今次同朋友食去商場食日式燒肉放題，一般會食美國金標SRF，呢種中價位嘅餐，日本和牛都試過。不過今次揀左最平最少選擇嘅澳洲安格斯牛板腱燒肉放題，優惠價$198，連加一只要$225，確實幾抵。不過原來除左平，仲有其他好處：牛板腱位於肩胛內側，肉質結實但有細緻的肌纖維，食落落有咬口，唔會太軟。而脂肪唔多但分佈均勻，中間又有一條嫩筋，燒烤時既有肉香又唔會太油膩，食落juicy，口感有層次，唔會食幾塊就膩。燒肉以外，我地入座，仲附上一個豬骨湯底火鍋，燒肉之前先食菜。火鍋湯底清淡，勝在可以補充各種蔬菜，同試下薄切牛肉喺清淡湯底入面，點突出牛味同口感。除左金菇之外，食完嘅蔬菜都可以出去自助區補充，令營養更均衡。正式食燒肉，發現豬牛雞都有，有原味、燒肉汁、塩鹽、蒜香同辛味醬汁。牛肉方面更加除左牛板腱之外，仲有牛肩肉同薄切牛舌。- 牛板腱：結實但有嚼勁，脂肪唔多但分佈均勻，嫩筋增添口感層次，適合原味、蒜香、辛味醬汁等 keep 肉味嘅醬汁，係穩定表現嘅熱門選擇。- 牛肩肉：通常較瘦但風味濃郁，口感會比板腱鬆少少，但同樣容易煎到多種熟度，較易吸收醬汁嘅香氣，所以我主要食原味。- 薄切牛舌：口感獨特，薄片易入口，肉味濃但脂肪少，煎得適中就會有脆嫩感，今次無韌，適合喜歡牛味但不想太厚重嘅食客。而豬肉係黑豚腩肉，雞肉係去骨雞腿同雞中翼，雞翼平時食得太多所以今次無叫- 黑豚腩肉：脂肪含量豐富、油脂香氣突出，所以我地燒耐啲，等佢有少少焦香。- 去骨雞腿：較多汁，味道清淡，作為中和其他部位嘅選擇，我地都叫左少少。牛油帶子一份比較多，但比較細隻，牛油香味搭救，而墨魚仔比較中規中矩。醬料區非常豐富飲品甜品都好豐富，除左一般常見汽水之外，都有部分韓國罐裝飲品。甜品蛋糕泡芙一應俱全，雖然雪糕牌子係任食火鍋常見CoCoBerry ，不過雪條有明治兩款口味，選擇唔算超多，不過滿足肉食以外其他需要，都算夠。…查看更多
