初心食堂

營業中

休息中

比起年半前嚟食，加咗1/3價錢，但個份量好似都有相應調整。所有肉都係即叫即煎，個豬五花好_好食，真係好好食🙏🏻❤️，佢係薄切再香煎，醃料唔會過鹹，入口豬油花喺口化開，有種食燒肉嘅感覺⋯雞扒以前會一開三，而家係無切，我覺得好似唔切個擺盤仲靚，仲好厚肉！唔知點解，明明佢係擺落碗麵，但塊皮係勁脆！一咬落個皮，皮同肉之間嘅雞油肉汁咇出嚟，好_正please….湯底濃郁得嚟，唔會好油膩，唔會紅油海浮面，可以好似食拉麵咁掛哂汁喺油麵同米粉到，飲完唔會口渴！京葱串就少失望，好細好細串（無名指長）但28蚊，味道就正常⋯我哋七點九去到，大概八點三有得入，八點半有得食，因為QR code落單system仲未整好，店主一人做哂 *所 有 嘢*，所以上菜次序有少少混亂，但係可以接受嘅～ 因為真係好食，一食落肚乜怨氣都無了😂

#初心食堂 #sorriso_葵青區 -呢間係我食過最好食嘅喇沙，而家仲有串燒賣， 之前初心裝修就一直好掛住呢間野，一聽到開返就即刻去左食， 果然水準仲有啊，下次想食豬軟骨同埋印式煎雞啊，唔知幾時會再出返🍜【豬．喇沙摻摻】 試業價$69 (9.8/10)摻摻就係油麵溝米粉，而家試業終於有返糖心蛋，先講下點解咁鍾意呢道嘅喇沙， 椰奶完全唔會搶過香茅味，湯底超超超濃， 每次嚟到都一定會飲哂先走，喇沙湯帶有泡沬，泡沬攪拌器打出，食出嚟質感幼滑濃厚，真係冇誇張，我冇食過一間香港嘅喇沙好食過佢， 豬肉片煎到好香口，好好食，豆卜都發揮到佢嘅作用，勁吸湯，好好好食🍜【牛．喇沙摻摻】 試業價$69 (9.５/10)牛對比起豬肉片就冇咁出色， 不過你見我都比得咁高分就知佢個喇沙湯麵真係好好食#sorriso_葵芳 #sorriso_新界 -📍【初心食堂】 @sssdlaksa.hk葵芳美芳街2-14號昌鴻大廈地下9號舖🕑留意ig story，老闆要開多啲鋪，唔好成日「是日休息」-#foodie #foodiehk #hkeats #黃店 #黃色經濟圈 #黃店推介 #不專業食評 #打卡 #相機食先 #黃店

#初心食堂 💛今次講嘅係位於葵芳美芳街嘅初心食堂啦💛💛睇到個名已經知佢係黃店😽😽店舖名都想你記返大家嘅初心究竟係咩‼️環境方面 算有少少偏 但小編希望大家可以俾少少時間去揾下🥺只要係葵涌廣場2樓條橋落去直行轉右就會揾到㗎啦❤而店內大概有八人座位💛店舖老細真係超級好人🤍🤍男小編同女小編第一次去嘅時候係咁啱店舖個日唔開 大頭蝦嘅我哋唔記得留意佢哋IG🙈🙈臨走嘅時候 老細仲送佐龍眼冰俾我哋飲🥰🥰叫我哋第日再去✨✨咁好嘅手足 就一定要再去幫襯🤍🤍店舖係主打買喇沙㗎🤪🤪男女小編期待佐好耐‼️第日打完拳就即刻去食啦✨✨咁好食又抵食嘅喇沙面好快就可以餵飽肚餓嘅男小編同女小編😽😽招牌喇沙板燒肥牛拉麵 $58💰（8/10）送到過嚟已經有好香嘅椰香喇沙味🔥🔥湯底係呈現金黃色 好滑 而且Feel到係落足料🙈有好香嘅蝦味🤤🤤同拉麵食完全一流 加上拉麵掛湯效果超好 完全可以令食緊麵嘅同時 飲到湯👅👅拉麵亦都煮得非常彈牙 令到食嘅時候 多佐一種層次感👍🏻👍🏻 而配菜方面有好多嘅洋蔥🧅同埋芽菜😽😽 芽菜好爽 😙😙而板燒肥牛方面🐮真係燒得好香牛肉味 唔會都韌 亦都因為燒過嘅關係 令到配湯食嘅時候 有多佐口感同個香味✨✨肥

