刺參同琵琶豆腐熱力十足，而且仲入哂味，當中刺參Ｑ彈可口，琵琶豆腐香潤甜美，伴配厚潤嘅冬菇更顯矜貴。脆皮炸子雞：炸至紅噹噹嘅招牌靚雞皮層脆薄脂肪少，雞胸肉一啲都唔嚡唔乾，如果有得食埋啲雜就更加完美啦！黑松露海皇炒飯：成座小山丘嘅炒飯絕對稱得上為勁量級呀！散發出陣陣松露香嘅金黃炒飯乾濕度適中，最正係所選用嘅蝦仁粒粒肥潤爽甜，溢滿鮮香。水果盆：結尾嘅哈密瓜清脆爽甜。楊枝甘露：楊枝甘露尚算濃滑，內含甜甜嘅芒果肉同酸甜嘅柚子肉，只係飲咗酒嘅人未必會想飲糖水，建議師傅可以轉做固體嘅小甜點代替。灣仔樓上中菜館「味閣」疫後改變經營策略，煥然一新嘅廂房式設計成功提升舒適度！店子雖則有點兒人手不足，但勝在服務生友善落力，大廚發辦嘅十道菜海陸晚宴優質精美，價格合理，全方位嘅升呢足以令XO仔重新寫出笑評，除咗想表示改觀之外，其實都想加以鼓勵一番，支持有心食肆！…查看更多

老闆喺街上接到「味閣」o既傳單，眼見地址就喺公司附近，所以就提議XO仔孖會計小姐去試，試完順便報告俾佢聽去唔去得過。樓上中餐廳門面有個水晶陣，風水味極濃。店內只有一間大房擺放著六張大小不一o既散枱，當中o既厚墊椅櫈都好舒適，只係用上紫色就視覺上有啲怪。最右方有枱係配矮矮o既梳化櫈，望落似係小廳變出黎咁。配上水晶吊燈及花花紋布簾，裝修感覺頗為女性化。就如宣傳單張所講一樣，午市茶芥每位$5，可選之點心菜式就只有一頁之多，點菜當然係交由數口最精o既會計姐姐負責啦！香煎蘿蔔糕（$20）：第一道上場o既蘿蔔糕不單唔實，入面仲見到有一絲絲o既蘿蔔，咬落軟身得黎帶點彈牙，而且煎得好夠香脆，堅好食！吃畢，兩口子都開始期待接著o既點心，真係冇諗到原來此乃惡夢之前奏。晶瑩鮮蝦餃（$28）：如相所示，蝦餃皮層厚度唔可以算晶瑩。韌皮之餘，蝦心唔得爽嫩，不吃也吧。土魷肉餅飯（$30）：以鐵盅上o既土魷肉餅飯真係好辣手，而且份量都幾足吓。可惜第一羮落碗已見鮮紅色o既生豬肉，二人當然係唔敢食啦！不過同樓面位姐姐仔投訴後，佢都即刻攞返入廚房再蒸過。終於蒸熟咗o既土魷已經韌哂，啲肉餅又實，就連飯粒都又乾又硬，另上o既豉油仲要一啲甜味都冇，絕對出哂事！蟹籽燒賣皇（$28）：由於之前嗰盅蒸肉餅飯出哂煙都仲驚見生豬肉，自己食燒賣前都變得謹慎咗。細佬從不入廚，不過見到燒賣個心呈粉紅色o既模樣，盡管服務生話可以安全進食，個人仍有所保留，熟唔熟就不如由讀者憑下圖判斷…山竹牛肉（$25）：牛肉球個心同外面o既色差頗大，會計小姐解釋話同生熟冇關，只係牛肉以生粉乸得過火所致。可能係心理作用掛，小肥食落總係覺得牛肉球外熱內則凍凍地，食得極不安心:(。椒鹽脆豆腐（$25）：豆腐粒形狀大小都非常不一，豆腐個心就夠幼嫩，無奈皮層唔得香脆，而且調味欠奉，認真失敗！灣仔樓上私房菜「味閣」o既裝修略帶女性化，座位間空間感足，其實都幾好坐。全店只有一位姐姐hea住做，成餐飯唔多見人之外，落單、加茶、上菜都慢到近乎冇服務咁。餐店午市雖則只有一頁菜式可選，客人又唔多，但食物最快都要等成十五至二十分鐘先上枱，蒸煮o既點心及盅飯居然大多未熟，所以顧客唔多亦不無道理。…查看更多

