平時好少聽到黎巴嫩菜，就算聽過都唔知去邊度食。其實香港有黎巴嫩人開設嘅“Shahrazad Lebanese Dining Lounge & Bar”，正宗地道口味，加埋阿拉伯異國風環境好似去咗旅行咁。
其實黎巴嫩菜好健康，有好多海鮮、蔬果、香草。當地人都好鍾意食烤肉，多數會伴上果仁、水果等天然配菜，好有獨特風味。主廚堅持全用外國高級食材，就算小至沙律菜、番茄都特別清甜㗎！
呢度仲有半露天座位，好啱傾計。
阿拉伯地區嘅藝術圖案Mashrabiya，成為呢度嘅人氣打卡位。
【人氣料理】
阿拉伯沙律 Fattoush Salad
新鮮蔬菜配上香甜番石榴，清爽微酸。依地道食法配脆硬口袋麵包一齊食，好啱夏天食㗎。
慢煮阿拉伯羊肩飯 Lamb Ouzi
呢度嘅羊肉整得好軟腍，如果你鍾意食羊嘅話真係必食。入口肉味勁濃又夠腍，咬落會有少少羶味但係完全接受到嘅程度，好有風味。
香煎無鬚鱈魚 Samak Bil Tahini
無鬚鱈魚比一般鱈魚魚油更豐富，食落會特別肥美。配上芝麻洛神花醬，細滑微酸好開胃。
哈羅米芝士西瓜 Halloumi Watermelon
估唔到芝士加西瓜係咁夾～哈羅米芝士香濃軟Q，又有清爽西瓜汁中和芝味，加埋石榴糖漿好啱春夏食。
敘利亞紅椒核桃醬Muhammara
味道好豐富嘅經典醬，用炭烤紅辣椒、核桃、石榴糖漿做出微酸微甜微辣，用嚟配薄餅或者蔬菜都好夾㗎。
綠色小麥燉羊腿 Freeket Mozzah
用綠色小麥燉到羊腿好軟腍，仲有煙煙韌韌嘅超級食物翡麥(Freekeh)，營養價值高、升糖指數低，聽講有減肥幫助㗎。
烤虎蝦 Tigher Prawns
呢度所有食材都係外國運到，特別係海鮮、蔬菜特別新鮮清爽㗎！炭燒虎蝦好keep到鮮味，配黎巴嫩蒜大蒜醬(Toum Sauce)好惹味。
原隻自由放牧春雞 配大蒜醬烤 Farrouj Meshwi
西班牙春雞好嫩，搣開好多肉汁流出嚟～仲有焦糖洋蔥又甜又軟綿綿。
【午市套餐】
如果未食過黎巴嫩菜又想淺嚐吓，可以試吓午市套餐，有地道嘅Cold/Hot Mezze+主菜+甜品，價錢幾划算。
Cold Mezze 4選1
首先有是日餐湯，跟住係4選1嘅沙律/Cold Mezze。烤茄子沙律Roasted Eggplant Salad灑滿番石榴、松子仁好開胃；哈羅米芝士Halloumi Cheese軟軟QQ蘸石榴醬；黎巴嫩鷹嘴豆蓉Lebanese Hummus係當地好常見嘅Cold Mezze，綿滑有豆香；仲有另一種鷹嘴豆蓉Hummus Beiruti，會加多咗番茄、蒜蓉、香草會更加清新。
首先有是日餐湯及Cold Mezze 4選1。
(左)烤茄子沙律Roasted Eggplant Salad、(右)哈羅米芝士Halloumi Cheese
(左)黎巴嫩鷹嘴豆蓉Lebanese Hummus、(右)Hummus Beiruti
Hot Mezze 2選1
想香辣啲可以揀辛辣薯仔Batata Harra，黎巴嫩人會用紅燈籠椒、辣椒等煮製；另一款係檸檬蒜蓉石榴香煎雞肝Pan-fried Chicken Livers with Lemon Garlic & Pomegranate，係重口味之選呀。
(左)辛辣薯仔Batata Harra、(右)檸檬蒜蓉石榴香煎雞肝Pan-fried Chicken Livers with Lemon Garlic & Pomegranate
主菜4選1
主菜有4款—燉魚、烤雞、烤肉拼盤、Impossible不可能肉丸。澳洲盲曹Salq Barramundi先香煎魚柳，再配上燉瑞士甜菜及黑眼豆；烤雞配煙燻阿拉伯飯Chicken Ouzi，烤雞好香口，阿拉伯飯本身就已調味好開胃；阿拉伯烤肉拼盤Mashawy就有燒羊肉、雞肉同羊肉，真正炭火燒㗎！唔想食肉就可以揀不可能的岜沙Impossible Basha，以阿拉伯調味不可能肉丸配蔬菜燉飯好健康。
主菜4選1，有燉魚、烤雞、烤肉拼盤同Impossible不可能肉丸。
(左)澳洲盲曹Salq Barramundi、(右)烤雞配煙燻阿拉伯飯Chicken Ouzi
(左)阿拉伯烤肉拼盤Mashawy、(右)不可能的岜沙Impossible Basha
最後就有甜品Mahalabia，係傳統黎巴嫩牛奶布甸。
Shahrazad Lebanese Dining Lounge & Bar
地址: 中環雲咸街75-77號嘉兆商業大廈2樓
電話: 23300242