串燒陣

營業中

休息中

係旺角行完街，夜麻麻想同朋友搵d小食食下再飲反兩杯，就簡左嘅間新開嘅串燒店。要送野飲第一味一定要叫炸雞軟骨，每粒都炸到好香脆，又夠惹味。之後再叫左小食類別嘅芝士腸、芝士丸同埋燒賣，特別係燒賣燒到外脆內軟，特別好食。而串燒肉類方面叫左五花腩、豬頸肉同埋八爪魚鬆，今次推介豬頸肉，味道好足，燒到裏面啲油花迫晒出嚟，油脂感十足，好正。而食串燒又點可以無蔬菜類，我地叫左虎皮青椒、秋葵同埋四季豆，調味大致相同，會推介青椒，食落小辣好過癮。最後叫多樣錫紙燒蒜蓉花甲，花甲粒粒無沙乾淨，蒜蓉比得超多，亦都好好食。今次叫嘅嘢食全部都好滿意，下次去到旺角夜晚，要食宵夜又有好地方啦！

今日同朋友去旺角通菜街覓食😆經過呢間串燒店聞到陣好香嘅燒烤味🤤所以決定入去食✌🏻-首先非常推介炸雞軟骨雞軟骨爽口 唔會話炸到好乾👍🏻-燒五花腩肉串 醬燒豬頸肉 燒八爪魚鬚五花腩味道甘香 肥潤而不膩豬頸肉肉質爽嫩八爪魚鬚口感爽脆-燒台灣腸 脆皮芝士腸 燒司華力腸 炸鵪鶉蛋串台灣腸咬落去有滿滿Q彈嘅肉粒🙌🏻絕對唔係一般充滿澱粉感嘅腸仔脆皮芝士腸仲會爆芝🧀鵪鶉蛋好迷你 外皮香脆-燒安格斯牛仔骨 燒紐西蘭羊架安格斯牛仔骨充滿牛香羊架肉質軟嫩-蒜蓉燒大大茄子茄子吸滿晒啲蒜蓉味非常惹味

旺角真係唔知食乜好，同行者話想試新店所以帶左佢去串燒陣。 冇諗過又幾高質喎，所以叫咗超多嘢食，一齊攬住個肚走。😂先叫左燒八爪魚鬚，燒翠玉瓜，同燒娃娃菜，試下廚師水準。一食就知係經驗廚師之作，調味恰到好處唔會過咸，火侯掌握亦非常好，咁就可以叫多啲其他野食啦～食肉獸既我叫左燒台灣腸，燒司華力腸，仲有不得不叫既炸鵪鶉蛋，唔係度度有㗎。燒絕味雞軟骨係強烈推介，口感絕佳，佐酒一流。而朋友就最鐘意食燒脆香雞皮。另外仲叫左爽滑多汁既燒豬頸肉，同童年回憶既燒脆脆香燒賣，脆皮芝士腸。爆漿芝心丸記得趁熱食，如果唔係就冇咗拉絲效果㗎啦～

超喜歡同朋友到每一區發掘特色串燒食店今日黎到旺角食#串燒陣 燒澳洲牛小排 $98🐄香噴噴既牛小排一定要趁熱食 上碟已經切好曬 曬岩手殘既我😜每塊都厚肉又爽口 真係燒得超級爽彈沾上少少鹽更能帶牛小排既香味🤤醬燒豬仔髀 $38🐖豬仔髀係油脂較低嘅一款豚肉味就更濃 配埋甜甜地既醬汁 肉質都幾軟綿同埋香口焦脆☺️燒紐西蘭羊架 $45🐏燒到羊架外層脆卜卜 食落好香同埋肉質嫩滑 好味😋錫紙燒蒜蓉花甲 $58🦪蒜蓉花甲分量十分多 花甲肉食落口十分細嫩每隻花甲食落去肉質都十分飽滿小小辣味調味食落更美味🧡蒜蓉燒大大茄子$38🍆茄子好大條 而且燒到多汁軟嫩茄子肉搭配濃濃的孜然粉與蒜蓉 忍唔住再叫多碟🧄店員非常有禮貌 態度誠懇友善服務效率很高 上菜速度快👍🏻📍旺角通菜街1A-1L號舖

最愛串燒，又是串燒，今次黎到旺角吃串燒。新開的店子，係正威達商廈地下，行到最入就見到，地鐵站附近，地點方便。餐牌有好多選擇，價錢唔貴，即叫即燒新鮮熱辣，店子通風做得好好，唔會一陣燒野食味。錫紙燒蒜蓉花甲惹味花甲香噴噴， 好大分好多花甲，一啲沙都冇，新鮮鮮味正。燒雞中翼 燒肥牛金菇卷雞燒雞翼我最鍾意食~雞翼好人入味，仲有少少燒嘅坑紋色香味俱全。紮實嘅金菇肥牛，肥牛包著超級大份量嘅金菇，juicy。燒脆脆香燒賣 脆皮芝士腸 爆漿芝心丸 頂級墨魚丸脆香燒賣唔係度度有，燒賣外皮燒到脆卜卜，本身個燒賣都已經係好好食！芝心丸、墨魚丸都係唔可以錯過㗎。燒絕味雞軟骨 燒脆香雞皮 燒雞中翼 燒肥牛金菇卷燒五花腩肉串 燒虎皮青椒 燒泰國秋葵 燒四季豆 燒冬菇全部都好好食。五花腩先係皇道，燒完唔會好肥膩，充滿肉脂香氣！推介燒翠玉瓜同蒜蓉娃娃菜，配上調味，夠惹味！又搵到一個食串燒嘅好地方。love 🍡🍢

