創發潮州飯店

心血來潮突然想去食，今晚點菜，胡椒豬肚湯魚如加熱水加開，淡而無味； 沙嗲牛肉炒芥蘭 出水；鵝片厚切以為好味，口感好好煙靭；肉碎粥，味道好鹹，好重味精！我唔會推介給朋友試！…查看更多

一段時間無光顧, 同老友想食潮州菜,所以揀呢間,.生意無以往咁好,但都有10枱客嘅,. 侍應起碼5個,所以服務最可以.坐低問咗開瓶收50蚊,都可以啦,但D杯完全唔掂,好彩自己帶咕😜一枝靚Burgundy white, 點都用白酒杯先得.叫咗椒鹽九肚魚,送吓酒先. 好脆,又滑,正. 之後點咗炸豆腐,凍馬友,好鮮甜又多魚油. 鵝片拼豬腸,韭菜棵, 好少合都好好食, 韭菜豬紅,蠔仔粥,咸菜胡椒豬肚湯,反沙芋.每一樣都好好味. …查看更多

九龍城創發潮州菜可算是潮州菜中的老字號，屹立九龍城多年，以住的韓江、陶芳已沒有了，近年一些老字號店舖也買少見少，所以也多專誠惠顧多些，此店多年前已開始惠顧，當年可算是人頭湧湧，自然招呼麻麻，近年少了人，招呼也熱誠了不少，店員例牌問要唔要魚呀之類，當然唔理佢😄枱面2碟小食也叫取走不要，先上來功夫茶，這里是沒有餐牌的，菜式都寫貼在牆壁，一貫的點了最愛的胡椒豬肚湯，胡椒味濃，材料豐富，豬肚、豬粉腸均咬口適中好味，炸蠔餅，鬆脆、蠔仔多，配魚露，恰到好處，美味，百吃不嚴，再來碗清心丸綠豆爽，甜度適中，清新。 吃完再來功夫茶，埋單200大元，不貴，似乎沒有加一，值得再來。…查看更多

試吓去九龍城食間老字號嘅潮州菜館，首先所有食店都要服務、態度、食物好食等等等等去配合，我寫食評之前都睇見有好多負評… 原來此言非虛😂😂😂其實我寫食評都算中肯瓜，就算服務週邊好有問題，唔會話佢d 野唔好食，好食就係好食…咁我點左4 樣嘢都ok 嘅….但有幾樣野係有問題：一，價錢真的貴了點；二，食物價錢要人客問或冇講；三，staff 硬sale 貴野；四，食品份量少叫左個唔知乜魚的烙😂， 墨魚拼鵝肝，豬肚湯，芋泥…. 全部都其實算幾好食的… 但個姐姐初初硬sale 海鮮，和對話落單過程冇話d price ..個XX魚烙幾好食，夠香內有其他配菜，配合啱啱好，又唔太油。豬肚湯好香好味，做得好好，但一碗份量⋯⋯墨魚鵝肝好味但太少，芋泥發揮正常，唔太死甜👍不過只此一次，已經不是幾廿年的老字號手法了，好似一間hard sell for 遊客的食店咁。但嘢食算ok 嘅….就咁依d普通嘢埋單都$600😂…查看更多

九龍城呢間老字號潮菜館，三十幾年前已經有去，以前就算訂咗枱都隨時要門口等一個鐘頭，但係10多年前開始已經好少見到有人喺門口排隊，究竟係點解呢？其實佢嘅口味係真係正宗嘅，不過食物質素，服務態度真係越做越差，收得貴都唔係問題，當啲客係傻仔先至衰。十幾年前試過喺創發食響螺炒片，$1500+一隻響螺，唔知係咪見我人少得三個人，仲要有兩個老人家所以名恰我，炒出來只係得五小片響螺，問個夥計，佢仲好串大大聲話響螺係剩係得個殼重，切出嚟係得咁少。雖然我唔係咩富貴人家，但係響螺我都唔係第一次食，斤幾一隻響螺，只係起到五少薄片響螺肉，都應該只有創發先咁離譜。自此其實已講過唔再去創發。今日揸車經過九龍城，突然想起創發嘅花生豬尾，呢啲平價舊式潮州菜已經好少有地方有得食，所以膽粗粗入去創發諗住買個外賣花生豬尾加餸，因為我趕時間，連加熱都叫個夥計不用，$80蚊一盒一啲都唔貴，我見個夥計好快手，仲諗住俾個like佢，好彩臨走前打開望一望，原來一盒花生豬尾，得三舊，超過80%個盒都係裝花生。我當然即刻又問個夥計，佢今次仲搞笑，大大聲話「唔會喎，我明明數着有五粒喎」，原來$80一盒嘅豬花生豬味只係得五粒，仲要有兩嚿得指甲咁上下大都計數，唔怪之得你會用「粒」來形容唔係用「嚿」啦😂我衰有老花，真係細到睇唔到，所以最尾我擺返低盒嘢，$80豪比你，呢間餐廳我食唔起，咁嘅服務態度，令我覺得好似返咗香港七八十年代，啲舖頭呃得就呃，只有傻仔先至會去！…查看更多

