元札幌拉麵 (悅來坊)

營業中

休息中

今日去左荃灣悅來坊行街，行到攰攰地，就見到細細個同我一齊成長嘅叮噹……(多拉A夢)吸引左，原來食拉麵，店舖好有日本風，咁就係唔洗講，梗係入去試吓啦😆😆入到去見到好多唔同造型嘅細叮噹，好攪笑，未見過，見到都令人開心晒，食野都好味d 🤗🤗原來唔止有拉麵，仲有我最愛嘅~~鰻魚飯、燒物、小食……唸左好耐都唸唔掂😅又係選擇困難症發作😅😅鰻魚飯套餐~以為只有鰻魚飯，驚喜原來係套餐，有湯，沙律，仲有滑嘟嘟嘅蒸旦🥚,當然唔少得鰻魚飯。湯偏少少咸，沙律開胃，又健康清新👍🏿食左令人更餓🤭🤭,蒸旦就不得了，滑到無朋友，食完想再食(有唸過叫佢俾多個🤫🤫)。鰻魚勁大塊，飯中間墊左旦絲，食落無咁膩而且更加有口感🤤🤤🤤安格斯牛肉串~肥瘦適中，好味牛味，咬落有少少油脂出嚟，食唔停口，而且有5-6粒，都好抵食。😋另外食到中間，店員店主都好細心，送上獨立包裝口罩，感覺被愛🥰🥰呢個時候，願意分享是好難得事情(申利~疫情已經3個月，但未試過一間食店送口罩🤫🤫)

咁岩朋友都係荃灣悅來坊附近，所以急CALL 我去食Lunch!朋友揀左元札幌拉麵。豚軟骨拉麵$82從來未見過豬軟骨份量咁多既拉麵，有3,4大舊! 係大大舊.豬軟骨夠入味，而且煮得夠淋。半隻糖心蛋，絕對係拉麵既必備的。而且麵既份量絕對唔少，我覺得份量夠2個人食。湯底味道剛好，唔會太淡味。因為有點口痕所以叫左2款串燒串燒雞軟骨$18/2串 鹽燒雞腎$18/2串開頭以為$18/1串，所以上台時有點驚訝！因為就算街邊小食店，都做唔到呢個價錢。絕對性價比超高。２款串燒都唔會太鹹！而且唔會燒得太乾。呢個價錢呢個份量，實在非常抵食！

重要嘅事情要講三次 。我真係好鍾意食日本嘢食日本嘢食日本嘢，不論壽司刺身燒肉拉麵等等 ，既然冇得飛去日本，咁就只有捐窿捐罅搵好食嘅拉麵 。今日就去到荃灣悅來坊嘅元札幌食拉麵一試究竟。我叫咗一碗豚軟骨拉麵 $82 。 食得出豬軟骨用猛火烹製咗好耐， 豬軟骨好林好林，一入口就鬆化，加上脂肪同根煮到好似啫喱狀咁，口感非常豐富。 而且湯底都好濃郁，都接近日本正宗拉麵嘅風味 。除此之外，個人比較喜歡色黃色攣身嘅拉麵，呢一碗拉麵嘅硬度正合我心意。另外仲叫咗和風炸雞$42。 如圖所示 ，炸雞嘅份量都唔小，每一件都大大件 ，咬入口雞肉都算嫩滑 ，熱辣辣 。如果嫌熱氣嘅話可以加少少檸檬汁 ，又或者先浸落湯度 先至再食都可以。碗拉麵嘅份量都好足夠，加埋炸雞，食曬之後我連晚飯都冇食到，哈哈。另外想講講店舖裝修，都好跟足日本拉麵舖嘅風格 ，無疑係提升咗成個食拉麵嘅體驗 。PS: 門口有個好大個叮噹figure ,食之前可以同佢一齊合照喔。

午餐時間來到熊貓酒店附近，先周圍行行，發現這裏有很多餐廳。見到呢間餐廳嘅餐牌都幾吸引同埋幾抵食，決定入去試試。好驚喜！我地入去後店員先俾我哋各一個口罩，可能餐廳方便客人吃完午餐後換口罩。另外都俾咗一支迷你洗手啫喱俾我哋用。疫情期間，有依啲心思係好加分！我哋點左一set飯餐，一set拉麵餐。先講飯餐。咖喱飯味道香濃，少少辣。材料有入味嘅薯仔、紅蘿蔔、牛肉、洋蔥等等。另外，配上嘅蒸蛋好好味！熱辣辣食嘅時候充滿着蛋香及冬菇嘅香味沙律酸酸地好清新！麵豉湯也香濃好飲。我再試左少少老公嘅拉麵餐。牛油味香濃！初頭擔心會好油膩，但係原來好香薯餅好好味！外面非常脆, 裏面嘅薯蓉同埋南瓜蓉好軟棉棉。總括而言，覺得餐廳的午餐質素不錯，價錢亦非常抵，環境坐得舒服。另外店員都好細心上為我們加茶。而餐廳的器皿及餐具也很精緻美麗。值得推介！