同事welcome lunch聚餐選擇來這家餐廳嘗試全新供應的點心試菜，由於人比較多有8位，因此幾乎把點心紙上的點心都點遍了。上菜速度有點慢外，點心有部分還是不熟的！其中兩籠燒賣的肉是生的，先夾去吃的同事就這樣不小心吃到了軟綿綿的還是鮮粉色的肉的燒賣，唯有立即叫店員拿進去再蒸上一段時間，隨後上的排骨蒸飯的排骨肉也是粉粉的，不敢吃了，再次要求店員拿進去再蒸久一些才端出來。提供的點心沒蒸熟實在是罕見的！有好幾個同事吃完肚子不舒服，非常差的一次用餐體驗。其他的點心一般般，沒有什麼特色，有的太鹹了。…查看更多

年年父親節都係去酒家食，今年就轉一轉食私房菜事前訂枱店主好細心幫我哋出菜單，之後想轉幾款菜式都冇問題！本來訂7:30可能老人家早食晚飯早到咗都冇問題！先講環境裝修得好靚坐得又舒服，好適合家庭朋友聚會！好喇人齊上菜😆先嚟前菜＂四小碟＂跟著就係是日老火靚＂湯係蘋果響螺煲雞＂個湯好正，連我妹妹都話冇諗到咁好飲，侍應招呼周到幫我哋分好上枱清蒸海斑泰式咖哩炒蟹配法包，個汁好正配上法包一流，連我老豆好小食呢類菜色都食咗幾件😂😂😂黃金蝦球太爺煙薰雞鮮果咕嚕肉南乳雜菜齋煲芥末安格斯牛柳粒其實仲有個＂海鮮脆米泡飯＂因為我掛住食唔記得影相😅不過個泡飯真係好食，我老豆食完都話好食仲對我俾咗個👍🏼添😂😂😂最後甜品出場＂果皮紅豆沙＂😋😋😋又係掛住食冇影到😅不過甜品又點只一款呢.....呢次我記得影喇😆拔絲芋頭，外脆內軟唔會太甜又香口總括嚟講全家人都食得好開心，環境舒適招呼周到，菜色味美連我個咀刁細佬都話D嘢好食😆😆😆下次一定會再嚟！…查看更多

我個人比較喜歡中菜，所以四處找尋不同美食，上星期經朋友推介去一間上海廣東私房菜館嘗試美食，第一印象十分好，這菜館雖然地方不大，竟然環境舒適，裝飾華麗，還可唱K，好適合好朋友們及小團體聚會。要提一提就係所有菜式都十分美味，其中我最欣賞就係' 太爺煙薰雞 '，肉有茶香軟滑多汁，食到停唔倒口，及別外一味 ' 黑胡椒炒蟹 '，十分鮮味，能看出製作用心，值得各位喜歡美食食家一嘗…查看更多

為咗搵個舒服地方Farewell 老闆，朋友介紹味閣，一圍便有獨立房間，仲有埋K唱，確實係好友、同事聚會好地方！ 成日諗住私房菜嘅地點一個好偏，呢間就喺灣仔道利景酒店旁嘅大廈，入口光猛！講返食，每道菜恰到好處，薰蛋驚喜之作！蛋白蒸蟹簡直回味無窮！柚子豬頸肉柚子味濃！黃金蝦夠香又唔漏，仲有我最愛嘅杏汁白肺湯，極度推介！😋😋事前可以 what's app比佢哋點菜，我點時佢覺得我哋叫太多怕食唔晒，好有 Heart 嘅服務！👍🏼👍🏼…查看更多

已去過唔止一次呢間私房菜，正因為佢環境舒適、整潔，老闆、侍應親切嘅招待，食物又色、香、味俱全，最重要係可以一班朋友能有咁私人嘅地方飲飲、食食、打吓牌，仲可以唱埋K，價錢又超值，所以係值得再去、再再去！！！…查看更多

估不到一間小小私房菜，老闆肯花錢裝修，不論擺設和用具都不錯。至於食物方面更加用心，雖然小菜名稱跟其他食肆沒有太大分別，但質素則絕對100分。有驚喜! 如果朋友聚會絕對係不錯的選擇。還有卡拉ok可供娛樂。。正!!!!…查看更多

上2星期 朋友帶我去這間私房菜吃晚飯 我們一班人坐在private room 裝修不錯 舒服 內有投射電視 梳化。 朋友負責叫菜 叫左其中幾個主打菜 有油浸荀殼魚，胡椒蟹，辣妹子安格司牛柳。荀殼魚夠新鮮 炸得脆口。胡椒蟹美味 蟹肉口感都新鮮。牛柳質感好好 廚法新穎。當晚每人消費二百幾 價錢公度 直得再去。…查看更多