經過旺角通菜街威達商業大廈, 地舖有間串燒店個名好得意, 叫“串燒陣”. 咁我就入黎睇下你會唔會比我串少陣啦.簡簡單單叫左炸雞軟骨, 外脆內軟, 入口喀喀聲, 正.蒜蓉燒大大茄子, 超大隻茄子, 上面放滿哂蒜蓉, 超正蒜蓉香味.蒜蓉燒原條魷魚, 燒八爪魚鬚, 魷魚彈牙, 香噴噴, 有D回憶O係以前戲院門口嘅燒魷魚.燒脆脆香燒賣, 脆皮芝士腸, 墨魚丸 燒司華力腸, 簡單食材, 燒得精彩, 香氣撲鼻. 燒五花腩肉串, 肥瘦適中, 肥膏位重燒得燶燶地, 十分野味. 燒虎皮青椒 燒泰國秋葵 燒四季豆 燒冬菇, 燒左咁多肉類, 都要燒返D蔬菜類中和一下. 估唔到燒蔬菜都幾好食. 非常香口, 食到索索聲.

今日想推介呢間位於旺角新開既串燒小店串燒陣，地理位置比較隱蔽，不過串燒價錢都幾親民，最適合約埋一班朋友坐低食串燒飲野，點餐紙已經分好哂唔同類別，我地每款都叫左幾款share一齊食🌟必食推介▫️燒脆脆香燒賣 ($20)▫️燒絕味雞軟骨 ($18/串; $88/6串)雞軟骨上面加左孜然粉，一次過叫夠6串唔洗爭，燒賣脆卜卜好好食🌟肉類串燒▫️燒五花腩肉串 ($28)▫️醬燒豬頸肉 ($28)▫️燒肥牛金菇卷 ($28)▫️燒雞中翼 ($24)▫️燒脆香雞皮 ($18)幾時都話燒雞翼我鐘意食，串燒又係一定會叫燒雞翼，一串兩隻雞皮燒到好香脆但雞肉依然保持嫩滑多汁，燒五花腩肉串層次分明，食落好爽口，必食脆香雞皮，脆卜卜好似食緊薯片咁🌟蔬菜類▫️燒豆卜 ($18)▫️燒甜美菠蘿 ($20)▫️燒翠玉瓜 ($18)燒菠蘿香甜多汁，翠玉瓜加埋調味料好入味，食落好juicy🌟串燒丸腸類▫️爆漿芝心丸 ($20)▫️頂級墨魚丸 ($20)▫️燒台灣腸 ($20)推介大家試下呢個爆漿芝心丸，一咬落去feel到芝士湧緊出黎，超正，墨魚丸爽口彈牙，仲食到粒粒墨魚既口感🌟炸物類▫️炸鵪鶉蛋串 ($20)雖然餐廳主打串燒，但佢地既炸物都好出色，

最近愛上食串燒，朋友話想試呢間餐廳，所以一齊去食。見菜單上食物頗豐富，包括肉、海鮮、炙燒等等，應有盡有！我地order到成枱食物，每樣都可以試少少，好滿足！至於其他食物，整體而言味道都幾唔錯，以下呢幾樣係自己比較鍾意既：蔬菜點咗好多，樣樣都幾新鮮。而燒豆卜加埋調味粉之後風味十足，非常惹味。雞軟骨、雞中翼、雞皮係必點，唔會太油，乾濕度啱啱好，好有口感。燒肥牛金菇卷有驚喜，因為平時少食，所以印象比較深刻，燒出嚟仲係好juicy。

食串燒嘅地方好多，但我簡串燒店嘅方式通常得一個，就係近😂依間　#串燒陣位於旺角，地鐵行5分鐘就到，都非常之近我而且依間可以用手機點單，最適合我依種唔鍾意同外人講野嘅人而佢串串嘅味道都唔錯，調味剛好，唔會太鹹，羊肉串，一口牛，同茄子都幾好食，而佢嘅小辣亦都唔會太辣，所以我食佢嘅花甲粉都覺得OK不過位置唔多，所以繁忙時間嚟嘅話，有機會要係外面等一陣位，而且佢出餐時間比較慢，所以有機會要等比較耐，肚餓心急嘅朋友就要注意下