創發在九龍城也是有五十多年歷史, 和樂口福也是區內潮州菜的歷史名店, 和後者最大分別是後者走傳統的潮州酒樓老師, 而前者則是更為平民化的打冷風格, 有麻雀雖小五臟俱全的冷檔, 從滷水菜式到凍海鮮也有提供. 除了冷檔外, 我覺得最經典的是韭菜粿, 煎得香脆咬下去, 依然保持煙靭的口感, 內裏就是純粹的韭菜, 澎湃得會流出來, 吃完口腔依然停留着韭菜的辛香, 是另類的指甲留香.兩個人吃的關係沒有點凍海鮮, 其他傳統潮州菜的美食, 處理得我覺得還可以, 比很多食評說的來得OK. 特別是炸物拼盤的炸芋頭角及糯米塊, 炸得很酥脆, 最重要是吃潮州菜的炸物, 一定要加上酸酸甜甜的桔油, 比起點泰式辣醬來得更配合. 另外鹹菜胡椒豬肚湯, 胡椒味夠濃鹹菜味夠香, 和現在興起的酸菜魚有很大分別, 後者酸比鹹重, 前者則是純粹的鹹香, 除了豬肚外也有我最愛的豬粉腸, 膽固醇萬歲! 另一度膽固醇萬歲的名物, 就是滷水拼盤裏的鵝肝和鵝腸, 鵝片就留給老婆, 自己就好好享用最邪惡的美味!…查看更多

入到去，冇餐牌，冇價錢，諗住都係一般潮州嘢，於是叫咗一隻最細嘅凍蟹，同埋幾碟餸，味道一般，份量比其他店少，埋單睇一睇張單，$1340，差少少以為自己睇錯。再睇清楚，原來嗰隻細細隻嘅凍蟹，居然收$800 ，仲要行出櫃位見佢喺原有價錢外邊貼咗另一個價錢，寫住每兩$70。店員聽到我對凍蟹既價錢有疑惑，繼續同我講$800已經係最細最平嗰隻，如果大少少，要$2000至到$2500。我想講$2500係差唔多可以食到一隻大大隻嘅阿拉斯加長腳蟹。雖然冇得比較，唯有比大家參考參考。搞掂。…查看更多

行入九龍城，估唔到竟然搵到呢間咁古老滋味嘅潮州菜館。坐低才發現，呢度嘅食客都有講究，食起嚟個個都寫意。第一啖功夫茶入口，已經覺得係喝啦起步 🍵。四小碟頭盤，每樣都細心炮製，尤其係炸獅子魚，滋味真係正！主菜方面，炸豆腐外皮香脆，一咬落去嘅豆腐卻又嫩滑。胡椒豬肚湯暖笠笠嘅，雖然我會鍾意再重口啲，但湯底真材實料，豬肚嘅嚼勁亦剛好。蠔餅真係畀讚，啖啖鮮味充滿口腔！過嚟講講芋頭、蘿蔔同埋墨魚卷，呢個炸三拼我一向挑剔。但佢地每樣嘢食都係酥脆得黎唔油膩，特別係墨魚卷，彈牙得來又唔會太實，完美結合。韮菜粿同鹵水鵝，兩者齊讚！鹵水香港味仲啱我口味啲。而川椒雞辣勁就啱晒食辣嘅朋友，而糖醋麵雖然唔算出眾，但都過得去。完場飲品，清心丸荳爽同芋泥都係正宗潮州風格，不過唔會過分甜膩，可以輕鬆收尾。總之，今次嚟到呢間老字號，就算飽到走唔開都覺得值得！👍🥢…查看更多

叫平嘢會同你話冇，然後就只會推介貴嘅嘢食，第一次聽去潮州餐廳話冇鵝片，仲要係晚餐黃金時間七點幾話冇，推介個鵝髀起肉不特止，隔咗10分鐘隔籬枱嗌鵝片無啦啦又有返，為咗呃嗰幾十蚊真係去到好盡！更加唔好講豉椒花甲一碟得八隻收$150 ，墨魚伽鵝髀起肉就差唔多$250，咁唔誠實嘅生意，會做得越嚟越差唔係冇理由！特別認得短頭髮個阿姐，落單時藉口多多，廚房都唔去check吓就乜都同你話冇，然後只會推介餐單上面冇嘅嘢食價錢都冇，大家一定要小心！…查看更多