荃灣呢間拉麵店真係幾正，雖然都好多人食，但係其實佢啲座位都係分得比較開，感覺非常安全。而且坐低嘅每一位客人都會送一個口罩，以及酒精搓手液，實在非常細心貼心。見到旁邊有啲限定Menu，但係我哋又唔係太肚餓，就叫一個試吓北海道芝士忌廉吉列炸蝦飯$82佢個份量好多啊！本身個芝士忌廉已經好香，但係又唔會太杰身！加上嗰個炸蝦其實個外皮好香脆，裏面都熱辣辣。入邊仲有啲雞肉粒，豐富又match～另外仲有沙律，味增湯及茶碗蒸，講真質素都唔錯！沙律好味清新酸酸地好開胃；味增湯鹹味適中，必需用筷子攪拌後飲用；茶碗蒸啲蛋夠滑而且味道偏甜適合女仔。招財貓$24白葡萄碳酸$24呢度有啲幾好飲嘅茶，但係我哋都想飲下日本野，招財貓金黃色嘅包裝好吸引，味道有啲似七喜雪碧之類嘅飲品， 白葡萄碳酸就似平時嘅乳酸飲品，個甜味都好適中～見到有其他人話佢哋嘅燒烤嘢食好正，下次再嚟試吓囉，因為見到價錢其實都唔貴｜

雖然最近多咗留喺屋企，但係有時都要出去食下野，因為有啲嘢食真係自己冇材料或者唔識整！依間餐廳好多嘢食都令我喜出望外，真係勁滿意，以下幾款食品我都重點推介，特別係鹽燒五花腩真係超好食！鹽燒五花腩$55佢唔係用竹籤穿着，但係佢一碟有好多件，我諗大概都有兩串嘅size，燒得好香，鹽味個份量啱啱好，而且個肉都有彈性，容易咬開。鹽燒雞腎$18兩串，質感比較結實，但係都有啲爽口，加啲檸檬中和左個鹹味，酸酸地真係幾好食！海鮮大阪燒$48呢個size都幾大，好飽肚，上面有好多木魚絲。同埋佢比嘅醬汁份量都好夠，好似去咗日本食大阪燒咁。北海道南瓜炸薯餅$18炸薯餅裏面有好多番薯蓉，都好甜，外皮又香脆，加埋啲沙律醬味道同口感都豐富左好多！

今日去咗荃灣悅來坊本身諗住去超級市場買啲嘢食，經過見到呢間日本拉麵即刻點燃左我對日本拉麵嘅心癮😍😍 即刻衝左入去試吓，果然冇令我失望！一睇餐牌佢拉麵嘅選擇都幾多，搞到有選擇困難症嘅我都有啲頭痕，最後店員就推薦左我豚軟骨拉麵，我個朋友仔就鍾意食辣所以叫咗地獄拉麵。而個湯底大家都可以揀嘅，分別有豬骨味增同埋醬油湯底。我哋就揀咗豬骨湯底。除咗湯底之外仲可以俾你揀埋麵嘅硬度，我地就兩碗都叫咗硬麵。好多唔專業嘅拉麵店，師傅可能技巧唔純熟，你叫硬麵有時佢可能會搞到個麵過生，依間就處理得好好，麵嘅硬度十分彈牙，值得加分。豬骨湯底都好濃郁，我估就有可能係自己用豬骨煲嘅。另外值得點名一讚嘅就係佢個豬軟骨，醬汁超級入味，而且肉質入口即化，個軟骨亦都唔會煮得過冧，啱啱好😍 所以建議大家嚟到都試吓豬軟骨拉麵。我個朋友碗地獄拉麵雖然就冇想像中咁地獄🤣但係佢個辣味都幾好食，鍾意食辣嘅朋友仔可以試吓。另外佢仲有好多唔同嘅小食都幾吸引，不過我哋就比較細食所以就冇試到😭 總括嚟講呢間都算係隱世嘅高質拉麵店，推薦大家一試！

