想喺尖沙咀望靚景食Lunch! 呢間泰越酒吧餐廳“MAMTOM”嘅午市套餐只係$80，就可以一邊欣賞維港美景、一邊享用高質泰越菜啦。
午市套餐$80可自選前菜、主菜；並可優惠價+$18追加甜品，每日12pm-3:30pm都有㗎!!
【前菜】
前菜6選1都幾豐富，鍾意香口啲可以揀春卷、香辣雞翼，下晝配杯啤酒都幾chill啊。清爽簡單啲又有青木瓜沙律，或者紅咖喱配薄餅都好開胃啊。
【主菜】
主菜5選1，想食飯嘅有雞肉碎咖喱炒飯配蛋、雞肉/牛肉炒飯等；仲有款紅咖喱茉莉香米/米粉(配雞/蔬菜)，素食者都啱食。
最私心推薦係炸青木瓜及豆腐 配茉莉香米/米粉，平時好少食到炸青木瓜，外酥內軟幾清新脆口，有種食緊日本蔬菜天婦羅咁，好吸引!!
【Lunch Set配搭】
我哋今次就食咗3個Lunch Set，前菜+主菜其實都好大份，加埋甜品坐個下晝幾爽，畀大家參考吓～
春卷+紅咖喱茉莉香米/米粉(配雞/蔬菜)+椰子Gelato
春卷炸到好金黃香脆，而且好爆餡有雞肉碎、越南香草、生菜等等，口感好豐富。好鍾意佢個汁，酸甜辣幾有層次。
紅咖喱就唔會好辣，係辣中帶甜嗰種，最後食個椰子雪糕啱啱好。
香辣雞翼+雞肉/牛肉炒飯+炸香蕉
雞翼用咗泰國辣椒、香茅、大蒜醃製，鹹辣衝撃!! 濃味控一定鍾意啊～同埋雞皮炸到好厚脆，存在感強真係脆卜卜咁。
炒飯正常發揮，粒粒分明幾乾身，諗唔到食咩揀個炒飯幾開胃。反而炸香蕉幾有驚喜，真係炸到金黃好脆，出面又有啲煉奶好香甜。
青木瓜沙律+雞肉碎咖喱炒飯配蛋+炸香蕉
平時食泰國嘢都好鍾意嗌木瓜沙律，比其他沙律爽脆酸甜，加埋啲蝦乾、花生、羅望子調料幾惹味。咖喱炒飯最正係有隻太陽蛋，撈埋蛋漿一齊食真係瞬間清碟。
升級優惠～
+$118升級冬陰功粉絲湯，獨特酸辣風味。
+$138越南牛肉粉，湯底牛味濃郁；另+$58仲有滑嘟嘟嘅牛骨髓。
越南米粉料理Bun Thit Nuong，+$118(剁碎羊肉)/+$108(牛肉)/+$80(雞肉)。撈勻魚露一齊食好有風味。
MAMTOM
地址: 尖沙咀麼地道62號永安廣場地下1-6及45-46號舖
電話: 27213600