九頭鳥米線

營業中

休息中

近排聽講藍田開咗間九頭鳥，特登嚟呢間米線試吓！睇佢個餐牌，都有唔少選擇可以揀。最後我叫咗一個雞肉墨魚頭雲南酸辣（三小辣）米線再加杯凍華田。個米線等咗大概10分鐘到就有，算係幾快手。至於姐姐嘅服務態度，本身都冇咩大期望，但係我只係想要杯水，佢就咁用手指指一指示意要自己出去斟就擰頭走。。。其實態度真係可以好翻少少。。。講番碗米線先，個湯底略嫌有啲太淡，冇乜酸辣味。。。比較好嘅係，佢又加返個芫荽令到個湯底有返啲味，但係個花生如果可以再香口啲嘅話會更加好。至於個米線，我個人就覺得太淋啦。。。而餸嘅份量我就覺得啱啱好，幾足料。總括而言，我覺得譚仔或者譚仔三哥好味過九頭鳥，試過一次就夠😅

11點幾我就去左呢間新開既米線店試食，岩岩開無耐就已經差唔多坐爆曬，可見都幾旺場。 我等左差唔多15-20分鐘攞到碗麵，企喺度嗰陣時有兩個客人催外賣，一個就開到口話等左30分鐘可唔可以理下啲外賣，但我見岩岩坐低堂食嗰啲無耐就有得上麵，只能講可能岩岩開張係要等耐啲。 首先就係個霸王雞翼，佢係比譚仔香啲，但係佢真係幾咸，同大家試過可以唔洗嗌，咸到食左幾啖已經唔想食😂😂 就碗麵嚟講，佢嘅酸辣湯係ok既，唔會話死酸嗰種，但又未話到驚喜既程度，中規中矩。我就嗌左雞肉竹笙牛丸，佢啲牛丸同竹笙係ok好食既，但係雞肉就鞋鞋地，之後就唔會嗌雞肉了。三個餸嚟講50幾蚊，我認為係略貴左少少。 （個人口味而言） 湖南酸辣湯米線嚟講就係 譚仔>九頭鳥>三哥

藍田分店新開張，咪唸住起下啦，眼見又唔夠職員，得3個咁大把，一個就負責收銀，一個就一腳踢，樓面又係佢，外賣又係佢，登記又係佢，另一個就好似雲遊太空咁，唔知做乜。碗粉嚟到啦，嘩！咩料呀🤪，見到一個粉餅咁嘅，已經無言啦，咪問個職員囉，佢話係咁㗎係一早整好晒㗎，唉！咁算吧啦，一食之下，個湯暖嘅😩😩救命呀，粉係要熱先好味㗎嘛，生腸一d味都無，只係加咗辣咁囉，好後悔食咗間咁嘅嘢，無下次，唔會再幫襯囉。

之前呢個位嗰間譚仔執咗，搞到喺藍田局住要食三哥，我自己就一直覺得三哥個味道比較重，唔係好啱喎，以前都一直幫襯譚仔多啲。今日見到呢個位，剛剛開咗間新嘅雲南米線，上網望一望，原來好似話同譚仔嗰啲差唔多，咁就去試吓佢，應該因為開張仲有幾日，六點未夠就好多人，不過好彩有位😂，入到去啲格局同之前個譚仔有少少分別，好似多咗啲二人位。價錢同其他嗰兩間差唔多，不過佢居然用QR code落單，呢個都唔係問題，但係佢到落單系統唔係好掂，或者我唔係好識啦，我搞咗好耐都搞唔到點樣可以加多一餸，咁咪有焗住見一餸啦。加嘢飲佢又先計返正價，問過阿姐，佢話埋單先會計返，最麻煩係落咗單都唔知有冇落到，因為完全睇唔唔返自己叫做啲咩嘢。味道我覺得真係同譚仔好似，我唔係好識分🤣，試咗佢個小食麻辣墨魚頭都OK，係好爽口，只不過份量少啲。

【試食九頭鳥米線】第一日過嚟試吓，未夠六點就差不多坐滿人，菜單同譚仔基本上冇乜分別。專登叫譚仔冇嘅墨魚頭試吓，麻辣湯底亦都差唔多，不過個人覺得味道譚仔好食啲啲。米線嘅份量比譚仔多少少，個人口味鍾意米線林啲，已經叫咗米林啲，不過都係唔夠淋，有冇米勁林呢個選擇😆第一日開門預咗冇咁順暢，落單之後都要等20分鐘先至有得食，隔離枱甚至等咗半個鐘，不過都體諒第一日營業。內部個裝修，坐低之後唔係好見到其他客，一入舖頭亦都唔係太見到邊度有位，好處係私隱度高少少，唔好處係企喺門口唔知入邊仲有冇位。整體來講分別真係唔算好大，價錢又差不多，味道亦都相近，未試過嘅可以試吓嘅。 對螺旋藻特別有興趣，唔知係咩嚟⋯⋯P.s. 我本身好少食三哥，因為覺得佢味精勁，食完會頭痛，所以主要同譚仔比較。#九頭鳥米線