小店一人打理 晚市時段好多熟客捧場麵好食 湯好飲 絕對值得耐心等候😙.🐔 印式煎雞/素春卷/板燒肥牛 $58(招牌喇沙配以摻摻/油麵/米粉/拉麵).三款之中最推薦嘅係煎雞🐥帶有黑蒜油嘅香氣 同喇沙湯融為一體肥牛嘅調味都近似 但我冇食唔清楚而素春卷就會吸晒啲湯汁 變到好入味.湯底唔係一般食開嗰隻百勝廚喇沙😗反而椰奶味重啲 唔會咁鹹咁多香辛味油麵麵條粗身 同平時食嘅車仔麵相約配料嘅芽菜豆卜非常飽滿 爆晒汁咁🥺.偏向家庭式嘅風味 絕對值得再食多次！

一間位於葵芳居民區的小店，家庭式經營，老闆一腳踢做哂樓面收銀到煮食，人多時就急call家人幫手由於店面細細，大約只有6人座位，所以老闆都積極發展外賣小食類別除了湯麵外，剛剛開始販賣煎雞漢堡，適合速食；而且有可能遲d進軍串燒市場，等街坊都可以飯後散步時享受一下美食－－－－－－招牌喇沙滲滲配印式煎雞 $48 8.5/10 湯底非常濃郁，椰香撲鼻，BB辣既程度令食唔到辣既人有福啦滲滲由油麵溝米粉，非常掛汁，與湯底搭配度很高主菜印式煎雞調味較鹹，表面煎得香脆，與湯汁一同入口就能中和更令湯底甜味突出喇沙畫龍點晴既就係當中既配菜：芽菜和豆卜，佢地完美完成任務，放係底下，最後變成一個湯汁大炸彈係嘴入面爆開。即炸蝦片 $12 7/10 上檯時仍然冒著熱氣，有炸物既滋滋聲，顯露佢啱啱出爐既身份。非常脆口，有淡淡蝦味，另外有一個小祕技，將蝦片沾上喇沙湯底再食，令味道更豐富

今日外賣自取，小店未開門，老板知我喺出面等，收拾好，一開門就熱情咁叫我入去坐。俾錢嘅時候，一時曾錯手，俾多左錢，老板數完就俾返，誠實好人。返到屋企，一打開外賣盒就聞到好香喇沙味，湯香而滑，唔會太辣，啱我！

葵芳除咗葵廣其實重有好多嘢食依間係葵廣附近仲要係新開嘅黃店💛💛店舖細細間當日夜晚去食 都有幾個喺出面排緊隊.吉列蝦餅·喇沙摻摻 $48.店舖主打喇沙 有六款餸可以揀麵底有三款有摻摻 米粉 油麵當日唔知摻摻係咩嚟店員都好有耐性咁解釋係米粉同油麵兩溝🌵蝦餅摻摻湯底好味 喇沙味好濃郁 蝦餅即炸 好脆好香口 蝦味幾濃 好彈牙除咗蝦餅仲有幾舊豆卜豆卜冇咩特別 但索晒啲湯好好味 👍🏻其餘仲有少少配料如豆芽 洋蔥麵底揀咗摻摻有唔同嘅口感 可以一次過食晒米粉同油麵⭐️多謝你睇到最尾🧚🏼‍♀️希望大家可以訂閱我嘅ac🤣咁就留意我最新嘅食評📜✏️