串燒陣，位於旺角通菜街威達大廈地下，餐廳新開張不久，以串燒食物為主，餐廳佈置簡單舒適，座位尚算寬敞。串燒餐牌選擇確實非常多，豬牛羊雞海鮮蔬菜甜品樣樣有，價錢相當大眾化，部份更有叫6串優惠價。錫紙燒麻辣蒜蓉花甲，錫紙可以保暖，花甲用中大量蒜蓉調味，味道香濃，花甲新鮮甜美。燒脆脆香燒賣，燒賣外脆內軟。燒五花腩肉串，肥瘦適中，五花腩肉有有燶邊，有咬口。金菇牛肉卷串燒，牛肉味濃有咬口，金菇可減低牛肉油膩感覺。

喺旺角收工見到有間新開無耐嘅串燒店，佢哋啲串燒勁香，喺門口聞到都流哂口水，所以即刻入去一試究竟，呢間就係串燒陣。佢哋嘅串燒種類繁多，價錢相宜，所以唔洗就住嚟叫，呢次叫咗燒脆脆香燒賣、脆皮芝士腸、爆漿芝心丸、頂級墨魚丸、燒八爪魚鬚。佢哋串燒調味得宜，唔會太濃，令人食完會好口乾，而且做到外脆內嫩，有陣陣嘅燒烤嘅香味，未食到流哂口水。食咗數款嘅肉串燒，所以都叫咗幾款蔬菜串燒，分別有燒翠玉瓜、燒娃娃菜、燒豆卜、燒甜美菠蘿。食完可以消減肉類串燒嘅油膩感。而甜嘅串燒都有，我呢次就叫咗一個燒朱古力香蕉作甜點。

又有一間高質串燒店好介紹😍 串燒款款都好正！環境又舒服😌下次再同朋友來食！ 以下係我哋叫咗嘅食物：醬燒豬頸肉，醬汁香濃，勁惹味～ 啖啖肉好滿足！燒豆卜係我第一次食，估唔到外脆內軟，口感好正！頂級墨魚丸，一口一粒，香口脆口又彈牙炸鵪鶉蛋串，香軟酥脆又可口！燒韭菜，調味粉滿滿，更加突顯韭菜香味燒絕味雞軟骨，粒粒脆卜卜，好爽口燒脆香雞皮，邪惡到不得了😍蒜蓉燒大大茄子，蒜香濃郁😃燒朱古力香蕉，甜到入心，香軟又滑～

依排天氣凍凍地，真係好岩食啲辣辣哋既野。依間串燒專門店就專門有好多串燒小食，多到你試唔晒。🍡燒五花腩肉串。燒虎皮椒。燒泰國秋葵。燒四季豆。燒冬菇幾鍾意佢滿滿嘅孜然粉、五香粉，令到蔬菜嘅鮮味突出，五花腩同個孜然粉又好夾。🍴燒安格斯牛仔骨。燒紐西蘭羊架肉類啱啱好熟，唔會好韌，一咬就爛。😋燒脆脆香燒賣。脆皮芝士腸。爆漿芝士丸。頂級墨魚丸。燒司華力腸。炸鵪鶉蛋串。蒜蓉燒原條魷魚呢度係好多嘅肉類、丸類，每樣嘢都燒到好脆口，外脆內軟，好惹味。😍燒絕味雞軟骨。燒脆香雞皮。醬燒豬頸肉。燒肥牛金菇卷估唔到肥牛金菇卷都有得燒，個醬汁嘅味道入晒個牛度，金菇夠爽口。雞皮同雞軟骨都好正，夠脆口、又香口。

香港近年開始開張了不少串燒店舖。此行新開的串燒陣，點選了不同食品，食品種類繁多。味道不俗而且燒嘅生熟程度掌握火候不錯。有點選了一些海鮮，生蠔及扇貝也很新鮮。至於雞皮也很香脆。推介必點茄子，茄子的味道及質感很好。至於豬頸肉則有點柴口。有機會也會重臨品嚐。

朋友生日話想食串燒，我搵到呢間叫做串燒陣，就帶朋友去試吓啦。餐廳食串燒為主，我地叫咗好多嘢食，食到飽晒。我哋叫咗燒豆卜同埋燒波蘿，波蘿燒得剛剛好，好多汁，好好味。燒豆卜好得意，脆脆哋，口感唔錯。跟住叫咗燒安格斯牛仔骨 同埋燒 紐西蘭羊架，牛仔骨一啲都唔韌，羊架完全無羊羶味，正呀，食完都飽飽哋。最好味嘅係燒脆脆香燒賣同埋頂級墨魚丸 ， 燒賣外脆內軟。 墨魚丸爽口彈牙， 加上串燒用的增味份粉，味道一流。食咗咁多肉類，我哋都叫咗一啲蔬菜類，我哋叫咗燒韭菜，蒜蓉燒大茄子。 兩種蔬菜都好好味，大家食咗咁多肉類，都要食多啲蔬菜啊。