又係我，上篇食評唔記得講，只好多加一篇補充。一入餐廳坐低已見枱上有前菜小食，我哋知一定要收錢，所以話唔要，叫侍應收走。其實佢哋擺晒前菜喺各張吉枱度極不衛生，我見到周圍嘅吉枱上嘅前菜有好多烏蠅飛上去食的，你夠唔夠膽食呢？另外，我聽到隔離枱位女客人同侍應講佢想要水唔要茶。個女侍應即刻好清晰咁問：你唔要幾多杯茶？個客人話：我要3杯水。跟住我見到（係我親眼見到）個女侍應收走咗佢枱上3杯茶，然後倒返入個銀色茶壼入面（環保回收茶！）我有理由相信我哋剛才用嚟洗杯嘅茶，佢都攞返入去環保回收！呢間店劏客咁叻，環保又咁叻，我唯一可以講嘅係：一定無下次。…查看更多

一入餐廳問個阿姐侍應取餐牌，佢話無餐牌，叫我睇下牆上的菜。我想食卤水鵝，但見唔到牆上有寫，就問佢幾錢，佢答我例牌$150，其實有少少貴，但我鍾意食，所以就叫啦！一食，覺得好咸，同埋卤水鵝點解無皮嘅？d皮去咗邊？蠔餅又係牆上無寫明的，問佢先答我$80。我去其他地方食有莞茜和胡椒粉，香好多，這裡的蠔餅，無乜特別人。我見到牆上有個炸拼盤$120，問佢咩嚟？佢話有蝦棗、蟹棗和蘿蔔糕，ok咁試下啦。我見到個阿姐在雪櫃攞了6粒東西，然後拿入廚房處理。上碟共有6粒東西，沒有賣相可言，味道都正常，但數量少，都算貴。飯後不斷問我哋食唔食甜品？我哋話唔洗，因為諗住去九龍城另一間甜品店食。好彩咋！睇返呢度食評先知呢度原來甜品要$30-40。埋單$350，可能我哋係全日最低消費額嘅客人。點菜一定要問幾錢。各位如想試下俾人劏係咩滋味，即管試下。…查看更多

一心諗住食響螺，所以先來到這間潮洲老店，雖然見近年大部份食評都差劣，但心想叫隻響螺啫，－両$80，講咗要白灼，然後頭尾取走回家煲湯，我話想要一隻約兩斤的螺，心想佢總會拿隻螺出嚟坪，點知伙記只是口說會找一隻約2⃣️斤，並會去叫老闆去坪喇，好，於是叫埋其他餸，埋位等老闆攞隻螺，點知不用2分鈡，老闆已拿了一盒用發泡膠盛著已開螺頭、螺肉，但又不給我看，然後就放在冰櫃內，說是我們的螺，當時我嚇咗一跳，吓老闆你唔係要拿隻螺過來坪比我睇幾多斤両嘅咩？你居然開咗隻螺先，然後先話我聽約幾重，於是我走出去魚缸，見D螺根本就冇攞走過，於是我搵返頭先個伙記，佢夠膽死話你見唔到頭先係個缸底大隻個隻就係，而事實上頭先我見到甘多隻就係甘多隻，根本冇比人攞走過。真係當我白痴！唉，我終於知道騙人手法真係可以去到咁⋯咁當然碟螺片嚟到斤両固之然唔似有兩斤，最慘係冇咗個種新鮮即劏嘅質素…一間老店做生意做到甘，人客願意付出甘嘅價錢，你應該明碼實價比返人哋要嘅嘢囉，而唔係用呢種手法，我終於知點解D人要blacklist佢啦！！！…查看更多