放工想近近地食碗拉麵，本身無咩期望，但點知有啲驚喜！餐廳有種80年代日本風情，時下興復古，我都幾喜歡。不過如果佢地唔播中文歌會更有feel。放工想近近地食碗拉麵，本身無咩期望，但點知有啲驚喜！餐廳有種80年代日本風情，時下興復古，我都幾喜歡。不過如果佢地唔播中文歌會更有feel。講返食物，話明札榥拉麵，當然要食北海道名產拉麵啦，呢個蟹柳拉麵湯底麵幾夠味，雖然蟹柳係用冰凍蟹柳，但平平地，我覺得都可以接受。男朋友唔想食拉麵，嗌左鰻魚飯套餐，個鰻魚幾軟熟夠味！仲有佢地個set入面嘅茶碗蒸，因為太好食我成個搶左黎食hahaha另外仲有幾個小食，啲燒薯仔普普通通啦，不過凍豆腐好好食！因為塊皮脆脆地，但豆腐仲係好滑，又凍凍地，配上鰹魚汁，好味！仲有好多其他野食架，不過兩個人嗌唔到咁多間舖嘅裝修唔錯，門口仲有隻叮噹！

元札幌拉麵，作為地道嘅港式日本菜，冇錯，係地道嘅港式日本菜，佢已經做到佢的極限。雖然佢係標榜拉麵，但佢都有唔少其他野食－－正正就是港式茶餐廳的感覺，所有日本野都可以係一間鋪食晒。甫入餐廳，我feel到了，係90年代的香港。記得當時拉麵剛引入到香港，日本人看待拉麵就好似香港人看待雲吞麵，估唔到當曷拉麵黎到香港可以賣得咁貴。而家，靚少少既拉麵冇150蚊都落唔到樓了。望住餐牌，的確有90年代的感覺，我指的係價錢：呢個價位的拉麵，香港除了味千，我諗都絕無僅有了。我叫咗個鰻魚飯，咁d飯有d鰻魚，就98蚊仲包埋沙律呀茶碗蒸呀湯呀咁（個茶碗蒸我比幾高評價）鰻魚食到少少骨，但都幾大條。之後仲叫了d小吃：豆腐炸得好好，個汁亦恰如其分，努力咁托住個豆腐。另外都叫了蕃薯仔同雞軟骨，雞軟骨有少少硬。入到呢間餐廳，時間好似返返去90年代咁，望住個種符號堆砌既紅燈籠，用文字藝術師整出黎既餐牌，個種感覺就好似你而家去尖東個個噴水池咁，無論而家係2020定2047，呢間餐廳，同尖東一樣，凝住時間，好似一個異托邦咁。你問我90年代好唔好，我答你唔到，但2020的香港，的確好差，而且還未見到底，我地呢d呀叔，做唔到d咩，

今日去咗位於荃灣悅來坊嘅元札幌拉麵店🍜睇門面已經好吸引我哋入去🤗佢嘅裝修主要係用紅燈籠同埋木櫈木枱🏮感覺好日式，都係可以瘋狂打卡嘅餐廳🎎最後我揀咗個🍜🐖豚軟骨拉麵、海鮮大阪燒🍤先講吓海鮮大阪燒，佢面頭好多木魚，咬落去感覺唔會好粉，啖啖都有海鮮😙，醬汁適中，唔會太咸太濃味。🍜🐖豚軟骨拉麵有半隻糖心蛋，仲有海量粟米🌽😍，因為我好鍾意食粟米同豬軟骨，所以呢個拉麵都冇令我失望😗 可以自選湯底同埋拉麵嘅硬度，我揀咗味噌，佢呢邊啲拉麵唔算係好濃好鹹，食完都唔需要係咁飲水😛 豬軟骨好入味，好林，成碗面份量好大，都十分抵食😝 上菜速度都算快，等左一陣就有得食嚕😘

