暑假多咗好多家庭飯局，天氣咁熱最好搵間坐得舒服涼爽嘅中菜啦。主打海鮮嘅「翠林辣蟹舫」好啱夏天食，最經典一定係避風塘香辣蟹，大廚用炸蒜、辣椒爆香大炒。火喉鑊氣好夠，惹味得嚟炸蒜又唔會過熟變苦。游水蟹幾大隻厚肉，最啖啖肉一定係蟹鉗。不過私心最鍾意蟹腳，直接用口咬開蟹殼嗰陣可以食埋啲蒜味，正～
避風塘香辣蟹。呢個係中蟹size已經咁大隻，多人食揀隻大蟹都唔係貴好多。
女生一定要嗌埋濃湯大花膠雞，係用大花膠+原雞熬4個鐘。其實原雞已經熬到融喺湯入面，湯料精華都逼晒出嚟，真係好滋補美顏。上枱之前會再另外加半隻三黃雞落去，保證食到三黃雞獨有嘅雞味同嫩彈肉質啊，而家網上訂座更可享花膠雞湯半價優惠，記得記得叫啊。
濃湯大花膠雞以大花膠、原雞熬足4個鐘，每啖湯都係精華。
龍蝦迷一定唔好錯過游水澳洲龍蝦!! 5款口味都係一樣價錢—避風塘龍蝦、黃金流沙龍蝦、香辣宗谷瑤柱炒龍蝦、川味椒麻龍蝦、水煮澳洲龍蝦。
如果多人飲酒，揀黃金流沙龍蝦、川味椒麻龍蝦會惹味佐酒啲。飯局有長輩嘅話，推薦加咗北海道瑤柱嘅香辣宗谷瑤柱炒龍蝦，香口得嚟又有瑤柱鮮味。
游水澳洲龍蝦，幾有海水味。
香辣宗谷瑤柱炒龍蝦特用北海道瑤柱，長輩都會鍾意嘅鮮甜味。
原隻起殼 黃金拆肉瀨尿蝦
其實瀨尿蝦一直都好多fans鍾意食，但係又硬又𠝹手嘅蝦殼令唔少人卻步。所以大廚索性將瀨尿蝦原隻起殼，一夾起瀨尿蝦即刻食得。而且瀨尿蝦超大隻，大大啖都要3、4啖先食完，鹹蛋黃脆脆加埋超厚蝦肉，食一隻已經勁滿足。
私心最愛就有呢道黃金流沙蝦球!! 雖然個名叫蝦球，但其實隻蝦勁大隻又有蝦味。食嗰陣直接一人一碗好方便，鹹蛋黃脆脆滿到就嚟瀉，又脆又鹹香。
必食黃金流沙蝦球，鹹蛋黃脆脆多到滿瀉。
中菜飯局好興最後食個炒飯，而「翠林辣蟹舫」呢個食神炒飯係值得留肚食。因為係真·《食神》電影中嘅戴師傅親教，煮法繁複要分4次倒入3種米炒到乾身輕韌、粒粒分明又Q彈，同平時嘅炒飯真係好唔同啊。
電影《食神》中嘅戴師傅親教，高度還原電影味道。
呢度全部都係游水海鮮同明碼實價。你仲可以自己去魚缸揀，逐隻計錢唔驚海鮮價。
海鮮每日直送，可以去魚缸自己揀海鮮。
游水海鮮生猛，逐隻計錢唔驚海鮮價。
好似呢度嘅招牌菜炒蟹，餐牌已經寫明每隻幾錢，5款口味—避風塘香辣蟹／黃金流沙炒蟹／椒麻香辣蟹／欖菜煮蟹／黑白胡椒炒蟹都係一樣價錢㗎。
翠林辣蟹舫
地址: 尖沙咀亞士厘道24-38號天星大廈1樓A號舖
電話: 26289888
