喺尖沙咀想食好啲，氣氛casual又唔太貴，Fifth Element Shokudo係唔錯嘅選擇。雖然餐廳位於商場內，但都有室外座位，加上輕工業風裝潢，感覺幾chill。而品牌源自日本一間主打意日Fusion菜嘅小店，佢嘅薄餅餅底加入味噌製作，嚟到香港增加多款口味外，更推出漢堡、丼飯等味道香濃嘅菜式；而一系列牛肉料理更只選用美國黑毛和牛，以及日本岩手縣嘅牛匠和牛，即睇邊款啱你口味啦～
【招牌菜式】
辣肉醬至尊味噌麵糰薄餅
嚟到當然要試自家創作嘅特色薄餅，餅底依照日本配方，加入味噌製作麵糰，發酵需要12個鐘，焗起會更加鬆軟。其中辣肉醬至尊薄餅，加上一款源自意大利小鎮嘅辣肉醬，辣肉醬係以傳統肉碎同多款辣味香料製成；面頭鋪埋肉腸片等配料，風乾肉香嘅滋味更突出。
辣肉醬至尊薄餅
W特大黑毛和牛丼
牛魔王必食！W特大黑毛和牛丼嘅肉量有250-300g，比正常版多一倍㗎～黑毛和牛牛肉已明火燒製後，配搭用自家製昆布高湯、秘製醬油等材料製作嘅醬汁，味道煥然一新。
W特大黑毛和牛丼
日本A4牛匠岩手和牛沙律
唔食飯嘅話，呢款沙律就啱你喇～牛肉主要選用肉眼同西冷部位，燒起有陣陣肉香，肉質非常嫩滑，多款蔬菜則新鮮爽甜。
日本A4牛匠岩手和牛沙律
味噌大蝦手打扭紋意粉
餐廳所有意粉都係自家製作，用意大利00號麵粉同Semolina兩種麵粉製成，冇經過曬乾處理，質感比較煙韌。想試Fusion口味可以試下味噌大蝦手打扭紋意粉，醬汁用赤味噌同忌廉煮成，食落微鹹又不失cremay口感。
味噌大蝦手打扭紋意粉
巴馬臣蒜牛油雞翼
至於小食方面，不得不試呢度嘅雞翼。雞翼醃24小時再炸，外脆內嫩，而人氣款式巴馬臣蒜牛油雞翼，配自家特製嘅蒜蓉牛油醬，鹹香惹味。
巴馬臣蒜牛油雞翼
【新款菜式】
松露鮮菇和牛薄餅
嚟到黑松露同菇菌當造嘅季節，餐廳特別推出松露鮮菇和牛薄餅。餅底鋪上岩手和牛免治牛肉、黑松露、香菇粒、芝士、意大利番茄醬等材料，出料豐富。
松露鮮菇和牛薄餅
燒牛扒配黑松露手打闊意粉
自家製嘅寬帶意粉每條近2寸闊，比一般意粉掛汁；醬汁則用意大利芝士taleggio加忌廉煮成，配上燒牛肉片同新鮮黑松露，清香又惹味。
燒牛扒配黑松露手打闊意粉
W特大南蛮風炸雞丼
炸雞塊選用雞上髀部位，一碗有成8至10件咁多，即叫即炸，咬落外脆內嫩。而日本米飯先淋上自家調配微酸醬燒汁；炸雞則淋上自家製辣味蛋黃醬，提升惹味指數。
W特大南蛮風炸雞丼
【招牌終極和牛漢堡套餐】
餐廳所有漢堡，都用日本岩手縣和牛免治牛肉製作漢堡扒，煎起有日本和牛嘅肉香又juicy！分量十足嘅招牌終極和牛漢堡，新鮮軟熟牛油包夾住炸到香脆嘅意大利parma ham、美國番茄同生菜、中等濃度嘅荷蘭芝士等材料同自製蛋黃醬，口感極之豐富，味道層次感滿瀉。
你重可以用優惠價加配超級香脆薯條同雞翼，前者選用歐洲品牌，香脆口感比一般薯條保持得耐，配各式調味同醬汁好惹味，例如檸檬胡椒薯條配特製芝士丘比醬；味道濃郁，其中自創嘅鰹魚芝麻雞翼，雞翼沾上自製鰹魚乾紫菜碎一齊炸，帶有獨特香氣。
終極和牛漢堡套餐加配特色薯條/雞翼
【聖誕晚市二人套餐】
套餐有5道菜式
聖誕晚市二人套餐包括沙律、小食、主食等合共7道菜式，當中不乏招牌菜式：
濃厚男爵薯仔沙律 薯蓉加入用橄欖油浸嘅意大利銀魚柳、忌廉同蛋黃醬，比傳統做法鮮味。
牛舌洋蔥清湯 糅合法式洋蔥湯做法，炒香洋蔥後加入牛舌熬煮1日，牛香又唔會好油膩。
自選薯條口味 其中蟹肉味醬薯條，配嘅蛋黃醬拌入蟹膏、再加蟹肉而成，鮮味又增加口感。
自選雞翼口味 負責人推介嘅水牛城雞翼，用傳統方式製作醬料，我酸辣程度適中，灑上少少紫菜碎增加香氣，風味更獨特。
自選主菜(可選擇牛扒、豬扒、沙律、各款意粉和各款薄餅) 300g美國西冷扒（伴紫薯栗子薯餅/和牛薯餅、和風沙律） 明火燒製嘅美國安格斯西冷扒，標榜大件足秤，配2款醬汁：鍾意濃味可以蘸藍芝士蛋黃醬，鍾意日式風味則有自家製日式燒汁，味道偏甜。
北海道帶子荒磯海苔意粉 荒磯海苔醬，用紫菜、醬油同糖熬成。呢道意粉用蒜香意粉嘅煮法，加入荒磯海苔炒香，更加突出刺身級帶子嘅鮮味。
五要素意大利芝士蛋糕 呢款甜品名用店名行頭，當然係招牌款式啦～意大利芝士蛋糕用傳統方式製作，但加入柚子皮，質感幼滑，同時有種清香感覺。 |
Fifth Element Shokudo
網址：https://s.openrice.com/QrbS0jMSA00
地址：尖沙咀彌敦道100號The ONE3樓L308號舖
電話：28892240