今日黎到位於荃灣悅來坊商場嘅元札幌日本餐廳🍴一入去店員會幫你量體溫，😷再每人派一個口罩，亦都有消毒搓手液，好衛生！🥰睇完餐牌都有少少選擇困難症😂，因為太多嘢揀，佢有牛肉飯鰻魚飯同各式拉麵、小食🍱🍢入到去坐低叫咗炸豆腐，燒野菜魚餅同埋主菜日式叉燒鹽味拉麵。先講下個炸豆腐，佢做到好似天婦羅咁外脆，炸到唔會炸到豆腐散晒豆腐上面鋪滿木魚好夾。另外個燒野菜魚餅好彈牙好香魚肉味👍🏽。到個主菜叉燒鹽味拉麵，個叉燒好厚身偏瘦所以好啱一啲減肥嘅人，湯底偏清淡所以自己可以配搭枱上嘅麻油、七味粉飲完成碗湯都唔會覺得口渴。餐廳環境好寬躺座位與座位之間亦有足夠距離，侍應周不時都消毒餐枱同櫈清潔做足所以大家都可以放心黎食

食日本嘢係我嘅最愛，基本上每個星期都會食兩至三萬日本嘢，朋友喺荃灣收工，所以就過嚟大窩口試吓呢間日本菜。食物嘅種類都幾多，價錢都幾大眾化，個人比較喜歡食拉麵，所以今次就叫咗個雜錦拉麵試吓。嚟到嗰時叫完嘢食，侍應就即刻派兩個口罩同埋一支搓手液，系呢個時候咁缺口罩都仲會派口罩回饋客人，真係好有人情味。雜錦拉麵嘅份量都幾大，湯底好濃郁，啲面好彈牙，入邊有兩塊叉燒，半隻流心蛋，一條蟹柳棒，呢個價錢真係算幾抵食。另外加$28加多四隻餃子，隻隻都好飽滿，好抵食。$48叫咗份和風雞件，件件都好大隻，新鮮炸起食啱啱好。

荃灣不嬲都多嘢食，太多選擇唔知食咩好，咁岩行開大窩口，喺悅來酒店地下商場原來有好多好嘢食，太耐話冇食過日本野，經過見到呢間好有情調嘅日本菜，二話不說就沖左入去。食物嘅價錢相當平民化，大概70至$80就有一個便當，呢個係晚飯嘅價錢。呢間鋪頭仲好好，每人送一個口罩同一支搓手液。叫咗個溫泉蛋牛肉飯，配麵豉湯、茶碗蒸同埋沙律，麵豉湯新鮮熱辣，茶碗蒸好滑同埋好多配料，正。餃子食得出新鮮豬肉包，大大隻，一啖都食唔晒，好足料。最後叫咗兩份雞翼，啲雞翼新鮮熱辣上菜，好好味。

朋友介紹荃灣悅來坊嗰邊有間日式餐廳，坐得幾舒服同埋好衛生。因為最近疫情原因，都少咗出街食飯都好少寫食評，但係喺屋企食嘢實在太悶，所以都係要出嚟抖氣。坐低叫嘢食之後店員提供左口罩同埋酒精搓手液，令人感到貼心又安心。章魚燒$42如果呢個價錢唔算話非常抵食，但係其實而家香港已經少咗好多地方有得食，個味道都OK，醬汁份量，熱力，都比較適中。牛舌溫泉蛋飯$82如果鍾意食牛舌千祈唔好錯過，呢間啲牛舌質感比較厚身有口感，而且有充足調味，用來送飯一流，加埋溫泉蛋就更加豐富。另外同事富有湯品，茶碗蒸及沙律，大胃王都夠食，如果細食嘅話可能就一個都食唔晒。下次嚟再試吓拉麵，因為佢款式都幾多，不過今次俾個飯吸引左又的確幾有質素！

今日相約朋友去荃灣悅來坊shopping🤩發現太耐冇黎過發現好多新商舖新餐廳進駐,然後我們黎到一間拉麵店門口有隻巨型多啦A夢吸引住，因為我好鍾意多啦A夢，所以二話不說我就拉咗朋友入去食晚餐🙆‍♀️環境很整潔舒服好有日本拉麵店舖風格！打開餐牌有非常之多嘅拉麵選擇，我同朋友各自叫咗一個拉麵食！札幌螃蟹拉麵，店員話呢個係招牌拉麵，果然湯底鮮甜，拉麵爽口彈牙，螃蟹食落口非常之有口感！而且份量很多👍另外朋友鐘意食辣叫了地獄拉麵，裡面有大大塊嘅日本叉燒，雖然叫地獄拉麵，但係湯底唔會話太辣，加埋隻半熟蛋好好味，值得推薦！有多啦A夢既陪伴食得特別開心🥳非常高質素嘅日本拉麵鋪，值得叫埋身邊嘅朋友一齊去試！