幾年冇去呢間老字號，估唔到而家變成咁！諗住開開心心同屋企人去慶祝生日，因為屋企人鍾意食潮州菜，但換來一肚氣，佢哋擺明劏客，仲要超級難食，及服務態度勁差，終於我哋全家人都頂唔順全部要轉去另外一間餐廳食 😤係每一樣嘢都好難食，而且好細碟，我們10個人，其中3個小朋友，佢upsell我哋要 ［例半］嘅份量，因為驚我哋唔夠食，但結果出嚟嘅份量，少得驚人。- 川椒雞得九少件而且冇味，呢個係「例半」份量- 潮州魚麵同seven嘅2個營多撈麵差唔多size，咸都佛祖都開眼，待應呀姐堅稱話呢個係「例半」份量- 滷水鵝片拼鵝腸，數埋唔夠七塊鵝片，跟三四舊有骨鵝肉，及五六條濕水鵝腸，個滷水汁係豉油汁，唔係滷水汁，記住呢個一定唔係滷水汁！- 鹽水豆腐變咗炸鮮奶咁，一啲豆腐味都食唔到，鹽水冇落鹽，係清水豆腐- 蠔餅更加唔使講，例半份量仲少過我用兩隻蛋炒嘅size，仲要好難食- 小食要收錢都唔緊要，但係竟然最經典嘅鹹酸菜同花生都可以好難食，勁- 侍應中段已經開始力sell糖水, 問佢係咪免費送, 佢話要收錢之後black face, 原來要成$30/$40一碗- 潮式炒飯，變咗雞蛋炒飯，我諗我個工人姐姐仲炒得都好食過佢，叫佢攞支匙羹，佢又black face- 一路食一路受氣，又唔夠飽，終於要轉場埋單要$2600好彩冇俾佢sell到凍蟹，原來要$2400真係差到講唔晒，總之四個字［不知所謂］😡…查看更多

去九龍城買茶葉又俾我泊到咪錶位于是去創發食個妟。入到去見到枱面有兩碟咸酸菜及魚仔就知是未叫菜已先俾人打三十大板，盛惠60大元，味道太咸，送粥還可以。先有四杯仔潮洲茶醒吓晨先，都好濃味。問完條大烏頭要成二百八十就即刻唔感亂叫嘢！是關食咗早餐又不太饿，所以叫了二人份的一窩蠔仔粥。蠔仔大隻新鮮，但加埋各樣料就略咸。九菜豬紅好香，但食多幾件都覺得太咸。食完雖然又送上功夫茶，但不貪心冇要怕今晚瞓唔著。不過後悔冇飲，因為咸到好頸渴要走去七仔買支水隊晒佢！目測其他客都過六十歲，似遊客，食得豪氣。可能為咗老人家啲口味先咁重手，其實為健康也不應咁重鈉！再者，哩啲舊式老舖的洗手間必定要經後面好濕的地方，至惨是踎廁，真的不是我杯茶。埋單兩嚿有啲不值！…查看更多

作為香港人一盡地主之宜，特登帶一班因為疫情關係三年無來香港既台灣朋友，一共6大2小來食啲地道香港名店，點知比人劏。唔知係咪因為我哋成枱都講普通話，又撞正五一黃金週，所以有特別待遇，覺得我哋似水魚。 老公先喺門口魚缸睇住海鮮點菜，點咗兩隻響螺切片生食，坐到埋餐枱侍應同我報重量，一隻三斤幾，好彩老公多口問句幾錢，阿姐報價$80一両，計計數即刻O咗咀，成三千幾蚊一隻，我哋即刻話唔要，轉過頭阿姐又過來報另一隻響螺是2斤，都要二千幾蚊隻，咁貴梗係唔要啦，然後阿姐就話已經劏咗，無得唔要！點解啲劇情咁熟面口，咁似警訊啲騙案既？ 夾硬將啲藥材切碎磨粉就成日聽，夾硬話劏咗海鮮，局我哋食咗佢喎，真係靠創發見識到呀！阿姐你咁講唯有照要，碟生切螺片出到來只夠6個大人分，細路都無食過，張單收我$25xx ，即係一片螺片平均要$4xx！我真係唔知自己食咗啲咩……老實講，食物質素是對得起這老店的招牌，食到尾聲阿姐問我哋要唔要糖水，佢話有兩款，所以我就話一樣一半啦，因為我覺得阿姐咁問得，糖水應該係送既。到糖水上枱，我哋又係多口問句，先知道糖水都係要收錢，睇返收據，分別係$40/$30一碗。咁講真，你要收錢我就未必要咁多碗啦，然後我同阿姐講，要收錢我哋唔要啦，阿姐又用同一個理由話啲糖水出來無得退，嗰吓真係著著地。香港酒樓慣例糖水果盤都係送既，你如果要另計錢唔緊要，打開門做生意個個手法可以不同，既然同行規唔同係咪應該同個客講明糖水唔係送既，避免誤會，等個客自行決定。最後阿姐聲稱老板請我哋食，真心我唔係要R糖水食先嘈你架。食一餐飯點既菜有2項都靠生米煮成熟飯既騙徒手法昆個客埋單，個客唔問就唔講打算瞞天過海，真係點可以唔登特為你打篇食評阻止下枱客中伏先得？大家過來食一定要問清楚價錢斤數，香港一斤是16両，創發阿姐話佢哋無菜單也沒有價錢牌，要來食既真係要睇路！…查看更多