💛初心食堂💛..............................葵廣多黃店係人都知 但附近其實都有啲架行條天橋落去 都好方便架 大家可以試下🥰👉🏻開放時間請留意  嘅story😋.🔅想知黃店原因請Dm💛..............................🍽印式煎雞喇沙米粉 $48（👏🏻9/10）.湯底濃郁到一個點 基本上枱頭啲調味料完全用唔著好重蝦味香料味 而且米粉掛湯一流不過食完會有少少膩 但好滿足🤩🤩配料有芽菜 豆卜 紫洋蔥絲 半隻溏心蛋溏心蛋賣哂會轉泰式魚餅 或者芝士魚腐 都好好食㗎！印式煎雞超推薦 好有印式風味 有驚喜！而且皮仲有少少脆 塊雞扒仲好厚好滑上次食過芽菜好青所以走咗 今次又唔青啵🤩.🍽板燒肥牛喇沙油麵 $48（👏🏻7/10）.個湯都係一樣就唔特別講啦🥰板燒肥牛都幾香 但就無話好特別咁囉油麵無米粉咁膩 南瓜話油麵好食啲💛大家鍾意可以叫番摻摻 應該會平衡啲.🍽即炸蝦片 $12（👏🏻7/10）.蝦片自己本身無咩特別 都係脆卜卜好味嘅蝦片但當蝦片點埋啲喇沙湯 成件事唔同晒 正😈..............................🎈初心食堂 (葵芳)

喺葵芳搵食嘅話如果唔去葵廣，都有幾間唔錯嘅選擇！今次嚟到初心食堂，呢度主打喇沙湯麵😝😋 印式煎雞摻摻 $48嚟呢度基本上都一定係食喇沙湯麵，麵底可以揀拉麵、米粉、油麵同摻摻。摻摻意思即係兩溝，讀「參參 (caam1 caam1)」，一碗就可以食到油麵同米粉😗 第一啖食落口已經覺得勁惹味！喇沙湯底有啲紅色辣椒皮但其實都唔算辣，椰香味濃，加上個湯比較杰身，令到啲麵更加索到喇沙嘅味😬 印式煎雞醃得好香，少少鹹可接受，外皮煎到少少脆，入面竟然幾嫩滑！好surprise😝 幾嚿豆卜喺呢碗摻摻起咗畫龍點睛嘅作用，豆卜入面索晒喇沙嘅汁，但個皮仲係脆脆地嘅🥰 除咗豆卜都仲有啲芽菜，幾爽口好有咬口！48蚊好抵食，份量夠食得飽！

喇沙係我好中意既一食物，所以我成日都會去試唔同地方既喇沙。今次依間最得我心既就係佢個湯好濃郁同充滿椰香。我中意等啲麵吸左啲湯，食起上黎就更入味。而且佢個蝦餅好香口同彈牙，就算浸左湯，都唔會淋哂，好粉咁，個質量好好。我妹仲拎埋我食剩啲湯撈飯食太愛了

平日行開葵芳，淨係識得行葵廣，以為已經好多好野食😇如果唔係有黃色經濟圈，我諗我點都唔會行出葵廣，發現呢間小店。
呢間小店，地方淺窄，只係可以放到三枱，只有老闆一個人，由前枱到廚房打雜，全部都係老細一個人做晒。翻工都係呢種one man band嘅 role, 睇見佢嘅情況都真係幾有共鳴，好想去拍拍佢同佢打打氣咁。果日係平日，都有唔少人黎食，加上地方細，都等左一陣。等嘅時候，同老細有eye contact左一下，老細即刻出黎同我地都打聲招呼，講左幾次唔好意思咁😣終於入到去，見到餐牌，都有唔少選擇，我地叫左一個印式雞排摻摻、炸蝦餅摻摻。叻沙底香濃，摻摻都好爽滑，加上佢嘅洋蔥同芽菜，令每啖都更加有層次！知道老細本嘅糖心蛋係用日本蛋做的，好想每人加$8多隻蛋，可惜果日去到無晒蛋了😣 唯有下次再黎食啦！

今日去葵廣行街，之後發現咗呢間小店。因為老闆自己一腳踏，所以都等一陣先有嘢食，不過絕對值得一等👍🏻 本來見$48無抱太大期望，點知飲第一啖個喇沙湯底 😲😲😲 掂呀！湯底超濃郁蝦鮮味同椰香味，跟住佢個印式煎雞好香口，同埋啲香料好惹味😋以呢個水準，呢個試食價絕對係超級良心價，就算無咗試食價，我都一定會encore 👍🏻 期待老闆嘅新menu，加油！平時唔寫食評嘅我，加上又唔習慣相機食先，遺憾無影到相🤦🏻‍♀️

