踏入春夏，好想望住藍天白雲食個lunch chill吓。喺將軍澳海傍嘅“The Hunter”有室外座位望到大海景，叫杯啤酒真係唔覺唔覺坐半日，想影相就要mark實埋戶外韆鞦位喇。
夏天藍天白雲，坐室外食lunch好放鬆。
韆鞦位好啱影相。
呢度係外籍大廚主打地中海菜，係近年人氣嘅健康菜系之一。因為會將調味料減至最少，主要用天然蔬菜、香料、豆類逼出海鮮、肉扒原始風味，天然健康。而且大廚對食材都好高要求，全部都係嚟自外國，小至一粒番茄都係歐洲直送㗎。
店內環境都好有度假風。
【午市套餐詳情】
Starter 4選1
前菜可以揀是日餐湯，或者有3款沙律揀—Gluten Free、The Hunter Shrimp Salad、Nicoise Salad(+$28)。
Gluten Free
好少見有道菜直接了當叫Gluten Free，而佢真係名副其實Gluten Free，無任何麥類之餘仲集合咗好多superfood，以羽衣甘藍、藜麥、石榴籽、松子、橄欖油、檸檬汁調製出清爽健康沙律。
The Hunter Shrimp Salad
另外一款沙律就有青木瓜、雜錦生菜、大蝦配醬油，青木瓜酸酸甜甜，清新味道有種泰國風味。
Nicoise Salad (+$28)
好鍾意呢度嘅烤吞拿魚只係輕烤外層，入面仲係半熟軟綿綿，配埋車厘茄、迷你生菜、四季豆等好開胃。
Main & Josper Grill 8選1
Casarecce Peperonata$168
午市套餐價錢係依主菜決定，入門價$168就有呢道Casarecce Peperonata。呢款卷意大利麵係南意經典麵款，獨特卷型可以完美包住醬汁。大廚就以烤燈籠椒、車厘茄、白酒蒜蓉汁煮製，每啖都好有口感又唔膩。
Grilled Half Chicken$188
想下晝食得啖啖肉，揀呢道粟飼半隻黃油雞都好抵食，雞皮燒得脆香，一切開即刻滲出雞油肉汁，連埋薯蓉、蒜蓉汁食已經好滿足。
Lamb T-Bone$218
地中海菜好擅長羊料理，如果你食羊嘅話都幾值得一試。T骨羊扒係用燒烤爐Josper Grill燒，可以瞬間鎖住肉汁之餘，羊羶味亦唔重，特別係近骨位肉味更香呀。
Bavette$258
唔想食羊嘅話，可以揀澳洲草飼Flank Steak腹脅扒，係近後腰脊嘅肉位，油花唔多、肉味特濃，好多牛扒fans都鍾意食㗎。大廚特別用慢煮方法處理，令肉質更加軟嫩。
Sea Bream$208
鯛魚一向好嫩又無腥味，好啱下晝想食得輕盈啲。煎鯛魚下面係滿滿甜椒、茄子、番茄，用魚肉蘸埋甜甜酸酸嘅醬汁食好開胃。
The Hunter Burger$268
漢堡係用黑安格斯肉打成，所以比一般漢堡更加重肉味，而且一咬開好有肉汁，連埋半溶雙重芝士—車打芝士、埃文達芝士無得輸～配菜就有生菜、番茄，仲有自家製漢堡醬㗎。
Rump$288
想牛扒啖啖肉，可以揀M5和牛後腿肉牛排。因為後腿肉係經常運動嘅位，所以肉質較紮實、油脂唔多，係食佢嘅濃郁肉味同嚼勁。
21-Day Dry-age Ribeye(300g)$368
“The Hunter”除咗有烤爐，亦自設牛排熟成冷凍櫃，店內可見到擺放一系列由Brandt T骨扒到1855 USDA Prime肉眼扒都有。平時大廚會直接喺冷凍櫃拎出食客點嘅牛排，再放上Josper Grill烤爐即燒即出。估唔到午市都食到21日乾式熟成嘅USDA Prime Ribeye，下晝食得咁正真係會開心全日㗎。
THE HUNTER
地址: 將軍澳唐賢街29號藍塘傲地下11號舖
電話: 23300204