前幾天到葵芳閒逛，在網上找到這間主打喇沙的小店，評價也不錯，於是決定前來一試。店舖面積很小，只有兩張四人枱及二人吧枱。店內只有老闆一腳踢，由安排座位，下單至煮食都是他一人負責，所以等侯時間較長，我們入座後等了大約十分鐘才下單。本來想吃摻摻，但當天只剩油麵可選，於是我們分別點了泰式蝦餅油麵及印式煎雞油麵，食物約二十分鐘後才到。喇沙湯底頗香，椰奶味算濃郁，但一點也不辣，如果增一點點辣味可令湯頭更有層次。湯底配料有豆卜、芽菜及洋蔥，豆卜吸湯後很入味。雞扒亦有三大塊，煎得香口，肉質雖不至嫩滑但也不會鞋口，味道不錯，麵條份量亦足。蝦餅亦有三塊，外皮炸得香脆，惟蝦膠有點薄身，撇除炸粉的話口感不夠滿足，但整體味道還是不錯。個人認為炸蝦餅更索湯入味，煎雞扒口感更實在，同樣令人滿足。兩碗喇沙麵質素不錯，價錢合理。如果經過葵芳不妨一試，但前提要預足夠時間。

不起眼的店舖，店內只有零聲座位。第一次去時只剩下油麵，今次再來一試摻摻。先說配菜，紫洋蔥厚薄剛好，帶有薇薇辛辣的同時亦為整碗喇沙增添一點口感。芽菜比一般市面上買到的更為厚實，略略帶有草青味，讓人有一點點不習慣的時候，這味道馬上被濃郁的喇沙湯底蓋過去。豆腐卜吸滿濃郁的喇沙湯，讓人止不住手。而最讓人迷戀的則是那近乎燒焦的雞排，第一次食時失了手，顏色更加黑，略帶焦味，今次再食，幸運地沒有半點令人卻步焦苦味，反而更能品嘗到佈滿在雞排上到香料，而雞排亦鮮嫩冇比，帶有肉味，香料味，混合濃厚的湯底可謂三重滿足。雞皮上的脂肪被完美地萃取出來，剩下紙一般厚的雞皮，脆如薯片，沒有半點脂肪躲藏在皮與之間。這徘徊天堂與地獄的美味，可以說是我吃過最完美的雞扒。最後說麵，個人來說不喜歡米粉，品嚐完摻摻後則更加喜歡這家店的油麵。這裏的油麵沒有半點油耗味，它亦比平常吃到的油麵更加吸湯，油麵的表面佈滿濃郁的喇沙湯，每一啖都能充分地品嘗到湯底與麵條交匯的最佳狀態。位於葵芳鮮無人知的角落，廚師卻依然用心地製作著一碗如此完美的喇沙，雖然只有一人在奮力，連洗碗的時間也沒有，所以用着即棄餐具，但他連餐具也不偷工減料，選用著較為昂

好多人去葵芳都係去葵廣多，但其實葵廣後都有好多嘢食呢條街已經有兩間良心店，不過營業時間唔定，有時假期兩間會收咗工呢間叻沙店的確有幾分神秘，無乜宣傳功夫裝潢好簡單，好企理，餐牌係一塊黑板主打叻沙，由A餐至B餐基本價錢介乎46至48蚊價錢合理，有六款餸任揀，亦可選擇油麵、米粉或兩溝變摻摻仲有幾款特色小食同飲品呢排當然係將叻沙外賣唔堂食好啲老闆貼心將麵條同湯底分開放，只要食嗰時將湯底倒入小碗內就得叻沙湯底呈金黃色，有微微黏稠感，好滑溜同時有濃郁椰香味，雖有紅噹噹粒粒辣椒，但入口唔太辣油麵同米粉兩樣溝埋變做摻摻，油麵爽滑，米粉柔韌配料最吸引係豆卜，完全吸附濃郁叻沙湯汁，夠晒惹味不過，我哋呢碗好似漏咗隻溏心蛋印式煎雞略鹹，味道較濃厚，有類似胡椒味道，醃製過好入味入口偏辛辣，雞肉煎得香口泰式蝦餅入口似蝦膠，煎得同樣香口咬落幾爽滑，放湯底比煎雞更入味